Abalewi2
Ishikanwa ry’ifu
1Nihagira uwushikanira Uhoraho ishikanwa ry’ivyimburwa bivamwo ifu, ishikanwa ryiwe rize ribe iry’ifu inoze neza. Aze ayisukeko amavuta, ashireko n’ibimota neza,2hanyuma ayishire abaherezi bene Aroni. Umuherezi aze ayore ifu yuzuye urushi kuri ya fu inoze neza ivanze n’amavuta hamwe na vya bimota neza, abituririre ku gicaniro kugira ngo ako gace kabe icibutso, ishikanwa rituriwe rimota neza rinezereza Uhoraho.3Ibisigaye kuri iryo shikanwa ry’ibivamwo ifu, ni ivya Aroni n’abahungu biwe; ni igice cejejwe kurusha ibindi mu mashikanwa ashikanirwa Uhoraho yo guturirwa n’umuriro.4Nimwatanga ishikanwa ry’ivyokejwe, rize ribe umukate ucumbwe mw’ifu inoze neza: udukate tutarimwo umwambiro kandi tuvanze n’amavuta ya elayo, canke udukate tutarimwo umwambiro tw’intimba nto tumijagiwe amavuta ya elayo.5Nimba ishikanwa ryawe ari udukate twokejwe kw’ipano, tuze tube dukozwe mw’ifu inoze neza ivanzwe n’amavuta kandi itarimwo umwambiro.6Uzotumanyuremwo utumanyu dutoduto hanyuma udusukeko amavuta; iryo rizoba ari ishikanwa ry’ifu.7Nimba ishikanwa ryawe ritetswe kw’ipano, rize ribe rigizwe n’ifu inoze neza ivanze n’amavuta ya Elayo.8Ishikanwa iryo ari ryo ryose rivuye mu biterwa bivamwo ifu ushikaniye Uhoraho, uzorihe umuherezi, na we azorijana ku gicaniro.9Aze akureko igice c’icibutso agituririre ku gicaniro nk’ishikanwa ryo guturirwa, ritanzwe biciye mu guturirwa, ishikanwa rimota neza rinezera Uhoraho.10Ibisigaye kuri iryo shikanwa ry’ibivamwo ifu, ni ivya Aroni n’abahungu biwe; ni igice cejejwe kurusha ibindi mu mashikanwa ashikanirwa Uhoraho yo guturirwa n’umuriro.11Ishikanwa ryose rivuye mu vyimburwa bivamwo ifu muzoshikanira Uhoraho rize ribe ritarimwo umwambiro, kuko mudakwiye guturira umwambiro canke ubuki mw’ishikanwa mushikaniye Uhoraho.12Ivyo muzoshobora kubishikanira Uhoraho nk’amashikanwa y’ivyeze imbere y’ibindi, atari amashikanwa atuririwe ku gicaniro nk’ikimazi kimota neza.13Muze murunge umunyu mu mashikanwa yanyu yose avuye mu vyimburwa. Ntimuze mwibagire gushiramwo umunyu kuko umunyu werekana isezerano riri hagati y’Imana yanyu namwe. Muze mushiremwo umunyu mu mashikanwa yanyu yose avuye mu vyimburwa bivamwo ifu.14Nimwashikanira Uhoraho amashikanwa avuye mu vyimburwa bivamwo ifu vyimbuwe ubwa mbere, muze mufate imikama y’ingano mukuye mu mirima, muzotse ku muriro, hanyuma intete zazo muzisye.15Muze mwongereko amavuta n’ibimota neza; rizoba ribaye ishikanwa rivuye mu vyimburwa bivamwo ifu.16Umuherezi aze akureko igice c’icibutso, agituririre hamwe na ya mavuta na vya bimota neza, iryo ni ishikanwa rishikaniwe Uhoraho ku gicaniro.Biblica, Inc.