2 Samweli1
Dawidi abwirwa ko Sawuli yapfuye
1Sawuli amaze gupfa, Dawidi aragaruka avuye kunesha Abamaleki aca aguma i Zikulagi imisi ibiri.2Ku musi ugira gatatu umuntu umwe araza avuye mu ngabo za Sawuli, yitabaguriyeko impuzu yisuriyeko ivu mu mutwe. Ashitse aho Dawidi ari, aramwunamira ashitsa umutwe hasi mu kumuha icubahiro.3Dawidi aramubaza ati: “Uvuye he?”Aramwishura ati: “Ncitse kw’icumu mva aho Abisirayeli bari bacumbitse.”4Dawidi aramubaza ati: “Vyagenze gute? Mbarira.”
Aramwishura ati: “Ingabo z’Abisirayeli zahunze ku rugamba. Benshi bapfuye. Na Sawuli n’umuhungu wiwe Yonatani bapfuye.”5Maze Dawidi abwira wa musore amuzaniye inkuru ati: “Ni igiki cakumenyesheje ko Sawuli n’umuhungu wiwe Yonatani bapfuye?”6Wa musore ati: “Nari ku musozi Gilibowa, maze mbona Sawuli yishimikije icumu ryiwe, kandi azigirijwe n’imikogote n’abagendera ku mafarasi.7Ahindukiye arambona, arampamagara, nanje ndamwishura nti: ‘Nogukorera iki?’8Arambaza ati: ‘Uri nde?’
Ndamwishura nti: ‘Ndi Umwamaleki.’9Arambwira ati: ‘Egera hano unyice! Nta co ngisigaje, naho nkiri muzima.’10Nuko ndamwegera ndamuhohosha, kuko nabonye ko atari gukira. Maze nca mfata urugori rwari ku mutwe wiwe n’ikidede cari ku kuboko kwiwe nca ndabizanira databuja hano.”11Nuko Dawidi n’abo bari kumwe bitaburirako impuzu.12Bararira baraboroga barisonzesha gushika ku mugoroba ku bwa Sawuli n’umuhungu wiwe Yonatani, n’ingabo zose z’Uhoraho n’ab’inzu ya Isirayeli bose, kuko bishwe n’inkota.13Dawidi abwira wa musore yamuzaniye inkuru ati: “Uturuka he?”
Arishura ati: “Ndi umuhungu w’inyambukira, Umwamaleki.”14Dawidi aramubaza ati: “Ni kuki watinyutse kwica uwo Uhoraho yarobanuje amavuta?”15Maze Dawidi ahamagara umwe mu bantu biwe ati: “Genda umwice!” Nuko aragenda aramwica.16Kuko Dawidi yari yamubwiye ati: “Amaraso yawe aje ku gatwe kawe. Akanwa kawe ni ko kakwagirije igihe wivugira uti: ‘Nishe uwo Uhoraho yarobanuje amavuta.’ ”
Dawidi acura intimba ku bwa Sawuli na Yonatani
17Nuko Dawidi acura intimba ku bwa Sawuli n’umuhungu wiwe Yonatani,18aca ategeka abantu b’i Buyuda ngo bigishwe iyo ndirimbo yo gucura intimba y’umuheto (kandi yanditse mu gitabu ca Yashari). Aravuga ati:19“Iteka n’umunezero vyawe, yewe Isirayeli, birambaraye ku misozi.Ese ukungene abahizi bawe bapfuye!20Ntimubibwire ab’i Gati,ntimuvyamamaze mu mabarabara y’i Ashikeloni,kugira ngo abakobwa b’Abafilisitiya ntibanezerwe,kugira ngo abakobwa b’izo ntakebwa ntibahimbarwe.21Yemwe misozi y’i Gilibowa,ntimukongere kugira urume canke imvura,canke ngo mugire imirima ishobora kwera ingano.Kuko kuri mwebwe ari ho inkinzo z’abahizi zahumaniye.Inkinzo ya Sawuli ntizosubira gusigwa amavuta.22Amaraso adasesetse,abahizi batarashwe,umuheto wa Yonatani ntiwigera usubira inyuma,kandi n’inkota ya Sawuli ntiyagaruka idakoze igikorwa cayo.23Sawuli na Yonatanibakiriho barakundwa canekandi no mu rupfu ntibatandukanye.Banyaruka kurusha inkona,bari bakomeye kurusha intambwe.24Yemwe bakobwa ba Isirayeli,nimuririre Sawuli,yabambika impuzu nziza z’igiciro,yashariza impuzu zanyu n’ibisharizo vy’inzahabu.25Ese ukuntu abahizi baguye mu ntambara!Yonatani umuvyimba wiwe urambaraye ku misozi.26Ndababaye ku bwawe, Yonatani muvukanyi;wari uw’igiciro kuri jewe.Urukundo wankunda rwari igitangaza,rwari igitangaza kurusha urw’abagore.27Ewe kuntu abahizi baguye ku rugamba!Ibigwanisho vy’intambara vyasambuwe!”Biblica, Inc.