Read Matej 13

Matej13rmn_atw

O Isus vaćeri i priča oto sejači

¹Ko adava dive o Isus iklilo taro čher hem dželo te bešel uzalo jezero te sikaj.²Sa edobor džene čedinde pe uzalo leste, i adalese đerdinđa ko čamco hem beštino, a o manuša terđona ine ki phuv uzalo jezero.³I but so vaćerđa lenđe ano priče, sar akaja: “Šunen! Iklilo o sejači te sejini.⁴I sar frdela ine o seme, nesave zrnja pele ko drom, i o čiriklja ale hem sa hale len.⁵A nesave pele ko than kote inele hari phuv upro bara, i odmah lelje te ikljon, adalese so na inele ani hor phuv.⁶Ali kad iklilo o zoralo kham, thabile hem šućile, adalese so na ine len baro koreno.⁷A nesave pele maškaro kare, i o kare barile hem tasavde len.⁸A nesave pele ki šukar phuv hem ande bijandipe – šel puti, šovardeš puti ili trijanda puti više adalestar so inele sejime.⁹Kas isi kana, nek šunel!”

Sose o Isus vaćeri ano priče

¹⁰E Isusesere učenici ale koro leste hem pučle le: “Sose vaćereja e manušenđe ano priče?”¹¹A ov phenđa lenđe: “Adalese soi tumenđe dindo te džanen o tajne oto carstvo e nebosoro, a olenđe nane dindo.¹²Adalese so, đijekhe kas isi džandipe, ka del pe lese pana hem ka ovel le but, a okole kas nane, ka lel pe lestar hem adava so isi le.¹³Adalese vaćerava lenđe ano priče, adalese so anglo jaćha na dikhena hem anglo kana na šunena ni na haljovena.¹⁴Ađahar upro lende pherđola o proroštvo e Isaijasoro:
‘Ka šunen hem ka šunen,ali naka haljoven;ka dikhen hem ka dikhen,ali naka pendžaren.¹⁵Adalese so akale manušengoro vilo ulo pharo,phareste šunena kanencarhem phandle pumare jaćha,te na dikhen jaćhencarhem te na šunen kanencar,a vileja te na haljoven.Adalese našti te irinen pe kora mandete sasljarav len.’

¹⁶Ali blago tumare jaćhenđe so dikhena hem blago tumare kanenđe so šunena.¹⁷Čače phenava tumenđe: But proroci hem pravednici edobor mangle te dikhen akava so tumen dikhena, ali na dikhle; hem mangle te šunen okova so tumen šunena, ali na šunde.”

Sostar vaćeri i priča oto sejači

¹⁸“Šunen akana sostar vaćeri pe ani priča oto sejači:¹⁹Svakonese kova šunela o lafi oto carstvo e nebosoro, a na haljola le, avela o Bišukar hem čorela lestar okova soi lese sejime ano vilo. Adavai o than ko drom ko savoi sejime o zrnja.²⁰A o than e barencar ko savoi sejime o zrnja, adavai okova kova šunela o lafi hem odmah lela le radosno.²¹Ali, adalese so nane le baro koreno ana peste, na trajini but. Kad avela i nevolja ili o progonstvo zbog o lafi, ov odmah otperela oti vera.²²A o than maškaro kare ko savoi sejime o zrnja, adavai okova kova šunela o lafi, ali o brige akale dživdipnasere hem o zavodljivost e barvalipnasoro tasavena o lafi, i našti anel bijandipe.²³A i šukar phuv ki savi sejime o zrnja, adavai okova kova šunela hem haljovela o lafi. Ov čače anela bijandipe – šel puti, šovardeš puti ili trijanda puti više adalestar so inele sejime.”

Priča oto điv hem oto kukolj

²⁴O Isus dinđa len hem aver priča: “O carstvo e nebosoroi slično sar kad o manuš pese ki njiva sejinđa o šukar seme.²⁵Ali, sar sare sovena ine, alo lesoro neprijatelj, sejinđa kukolj maškaro điv hem dželo.²⁶A kad barilo o điv hem kad anđa bijandipe, dikhlilo hem o kukolj.²⁷O sluge ale koro domaćini hem pučle le: ‘Gospodarona, ini tu sejinđan šukar seme tuće ki njiva? Kotar onda adava kukolj?’²⁸A ov phenđa lenđe: ‘O neprijatelj adava ćerđa.’ Tegani o sluge pučle le: ‘Mangeja li te dža te ikala o kukolj?’²⁹A ov phenđa: ‘Na, adalese so tumen ko ikaliba o kukolj šaj te ikalen hem o điv.³⁰Muken soduj te barjon đi ki žetva. I kad ka avel o vreme e čedibnasoro, ka phenav okolenđe kola čedena: Ikalen najangle o kukolj hem phanden le ko kupe te tharel pe, a o điv čeden hem čhiven le maje ki šupa.’ ”

Priče oto zrno e gorušicakoro hem oto kvasco

³¹O Isus dinđa len hem aver priča: “O carstvo e nebosoroi slično e zrnose oti gorušica save o manuš lelja hem sejinđa pese ki njiva.³²Ovi čače najtikoro oto sa semenja, ali kad barjola ovela po baro oto sa o biljke ki bašta, ovela kaš, i o čiriklja avena hem ćerena gnezdija upro lesere granke.”³³Phenđa lenđe hem aver priča: “O carstvo e nebosoroi slično e kvascose save i đuvli lelja hem čhivđa ano but baro čaro vareja, i ov ćerđa sa o humer te uštel.”³⁴Sa adava o Isus vaćerđa e manušenđe ano priče. Na vaćerđa lenđe ništa bizo priče.³⁵Ađahar pherdilo okova soi vaćerdo prekalo proroko:
“Mlo muj ka phravav ano priče,ka vaćerav okova soi garavdo pana taro ćeriba e svetosoro.”

Sostar vaćeri i priča oto điv hem oto kukolj

³⁶Tegani o Isus bičhalđa e manušen čhere, i đerdinđa ko čher. Lesere učenici ale koro leste hem phende: “Vaćer amenđe sostar vaćeri pe ani priča oto kukolj ki njiva.”³⁷Ov phenđa lenđe: “Okova kova sejinđa o šukar semei o Čhavo e manušesoro,³⁸a i njivai o sveto. O šukar semei o čhave e carstvosere, a o kukolj o čhave e Bišukaresere.³⁹O neprijatelj kova sejinđa o kukolj – adavai o beng. I žetva – adavai o kraj e svetosoro, a okola kola čedena – adalai o anđelja.⁴⁰Sar so o kukolj ikali pe hem tharela pe, ađahar ka ovel hem ko kraj e svetosoro.⁴¹Me, o Čhavo e manušesoro, ka bičhalav mle anđelen te ikalen taro mlo carstvo sarijen kola ćerena averen te grešinen hem kola ćerena bišukaripe⁴²hem ka frden len ani jagali peć, kote ka ovel baro rojba hem krciba e dandengoro tari dukh.⁴³Tegani o pravednici sar o kham ka sijajinen ano carstvo pumare Dadesoro. Kas isi kana, nek šunel!”

Priča oto garavdo blago

⁴⁴“O carstvo e nebosoroi sar o blago garavdo ki njiva. Kad o manuš arakhi le, palem garaj le hem radosno džala te biknel sa so isi le hem činela adaja njiva.”

Priča oto dragoceno biseri

⁴⁵“Palem, o carstvo e nebosoroi sar kad o trgovco rodela šuže biserja.⁴⁶Kad arakhi jekh dragoceno biseri, džala hem biknela sa so isi le hem činela le.”

Priča oti mreža zako maćhe

⁴⁷“Palem, o carstvo e nebosoroi sar i mreža frdimi ano jezero ani savi dolinde pe maćhe oti svako vrsta.⁴⁸Kad i mreža pherđola, o manuša ikalena la ki phuv. Tegani bešena hem e šukare maćhen čhivena ano čare, a e bišukaren frdena.⁴⁹Ađahar ka ovel hem ko kraj e svetosoro. Ka aven o anđelja hem ka ciden e bišukare manušen e pravednikonendar⁵⁰hem ka frden len ani jagali peć, kote ka ovel baro rojba hem krciba e dandengoro tari dukh.⁵¹Haliljen li sa adava?” On phende: “Oja.”⁵²A ov phenđa lenđe: “Adalese svako učitelj e Zakonestar kovai sikavdo oto carstvo e nebosoro – ovi sar o domaćini kova pestar ikali hem o nevo hem o purano blago.”

E Isuse na prihvatinena ano Nazaret

⁵³Kad o Isus vaćerđa sa adala priče, dželo adathar⁵⁴hem alo ko than kaj barilo. Adari ki sinagoga sikavđa e manušen, a on divinde pe hem pučle: “Kotar lese adaja mudrost hem zoralipe te ćerel čudesija?⁵⁵Nane li akava e kaštarutnesoro čhavo? Nane li lesiri daj i Marija, a lesere phralja o Jakov, o Josif, o Simon hem o Juda?⁵⁶Hem nane li sa lesere phenja akate amencar? Kotar lese onda sa adava?”⁵⁷I na mangle te prihvatinen le. Tegani o Isus phenđa lenđe: “E prorokose dela pe čast ano sa o thana, sem lese ano than kaj barilo hem lese ano čher.”⁵⁸I na ćerđa but čudesija adari adalese so e manušen na ine vera.

Matej 13 / rmn_atw