Luka8
O romnja so džana palo Isus
1Palo adava, o Isus počmingja te džal ko gradija hem ko gava hem te propovedinel o evangelije bašo o carstvo e Devleskoro. A leja gele o dešuduj učenikija2hem nesave romnja so sine sasljarde taro lošna duhija hem taro nasvalipa: I Marija taro Magdala so latar ikalgja efta demojna,3i Joana, i romni e Huzaeskiri, so sine upravniko ko Irod, i Suzana hem but javera. Akala romnja pomožinena sine pumare parencar le hem leskere učenikon.I parabola bašo sejači
4Koga khedinge pe uza ko Isus bari gužva taro but gradija, ov vakergja lenge jekh parabola:5“Iklilo jekh sejači te sejnel. Dži kote sejnela sine o seme, nesavo seme pelo lestar ko drumo, sine gazimo hem o čirikla sa hale o seme.6Nesavo seme pelo ko than kote so sine hari phuv a poviše bara, i koga barilo, šukilo adaleske so na sine le pani.7I nesavo seme pelo maškar o kare, i koga barile, o kare zagušinge le.8A nesavo seme pelo ki šukar phuv, barilo hem angja šel puti poviše taro adava so sine sejmo.”I vakergja lenge: “Kas isi kana neka šunel!”
Soske o Isus vakerela ko parabole
9Togaš leskere učenikija pučle le te objasninel lenge i parabola.10A o Isus odgovoringja: “Tumenge i dendo te džanen o tajne taro carstvo e Devleskoro, a javerenge vakerava ko parabole, te šaj:‘Jakhencar te dikhen, a te na pendžaren,hem kanencar te šunen ama te na svatinen.’11A akaja parabola značinela: o seme tano o lafi e Devleskoro.12Okova seme soj ko drumo tane adala so šunena o lafi e Devleskoro, i togaš avela o Beng hem čorola adava soj tano ko lengoro srce, te šaj te na verujnen hem te na oven spasime.13A okova seme soj sejmo ko poviše bara a pohari phuv tane adala, so koga šunena o lafi e Devleskoro odma priminena le so radost, ama nane len koreno. Ola nesavo vreme verujnena, ama koga avela o iskušenie perena tari vera.14A okova seme so pelo ko kare tane okola manuša so šunge o lafi e Devleskoro, ama dži kote džana ko pumaro drumo, zagušinena pe taro sekiracije akale životoskere, taro barvalipe hem taro zadovolstvo, i na dena šukar plodi.15A okova seme so pelo ki šukar phuv tane okola manuša so šunena o lafi e Devleskoro hem ikerena le ko šukar hem čisto srce sa dži kote na anena šukar plodi.”
I parabola baši svetlina
16“Nikoj na tharela momoli te učharel la čareja, ili te čhivel la telo kreveti, nego čhivela la ko lakoro than te šaj te dikhen i svetlina adala so khuvena.17Adaleske, sa soj garavdo, ka dikhol; sa soj tajno, ka šungjol.18Adaleske pazinen sar šunena. Soske, kas so isi le, leske ka del pe panda poviše; a kas nane, lestar ka lel pe adava da so isi le!”Koj tani e Isuseskiri familija
19A e Isuseskiri daj hem leskere phrajla ale te dikhen le, ama tari bari gužva našti sine avena dži leste.20Togaš nekoj phengja e Isuseske: “Ti daj hem te phrajla tergjona avrijal hem mangena te dikhen tut.”21A o Isus vakergja: “Mi daj hem me phrajla tane okola so šunena hem kerena o lafi e Devleskoro.”O Isus smirinela i bura
22Jekh dive o Isus phengja pe učenikonge: “Te nakha tari okoja strana taro ezero!”I uklinge ko čamco hem cidinge.23Dži kote plovinena sine, o Isus zasukja. I astargja jekh silno bura upro ezero. Adaleja so o čamco počmingja te phergjol pani hem ola sine ki bari opasnost.24O učenikija gele ko Isus hem vazdinge le vakerindor: “Učitele, učitele ka tasavgjova!”
O Isus uštilo hem zapovedingja e bavlalake hem e ezeroske te ačhon, a i bura ačhili hem sine tišina.25Togaš ov pučlja e učenikon: “Kaj tani tumari vera?”
A ola darandile hem čudinge pe, i pučle pe maškar peste: “Koj tano akava, so i bavlal da hem o talasija da šunena le?”
O Isus ikalela demonen taro manuš
26O Isus hem leskere učenikija resle ki Gadarinsko phuv, soj tano tari okoja strana taro Galilejsko ezero.27A koga o Isus iklilo ko kopno, alo angli leste jekh manuš taro gradi so sine opsednimo demonencar. But vreme akava manuš na phiravela sine šeja hem na živinela sine ko kher, nego živinela sine ko grobija.28I koga dikhla e Isuse, pelo anglo leskere pre hem vikingja sa pe glasoja: “So mangeja mandar, Isuse, Čhavo e Najbare Devleskoro? Molinava tut, ma mučin man!”29(Adaleske so o Isus više naredingja e lošno duhoske te iklol taro manuš. But puti sine napadimo taro lošno duho, hem ako sine phandle leskere vasta hem leskere pre lanconcar hem sine arakhlo taro čuvajra, o manuš čhinela sine o lancija hem o demoni legarela le sine ko čuče thana.)30A o Isus pučlja le: “Sar vikineja tut?”Ov vakergja leske: “Legija”, soske but demojna khuge ki leste.31I but molinge e Isuse te na zapovedinel lenge te džan ki Bezdna.32A adathe ko rido sine but bale so hana sine, i o demojna molinge e Isuse te mukhel len te khuven ko bale. I ov mukhla len.33Togaš o demojna iklile taro manuš hem khuge ko bale. I o bale prastandile taro brego ko ezero hem adathe taslile.34Koga okola so arakhena sine e balen dikhle so ulo, našle hem vakerge ko celo gradi hem ko gava.35Togaš o manuša iklile te dikhen so ulo. Koga ale ko Isus dikhle e manuše so sine le legija demojna, sar bešela uravdo hem sasto vesto e Isuseja, hem ola darandile.36A adala manuša so dikhle adava so ulo, vakerge javerenge sar o Isus sasljargja e manuše so sine opsednimo demonencar.37I sa o manuša tari Gadarinsko phuv molinge le te džal peske lendar, soske uklingja len dar. Togaš o Isus khugja ko čamco hem irangja pe palal.38A o manuš so o Isus ikalgja lestar o demojna, molingja le te džal leja, ama o Isus bičhalgja le vakerindor:39“Iran tut khere hem vaker sa so kergja tuke o Devel.”
I o manuš gelo peske hem vakergja sarinenge ko gradi so kergja leske o Isus.
O Isus vazdela e čhaja taro mule hem sasljarela e nasvale romna
40Koga o Isus irangja pe ki okoja strana taro ezero, but manuša sine radosno so dikhle so avela, soske sarinen adžikerena le sine.41Togaš alo ko Isus jekh manuš so vikinela pe sine Jair, so sine vodači ki sinagoga. Ov pelo anglo pre e Isuseskere hem molinela le sine te avel leste ko kher.42Adaleske so e Jaire sine le jekh čhaj, so sine la dešuduj berš hem sine meribaja jekh.Dži kote o Isus džala sine palo Jair, but manuša gurinena pe sine upro leste.43Maškar lende sine jekh nasvali romni, so dešuduj berš thavdela sine latar rat. Oj trošingja sa so sine la ko doktori, ama nikoj našti sine te sasljarel la.44Oj ali palo Isus hem pipingja le ko krajo taro leskere šeja, i odma ačhilo o rat te thavdel latar.45A o Isus pučlja: “Koj pipingja man?”
Sekoj lendar phenge: “Na sijum me.” A o Petar phengja leske: “Učitele, sar te džana koga but džene khedinge pe hem gurinena pe upro tute.”46A o Isus vakergja leske: “Nekoj pipingja man. Osetingjum deka iklili mandar sila.”47Togaš i romni dikhla deka našti garavela pe, tresindor tari dar ali hem peli mujeja anglo leskere pre hem vakergja anglo sa o manuša soske pipingja le hem sar odma saslili.48A o Isus phengja lake: “Mi čhaj, ti vera sasljargja tut! Dža tuke mireja.”49Dži kote kerela sine lafi o Isus, alo nesavo manuš taro kher e Jaireskoro, o vodači e sinagogakoro hem vakergja leske: “Ti čhaj muli; ma dosadin više e učitele.”50Koga šungja akava o Isus vakergja e Jaireske: “Ma dara! Samo verujn hem oj ka ovel sasti.”51I koga resla o Isus ko kher e Jaireskoro, nikas na mukhla te khuven leja, osven e Petare, e Jovane e Jakove hem e čhajakere dade hem e daja.52A sarinen so sine ko kher, rovena sine hem tugujnena palo late.
A o Isus phengja: “Ma roven! Oj nane muli, nego sovela.”53I ola asandile leske soske džange deka tani muli.54A o Isus gelo hem astargja la taro vas hem vakergja: “Čhaje, ušti!”55I lakoro duho irangja pe ki late hem oj odma uštili. Togaš o Isus vakergja te den la te hal.56Lakoro dad hem lakiri daj sine but čudime, ama o Isus zapovedingja lenge ma te vakeren nikaske so ulo.
The Word for the World International