ⴰⵙⴰⵔⴳⴻⴱ18rif_tti
ⴰⵡⴻⵟⵟⵓ ⵏ ⴱⴰⴱⵉⵍ
1ⴰⵡⴰⵔⵏⵉ ⴰⵙ ⵥⵔⵉⵖ ⵉⵊⵊ ⵏ ⵍⵎⴰⵍⴰⴽ ⵏⵏⴻⵖⵏⵉ ⵉⵀⴻⴽⴽⵡⴰ-ⴷⴷ ⵣⴻⴳ ⵓⵊⴻⵏⵏⴰ, ⵖⴰⵔⴻⵙ ⵚⵚⵓⵍⵟⴰ ⵜⴰⵎⴻⵇⵇⵔⴰⵏⵜ, ⵓⵛⴰ ⵟⵟⵢⴰ ⵏ ⵓⵄⵓⴵⵉ ⵏⵏⴻⵙ ⵜⴻⴳⴳⴰ ⵜⴰⴼⴰⵡⵜ ⴽⵓⵍⵛⵉ ⵉ ⵜⴻⵎⵎⵓⵔⵜ.2ⵏⴻⵜⵜⴰ ⵉⵍⴰⵖⴰ ⵙ ⵜⵎⵉⵊⵊⴰ ⵜⴻⵊⵀⴻⴷ, ⵉⵇⵇⴰⵔ:“ⴰⵇⴰ ⵜⴻⵡⴹⴰ, ⵜⴻⵡⴹⴰ ⵜⴻⵏⴷⵉⵏⵜ ⵜⴰⵎⴻⵇⵇⵔⴰⵏⵜ ⴱⴰⴱⵉⵍ, ⵜⴻⴷⵡⴻⵍ ⴷ ⵜⴰⵣⴻⴷⴷⵉⵖⵜ ⵉ ⵛⵛⵡⴰⵟⴻⵏ ⴷ ⵍⴻⵃⴱⴻⵙ ⵉ ⴽⵓⵍ ⵍⴰⵔⵢⴰⵃ ⴰⵎⴻⵏⴳⵓⵙ ⴰⵎⴻⵏⵄⵉ,3ⵎⵉⵏⵣⵉ ⵜⴻⵙⵙⵅⴻⴵⴻⴹ ⴱⵉⵏⵓ ⵏ ⴼⴰⵔⵇ-ⵛⵛⵖⴻⵍ ⵏⵏⴻⵙ ⵉ ⵎⴰⵔⵔⴰ ⵍⴻⴳⵏⵓⵙ, ⵓ ⵎⵉⵏⵣⵉ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴰⵇⴰ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵣⵣⴰⵢⴻⵙ, ⵓ ⵎⵉⵏⵣⵉ ⵉⵙⴻⴱⴱⴰⴱⴻⵏ ⵏ ⵜⴻⵎⵎⵓⵔⵜ ⴷⴻⵡⵍⴻⵏ ⴷ ⵜⵡⴰⵊⵊⴰⵔ ⵙ ⵊⵊⴻⵀⴷ ⵏ ⵓⵟⴻⵎⵎⴻⵙ ⵏⵏⴻⵙ ⵏ ⵡⴰⴳⵔⴰ.”4ⵓⵛⴰ ⵙⵍⵉⵖ ⵉ ⵜⵎⵉⵊⵊⴰ ⵏⵏⴻⵖⵏⵉ ⵜⵍⴰⵖⴰ-ⴷⴷ ⵣⴻⴳ ⵓⵊⴻⵏⵏⴰ:
“ⴼⴼⴻⵖ ⵣⵣⴰⵢⴻⵙ, ⴰ ⵍⴳⴻⵏⵙ ⵉⵏⵓ, ⵃⵉⵎⴰ ⵡⴰⵔ ⵜⵜⵉⵍⵉⵏ ⴷⴷⵏⵓⴱ ⵏⵏⴻⵙ ⵅ ⵢⵉⵔⵉ ⵏⵏⴻⵛ ⵓⵛⴰ ⵡⴰⵔ ⵜⴽⴻⵙⵙⵉⴷ ⵣⵉ ⵊⵊⵔⴰⵢⴻⵃ ⵏⵏⴻⵙ,5ⵎⵉⵏⵣⵉ ⴷⴷⵏⵓⴱ ⵏⵏⴻⵙ ⴰⵇⴰ ⵉⵡⴹⴻⵏ ⵖⴰⵔ ⵓⵊⴻⵏⵏⴰ, ⵓⵛⴰ ⴰⵔⴻⴱⴱⵉ ⴰⵇⴰ ⵉⵄⵇⴻⵍ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵙ.6ⴰⵔⵔⴻⵎ-ⴷⴷ ⵅⴰⵙ ⴰⵎ ⵎⴰⵎⵎⴻⵛ ⴷⴷ-ⵜⴰⵔⵔⴰ ⵏⴻⵜⵜⴰⵜ, ⴰⵔⵔⴻⵎ-ⴷⴷ ⵅⴰⵙ ⵙ ⵓⴹⴻⴼⴼⵓⵙ ⵄⵍⴰⵃⵙⴰⴱ ⵍⴻⵅⴷⴰⵢⴻⵎ ⵏⵏⴻⵙ, ⵅⴻⴵⴻⴹ ⴰⵙ ⵙ ⵓⴹⴻⴼⴼⵓⵙ ⴷⴻⴳ ⵓⵖⴰⵔⵔⴰⴼ ⵏⵏⵉ ⵜⵓⵖⴰ ⵜⵅⴻⴵⴻⴹ ⵏⴻⵜⵜⴰⵜ.7ⵅⴻⵍⴼⴻⵎ ⴰⵙ-ⴷⴷ ⴰⵄⴻⴷⴷⴻⴱ ⴷ ⵡⴻⵛⴹⴰⵏ ⴰⵏⴻⵛⵜ ⵜⵓⵖⴰ ⵏⴻⵜⵜⴰⵜ ⵜⴻⵙⵙⵄⵓⴵⵉ ⵓ ⵜⴻⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵎⵉⵏⵣⵉ ⵜⴻⵏⵏⴰ ⴷⴻⴳ ⵡⵓⵍ ⵏⵏⴻⵙ: ‘ⴰⵇⴰ ⵇⵇⵉⵎⴻⵖ ⴰⵎ ⵜⵊⴻⴵⵉⴷⵜ, ⵡⴰⵔ ⴵⵉⵖ ⴷ ⵜⴰⵊⵊⴰⵍⵜ, ⵓⵛⴰ ⴰⵛⴹⴰⵏ ⵡⴰⵔ ⵜ ⵥⴰⵔⵔⴻⵖ ⵛⴰ!’8ⵙ ⵓⵢⴻⵏⵏⵉ ⴷⴻⴳ ⵉⵊⵊ ⵏ ⵡⴰⵙⵙ ⴰⴷ ⵅⴰⵙ ⵡⴹⴰⵏⵜ ⵎⴰⵔⵔⴰ ⵊⵊⵔⴰⵢⴻⵃ ⵏⵏⴻⵙ: ⵍⵎⴻⵡⵜ, ⴰⵛⴹⴰⵏ ⴷ ⵍⴰⵥ, ⵓⵛⴰ ⴰⴷ ⵜᵉⵜⵜⵡⴰⵛⵎⴻⴹ ⴷⵉ ⵜⵎⴻⵙⵙⵉ, ⵎⵉⵏⵣⵉ ⵙⵉⴷⵉ, ⴷ ⵡⴻⵏⵏⵉ ⵅⴰⵙ ⵉ ⵖⴰ ⵉⵃⴻⴽⵎⴻⵏ, ⴰⵇⴰ ⵉⵊⵀⴻⴷ.9ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ, ⵉⵏⵏⵉ ⴽⵉⴷⴻⵙ ⵉⴳⴳⵉⵏ ⴼⴰⵔⵇ-ⵛⵛⵖⴻⵍ ⵓ ⵙⵙⴳⴻⵄⵄⴷⴻⵏ ⵉⵅⴻⴼ ⵏⵙⴻⵏ, ⴰⴷ ⵅⴰⵙ ⵔⵓⵏ, ⴰⴷ ⵅⴰⵙ ⵡⵜⴻⵏ ⴰⴳⴻⵊⴷⵓⵔ ⵅⵎⵉ ⵖⴰ ⵥⴰⵔⴻⵏ ⴷⴷⴻⵅⵅⴰⵏ ⵏ ⵜⵎⴻⵙⵙⵉ ⵏⵏⴻⵙ.10ⵏⵉⵜⵏⵉ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵖⴰⵔ ⵍⴰⴳⴳⵯⴰⵊ ⵣⵉ ⵜⴻⴳⴳⵯⵓⴷⵉ ⵏ ⵓⵄⴻⴷⴷⴻⴱ ⵏⵏⴻⵙ, ⵇⵇⴰⵔⴻⵏ:
‘ⵓⵛⵜ, ⵓⵛⵜ, ⵓⵛⵜ, ⵅⴰⵎ, ⴰ ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ, ⴱⴰⴱⵉⵍ, ⵜⴰⵏⴷⵉⵏⵜ ⵉⵊⴻⵀⴷⴻⵏ, ⵎⵉⵏⵣⵉ ⴰⵇⴰ ⵢⵓⵙⴰ-ⴷⴷ ⵍⵃⵓⴽⵎ ⵏⵏⴻⵎ ⴷⴻⴳ ⵉⵛⵜ ⵏ ⵜⵙⴰⵄⵄⴻⵜ!’”11ⵉⵙⴻⴱⴱⴰⴱⴻⵏ ⵏ ⵜⴻⵎⵎⵓⵔⵜ ⴰⴷ ⵅⴰⵙ ⵔⵓⵏ, ⴰⴷ ⵛⴻⴹⵏⴻⵏ, ⵎⵉⵏⵣⵉ ⵓⵍⴰ ⴷ ⵉⵊⵊ ⵡⴰⵔ ⵉⵙⵙⵉⵖ ⵄⴰⴷ ⵙⵙⴻⵍⵄⴻⵜ ⵏⵙⴻⵏ:12ⵙⵙⴻⵍⵄⴻⵜ ⵏ ⵡⵓⵔⴻⵖ ⴷ ⵏⵏⵓⵇⴰⵔⵜ ⴷ ⵢⴻⵥⵔⴰ ⵢⵉⵖⵍⴰⵏ ⴷ ⵜⵢⴰⵇⵓⵜⵉⵏ ⴷ ⵍⴻⵇⵟⴻⵏ ⴷ ⴰⵔⵊⵓⵡⴰⵏⵉ ⴷ ⵍⴻⵃⵔⵉⵔ ⴰⵣⴻⴳⴳⵯⴰⵖ ⵉⵃⴻⴷⵇⴻⵏ ⴷ ⵄⵍⴰⵎ ⴽⵓⵍ ⴰⴽⴻⵛⵛⵓⴹ ⵉⵜⵜⴼⵓⵃⴻⵏ ⴷ ⵄⵍⴰⵎ ⴽⵓⵍ ⵍⴻⵇⵛⵓⵄ ⵣⵉ ⵍⵄⴰⵊ ⴷ ⵄⵍⴰⵎ ⴽⵓⵍ ⵍⴻⵇⵛⵓⵄ ⵣⴻⴳ ⵓⴽⴻⵛⵛⵓⴹ ⵉⵖⵍⴰⵏ ⴷ ⵏⵏⵃⴰⵙ ⴷ ⵡⵓⵣⵣⴰⵍ ⴷ ⵍⵎⴰⵔⵎⵓⵔ13ⴷ ⵍⵇⴰⵔⴼⴰ ⴷ ⵍⴻⴱⵅⵓⵔ ⴷ ⵎⵉⵔⵔⵓ ⴷ ⵊⵊⴰⵡⵉ ⴷ ⴱⵉⵏⵓ ⴷ ⵣⵣⴻⵛⵜ ⵏ ⵣⵣⵉⵜⵓⵏ ⴷ ⴰⵔⴻⵏ ⵏ ⵙⵙⵎⵉⴷ ⴷ ⵡⵓⴵⵉ ⴷ ⵢⴻⵢⵙⴰⵏ ⴷ ⵉⴽⴰⵔⵔⵓⵜⴻⵏ ⵓⵍⴰ ⴷ ⴰⵔⵔⵉⵎⴰⵜ ⴷ ⵍⴻⵄⵎⵓⵔ ⵏ ⵉⵡⴷⴰⵏ.14ⴰⵇⴰ ⵍⵖⵉⴵⴻⵜ ⵉ ⴷⵉ ⵜⵓⵖⴰ ⵉⵜⵜⵎⴻⵥⵔⵉ ⵍⴻⵄⵎⴰⵔ ⵏⵏⴻⵎ, ⴰⵇⴰ ⵜⵉⴳⴳⵯⴻⵊ ⵅⴰⵎ, ⵓⵍⴰ ⴷ ⵎⴰⵔⵔⴰ ⵎⵉⵏ ⵜⵓⵖⴰ ⵖⴰⵔⴻⵎ ⴷ ⴰⴳⵍⴰ ⴷ ⵎⵉⵏ ⵉⵜⵜⵉⵙⵙⵉⵇⴻⵏ, ⴰⵇⴰ ⵉⵡⴻⴷⴷⴰⵔ, ⵡⴰⵔ ⵜ ⵜⵥⴰⵔⵔⴻⴷ ⵄⴻⵎⵎⴰⵔⵚ ⵄⴰⴷ.15ⵉⵙⴻⴱⴱⴰⴱⴻⵏ ⵏ ⵍⴻⵃⵡⴰⵢⴻⵊ-ⴰ, ⵉⵏⵏⵉ ⵉⴷⴻⵡⵍⴻⵏ ⵣⵣⴰⵢⵙⴻⵏⵜ ⴷ ⵜⵡⴰⵊⵊⴰⵔ, ⵡⴰⵔ ⵜⴻⵏⵜ ⵜⵜⵉⴼⴻⵏ ⵄⴰⴷ, ⵓⵛⴰ ⴰⴷ ⵇⵇⵉⵎⴻⵏ ⵖⴰⵔ ⵍⴰⴳⴳⵯⴰⵊ ⵣⵉ ⵜⴻⴳⴳⵯⵓⴷⵉ ⵏ ⵓⵄⴻⴷⴷⴻⴱ ⵏⵏⴻⵙ, ⴰⵎ ⵜⵜⵔⵓⵏ ⵓ ⴰⵎ ⵛⴻⵟⵟⵏⴻⵏ,16ⴰⴷ ⵉⵏⵉⵏ:
“ⵓⵛⵜ, ⵓⵛⵜ ⵅⴰⵎ, ⴰ ⵛⴻⵎ, ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ ⵉ ⵢⴰⵔⴹⴻⵏ ⵍⴻⵇⵟⴻⵏ ⴷ ⴰⵔⵊⵓⵡⴰⵏⵉ ⴷ ⴰⵣⴻⴳⴳⵡⴰⵖ ⵉⵃⴻⴷⵇⴻⵏ ⵉⵇⵇⴻⵏ ⵙ ⵡⵓⵔⴻⵖ ⴷ ⵢⴻⵥⵔⴰ ⵉⵖⵍⴰⵏ ⴷ ⵜⵢⴰⵇⵓⵜⵉⵏ,17ⵙ ⵎⵉⵏⵣⵉ ⴷⴻⴳ ⵉⵛⵜ ⵏ ⵜⵙⴰⵄⵄⴻⵜ ⴰⵇⴰ ⵉⵡⴻⴷⴷⴰⵔ ⵡⴰⴳⵍⴰ ⴰⵎⴻⵇⵇⵔⴰⵏ ⵏⵏⵉ!”
ⵎⴰⵔⵔⴰ ⵉⵏⵏⵉ ⵉⵏⴻⴷⴷⵀⴻⵏ ⵉⵖⴰⵔⵔⵓⴱⴰ ⴷ ⵎⴰⵔⵔⴰ ⵉⵏⵏⵉ ⵉⵜⵜⴻⴽⴽⴻⵏ ⵅ ⵍⴻⴱⵃⴰⵔ ⴷⴻⴳ ⵉⵖⴰⵔⵔⵓⴱⴰ ⴷ ⵎⴰⵔⵔⴰ ⵉⴱⴻⵃⵔⵉⵢⵢⴻⵏ ⴷ ⵎⴰⵔⵔⴰ ⵉⵏⵏⵉ ⵉⵜⵜⵙⴻⴱⴱⴰⴱⴻⵏ ⴷⵉ ⵍⴻⴱⵃⴰⵔ ⵇⵇⵉⵎⴻⵏ ⴱⴻⴷⴷⴻⵏ ⵖⴰⵔ ⵍⴰⴳⴳⵯⴰⵊ.18ⵏⵉⵜⵏⵉ ⵙⵖⵓⵢⵢⴻⵏ ⵓⵎⵉ ⵥⵔⵉⵏ ⴷⴷⴻⵅⵅⴰⵏ ⵏ ⵜⵎⴻⵙⵙⵉ ⵏⵏⴻⵙ, ⵏⵏⴰⵏ:
“ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⵎⵇⵓⴷⴷⴰ ⴰⴽ-ⴷ ⵜⴻⵏⴷⵉⵏⵜ-ⴰ ⵜⴰⵎⴻⵇⵇⵔⴰⵏⵜ?”19ⵙⵙⵓⵢⵓⵙⴻⵏ ⵓⵛⴰⵍ ⵅ ⵉⵣⴻⴵⵉⴼⴻⵏ ⵏⵙⴻⵏ ⵓⵛⴰ ⵙⵖⵓⵢⴻⵏ, ⴰⵎ ⵜⵜⵔⵓⵏ ⵓ ⴰⵎ ⵜⵜⴻⵛⴹⵉⵏⴻⵏ, ⵏⵏⴰⵏ:
“ⵓⵛⵜ, ⵓⵛⵜ ⵅⴰⵎ, ⴰ ⵛⴻⵎ, ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ ⵏⵏⵉ ⴷⵉ ⴷⴻⵡⵍⴻⵏ ⴷ ⵜⵡⴰⵊⵊⴰⵔ ⵎⴰⵔⵔⴰ ⵉⵏⵏⵉ ⵖⴰⵔ ⵉⴵⴰ ⵉⵖⴰⵔⵔⵓⴱⴰ ⴷⵉ ⵍⴻⴱⵃⴰⵔ, ⵙ ⵓⴱⴰⵔⵔⵓ ⵏ ⵡⴰⴳⵍⴰ ⵏⵏⴻⵙ, ⵎⵉⵏⵣⵉ ⴷⴻⴳ ⵉⵛⵜ ⵏ ⵜⵙⴰⵄⵄⴻⵜ ⵜⵡⴻⴷⴷⴰⵔ!”20“ⴼⴰⵔⵃⴻⵜ ⵣⵣⴰⵢⴻⵙ, ⴰ ⴰⵊⴻⵏⵏⴰ, ⵓ ⴽⴻⵏⵏⵉⵡ, ⴰ ⵉⵎⵇⴻⴷⴷⴰⵙⴻⵏ ⴷ ⵔⵔⵓⵙⵓⵍ ⴷ ⵉⵏⴰⴱⵉⵢⵢⴻⵏ, ⵎⵉⵏⵣⵉ ⴰⵔⴻⴱⴱⵉ ⴰⵇⴰ ⵉⵙⵙⵓⴼⴼⴻⵖ-ⴷⴷ ⵍⴻⵃⴽⴰⵎⴻⵜ ⵏⵏⴻⵙ ⵅⴰⵙ!”21ⵓⵛⴰ ⵉⵊⵊ ⵣⵉ ⵍⵎⴰⵍⴰⴽⴰⵜ ⵏⵏⵉ ⵉⵙⵙⴳⴻⵄⵄⴻⴷ ⵉⵊⵊ ⵏ ⵡⴻⵥⵔⵓ ⴰⵎⴻⵇⵇⵔⴰⵏ ⴰⵏⴻⵛⵜ ⵏ ⵜⴻⵚⴹⴰⵔⵜ ⵏ ⵜⵙⵉⵔⵜ, ⵉⵏⴹⴰⵔ ⵉ-ⵜ ⴷⵉ ⵍⴻⴱⵃⴰⵔ, ⵉⵇⵇⴰⵔ:
“ⴰⵎⵎⵓ ⵙ ⵊⵊⴻⵀⴷ ⴰⴷ ⵜᵉⵎⵎⴻⵏⴹⴰⵔ ⵜⴰⵏⴷⵉⵏⵜ ⵜⴰⵎⴻⵇⵇⵔⴰⵏⵜ ⴱⴰⴱⵉⵍ ⵓⵛⴰ ⵡⴰⵔ ⵜᵉⵜⵜⵡⵉⴼⵉ ⵄⴰⴷ ⵄⴻⵎⵎⴰⵔⵚ!22ⵍⵃⴻⵙⵙ ⵏ ⵍⵀⴰⵔⴱⴰ ⴷ ⵓⵙⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ, ⴷ ⵍⵃⴻⵙⵙ ⵏ ⵄⵍⴰⵎ ⴽⵓⵍ ⴰⵖⴻⵏⵏⴻⵊ ⵓ ⵏ ⵢⵉⵏⵏⵉ ⵉⵜⵜⵙⵓⴹⴻⵏ ⴷⵉ ⵍⴱⵓⵇ, ⵡⴰⵔ ⵉⵜⵜⵡⴰⵙⴻⵍ ⵄⴰⴷ ⴷⴰⵢⴻⵎ.23ⵄⴻⵎⵎⴰⵔⵚ ⴰⴷ ⴷⴰⵢⴻⵎ ⵜᵉⵜⵜⵡⴰⵥⴰⵔ ⵄⴰⴷ ⵟⵟⵢⴰ ⵏ ⵍⴻⴼⵏⴰⵔ, ⵓⵛⴰ ⵓⵍⴰ ⴷ ⵍⵃⴻⵙⵙ ⵏ ⵡⴻⵙⵍⵉ ⴷ ⵍⵃⴻⵙⵙ ⵏ ⵜⴻⵙⵍⵉⵜ ⵡⴰⵔ ⵉⵜⵜⵡⴰⵙⴻⵍ ⵄⴰⴷ ⴷⴰⵢⴻⵎ. ⵉⵙⴻⴱⴱⴰⴱⴻⵏ ⵏⵏⴻⵎ ⵜⵓⵖⴰ ⴰⵜⴻⵏ ⴷ ⵉⵎⴻⵇⵇⵔⴰⵏⴻⵏ ⵏ ⵜⴻⵎⵎⵓⵔⵜ, ⵎⵉⵏⵣⵉ ⵙ ⵜⵙⴻⵃⵃⴰⵔⵜ ⵏⵏⴻⵎ, ⴰⵇⴰ ⵜⵅⴻⴷⵄⴻⴷ ⵍⴻⴳⵏⵓⵙ ⵎⴰⵔⵔⴰ.24ⴰⵇⴰ ⵉⵜⵜⵡⴰⴼ ⴷⴰⵢⴻⵎ ⵉⴷⴰⵎⵎⴻⵏ ⵏ ⵉⵏⴰⴱⵉⵢⵢⴻⵏ ⴷ ⵉⵎⵇⴻⴷⴷⴰⵙⴻⵏ, ⵉⵏⵏⵉ ⵉⵜⵜⵡⴰⵏⵖⴻⵏ ⴷⵉ ⵜⴻⵎⵎⵓⵔⵜ.”
No translations available.