2 Timotej2
O šukar vojniko e Isuse Hristoskoro
1A tu mo čhavo, ov silno ki blagodat soj ko Isus Hristos.2Hem sa so šungjan mandar anglo but svedokija, de le verno manušenge, so ka oven sposobna javeren te sikaven.3Ov mancar ko pharipe, sar šukar vojniko e Isuse Hristoskoro.4Nijekh so služinela sar vojniko, na mešinela pe ko javera bukja, nego trudinela pe te ugodinel pe narednikoske.5Agjar hem sekoj so natprevarinela pe, na dobinela i pobedničko kruna osven ako na natprevaringja pe spored o pravila.6O rabotniko so mučinela pe ki niva trebela te ovel o prvo so ka le po delo taro plodija e žetvakere.7Razmislin bašo akava so vakerava, soske o Gospodari ka del tut te svatine sa akava.8Setin tut ko Isus Hristos, so uštilo taro mule, taro seme e Davideskoro. Adavaj mo evangelije so propovedinava,9bašo akava but cidava doborom ko asavko stepen so sijum lanconcar phandlo sar lošno kriminalco. Ama e Devleskoro lafi nane phandlo ko lancija.10Adaleske sa trpinava bašo o birime manuša, te šaj ola da te dobinen o spasenije soj ko Isus Hristos, e večno slavaja.11Akje jekh čačutno lafi:Te mulem leja,hem leja ka živina.12Te trpingjem leja,hem leja ka vladina.Te otkažingjem amen lestar,hem ov ka otkažinel pe amendar.13Te na sijem verna,ov ačhola verno,adaleske so ov našti te otkažinel pe korkori pestar.
Sikav tut sar šukar rabotniko
14Podsetin e Devleskere manušen ko akala bukja. Opomenin len anglo Devel te na akošen pe lafencar, adaleske so nane korist adalestar hem samo uništinela okolen so šunena.15De sa tutar te sikave tut anglo Devel sar dostojno manuš, sar rabotniko so na trebela te ladžal hem ispravno te objasninel o lafija e čačipaskere.16Naš taro bidevleskere hem čuče lafija, soske okola so mukhena pe ki lende ovena podur e Devlestar.17Lengoro učibe ka širinel pe sar gangrena. Maškar lende tane o Imenej hem o Filit,18kola so cidinge pe taro čačipe. Ola vakerena deka o uštibe taro mule više ulo, hem agjar peravena javerengiri vera.19Ama e Devleskoro zoralo temeli ačhola hem upro leste tano pišimo akava: “O Gospodari pendžarela okola soj tane leskere” hem “Neka ciden pe taro lošnipe sekoj so vakerela deka tano e Gospodareskoro.”20Ko barvalo kher nane samo zlatna hem srebrena čare, nego hem kaštunale hem phuvjale; nesave lendar bašo posebno koristiba, a nesave bašo obično koristiba.21Okola so ka čistinen pe taro lošnipe, ka oven čare bašo posebno koristiba, posvetime hem korisna pumare Gospodareske hem spremna bašo sekova jekh šukar delo.22Naš taro lošna želbe e ternengere hem dža pali pravednost, vera, mangipe hem mir, zaedno okolencar so vikinena taro čisto srce e Gospodare.23Cide tut taro glupava hem čuče muabetija, soske džaneja deka ola anena akošibe.24A e Gospodareskoro sluga na trebela te ovel kavgadžija, nego trebela te ovel ljubezno sarinencar, sposobno te sikavel, a na sigate te holanel.25Trebela krotko te sikavel okolen soj tane protiv leste, ki nada deka o Devel ka del len te pokajnen pe hem ka anel len te pendžaren o čačipe,26te phravgjon lengere jakha hem te oslobodinen pe tari zamka e Bengeskiri, so phandla len te keren leskiri vojla.The Word for the World International