1 Ngoma21
Dawidi aharura ingabo bimuzanira igihano
1Maze Satani ahagurukira Abisirayeli aca yosha umutima wa Dawidi ngo aharure Abisirayeli bose.2Nuko Dawidi abwira Yowabu n’intwazangabo ati: “Genda muharure Abisirayeli kuva i Berisheba gushika i Dani. Muce mumbwira kugira ngo menye igitigiri cabo.”3Ariko Yowabu amwishura ati: “Uhoraho arakagwiza ingabo ziwe incuro ijana. Mwami wanje, mbega bose si abasavyi bawe? None ni iki gitumye umwami wanje akora atyo? Ni igiki cotuma uteza Abisirayeli kubonekako icaha?”4Ariko ijambo ry’umwami riremera Yowabu; maze Yowabu ava imbere yiwe aca akwiragira mu Bisirayeli bose aca agaruka i Yerusalemu.5Yowabu ashikiriza Dawidi igitigiri c’abantu baja ku rugamba. Muri Isirayeli hari umuliyoni umwe n’ijana b’ababahizi bazi kugwanisha inkota, mu Buyuda na ho ibihumbi amajana ane na mirongo indwi.6Ariko Yowabu ntiyashiramwo Abalewi n’Ababenyamini mu guharura, kuko atashaka gukora iryo tegeko ry’umwami.7Kandi iryo tegeko ntiryanezereje Imana; ivyo bituma ihana Abisirayeli.8Nuko Dawidi abwira Imana ati: “Nacumuye cane ku bw’ico kintu nakoze. None rero, ndakwinginze, unkureko icaha canje jewe umusavyi wawe. Nakoze ivy’ubupfu rwose.”9Uhoraho abwira Gadi, uwerekwa wa Dawidi ati:10“Genda ubwire Dawidi uti: ‘Uku ni ko Uhoraho avuze: Ndaguhaye ibintu bitatu. Hitamwo kimwe nzoguhanisha.’ ”11Nuko Gadi aja kwa Dawidi aramubwira ati: “Uku ni ko Uhoraho avuze: ‘Hitamwo kimwe:12imyaka itatu y’inzara, amezi atatu uneshwa n’abansi aho inkota y’abansi banyu izobashikako, canke imisi itatu y’inkota y’Uhoraho; imisi y’ikiza mu gihugu, aho umumarayika w’Uhoraho azokwica abantu mu bice vyose vya Isirayeli.’ None rero, hitamwo hanyuma umbwire ico nishura uwantumye.”13Dawidi abwira Gadi ati: “Ndi n’umubabaro mwinshi. Reka mpfume ngwa mu maboko y’Uhoraho, kuko imbabazi ziwe ari nyinshi; ariko singwe mu maboko y’abantu.”14Nuko Uhoraho arungika ikiza mu Bisirayeli, abantu ibihumbi mirongo indwi vy’Abisirayeli barapfa.15Maze Imana ituma umumarayika ngo arandure Yerusalemu. Ariko igihe uwo mumarayika yariko arabikora, Uhoraho arabiraba ababazwa n’ico cago aca abwira uwo mumarayika yariko aratikiza abantu ati: “Geza aho! Garukana ukuboko kwawe.” Umumarayika w’Uhoraho yari ahagaze ku mbuga yo kugosorerako ingano ya Orunani Umuyebusi.16Dawidi aravye hejuru abona wa mumarayika w’Uhoraho ahagaze hagati y’isi n’ijuru, afise inkota iri mu kuboko kwiwe ibanguye kuri Yerusalemu. Nuko Dawidi n’abakuru muri Isirayeli, baca bambara amagunira bubama hasi.17Dawidi abwira Imana ati: “Mbega si jewe nategetse ko baharura ingabo? Ni jewe nacumuye nkora ibidakwiye. Aba bo ni intama gusa. None bakoze iki? Yewe Uhoraho Mana yanje, ukuboko kwawe niguhane jewe n’umuryango wanje, ariko iki kiza ntikigume mu bantu bawe.”Dawidi yubaka igicaniro
18Maze umumarayika w’Uhoraho ategeka Gadi kubwira Dawidi ngo aduge yubakire Uhoraho igicaniro ku mbuga yo kugosorerako ingano ya Orunani Umuyebusi.19Nuko Dawidi araduga yubashe iryo jambo Gadi yamubwiye mw’izina ry’Uhoraho.20Mu gihe Orunani yariko aragosora ingano, ahindukiye abona wa mumarayika; maze abahungu biwe bane bari kumwe na we biruka kwinyegeza.21Maze Dawidi arashika, Orunani yunamuye amaso aramubona, aca ava kuri ya mbuga yo kugosorerako yunama imbere ya Dawidi, ashika hasi.22Dawidi aramubwira ati: “Numpe iki kibanza c’imbuga yawe kugira ngo ndahubakire Uhoraho igicaniro, maze ikiza kiri mu bantu gihagarare. Ndahakugurira ku giciro bikwiranye.”23Orunani abwira Dawidi ati: “Hashikire! Umwami wanje nahakoreshe ico ashaka cose. Ehe, ndatanga n’impfizi z’ikimazi co guturirwa n’umuriro, imihini yo gusekura ingano ndayitanze ngo ibe inkwi, n’ingano na zo ngo zibe ishikanwa ry’ifu. Ivyo vyose ndabiguhaye.”24Ariko umwami Dawidi yishura Orunani ati: “Oya, ndakwinginze unyemerere ndakurihe igiciro bikwiranye. Sinshobora gushikanira Uhoraho ibintu vyawe, canke ngo nshikane ikimazi co guturirwa ata co ndakiguze.”25Nuko Dawidi ariha Orunani shekeli amajana atandatu vy’inzahabu ku bw’ico kibanza.26Dawidi yubakira Uhoraho igicaniro aho nyene aca ashikana ibimazi vyo guturirwa n’ivy’ishimwe. Yambaza Uhoraho, maze Uhoraho na we aramwishura, amanura umuriro uvuye mw’ijuru uza kuri ca gicaniro c’ibimazi vyo guturirwa.27Nuko Uhoraho avugana na wa mumarayika, asubiza inkota yiwe mu rwubati.28Muri ico gihe, Dawidi abonye ko Uhoraho yishuye isengesho ryiwe kuri ya mbuga yo kugosorerako ingano ya Orunani Umuyebusi, aca atangiraho ibimazi.29Ihema ry’Uhoraho, iryo Mose yari yarubatse mu bugaragwa, n’igicaniro co guturirirako ibimazi vyari mw’itaba ry’umusozi i Gibeyoni.30Ariko Dawidi ntiyashoboye kujayo ngo asiguze Imana, kuko yari yatekewe n’ubwoba igihe yabona ya nkota y’umumarayika w’Uhoraho.Biblica, Inc.