ⵃⵉⵥⵇⵉⵢⴰⵍ4rif_tti

ⴰⵔⵛⴰⵎ ⵏ ⵓⵇⴻⵡⵡⴰⵔ ⵏ ⵍⵄⴻⵙⴽⴰⵔ ⵏ ⵓⵔⵛⴰⵍⵉⵎ

1“ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⴽⵙⵉ ⵉⵛⵜ ⵏ ⵍⵓⵚⴰ ⵏ ⵜⵍⴰⵅⵜ ⵓⵛⴰ ⵙⴰⵔⵙ ⵉ-ⵜⵜ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⵓⵛⴰ ⴰⵔⵛⴻⵎ ⵅⴰⵙ ⵜⴰⵏⴷⵉⵏⵜ ⵏ ⵓⵔⵛⴰⵍⵉⵎ.2ⵇⴻⵡⵡⴰⵔ ⴰⵙ ⵓⵛⴰ ⴱⵏⴰ ⵅⴰⵙ ⵉⵊⵊ ⵏ ⵍⴱⴰⵔⴰⵊ ⵓⵛⴰ ⴻⴳⴳ ⵅⴰⵙ ⴰⵛⴱⴰⵔ, ⴻⴳⴳ ⵅⴰⵙ ⵍⴻⵎⵔⴰⴳⴻⵃ ⵏ ⵍⵄⴻⵙⴽⴰⵔ ⵓⵛⴰ ⵡⵡⴻⵜ ⵅⴰⵙ ⴷⴻⴳ ⵡⴻⵏⵏⴻⴹ ⵏⵏⴻⵙ ⵍⴻⵇⵛⵓⵄ ⵏ ⵡⴻⴷⵀⴰⵎ.3ⵓⵛⴰ ⵛⴻⴽ, ⴽⵙⵉ ⵉⵛⵜ ⵏ ⵎⴰⵔⵎⵉⵜⴰ ⵏ ⵡⵓⵣⵣⴰⵍ ⵓⵛⴰ ⴻⴳⴳ ⵉ-ⵜⵜ ⴰⵎ ⵢⵉⵊⵊ ⵏ ⵍⵃⵉⴹ ⵏ ⵡⵓⵣⵣⴰⵍ ⵊⴰⵔ ⵛⴻⴽ ⴷ ⵜⴻⵏⴷⵉⵏⵜ. ⴰⵔⵔ ⵓⴷⴻⵎ ⵏⵏⴻⵛ ⵅⴰⵙ ⵎⴰⵃⴻⵏⴷ ⴰⴷ ⵜᵉⵜⵜⵡⴰⵃⵚⴰⵔ ⵓ ⵛⴻⴽ ⴰⴷ ⵜⵜ ⵜⴻⵃⵚⴰⵔⴻⴷ: ⵎⴰⵏ ⴰⵢⴰ ⴰⴷ ⵜⵉⵍⵉ ⴷ ⵍⴻⵄⵍⴰⵎⴻⵜ ⵉ ⵜⴰⴷⴷⴰⵔⵜ ⵏ ⵉⵙⵔⴰⵉⵍ.4ⵓⵛⴰ ⵛⴻⴽ, ⴰⴷ ⵜⴻⵣⵣⵍⴻⴷ ⵅ ⵓⵖⴻⵣⴷⵉⵙ ⵏⵏⴻⵛ ⴰⵣⴻⵍⵎⴰⴹ ⵓⵛⴰ ⴰⴷ ⵅⴰⵙ ⵜⴻⴳⴳⴻⴷ ⵍⵎⵓⵄⵚⵉⵢⵢⴻⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. ⴰⵏⴻⵛⵜ ⵏ ⵓⵙⵙⴰⵏ ⵏⵏⵉ ⴷⵉ ⵅⴰⵙⴻⵏ ⵉ ⵖⴰ ⵜⴻⵣⵣⵍⴻⴷ, ⴰⴷ ⵜⴰⵔⴱⵓⴷ ⵍⵎⵓⵄⵚⵉⵢⵢⴻⵜ ⵏⵙⴻⵏ.5ⵎⴰⵖⴰⵔ ⵏⴻⵛⵛ ⴰⴷ ⵅⴰⴽ ⴳⴳⴻⵖ ⵍⵄⴰⴷⴰⴷ ⵏ ⵉⵙⴻⴳⴳⵯⵓⵙⴰ ⵏ ⵍⵎⵓⵄⵚⵉⵢⵢⴻⵜ ⵏⵙⴻⵏ ⴰⵎ ⵍⵄⴰⴷⴰⴷ ⵏ ⵡⵓⵙⵙⴰⵏ: ⵜⴻⵍⵜ-ⵎⵢⴰ ⵓ-ⵜⴻⵙⵄⵉⵏ ⵏ ⵡⵓⵙⵙⴰⵏ ⴰⴷ ⵜⴰⵔⴱⵓⴷ ⵍⵎⵓⵄⵚⵉⵢⵢⴻⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ.6ⵅⵎⵉ ⵉ ⵖⴰ ⵜⴽⴻⵎⵎⵍⴻⴷ ⵓⵙⵙⴰⵏ ⵏⵏⵉ, ⴰⴷ ⵜⴻⵣⵣⵍⴻⴷ ⵄⴰⵡⴻⴷ ⵅ ⵓⵖⴻⵣⴷⵉⵙ ⵏⵏⴻⵛ ⴰⴼⵓⵙⵉ ⵓⵛⴰ ⴰⴷ ⵜⴰⵔⴱⵓⴷ ⵍⵎⵓⵄⵚⵉⵢⵢⴻⵜ ⵏ ⵜⴰⴷⴷⴰⵔⵜ ⵏ ⵢⴰⵀⵓⴷⴰ, ⴰⵔⴻⴱⵄⵉⵏ ⵏ ⵡⵓⵙⵙⴰⵏ. ⵉⵊⵊ ⵏ ⵡⴰⵙⵙ ⵉ ⵢⵉⵊⵊ ⵏ ⵓⵙⴻⴳⴳⵯⴰⵙ, ⴰⵎ ⵎⴰⵎⵎⴻⵛ ⵉ ⴷ ⴰⵛ ⵓⵎⵓⵔⴻⵖ.7ⴰⴷ ⵜⴻⵇⵇⵉⵎⴻⴷ ⵜᵉⵜⵜⴰⵔⵔⴻⴷ ⵓⴷⴻⵎ ⵏⵏⴻⵛ ⵖⴰⵔ ⵍⴻⵃⵚⴰⵔⴻⵜ ⵏ ⵓⵔⵛⴰⵍⵉⵎ ⵓⵛⴰ ⴰⴷ ⵜⵄⴰⵔⵔⵉⴷ ⴰⵖⵉⵍ ⵏⵏⴻⵛ, ⴰⴷ ⵜⵏⴻⴱⴱⵉⴷ ⴹⵉⴷⴷ ⵏⵏⴻⵙ.8ⵅⵣⴰⵔ, ⵏⴻⵛⵛ ⴰⴷ ⵅⴰⴽ ⴳⴳⴻⵖ ⵜⵉⵙⵖⵓⵏⵉⵏ ⴰⵍⴰⵎⵉ ⵡⴰⵔ ⵜⵣⴻⵎⵎⴰⵔⴻⴷ ⴰⴷ ⵜⴻⵏⵏⵇⴻⵍⴱⴻⴷ ⵣⴻⴳ ⵉⵊⵊ ⵏ ⵓⵖⴻⵣⴷⵉⵙ ⵖⴰⵔ ⵓⵖⴻⵣⴷⵉⵙ ⵏⵏⴻⵖⵏⵉ ⴰⵍ ⵖⴰ ⵜⴽⴻⵎⵎⵍⴻⴷ ⵓⵙⵙⴰⵏ ⵏ ⵍⴻⵃⵚⴰⵔⴻⵜ ⵏⵏⴻⵛ.”9“ⴽⵙⵉ ⵉⵔⴷⴻⵏ, ⵉⵎⴻⵏⴷⵉ, ⵉⴱⴰⵡⴻⵏ, ⵍⴻⵄⴷⴻⵙ, ⵜⴰⴼⵙⴰⵡⵜ ⴷ ⴽⴰⵔⵚⴰⵏⴰ ⵓⵛⴰ ⴻⴳⴳ ⵉ-ⵜⴻⵏ ⴷⵉ ⵜⴻⴱⵇⴻⵛⵜ ⵓⵛⴰ ⴻⴳⴳ ⵣⵣⴰⵢⵙⴻⵏ ⴰⵖⵔⵓⵎ ⵉ ⵢⵉⵅⴻⴼ ⵏⵏⴻⵛ. ⴰⴷ ⵜⴻⵛⵛⴻⴷ ⴰⵢⴰ ⴰⵎ ⵎⴻⵛⵃⴰⵍ ⵍⵄⴰⴷⴰⴷ ⵏ ⵡⵓⵙⵙⴰⵏ ⵏⵏⵉ ⵉ ⵖⴰ ⵜⴻⵣⵣⵍⴻⴷ ⵅ ⵓⵖⴻⵣⴷⵉⵙ ⵏⵏⴻⵛ, ⵜⴻⵍⵜ-ⵎⵢⴰ ⵓ-ⵜⴻⵙⵄⵉⵏ ⵏ ⵡⵓⵙⵙⴰⵏ.10ⵎⴰⵛⵛⴰ ⵏⵏⵉ ⵉ ⵖⴰ ⵜⴻⵛⵛⴻⴷ ⴰⴷ ⵜᵉⵜⵜⵡⴰⵡⵣⴻⵏ: ⵄⵉⵛⵔⵉⵏ ⵛⵉⵇⵍⵓ ⵉ ⵢⵉⵊⵊ ⵏ ⵡⴰⵙⵙ. ⴰⴷ ⵜⵜ ⵜⴻⵛⵛⴻⴷ ⴷⵉ ⵜⵙⴰⵄⵄⴻⵜⵉⵏ ⵉⵜⵜⵡⴰⴳⴳⴻⵏ.11ⴰⴷ ⵜⴻⵙⵡⴻⴷ ⴰⵎⴰⵏ ⵙ ⵍⴻⵄⴱⴰⵔ: ⵉⵛⵜ ⵏ ⵜⵙⵉⵜⵜⵓⵜ ⵣⴻⴳ ⵉⵊⵊ ⵏ ⵓⵀⵉⵏⵓ. ⴰⴷ ⵜⵜ ⵜⴻⵙⵡⴻⴷ ⵣⵉ ⵍⵡⴻⵇⵜ ⴰⵍ ⵍⵡⴻⵇⵜ ⵏⵏⴻⵖⵏⵉ.12ⴰⴷ ⵜⴻⵛⵛⴻⴷ ⵉⵛⵜ ⵏ ⵜⵅⴻⴱⴱⴰⵣⵜ ⵏ ⵉⵎⴻⵏⴷⵉ ⵓⵛⴰ ⴰⴷ ⵜⵜ ⵜᵉⵙⵙⴻⵏⴳⴳⵯⴻⴷ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ ⵅ ⵉⵥⵥⴰⵏ ⵉ ⴷⴷ-ⵉⴼⴼⵖⴻⵏ ⵣⵉ ⴱⵏⴰⴷⴻⵎ.”13ⵉⵏⵏⴰ ⵙⵉⴷⵉ: “ⴰⵎⵎⵓ ⵉ ⵖⴰ ⵛⵛⴻⵏ ⴰⵢⵜ ⵏ ⵉⵙⵔⴰⵉⵍ ⴰⵖⵔⵓⵎ ⵏⵙⴻⵏ ⵉⵅⴻⵎⵊⴻⵏ ⵊⴰⵔ ⵍⴻⴳⵏⵓⵙ ⵎⴰⵏⵉ ⵜⴻⵏ ⵖⴰⵔ ⵉ ⵖⴰ ⵙⵙⵓⴼⴼⵖⴻⵖ.”14ⵅⴻⵏⵏⵉ ⵏⵏⵉⵖ: “ⴰ, ⵙⵉⴷⵉ ⵉⵏⵓ, ⵙⵉⴷⵉ, ⵅⵣⴰⵔ, ⵍⴻⵄⵎⴰⵔ ⵉⵏⵓ ⵡⴰⵔ ⵉⵜⵜⵡⴰⵙⵙⴻⵅⵎⴻⵊ ⵄⴻⵎⵎⴰⵔⵚ ⵙ ⵎⴰⵛⵛⴰ ⵡⴰⵔ ⵉⵃⵍⵉⵏ. ⵣⵉ ⵜⴻⵎⵥⵉ ⵉⵏⵓ ⴰⵍ ⵍⴻⵅⵅⵓ ⵏⴻⵛⵛ ⵡⴰⵔ ⵛⵛⵉⵖ ⵍⵅⴻⵛⴱⴻⵜ ⵏⵉⵖ ⵎⵉⵏ ⵉⵎⴻⵣⵣⵇⴻⵏ ⵓ ⵄⴻⵎⵎⴰⵔⵚ ⵡⴰⵔ ⵢⵓⴷⵉⴼ ⵡⴻⵢⵙⵓⵎ ⵏ ⵊⵊⵄⵉⴼⴻⵛⵜ ⵖⴰⵔ ⵓⵇⴻⵎⵎⵓⵎ ⵉⵏⵓ.”15ⵓⵛⴰ ⵏⴻⵜⵜⴰ ⵉⵏⵏⴰ ⴰⵢⵉ: “ⵅⵣⴰⵔ, ⴰⴷ ⴰⵛ ⵡⵛⵉⵖ ⵍⴻⵖⴱⴰⵔ ⵏ ⵉⴼⵓⵏⴰⵙⴻⵏ ⴷⴻⴳ ⵡⴻⵎⵛⴰⵏ ⵏ ⵓⴱⴰⵔⵔⵓⴹ ⵏ ⴱⵏⴰⴷⴻⵎ. ⵙⴻⵡⵊⴻⴷ ⵅⴰⵙ ⴰⵖⵔⵓⵎ ⵏⵏⴻⵛ.”16ⵅⴻⵏⵏⵉ ⵉⵏⵏⴰ ⴰⵢⵉ: “ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵅⵣⴰⵔ, ⴰⴷ ⴰⵔⵥⴻⵖ ⵍⴻⵄⵡⴻⵍⵜ ⵏ ⵡⴻⵖⵔⵓⵎ ⴷⵉ ⵓⵔⵛⴰⵍⵉⵎ ⵓⵛⴰ ⵏⵉⵜⵏⵉ ⴰⴷ ⵛⵛⴻⵏ ⴰⵖⵔⵓⵎ ⵙ ⵍⴻⵡⵣⴻⵏ ⵙ ⵓⵏⴻⵅⵍⵉⵄ ⵓⵛⴰ ⵙ ⴰⵔⵊⴻⴼ ⴰⴷ ⵙⵡⴻⵏ ⴰⵎⴰⵏ ⵙ ⵍⴻⵄⴱⴰⵔ,17ⵎⵉⵏⵣⵉ ⴰⴷ ⴰⵙⴻⵏ ⵉⵜⵜⵅⴻⵚⵚⴰ ⵡⴻⵖⵔⵓⵎ ⴷ ⵡⴰⵎⴰⵏ. ⵏⵉⵜⵏⵉ ⴰⴷ ⵅⵣⴰⵔⴻⵏ ⴰⵢⴰⵡⵢⴰ ⵙ ⴰⵔⵊⴻⴼ ⵓⵛⴰ ⴰⴷ ⴷⴻⵡⵍⴻⵏ ⴰⵔⵚⵓⴹⴻⵏ ⴷⵉ ⵍⵎⵓⵄⵚⵉⵢⵢⴻⵜ ⵏⵙⴻⵏ.”
expand_more
Search