Abacamanza17
Ibigirwamana vya Mika
1Hariho umugabo yitwa Mika yava mu karere k’imisozi ya Efurayimu.2Umusi umwe abarira nyina wiwe ati: “Narumvise uvuma uwakwivye shekeli igihumbi n’ijana z’ifeza. Ni jewe nazivye, ni jewe ndazifise.”Nyina amwishura ati: “Uhoraho aguhezagire, mwana wanje.”3Amugarukaniye za shekeli igihumbi n’ijana z’ifeza, nyina aca avuga ati: “Izi feza ndazeguriye Uhoraho ku bw’umuhungu wanje kugira ngo zikorwemwo igishushanyo n’ikigirwamana cometseko ifeza. Nzoheza ndabiguhe bibe ivyawe.”4Mika aca asubiza ya mahera nyina wiwe, na we aca akuramwo shekeli amajana abiri aziha umucuzi, na we azicuramwo igishushanyo n’ikigirwamana, baca babishira mu nzu kwa Mika.5Mika yari afise akazu asengeramwo, aca akoresha efodi n’ibindi bishushanyo, agena n’umuhungu wiwe ngo abe umuherezi wiwe.6Muri ico gihe Abisirayeli nta mwami bari bafise, umuntu wese yakora ibintu uko avyumva.7Umusi umwe haza umusore w’Umulewi avuye i Betelehemu i Buyuda, yabaye mu muryango wa Yuda,8ava i Betelehemu arondera aho yoba. Ari ku rugendo ni ho yashika kwa Mika, mu ntara y’imitumba mu gihugu ca Efurayimu.9Mika aramubaza ati: “Uva he?”
Aramwishura ati: “Ndi Umulewi w’i Betelehemu i Buyuda. Ndiko ndondera aho noba.”10Mika aramubwira ati: “Bana natwe, ube umuherezi wa data, nzoguhemba shekeli icumi ku mwaka, ndakwambike nongere ndakugaburire.”11Wa Mulewi aca aremera kubana na we, maze uwo musore aca aba nk’umwe mu bahungu biwe.12Mika agira uwo Mulewi umuherezi wiwe, aba mu nzu yiwe.13Mika aravuga ati: “Noneho menye ko Uhoraho azobana nanje, ko ndonse umuherezi w’Umulewi.”
Biblica, Inc.