Ezekiyeli39
1“Mwana w’umuntu, vugishwa kuri Gogi uti: ‘Uku ni ko Uhoraho Nyeninganji avuze: Ngiye kukugwanya yewe Gogi, umutware mukuru w’i Mesheki n’i Tubali.2Nzoguhindukiza ndagukwege, ndakuzane ngukuye kure mu buraruko, nkurungike ku misozi ya Isirayeli.3Nzovunagura umuheto wawe uri mu kuboko kw’ukubamfu, imyampi ikoragurike iva mu kuboko kw’i buryo.4Muzogwa ku misozi ya Isirayeli, mwe n’ingabo zawe n’amahanga yose. Nzobagaburira ibisiga n’ibikoko vyo mw’ishamba bibarye.5Muzogwa mu gahinga, kuko ari ko jewe Uhoraho Nyeninganji ndabivuze.6Nzokororera umuriro kuri Magogi hamwe no ku bantu bibereye impore mu mazinga, ni ho bazomenya ko jewe ndi Uhoraho.7Izina ryanje nzorigira Rurangiranwa mu Bisirayeli. Sinzokwemera ko izina ryanje risubira gutukwa, kandi amahanga azomenya ko jewe Uhoraho ndi Uwera wa Isirayeli.8Ivyo birashitse! Nta kabuza bizoba, ni ko jewe Uhoraho Nyeninganji mvuze. Uwo ni wo musi nari naravuze.9Maze ababa mu bisagara vya Isirayeli bazosohoka begeranye ibigwanisho vyabo babikoreshe nk’inkwi: uri inkinzo ntonto na nininini, imiheto n’imyampi, inkoni n’amacumu. Bazobicana imyaka indwi.10Ntibazosubira kuja gusenya canke ngo bicire ibiti mw’ishamba, kuko bazokoresha ivyo bigwanisho nk’inkwi. Bazonyaga abari barigeze kubanyaga, basahure abigeze kubasahura, ni jewe Uhoraho Nyeninganji ndabivuze.11Uwo musi Gogi nzomwimbira imva muri Isirayeli, mu kiyaya kirimwo inzira y’abava mu Buseruko baja ku Kiyaga. Iyo mva izozibira inzira y’abarengana, kuko Gogi n’amasinzi y’ingabo ziwe bazohambwa aho. Hazokwitwa Ikiyaya ca Hamoni Gogi.12Abisirayeli bazomara amezi indwi babahamba, kugira ngo basukure igihugu cabo.13Abantu bose muri Isirayeli bazokoranira kubahamba, kandi uwo musi nzokwerekanirako icubahiro canje uzoba umusi w’intibagirwa, ni jewe Uhoraho Nyeninganji ndabivuze.14Abantu bazohabwa igikorwa co kuguma basukura igihugu. Bazoguma banyuragirana mu gihugu, hanyuma bari kumwe n’abandi, bazohamba imivyimba yandagaye hasi.15Abo bantu bazonyuragira mu gihugu, aho bazobona ibisigarira vy’umuntu hose bahashire ikimeyetso kugira ngo abahamba bazobahambe mu kiyaya ca Hamoni Gogi.16Hazobaho n’igisagara citwa Hamona, bisigura “amasinzi”. Uko ni ko bazohumanura ico gihugu.17Mwana w’umuntu, uku ni ko jewe Uhoraho Nyeninganji mvuze: Hamagara ibisiga vyose vyo mu kirere n’ibikoko vyose vyo mw’ishamba, ubibwire uti: Nimukorane muvuye mu mihingo yose, muze ku kimazi nabateguriye, ikimazi gihambaye kiri ku misozi ya Isirayeli. Muzoriraho inyama munywereho n’amaraso.18Muzorya inyama z’abagabo bahambaye, munywe n’amaraso y’abatware b’isi nk’aho ari amapfizi y’intama canke imyagazi y’intama, impene canke amapfizi y’inka vyororewe i Bashani.19Kuri ico kimazi ndiko ndabategurira, muzorya inyama zibaduhire, mwongere munywe amaraso gushika muborerwe.20Kuri ayo mazimano nzobaha, muzohaga inyama z’amafarasi n’abayagenderako, abahizi hamwe n’ingabo z’ubwoko bwose, ni jewe Uhoraho Nyeninganji ndabivuze.21Nzokwerekana icubahiro canje ku mahanga, kandi abantu bose bazobona uguhana kwanje, babone n’ububasha naberekanyeko.22Uhereye uwo musi, Abisirayeli bazomenya ko ndi Uhoraho Imana yabo.23Kandi amahanga azomenya ko ubwoko bwa Isirayeli bwigeze gutwarwa mu kinyago kuko bancumuyeko. Vyatumye ndabanyegeza mu nyonga hanje, ndabarekurira mu maboko y’abansi babo, babamarisha inkota.24Nabishuye ibihwanye n’ukwononekara kwabo hamwe n’ivyaha vyabo, maze ndabanyegeza mu nyonga hanje.25None rero uku ni ko jewe Uhoraho Nyeninganji mvuze: Ngiye gukura Yakobo mu kinyago, ngirire impuhwe ubwoko bwose bwa Isirayeli, kandi nzogirira ipfuhe izina ryanje ryera.26Bazokwibagira ibimaramare n’isoni, no kubura ubwizigirwa mu vyo bankoreye, igihe baba ata nkomanzi mu gihugu cabo ata wubatera ubwoba.27Ninamara kubagarukana ndabakuye mu mahanga, nkabegeranya ndabakuye mu bihugu vy’abansi babo, nzokwerekana ukwera kwanje nciye kuri bo imbere y’amahanga menshi.28Ni ho bazomenyera ko ndi Uhoraho Imana yabo, kuko n’aho nabarungitse mu kinyago mu yandi mahanga, nzobegeraniriza mu gihugu cabo, ata n’umwe nsize inyuma.29Sinzoba nkibanyegeza mu nyonga hanje, kuko nzosuka Mpwemu wanje ku Bisirayeli, ni jewe Uhoraho Nyeninganji ndabivuze.’ ”
Biblica, Inc.