Esiteri6
Moridekayi ashirwa hejuru
1Muri iryo joro umwami abura itiro; nuko ategeka ko bamuzanira ibitabu bandikamwo ibigenda biraba, ivyo banditse vyabaye ku ngoma yiwe, ategeka ko babizana bakabimusomera.2Bashikira ahantu handitswemwo ingene Moridekayi yatanze inkuru ivuga ko inkone zibiri Bigitana na Tereshi, bacungera irembo, bari bagiye inama yo kwica umwami Ahasuwerusi.3Umwami aca abaza ati: “Mbega ni ikihe cubahiro n’ishimwe Moridekayi yahawe ku bw’ivyo?”Abakozi biwe bamwishura bati: “Nta na kimwe yahawe.”4Umwami aca avuga ati: “Ni nde ari ngaho mu rugo?” Hamani yari yinjiye ashitse mu rugo rw’ikirimba aje kubwira umwami ivyerekeye kumanika Moridekayi ku giti yari yamushingiye.5Abakozi bamwishura bati: “Hamani ni we ahagaze mu rugo.”
Umwami aca ategeka ati: “Nimumwinjize.”6Hamani yinjiye, umwami aramubaza ati: “Mbega umuntu umwami agomvye guha icubahiro yomukorera iki?”
Maze Hamani ariyumvira ati: “Hari uwundi muntu umwami yoba agomba guha icubahiro atari jewe?”7Nuko yishura umwami ati: “Umuntu umwami ashimye guha icubahiro,8bomuzanira impuzu y’ubwami umwami yahoze yambara, bakazana n’ifarasi umwami yagendeyeko, imwe yambaye urugori rw’ubwami ku mutwe.9Hanyuma iyo mpuzu n’iyo farasi bakabiha umwe mu baganwa arusha abandi gutona ku mwami. Hanyuma boca bambika ya mpuzu uwo muntu umwami ashimye guha icubahiro, bakamwicarika kuri ya farasi bakamutembereza mu mabarabara yo mu gisagara, basemerera imbere yiwe bati: ‘Uku ni ko uwo umwami agomvye guha icubahiro agirirwa!’ ”10Umwami aca ategeka Hamani ati: “Genda wihuta, wakire iyo mpuzu n’iyo farasi ukorere ivyo uvuze Moridekayi Umuyuda, yicaye ku kirimba c’umwami. Ntihagire na kimwe ukuramwo mu vyo wavuze.”11Nuko Hamani yakira ya kanzu na ya farasi. Yambika Moridekayi amushira kuri ya farasi amuja imbere amutembereza mu mabarabara yo mu gisagara, agenda arasemerera ati: “Uku ni ko uwo umwami ashimye guha icubahiro agirirwa!”12Inyuma y’ivyo Moridekayi agaruka ku kirimba c’umwami. Ariko Hamani yihuta kuja iwe, yicurikiriye yipfutse mu mutwe,13aca abwira Zereshi umugore wiwe n’abagenzi biwe ivyamubayeko vyose.
Abahanuzi biwe n’umugore wiwe Zereshi baramubwira bati: “Nimba Moridekayi, uwo utanguye gucishwa bugufi imbere, ari Umuyuda, ntuzomushobora. Mbere uzokomeza inzira yo kugesezwa imbere yiwe!”14Bakiriko baravugana na we, inkone y’umwami irashika yihutisha Hamani ngo anyaruke aje ku mazimano Esiteri yari yateguye.
Biblica, Inc.