ⵃⵉⵥⵇⵉⵢⴰⵍ7rif_tti
ⴰⵏⴻⴳⴳⴰⵔⵓ ⴰⴷ ⴷⴷ-ⵢⴰⵙ!
1ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:2“ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵉ ⵜⴻⵎⵎⵓⵔⵜ ⵏ ⵉⵙⵔⴰⵉⵍ:‘ⴰⵏⴻⴳⴳⴰⵔ, ⵢⵓⵙⴰ-ⴷⴷ ⵓⵏⴻⴳⴳⴰⵔ ⵅ ⴰⵔⴻⴱⵄⴰ ⵏ ⵉⵖⴻⵣⴷⵉⵙⴻⵏ ⵏ ⵜⴻⵎⵎⵓⵔⵜ.3ⵍⴻⵅⵅⵓ ⵢⵓⵙⴰ-ⴷⴷ ⵅⴰⵎ ⵓⵏⴻⴳⴳⴰⵔ ⵏⵏⴻⵎ, ⵎⵉⵏⵣⵉ ⴰⴷ ⵖⴰⵔⴻⵎ ⴷⴷ-ⵙⴻⴽⴽⴻⵖ ⴰⵖⴹⴰⴱ ⵉⵏⵓ ⵓ ⴰⴷ ⵅⴰⵎ ⵃⴻⴽⵎⴻⵖ ⴰⵎ ⵢⵉⴱⵔⵉⴷⴻⵏ ⵏⵏⴻⵎ ⵓⵛⴰ ⴰⴷ ⵅⴰⵎ ⴳⴳⴻⵖ ⵎⴰⵔⵔⴰ ⵊⵊⵄⴰⵢⴻⴼ ⵏⵏⴻⵎ.4ⵡⴰⵔ ⴷ ⴰⵎ ⵣⵣⵉⴵⵉⵣⴻⵏⵜ ⵜⵉⵟⵟⴰⵡⵉⵏ ⵉⵏⵓ ⵓ ⵡⴰⵔ ⴰⵔⴻⵃⵃⵎⴻⵖ, ⵎⵉⵏⵣⵉ ⴰⴷ ⴰⵔⵔⴻⵖ ⵉⴱⵔⵉⴷⴻⵏ ⵏⵏⴻⵎ ⵅ ⵓⵣⴻⴵⵉⴼ ⵏⵏⴻⵎ ⵓ ⵊⵊⵄⴰⵢⴻⴼ ⵏⵏⴻⵎ ⴰⴷ ⵛⴻⵎ ⵍⴻⵇⴼⴻⵏⵜ ⴷⵉ ⵍⵡⴻⵙⵟ ⵏⵏⴻⵎ. ⴰⵎⵎⵓ ⵉ ⵖⴰ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’5ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵉⵊⵊ ⵏ ⵍⵖⴰⵔ, ⵉⵊⵊ ⵏ ⵍⵖⴰⵔ ⵉⴼⴰⵔⵣⴻⵏ, ⴰⵇⴰ ⴰⴷ ⴷⴷ-ⵢⴰⵙ.6ⵢⵓⵙⴰ-ⴷⴷ ⵓⵏⴻⴳⴳⴰⵔ, ⴰⵏⴻⴳⴳⴰⵔ ⵢⵓⵙⴰ-ⴷⴷ, ⵉⴼⴰⵇ-ⴷⴷ ⴹⵉⴷⴷ ⵏⵏⴻⵎ, ⴰⵇⴰ ⴰⴷ ⴷⴷ-ⵢⴰⵙ!7ⵜⵓⵙⴰ-ⴷⴷ ⵖⴰⵔⴻⴽ ⵜⵇⴻⴷⴷⵓⵃⵜ, ⴰ ⴰⵎⴻⵣⴷⵓⵖ ⵏ ⵜⴻⵎⵎⵓⵔⵜ, ⵜⴰⵙⴰⵄⵄⴻⵜ ⵜⵓⵙⴰ-ⴷⴷ, ⴰⵙⵙ ⵏ ⵓⵅⴰⵔⵡⴻⴹ ⵉⵇⴰⵔⵔⴻⴱ-ⴷⴷ ⵓ ⵡⴰⵔ ⴷⵉⵏ ⴰⵙⵍⵉⵡⵍⴻⵡ ⵣⴻⴳ ⵉⴷⵓⵔⴰⵔ.8ⵍⴻⵅⵅⵓ ⴷⴻⵖⵢⴰ ⴰⴷ ⵅⴰⵎ ⵣⴻⴵⵄⴻⵖ ⴰⵙⵄⴰⵔ ⵉⵏⵓ ⵓⵛⴰ ⴰⴷ ⴷⴰⵢⴻⵎ ⴽⴻⵎⵎⵍⴻⵖ ⴰⵖⴹⴰⴱ ⵉⵏⵓ. ⴰⴷ ⵅⴰⵎ ⵃⴻⴽⵎⴻⵖ ⴰⵏⴻⵛⵜ ⵏ ⵉⴱⵔⵉⴷⴻⵏ ⵏⵏⴻⵎ ⵓⵛⴰ ⴰⴷ ⵅⴰⵎ ⵙⵙⵉⵡⴹⴻⵖ ⵎⴰⵔⵔⴰ ⵊⵊⵄⴰⵢⴻⴼ ⵏⵏⴻⵎ.9ⵡⴰⵔ ⵣⵣⵉⴵⵉⵣⴻⵖ ⵓ ⵡⴰⵔ ⴰⵔⴻⵃⵃⵎⴻⵖ. ⴰⴷ ⵖⴰⵔⴻⵎ ⴷⴷ-ⴰⵔⵔⴻⵖ ⵎⵉⵏ ⵜⴻⵙⵙⴷⴰⵀⴻⴵⴻⴷ, ⵓ ⵊⵊⵄⴰⵢⴻⴼ ⵏⵏⴻⵎ ⴰⴷ ⵉⵍⵉⵏⵜ ⴷⵉ ⵍⵡⴻⵙⵟ ⵏⵏⴻⵎ ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⴰⵇⴰ ⵏⴻⵛⵛ ⴷ ⵙⵉⴷⵉ ⵡⴻⵏⵏⵉ ⴽⴻⵏⵏⵉⵡ ⵉⵛⵛⴰⵜⴻⵏ.’10‘ⵅⵣⴰⵔ, ⴰⵙⵙ, ⵅⵣⴰⵔ, ⴰⵇⴰ ⴷⴰ ⵜⵉⵡⴻⴹ-ⴷⴷ ⵜⵇⴻⴷⴷⵓⵃⵜ, ⵜⴻⵇⴹⴰ ⵜⵇⴻⴷⴷⵓⵃⵜ, ⵜⵏⴻⵡⵡⴰⵔ ⵜⴰⵖⵖⴰⵔⵛⵜ, ⵜⴻⵙⵙⴻⵏⴷⵉ ⵏⵏⴼⴰⵅⴻⵜ.11ⵉⴳⴻⵄⵄⴻⴷ ⵍⵄⵓⵏⴼ ⴰⵎ ⵓⵣⴻⴵⴰⴹ ⵏ ⵍⵖⴰⵔ. ⵡⴰⵔ ⵣⵣⴰⵢⵙⴻⵏ ⵉⵇⵇⵉⵎ ⵓⵍⴰ ⴷ ⵉⵊⵊ, ⵡⴰⵍⵓ ⵏ ⵍⵖⴰⵛⵉ ⵏⵙⴻⵏ ⵉⵏⵀⴻⵡⵍⴻⵏ, ⵡⴰⵍⵓ ⵏ ⴷⴷⵔⵉⵣ ⵏⵙⴻⵏ ⵓ ⵡⴰⵍⵓ ⵏ ⵓⵙⴻⵎⵖⴰⵔ ⴰⴷ ⵖⴰⵔⵙⴻⵏ ⵉⵇⵇⵉⵎ ⵄⴰⴷ.12ⵜⵓⵙⴰ-ⴷⴷ ⵜⵙⴰⵄⵄⴻⵜ, ⵉⵅⴻⵛⵛⴻⴷ ⵡⴰⵙⵙ. ⴻⵊⵊ ⵡⴻⵏⵏⵉ ⵉⵙⵖⵉⵏ ⵡⴰⵔ ⵉⴼⴰⵔⵔⴻⵃ ⵓ ⴻⵊⵊ ⵡⴻⵏⵏⵉ ⵉⵣⵣⵏⵓⵣⴰⵏ ⵡⴰⵔ ⵉⵜⵜⴻⵛⴹⵉⵏ, ⵎⵉⵏⵣⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⴰⵇⴰ-ⵜ ⵅ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.13ⵎⵉⵏⵣⵉ ⵡⴻⵏⵏⵉ ⵉⵣⵣⵏⵓⵣⴰⵏ ⵡⴰⵔ ⴷⴷ-ⵉⴷⴷⵉⴽⴽⵡⵉⵍ ⵖⴰⵔ ⵎⵉⵏ ⵉⵎⵎⴻⵏⵣⴻⵏ, ⵡⴰⵅⵅⴰ ⵏⵉⵜⵏⵉ ⵇⵇⵉⵎⴻⵏ ⴷⴷⴰⵔⴻⵏ, ⵎⵉⵏⵣⵉ ⵡⴰⵔ ⵉⴱⴻⵟⵟⵉⵍ ⵍⴻⵡⵃⵉⵢ ⵅ ⵎⴰⵔⵔⴰ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵜⴻⵎⵎⵓⵔⵜ, ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⵣⴻⵎⵎⴰⵔ ⵙ ⵍⵎⵓⵄⵚⵉⵢⵢⴻⵜ ⵏⵏⴻⵙ ⴰⴷ ⵉⵇⵇⵉⵎ ⵉⵜⵜᵉⵟⵟⴻⴼ ⴷⵉ ⵜⵓⴷⴰⵔⵜ ⵏⵏⴻⵙ.14ⵏⵉⵜⵏⵉ ⵙⵓⴹⴻⵏ ⵙ ⵊⵊⴻⵀⴷ ⴷⵉ ⵍⴱⵓⵇ ⵓⵛⴰ ⵙⵙⵡⴻⵊⴷⴻⵏ ⵎⴰⵔⵔⴰ ⵍⴻⵃⵡⴰⵢⴻⵊ, ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⵜⵜⴻⴼⴼⴻⵖ ⵖⴰⵔ ⵓⵎⴻⵏⵖⵉ, ⵎⵉⵏⵣⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵉⵏⵓ ⴰⵇⴰ-ⵜ ⵅ ⵎⴰⵔⵔⴰ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵜⴻⵎⵎⵓⵔⵜ.’15‘ⵣⵉ ⴱⴰⵔⵔⴰ ⵙⵙⵉⴼ ⵓ ⵣⵉ ⴷⴰⵅⴻⵍ ⵟⵟⴰⵄⵓⵏ ⴷ ⵍⴰⵥ. ⵡⵉ ⵉⴵⴰⵏ ⴷⴻⴳ ⵉⵢⵢⴰⵔ ⴰⴷ ⵉⵎⵎⴻⵜ ⵙ ⵙⵙⵉⴼ, ⵡⵉ ⵉⴵⴰⵏ ⴷⵉ ⵜⴻⵏⴷⵉⵏⵜ ⴰⴷ ⵜ ⵢⴻⵛⵛ ⵍⴰⵥ ⴷ ⵟⵟⴰⵄⵓⵏ.16ⵡⵉ ⵣⵣⴰⵢⵙⴻⵏ ⵢⴰⵔⴻⵡⵍⴻⵏ, ⵡⴰⵀ ⴰⴷ ⵏⴻⵊⵎⴻⵏ, ⵎⴰⵛⴰ ⴰⴷ ⵉⵍⵉⵏ ⵅ ⵉⴷⵓⵔⴰⵔ ⴰⵎ ⵉⴷⴱⵉⵔⴻⵏ ⵣⵉ ⵜⴻⵖⵣⵓⵔⵉⵏ, ⴰⴷ ⵏⵏⴻⵣⴱⴰⵔⴻⵏ ⵎⴰⵔⵔⴰ, ⴽⵓⵍ ⵉⵊⵊ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵙ.17ⵎⴰⵔⵔⴰ ⵉⴼⴰⵙⵙⴻⵏ ⴰⴷ ⵀⴻⵢⵢⴼⴻⵏ, ⵓ ⵎⴰⵔⵔⴰ ⵉⴼⴰⴷⴷⴻⵏ ⴰⴷ ⴷⴻⵡⵍⴻⵏ ⴷ ⴰⵎⴰⵏ.’18‘ⴰⴷ ⴱⴻⵢⵙⴻⵏ ⵙ ⵜⵅⵓⵏⵛⴰⵢ ⵏ ⵡⴻⵛⴹⴰⵏ, ⴰⵔⵊⴻⴼ ⴰⴷ ⵜⴻⵏ ⵉⵙⵙⴷⵓⵔⵉⵢ ⵅ ⵎⴰⵔⵔⴰ ⵓⴷⵎⴰⵡⴻⵏ ⴰⴷ ⵢⵉⵍⵉ ⵍⴻⵃⵢⴰ ⵓ ⵅ ⵎⴰⵔⵔⴰ ⵉⵣⴻⴵⵉⴼⴻⵏ ⵏⵙⴻⵏ ⵜⵓⵇⴻⵛⵛⴰⵔⵜ.19ⴰⴷ ⵏⴹⴰⵔⴻⵏ ⵏⵏⵓⵇⴰⵔⵜ ⵏⵙⴻⵏ ⴷⴻⴳ ⵉⴱⵔⵉⴷⴻⵏ ⵓ ⵓⵔⴻⵖ ⵏⵙⴻⵏ ⴰⴷ ⵢⵉⵍⵉ ⴰⵎ ⵛⴰ ⵏ ⵍⵃⴰⵊⵊⴻⵜ ⵜⴻⵅⵎⴻⵊ. ⵏⵏⵓⵇⴰⵔⵜ ⵏⵙⴻⵏ ⴷ ⵡⵓⵔⴻⵖ ⵏⵙⴻⵏ ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⴻⵏ ⴼⴻⴽⴽⴻⵏ ⴷⴻⴳ ⵡⴰⵙⵙ ⵏ ⵓⴷⵓⵇⵇⴻⵣ ⵏ ⵓⴼⵓⴳⴻⵎ ⵏ ⵙⵉⴷⵉ. ⵡⴰⵔ ⵣⴻⵎⵎⴰⵔⴻⵏ ⴰⴷ ⵣⵣⴰⵢⵙⴻⵏ ⵙⵙⵊⵉⵡⵏⴻⵏ ⵍⴻⵄⵎⴰⵔ ⵏⵙⴻⵏ ⵏⵉⵖ ⴰⴷ ⵣⵣⴰⵢⵙⴻⵏ ⵛⵛⵓⵔⴻⵏ ⵜⴰⴽⵔⵉⵛⵜ ⵏⵙⴻⵏ, ⵎⵉⵏⵣⵉ ⴰⵢⴰ ⵜⵓⵖⴰ ⴷ ⵙⵙⵉⴱⴱⴻⵜ ⵏ ⵓⵏⴻⵇⵔⴰⴹ ⵉ ⴷⴷ-ⵢⵉⵡⵢⴻⵏ ⵍⵎⵓⵄⵚⵉⵢⵢⴻⵜ ⵏⵙⴻⵏ.20ⴰⵥⵔⵉ ⵏ ⵜⴻⵍⵡⵉⵣⵜ ⵉⴳⴳⴰ ⵉ-ⵜ ⴷ ⵍⵄⴰⴹⴰⵎⴰ ⵢⵓⵄⵍⴰⵏ, ⵎⴰⵛⴰ ⵏⵉⵜⵏⵉ ⴳⴳⵉⵏ ⴷⴰⵢⴻⵙ ⵍⴻⵅⵢⴰⵍⴰⵜ ⵏ ⵏⵏⵄⴰⵡⴰⵜ ⵏⵙⴻⵏ ⵏ ⵍ’ⴰⵚⵏⴰⵎ ⵓ ⵍⴻⵅⵢⴰⵍⴰⵜ ⵏ ⵊⵊⵄⴰⵢⴻⴼ ⵏⵙⴻⵏ. ⵅ ⵓⵢⴰ ⴰⵔⵔⵉⵖ ⵜⴰⵍⵡⵉⵣⵜ ⴷ ⵜⴰⵅⵎⵓⵊⵉ ⵉ ⵏⵉⵜⵏⵉ.21ⵏⴻⵛⵛ ⴰⴷ ⵜⵜ ⵡⵛⴻⵖ ⴷ ⵜⵓⵛⵛⴻⴼⴼⵔⴰ ⴷⴻⴳ ⵓⴼⵓⵙ ⵏ ⵉⴱⴰⵔⵔⴰⵏⵉⵢⵢⴻⵏ ⵓⵛⴰ ⴰⴷ ⵜⵜ ⵡⵛⴻⵖ ⴷ ⵜⴰⴽⴻⵛⵛⴰⴹⵜ ⵉ ⵉⵄⴻⴼⴼⴰⵏⴻⵏ ⵏ ⵜⴻⵎⵎⵓⵔⵜ, ⵓⵛⴰ ⵏⵉⵜⵏⵉ ⴰⴷ ⵙⵙⵄⵉⴵⵜⴻⵏ ⵜⴰⵍⵡⵉⵣⵜ.22ⵏⴻⵛⵛ ⴰⴷ ⵅⴰⵙ ⵙⵙⴻⵏⵇⴻⵍⴱⴻⵖ ⵓⴷⴻⵎ ⵉⵏⵓ ⵓ ⵏⵉⵜⵏⵉ ⴰⴷ ⵙⵙⵄⵉⴵⵜⴻⵏ ⵜⴰⵣⴻⴷⴷⵉⵖⵜ ⵉⵏⵓ ⵉⵏⵏⵓⴼⴰⵔⴻⵏ, ⵎⴰⵖⴰⵔ ⵉⵛⴻⴼⴼⴰⵔⴻⵏ ⴰⴷ ⴷⵉⵏ ⴰⴷⴼⴻⵏ ⵓⵛⴰ ⴰⴷ ⵙⵙⵄⵉⴵⵜⴻⵏ ⵎⴰⵔⵔⴰ’.23‘ⵙⴻⵡⵊⴻⴷ ⵙⵙⵏⴻⵙⵍⴻⵜ, ⵎⵉⵏⵣⵉ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵓⵙⵉⵣⵣⴻⵍ ⵏ ⵉⴷⴰⵎⵎⴻⵏ ⵓ ⵜⴰⵏⴷⵉⵏⵜ ⵜⴻⵛⵛⵓⵔ ⵙ ⵍⵄⵓⵏⴼ.24ⵏⴻⵛⵛ ⴰⴷ ⴰⵡⵢⴻⵖ ⵍⴻⴳⵏⵓⵙ ⵉⵄⴻⴼⴼⴰⵏⴻⵏ ⵇⴰⵄ, ⵓ ⵏⵉⵜⵏⵉ ⴰⴷ ⵟⵟⴼⴻⵏ ⵜⵓⴷⵔⵉⵏ ⵏⵙⴻⵏ, ⴰⴷ ⵙⵙⴱⴻⴷⴷⴻⵏ ⵏⵏⴼⴰⵅⴻⵜ ⵏ ⴰⵢⵜ ⵏ ⵊⵊⴻⵀⴷ, ⵓⵛⴰ ⴰⴷ ⵜⵜⵡⴰⵙⵙⵄⵉⴵⵜⴻⵏⵜ ⵜⵣⴰⵡⵉⵢⵢⵉⵏ ⵏⵙⴻⵏ ⵉⵇⴻⴷⴷⵙⴻⵏ.25ⴰⴷ ⴷⴷ-ⵢⴰⵙ ⵓⵏⴻⵅⵍⵉⵄ ⴷ ⴰⵎⴻⵇⵇⵔⴰⵏ. ⵏⵉⵜⵏⵉ ⴰⴷ ⴰⵔⵣⵓⵏ ⵍⴻⵀⵏⴰ, ⵎⴰⵛⴰ ⵡⴰⵔ ⵉⵜⵜⵉⵍⵉ.26ⴰⵇⴰ ⴰⴷ ⴷⴷ-ⵢⴰⵙ ⵓⵛⴻⵍⵡⴰⵡ ⴰⵡⴰⵔⵏⵉ ⵉ ⵓⵛⴻⵍⵡⴰⵡ, ⴰⴷ ⵢⵉⵍⵉ ⵍⵀⴰⵔⴷ ⴰⵡⴰⵔⵏⵉ ⵉ ⵍⵀⴰⵔⴷ. ⵏⵉⵜⵏⵉ ⴰⴷ ⴰⵔⵣⵓⵏ ⵍⴻⵡⵃⵉⵢ ⵏ ⵓⵏⴰⴱⵉ, ⵡⴰⵅⵅⴰ ⵜⴻⵇⴹⴰ ⵛⵛⴰⵔⵉⵄⴰ ⵏ ⵓⴽⴻⵀⵀⴰⵏ ⴷ ⵛⵛⵡⴰⵔ ⵏ ⵉⵎⵖⴰⵔⴻⵏ27ⴰⵊⴻⴵⵉⴷ ⴰⴷ ⵉⵛⴹⴻⵏ, ⵍⵃⴰⴽⴻⵎ ⴰⴷ ⵢⴰⵔⴹ ⴰⵏⴻⵅⵍⵉⵄ ⵓ ⵉⴼⴰⵙⵙⴻⵏ ⵏ ⵍⴳⴻⵏⵙ ⴰⴷ ⵇⴰⵔⵔⵎⴻⵏ ⵙ ⵜⵉⴳⴳⵯⵓⴷⵉ. ⵏⴻⵛⵛ ⴰⴷ ⵣⵣⴰⵢⵙⴻⵏ ⴳⴳⴻⵖ ⴰⵎ ⵡⴻⴱⵔⵉⴷ ⵏⵙⴻⵏ ⵓ ⵏⴻⵛⵛ ⴰⴷ ⵅⴰⵙⴻⵏ ⵃⴻⴽⵎⴻⵖ ⴰⵎ ⵍⴼⴰⵔⴰⵢⵉⴹ ⵏⵙⴻⵏ. ⴰⵎⵎⵓ ⵉ ⵖⴰ ⵙⵙⵏⴻⵏ ⴰⵇⴰ ⵏⴻⵛⵛ ⴷ ⵙⵉⴷⵉ.’”