Abalewi8
Ukurobanurwa kwa Aroni n’abahungu biwe
1Uhoraho abwira Mose ati:2“Zana Aroni n’abahungu biwe, imyambaro yabo, amavuta yo kurobanura, ishuri y’ikimazi c’ivyaha, impfizi z’intama zibiri hamwe n’igiseke kirimwo imikate itarimwo umwambiro,3hanyuma ukoranirize ishengero ryose imbere y’Ihema ry’Ibonaniro.”4Nuko Mose akora nk’uko Uhoraho yamubariye, hanyuma ishengero ryose rikoranira ku muryango w’ihema ry’ibonaniro.5Mose abwira ikoraniro ati: “Ibi ni vyo Uhoraho yategetse ko bikorwa.”6Maze Mose azana Aroni n’abahungu biwe araboza n’amazi.7Yambika Aroni wa mwambaro usharijwe n’amabara, amukenyeza n’umukanda, yongera amwambika wa mutamana uri kumwe na efodi, iyo efodi aca arayimukenyeza akoresheje igitambara co gushariza.8Amwambika na ka gafuko ko mu gikiriza hanyuma agashiramwo Urimu na Tumimu.9Amwambika na ca gitambara mu mutwe agishirako ka gasharizo k’inzahabu kameze nk’ishurwe, nk’uko Uhoraho yategetse Mose.10Mose aca yakira ya mavuta yo kurobanura, ayarobanuza rya hema n’ibiri muri ryo vyose.11Amijagira ayo mavuta ku gicaniro incuro indwi, akirobanurira hamwe n’ibindi bikoresho vyaco vyose, na ca gikarabiro n’amaguru yaco na vyo arabirobanura.12Asuka ya mavuta yo kurobanura ku mutwe wa Aroni, amurobanurira igikorwa yatoranirijwe.13Hanyuma azana abahungu ba Aroni, abambika ya myambaro isharijwe n’amabara, abakenyeza ya mikanda, abambika na vya bitambara mu mitwe, nk’uko Uhoraho yabitegetse Mose.14Nuko azana ya shuri y’ikimazi c’ivyaha, Aroni n’abahungu biwe barambika ibiganza vyabo ku mutwe wayo.15Mose aca akerera iyo shuri, afata igice c’amaraso yayo ayasigisha urutoke ku mahembe y’igicaniro kugira ngo agihumanure, ayasigaye ayasuka i ruhande y’igicaniro. Uko ni ko yarobanuye ico gicaniro kugira ngo aceze.16Mose aca afata ibinure vyose bipfutse ivyo mu nda, igice gipfutse igitigu, amafyigo yompi n’ibinure biri kuri yo, abituririra ku gicaniro.17Ariko ibisigaye vy’iyo shuri, urusato n’inyama n’amayezi abituririra hirya y’aho bari bacumbitse, nk’uko Uhoraho yabitegetse Mose.18Aca azana ya mpfizi y’intama y’ikimazi co guturirwa, Aroni n’abahungu biwe barambika ibiganza vyabo ku mutwe wayo.19Mose aca akerera iyo mpfizi y’intama amaraso yayo ayamijagira ku mpande zose z’igicaniro.20Aca afata ya mpfizi y’intama ayihimbaguramwo ibihimba, ivyo bihimba aca abituririra hamwe n’umutwe n’ibinure.21Amaze kwoza n’amazi ivyo mu nda n’amaguru, aca aturirira ya mpfizi y’intama yose ku gicaniro nk’ikimazi co guturirwa, ikimazi kimota neza, ishikanwa rishikaniwe Uhoraho rituriwe n’umuriro, nk’uko Uhoraho yabitegetse Mose.22Hanyuma Mose aca azana ya mpfizi y’intama yindi, imwe yo kurobanura, Aroni n’abahungu biwe bayirambika ibiganza ku mutwe.23Mose aca akerera iyo mpfizi y’intama asiga igice c’amaraso yayo ku gutwi kw’i buryo kwa Aroni, ku rukumu rw’ikiganza c’i buryo no kw’ino rikuru ry’ikirenge c’i buryo.24Mose aca azana n’abahungu ba Aroni abasiga ya maraso ku matwi y’i buryo, ku nkumu no ku mano makuru vy’i buryo, hanyuma aca amijagira ayasigaye ku mpande zose z’igicaniro.25Aca afata ibinure vyo ku murizo, ibinure bipfutse ivyo mu nda, igice gipfutse igitigu, amafyigo yompi n’ibinure biri kuri yo n’itako ry’i buryo.26Hejuru y’ivyo aca ashirako umukate utarimwo umwambiro, umukate ucumbanywe n’amavuta n’akandi gakate gatogato, ayikuye mu giseke c’imikate itarimwo umwambiro kiri imbere y’Uhoraho.27Vyose aca abishira mu biganza vya Aroni n’ivy’abahungu biwe, babishikanira Uhoraho mu kubizunguza nk’uko bigenda mu migenzo yo gushikanira Uhoraho.28Hanyuma Mose abikura mu minwe yabo abituririra ku gicaniro hejuru y’ishikanwa rituririwe kurobanura, ishikanwa rimota neza, rishikaniwe Uhoraho rituriwe n’umuriro.29Mose afata igikiriza arakizunguza agishikiriza Uhoraho. Ico ni co cari igice c’iyo ntama yo kurobanura yari agenewe, nk’uko Uhoraho yari yarabimutegetse.30Hanyuma Mose yakira ku mavuta yo kurobanura no ku maraso ari ku gicaniro abimija Aroni n’imyambaro yiwe yongera abimija abahungu biwe n’imyambaro yabo.31Mose abarira Aroni n’abahungu biwe ati: “Nimuteke inyama zisigaye, muzitekere imbere y’umuryango w’ihema ry’ibonaniro, muzirire aho nyene muzikoze imikate iri muri ca giseke c’imikate y’amashikanwa yo kurobanura, nk’uko nategetse, aho navuga nti: ‘Aroni n’abahungu biwe baze babirye.’32Hanyuma ibisigara kuri izo nyama no kuri iyo mikate biturirwe.33Ntimuze muve ku muryango w’ihema ry’ibonaniro, muze muhamare imisi indwi, kuko kurobanurwa kwanyu kuzomara imisi indwi.34Ivyo twakoze vyose uwu musi, ni vyo Uhoraho yategetse kugira ngo mutangirwe ikimazi c’ivyaha vyanyu.35Muze mugume ku muryango w’ihema ry’ibonaniro ku murango no mw’ijoro gushika imisi indwi iheze, mukore ivyo Uhoraho yategetse kugira ngo ntimupfe, kuko uko ari ko nategetswe.”36Nuko Aroni n’abahungu biwe bakora vyose nk’uko Uhoraho yabibategetse abicishije kuri Mose.Biblica, Inc.