Read Matej 26

MAT26rmn_atw

E jevrejengere vođe dogovorinena pe te mudaren e Isuse

¹I kad o Isus završinđa sa ple vaćeribnaja, phenđa ple učenikonenđe:²“Džanena soi zako duj dive o prazniko Pasha. Tegani man, e Čhave e manušesere, ka den te ovav čhivdo ko krsto.”³Tegani o šerutne sveštenici hem o starešine e jevrejengere čedinde pe ko boro e prvosveštenikosoro kova vičinđa pe Kajafa⁴hem dogovorinde pe ko hovavne te dolen e Isuse hem te mudaren le.⁵I phende: “Naka ćera adava zako vreme e praznikosoro, te na pobunini pe o narodo.”

O Isus pomazime ani Vitanija

⁶A o Isus inele ano gav Vitanija, ano čher e Simonesoro e Gubavcosoro.⁷I sar inele uzalo astali, ali koro leste jekh đuvli e čareja savo inele ćerdo oto šužo bar, ano savo inele skupo mirisno ulje hem čhorđa le upro lesoro šero.⁸Kad o učenici dikhle adava, lelje te holjanen vaćerindoj: “Sose esavko bespotrebno čhoriba?⁹Bute parenđe šaj ine te biknel pe adava, a o pare te den pe e čororenđe.”¹⁰A o Isus džanđa sostar vaćerena, i pučlja len: “Sose uznemirinena akala đuvlja? Oj ćerđa maje šukaripe.¹¹Adalese so o čorore manuša uvek ka oven uzala tumende, a me naka ovav uvek tumencar.¹²Čhorđa akava mirisno ulje upra mande te pripremini mlo telo zako paruniba.¹³Čače vaćerava tumenđe, kaj god ki sa i phuv ka vaćeri pe akava Šukar lafi, ka vaćeri pe hem akalestar so oj ćerđa, sar setiba olatar.”

O Juda dogovorini pe te izdajini e Isuse

¹⁴Tegani jekh oto dešu duj apostolja – okova kova vičinđa pe Juda Iskariot – dželo koro šerutne sveštenici¹⁵hem pučlja len: “Kobor ka den man pare te izdajinav tumenđe e Isuse?” I on dinde le trijanda srebrna kovanice.¹⁶I otegani o Juda lelja te rodel šukar prilika te izdajini e Isuse.

O Isus bičhali e učenikonen ko Jerusalim te pripreminen i Pasha

¹⁷A ko prvo dive oto Prazniko e bikvascone marengoro o učenici pučle e Isuse: “Kaj mangeja te ćera će te ha e pashakoro hajba?”¹⁸A o Isus phenđa lenđe: “Džan ki diz koro adava hem adava manuš hem vaćeren lese: ‘O učitelj vaćeri: Mloi vreme paše. Kora tute ka slavinav i Pasha mle učenikonencar.’ ”¹⁹I o učenici ćerde sar so phenđa lenđe o Isus hem adari ćerde zako hajba e pashakoro.

O Isus džanel so o Juda ka izdajini le

²⁰Kad peli i rat, o Isus čhivđa pe uzalo astali ple dešu duje apostolencar.²¹I sar hana ine, o Isus phenđa lenđe: “Čače vaćerava tumenđe, jekh tumendar ka izdajini man!”²²On but rastužisale, i lelje jekh palo avereste te pučen le: “Te na injum me adava, Gospode?”²³A ov phenđa lenđe: “Okova kova mancar macinđa o maro ano čaro, ov ka izdajini man.²⁴Čače, o Čhavo e manušesoro valjani te merel sar so pisini ano Sveto lil, ali jao okole manušese kova ka izdajini le! Po šukar ka ovel lese te na ovel ine bijando!”²⁵A lesoro izdajniko o Juda pučlja: “Te na injum me adava, Učitelju?” A o Isus phenđa lese: “Ađahari sar so phenđan.”

O Isus hala i poslednjo večera e učenikonencar

²⁶Sar hana ine, o Isus lelja o maro, zahvalinđa e Devlese hem phaglja le, i dinđa le e učenikonenđe, vaćerindoj: “Len hem han! Akavai mlo telo.”²⁷Tegani lelja i čaša e moljaja, zahvalinđa e Devlese hem dinđa la olenđe, vaćerindoj: “Pijen olatar sare!²⁸Adalese so akavai mlo rat oto savez, savo čhorela pe butenđe, zako oprostiba e grehengoro.²⁹I vaćerava tumenđe da naka pijav više oti akaja mol sa đi o dive kad ka pijav tumencar i nevi mol ano carstvo mle Dadesoro.”³⁰Tegani đilabde psalmija, i džele ki e Maslinakiri gora.

O Isus džanel da o Petar hem avera učenici ka ačhaven le

³¹Tegani o Isus phenđa lenđe: “Erat sare ka ačhaven man, adalese soi pisime ano Sveto lil:
‘Ka mudarav e pastire,hem o bakre ka našen taro stado.’

³²Ali kad ka uštav taro mule, ka džav angla tumende ki Galileja.”³³A o Petar phenđa lese: “I sare te ačhavde tut, me naka ačhavav tut!”³⁴O Isus phenđa lese: “Čače vaćerava će, ki akaja rat, angleder so o bašno ka đilabi, trin puti ka hovave da na pendžareja man.”³⁵O Petar phenđa lese: “Naka ćerav adava, čak hem te valjanđum te merav tuja.” I ađahar vaćerde sa o učenici.

O Isus molini pe ani Getsimanija

³⁶Tegani o Isus dželo ple učenikonencar ko than vičime Getsimanija, i phenđa lenđe: “Bešen akate đikote me džava adari hem molinav man.”³⁷Peja lelja e Petre hem soduje čhaven e Zevedejeseren. Pelo lese žal hem pharipe,³⁸i phenđa lenđe: “Edobor injum žalosno da mlo vilo ka pharjol! Ačhoven akate hem džangale pazinen mancar.”³⁹I dželo hari po dur, pelo mujeja đi phuv hem molinđa pe vaćerindoj: “Dade mleja, te šaj, cide akaja čaša e patnjaja mandar. Ali, nek ovel pali ti volja, a na pali mli.”⁴⁰Tegani irinđa pe koro učenici hem arakhlja len sar sovena, i phenđa e Petrese: “Ah, našti li ine nijekh sati džangale te pazinen mancar!⁴¹Džangale pazinen hem molinen tumen te na peren ko iskušenje. O duho mangela te ćerel okova soi šukar, ali o teloi bizoralo.”⁴²I palo dujto puti dželo hem molinđa pe vaćerindoj: “Dade mleja, te našti te cide mandar akaja čaša e patnjaja, te na pijav olatar, nek ovel pali ti volja.”⁴³I palem, kad irinđa pe, arakhlja len sar sovena adalese so phandljona ine lengere jaćha.⁴⁴Ov ačhavđa len hem palem dželo po dur, i trito puti molinđa pe, vaćerindoj ista lafija.⁴⁵Tegani irinđa pe koro učenici hem phenđa lenđe: “Pana li sovena hem odmorinena? Ače, alo o sati kad me, o Čhavo e manušesoro, ka ovav dindo ko vasta e grešnikonengere.⁴⁶Ušten! Hajde! Ače mlo izdajniko avela.”

O Isus izdajime hem dolime

⁴⁷I sar pana o Isus vaćeri ine adava, alo o Juda, jekh e dešu duje apostolendar, hem oleja but džene, e mačencar hem e kaštencar, kolen bičhalde o šerutne sveštenici hem o starešine e jevrejengere.⁴⁸A o Juda, lesoro izdajniko dinđa len znako vaćerindoj: “Kas ka čumudinav – ovi adava. Ole dolen.”⁴⁹I odmah alo đi o Isus hem phenđa: “Zdravo, učitelju”, hem čumudinđa le ki čham.⁵⁰A o Isus phenđa lese: “Amala, ćer okova savese aljan.” Tegani o manuša ale, dolinde e Isuse hem phandle le.⁵¹I dikh, jekh okolendar kola inele e Isuseja dolinđa pe ko mači, ikalđa le hem khuvđa oleja e prvosveštenikosere sluga hem čhinđa lesoro kan.⁵²Tegani o Isus phenđa lese: “Irin o mači olese ko than, adalese so sare kola dolena pe ko mači, oto mači ka meren.⁵³Tu li mislineja da me našti te rodav mle Dadestar te bičhali maje akana više oto dešu duj armije anđelen?⁵⁴Ali te ćerđum adava, sar ka pherđon o Sveta lila save vaćerena da valjani te ovel ađahar?”⁵⁵Tegani phenđa e manušenđe: “Mačencar hem kaštencar aljen pala mande te dolen man, sar palo pobunjeniko. Divencar ano Hram bešljum hem sikavđum e narodo, i na dolinđen man.⁵⁶Ali, sa akava ulo sar te pherđol okova so mandar pisinde o proroci.” Tegani sa o učenici ačhavde le hem našle.

E verakere hem e narodosere vođe rodena krivica upro Isus

⁵⁷Okola kola dolinde e Isuse, legarde le koro prvosvešteniko o Kajafa, kora kaste čedinde pe o učitelja e Zakonestar hem o starešine.⁵⁸O Petar odural džala ine palo Isus sa đi ko boro e prvosveštenikosoro, i đerdinđa andre hem bešlo e slugencar te dikhel so ka ovel.⁵⁹A o šerutne sveštenici hem sa o sabor rodena ine nesavo hovavno svedočiba protiv o Isus sar te šaj ćeren te ovel mudardo,⁶⁰ali našti ine te arakhen le, iako ale but hovavne svedoci. A ko kraj ale duj džene⁶¹hem phende: “Akava manuš phenđa: ‘Šaj te peravav o Hram e Devlesoro hem zako trin dive palem te vazdav le.’ ”⁶²I o prvosvešteniko uštino hem pučlja e Isuse: “Tut li nane so te phene ko akava so vaćerde protiv tute?”⁶³A o Isus trainđa. I o prvosvešteniko phenđa lese: “Hava tut sovli upro dživdo Devel, phen amenđe tu li injan o Hrist, o Čhavo e Devlesoro?”⁶⁴O Isus phenđa: “Ađahari sar so phenđan. Ali vaćerava tumenđe: Od akana ka dikhen man, e Čhave e manušesere, sar bešava ko počasno than, oti desno strana e Najzorale Devlesiri hem sar avava upro oblaci e nebosere.”⁶⁵Tegani o prvosvešteniko pharavđa ple šeja hem phenđa: “Hulinđa upro Devel! Na valjani amenđe više svedoci! Ače, akana šunđen i hula!⁶⁶So mislinena?” A on phende: “Zaslužini te merel!”⁶⁷Tegani čhungarde le ko muj hem khuvde le dumukhencar. A nesave khuvena le ine šamarke,⁶⁸vaćerindoj: “Hriste, prorokujin amenđe ko khuvđa tut!”

O Petar odreknini pe e Isusestar

⁶⁹I sar o Petar bešela avri ano boro, ali nakoro leste jekh sluškinja hem phenđa: “Hem tu injanle e Isuseja tari Galileja!”⁷⁰A o Petar anglo sarijende hovavđa vaćerindoj: “Na džanav sostar vaćereja!”⁷¹Kad iklilo angli kapija, dikhlja le jekh aver sluškinja, i phenđa okolenđe kola inele adari: “Akava inele e Isuseja e Nazarećanineja!”⁷²O Petar palem hovavđa hem pana halja sovli: “Na pendžarava adale manuše!”⁷³Na nakhlo but palo adava, okola kola terđona ine adari ale nakoro Petar hem phende: “Tu čače injan jekh olendar! Izdajini tut to vaćeriba!”⁷⁴Tegani o Petar lelja te vičini prokletstvija upra peste hem te hal pe sovli: “Na pendžarava adale manuše!” I odmah o bašno đilabđa.⁷⁵Tegani o Petar setinđa pe e Isusesere lafendar: “Angleder so o bašno ka đilabi, trin puti ka hovave da na pendžareja man.” I iklilo taro boro hem zorale runđa.

MAT 26 / rmn_atw