2 ⵉⵎⴻⵥⵔⵓⵢⴻⵏ32rif_tti
ⴰⵀⴻⵊⵊⴻⵎ ⵏ ⵙⴰⵏⵃⴰⵔⵉⴱ ⴷ ⵡⴻⵄⵇⴻⴱ ⵏⵏⴻⵙ
1ⴰⵡⴰⵔⵏⵉ ⵜⴻⵎⵙⴰⵔⵉⵏ-ⴰ ⴷ ⵡⴻⵙⵛⴰⵏ-ⴰ ⵏ ⵍⴰⵎⴰⵏ, ⵢⵓⵙⴰ-ⴷⴷ ⵙⴰⵏⵃⴰⵔⵉⴱ, ⴰⵊⴻⴵⵉⴷ ⵏ ⴰⵛⵛⵓⵔ. ⵏⴻⵜⵜⴰ ⵢⵓⴷⴻⴼ ⵖⴰⵔ ⵢⴰⵀⵓⴷⴰ ⵓⵛⴰ ⵉⵏⵏⴻⴹ ⵉ ⵜⵏⴻⴷⴷⴰⵎ ⵉⴼⴰⵔⵢⴻⵏ, ⵉⵜⵜⵖⵉⵍ ⴰⵙ ⴰⴷ ⵜⴻⵏⵜ ⵉⵟⵟⴻⴼ ⵉ ⵢⵉⵅⴻⴼ ⵏⵏⴻⵙ.2ⵉⵥⵔⴰ ⵃⵉⵣⵇⵉⵢⴰ, ⴰⵇⴰ ⵙⴰⵏⵃⴰⵔⵉⴱ ⵢⵓⵙⴰ-ⴷⴷ ⵓⵛⴰ ⵉⵏⵡⴰ ⴰⴷ ⵉⵃⵊⴻⵎ ⵅ ⵓⵔⵛⴰⵍⵉⵎ.3ⵏⴻⵜⵜⴰ ⵉⵎⵛⴰⵡⴰⵔ ⴰⴽ-ⴷ ⵍⵃⵓⴽⴽⴰⵎ ⵏⵏⴻⵙ ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵏⵏⴻⵙ, ⵎⴰⵃⴻⵏⴷ ⴰⴷ ⵏⴻⵜⵢⴻⵏ ⵜⴰⵍⴰⵡⵉⵏ ⵏ ⵡⴰⵎⴰⵏ ⴱⴰⵔⵔⴰ ⵉ ⵜⴻⵏⴷⵉⵏⵜ, ⵓ ⵏⵉⵜⵏⵉ ⵡⵛⵉⵏ ⴰⵙ ⴰⴼⵓⵙ.4ⵉⵡⵢⴻⵏ-ⴷⴷ ⴰⵟⵟⴰⵙ ⵣⵉ ⵍⴳⴻⵏⵙ ⵓⵛⴰ ⵏⴻⵜⵢⴻⵏ ⵎⴰⵔⵔⴰ ⵜⴰⵍⴰⵡⵉⵏ ⵓⵍⴰ ⴷ ⵜⴻⵖⵣⴰⵔⵜ ⵉ ⴷ ⵉⵜⵜⴰⵣⵣⵍⴻⵏ ⴷⵉ ⵍⵡⴻⵙⵟ ⵏ ⵜⴻⵎⵎⵓⵔⵜ, ⵏⵏⴰⵏ: “ⵎⴰⵢⴻⵎⵎⵉ ⵉ ⴷⴷ ⵖⴰ ⵢⴰⵙⴻⵏ ⵉⵊⴻⴵⵉⴷⴻⵏ ⵏ ⴰⵛⵛⵓⵔ ⵓⵛⴰ ⴰⴷ ⴰⴼⴻⵏ ⴰⵟⵟⴰⵙ ⵏ ⵡⴰⵎⴰⵏ?”5ⵏⴻⵜⵜⴰ ⵉⵙⵙⴻⵊⵀⴻⴷ ⵜⴰⵏⴷⵉⵏⵜ, ⵉⵄⴷⴻⵍ ⵎⴰⵔⵔⴰ ⵍⵃⵉⴹ ⵉ ⵜⵓⵖⴰ ⵉⵜⵜⵡⴰⵔⵥⴻⵏ ⴷ ⵉⵡⴻⵜⵡⵉⵜⴻⵏ ⵓⵛⴰ ⵢⴰⵔⵔⴰ ⵉ-ⵜ ⴰⴷ ⵉⴳⴻⵄⵄⴻⴷ ⴰⵍ ⵚⵚⵓⵎⵄⴰⵜ. ⵓ ⵖⴰⵔ ⴱⴰⵔⵔⴰ ⵉⵄⴷⴻⵍ ⵄⴰⴷ ⵉⵊⵊ ⵏ ⵍⵃⵉⴹ ⵏⵏⴻⵖⵏⵉ. ⵏⴻⵜⵜⴰ ⵉⵙⵙⴻⵊⵀⴻⴷ ⵍⵇⴻⵍⵄⴰ ⵏ ⵜⴻⵏⴷⵉⵏⵜ ⵏ ⴷⴰⵡⵓⴷ ⵓⵛⴰ ⵉⴳⴳⴰ ⴰⵟⵟⴰⵙ ⵏ ⵍⴰⵏⵙⴰⵜ ⴷ ⵜⵙⴻⴷⴷⴰⵔⵉⵢⵉⵏ ⵏ ⵓⵄⴻⵙⴽⴰⵔⵉ.6ⵏⴻⵜⵜⴰ ⵉⴳⴳⴰ ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔⴰⵜ ⵅ ⵍⴳⴻⵏⵙ ⵓⵛⴰ ⵉⵙⵙⵎⵓⵏ ⵉ-ⵜⴻⵏ ⵖⴰⵔⴻⵙ ⴷⴻⴳ ⵡⴰⵣⵣⴰⵢ ⵏ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵓⵛⴰ ⵉⵙⵙⵉⵡⴻⵍ ⴰⵍⴰⵎⵉ ⴷⴰⵢⵙⴻⵏ ⵉⴳⴳⴰ ⵓⵍ, ⵉⵏⵏⴰ:7“ⵉⵍⵉⵎ ⴷ ⵉⵔⵢⴰⵣⴻⵏ ⵓ ⵉⵍⵉⵎ ⵜⵎⴻⵃⴹⴻⵎ, ⵡⴰⵔ ⵜⵜⵏⴻⵅⵍⵉⵄⴻⵎ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⵏ ⴰⵛⵛⵓⵔ ⵓⵍⴰ ⵣⵣⴰⵜ ⵉ ⵡⵓⴷⴻⵎ ⵏ ⵎⴰⵔⵔⴰ ⵍⵖⴰⵛⵉ ⵏⵏⵉ ⵖⴰⵔⴻⵙ ⵉⴵⴰⵏ, ⵎⴰⵖⴰⵔ ⵡⴻⵏⵏⵉ ⵖⴰⵔⵏⴻⵖ ⴰⵇⴰ-ⵜ ⴷⴻⴳ ⵡⴰⵟⵟⴰⵙ ⵅ ⵡⴻⵏⵏⵉ ⵖⴰⵔⴻⵙ.8ⵖⴰⵔⴻⵙ ⵉⵊⵊ ⵏ ⵓⵖⵉⵍ ⵏ ⵡⴻⵢⵙⵓⵎ ⵏ ⴱⵏⴰⴷⴻⵎ, ⵎⴰⵛⴰ ⵖⴰⵔⵏⴻⵖ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵃⵉⵎⴰ ⴰⴷ ⴰⵏⴻⵖ ⵉⵡⵛ ⴰⴼⵓⵙ ⵓ ⵃⵉⵎⴰ ⴰⴷ ⵉⵎⵎⵏⴻⵖ ⴰⵎⴻⵏⵖⵉ ⵏⵏⴻⵖ.” ⵓⵛⴰ ⵍⴳⴻⵏⵙ ⵉⵜⵜⴻⵛⵛⴻⵍ ⵅ ⵡⴰⵡⴰⵍⴻⵏ ⵏ ⵃⵉⵣⵇⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ.9ⴰⵡⴰⵔⵏⵉ ⵎⴰⵏ ⴰⵢⴰ ⵉⵙⵙⴻⴽⴽ ⵙⴰⵏⵃⴰⵔⵉⴱ, ⴰⵊⴻⴵⵉⴷ ⵏ ⴰⵛⵛⵓⵔ, ⵉⵎⵙⴻⵅⵅⴰⵔⴻⵏ ⵏⵏⴻⵙ ⵖⴰⵔ ⵓⵔⵛⴰⵍⵉⵎ, ⴰⵎ ⵜⵓⵖⴰ ⵏⴻⵜⵜⴰ ⵣⵣⴰⵜ ⵉ ⵍⴰⵅⵉⵛ ⴷ ⵎⴰⵔⵔⴰ ⵍⵃⵓⴽⴽⴰⵎ ⵏⵏⴻⵙ ⴰⴽⵉⴷⴻⵙ. ⵉⵙⵙⴻⴽⴽ ⵉ-ⵜⴻⵏ ⵖⴰⵔ ⵃⵉⵣⵇⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵓ ⵖⴰⵔ ⵎⴰⵔⵔⴰ ⵍⴳⴻⵏⵙ ⵏ ⵢⴰⵀⵓⴷⴰ ⵏⵏⵉ ⵉⴵⴰⵏ ⴷⵉ ⵓⵔⵛⴰⵍⵉⵎ, ⵉⵏⵏⴰ:10“ⴰⵎⵎⵓ ⵉ ⵉⵏⵏⴰ ⵙⴰⵏⵃⴰⵔⵉⴱ, ⴰⵊⴻⴵⵉⴷ ⵏ ⴰⵛⵛⵓⵔ: ‘ⵎⵉⵏ ⵅⴻⴼ ⵜᵉⵜⵜⴻⵛⵍⴻⵎ ⴽⴻⵏⵏⵉⵡ, ⵣⴻⵄⵎⴰ ⴽⴻⵏⵏⵉⵡ ⵜⵣⴻⵎⵎⴰⵔⴻⵎ ⴰⴷ ⵜⴻⵇⵇⵉⵎⴻⵎ ⴷⵉ ⵓⵔⵛⴰⵍⵉⵎ ⴰⵎ ⵜᵉⵜⵜⵡⴰⵃⵚⴰⵔⴻⵎ?11ⵎⴰ ⵡⴰⵔ ⵢⴰⵔⴻⵣⵣⵓ ⵃⵉⵣⵇⵉⵢⴰ ⴰⴷ ⴽⴻⵏⵏⵉⵡ ⵉⵖⵡⴰ, ⵃⵉⵎⴰ ⴰⴷ ⴽⴻⵏⵏⵉⵡ ⵉⵙⴻⵍⵍⴻⵎ ⵉ ⵍⵎⴻⵡⵜ ⵣⵉ ⵍⴰⵥ ⴷ ⵓⴼⴰⴷⵉ ⵅⵎⵉ ⵉⵇⵇⴰⵔ: ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴰⴷ ⴰⵏⴻⵖ ⵉⴼⴻⴽⴽ ⵣⴻⴳ ⵓⴼⵓⵙ ⵏ ⵓⵊⴻⴵⵉⴷ ⵏ ⴰⵛⵛⵓⵔ!?12ⵎⴰ ⵡⴰⵔ ⵉⴽⴽⵉⵙ ⵃⵉⵣⵇⵉⵢⴰ ⵏⵏⵉ ⵓⵍⴰ ⴷ ⵍⴻⴳⵄⵓⴷⵉ ⵏⵏⴻⵙ ⴷ ⵉⵄⴰⵍⵟⴰⵔⴻⵏ ⵏⵏⴻⵙ, ⵓ ⵎⴰ ⵡⴰⵔ ⵉⵙⵙⵉⵡⴻⵍ ⵏⴻⵜⵜⴰ ⴰⴽ-ⴷ ⵢⴰⵀⵓⴷⴰ ⴷ ⵓⵔⵛⴰⵍⵉⵎ, ⵉⵏⵏⴰ: ⵎⵖⵉⵔ ⵉ ⵢⵉⵊⵊ ⵏ ⵓⵄⴰⵍⵟⴰⵔ ⴰⴷ ⵜⴱⴻⵏⴷⵇⴻⵎ ⵓ ⴰⴷ ⵅⴰⵙ ⵜⴰⵡⵢⴻⵎ ⵍⴻⴱⵅⵓⵔ!?13ⵎⴰ ⵡⴰⵔ ⵜⴻⵙⵙⵉⵏⴻⵎ ⴽⴻⵏⵏⵉⵡ ⵎⵉⵏ ⴳⴳⵉⵖ ⵏⴻⵛⵛ ⴷ ⵍⴻⵊⴷⵓⴷ ⵉⵏⵓ ⵙ ⵎⴰⵔⵔⴰ ⵍⴻⴳⵏⵓⵙ ⵏ ⵜⴻⵎⵎⵓⵔⴰ? ⵎⴰ ⴼⴻⴽⴽⴻⵏ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⵏ ⵜⴻⵎⵎⵓⵔⴰ ⵏⵏⵉ ⵜⴰⵎⵎⵓⵔⵜ ⵏⵙⴻⵏ ⵣⴻⴳ ⵓⴼⵓⵙ ⵉⵏⵓ?14ⵎⴰⵏ ⵡⴻⵏ ⵣⵉ ⵊⴰⵔ ⵎⴰⵔⵔⴰ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⵏⵏⵉ ⵅ ⵇⴹⴰⵏ ⵍⴻⵊⴷⵓⴷ ⵉⵏⵓ, ⵜⵓⵖⴰ ⵉⵣⴻⵎⵎⴰⵔ ⴰⴷ ⵉⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⵙ ⵣⴻⴳ ⵓⴼⵓⵙ ⵉⵏⵓ, ⴰⵍⴰⵎⵉ ⴰⵔⴻⴱⴱⵉ ⵏⵡⴻⵎ ⵉⵣⴻⵎⵎⴰⵔ ⴰⴷ ⴽⴻⵏⵏⵉⵡ ⵉⴼⴻⴽⴽ ⵣⴻⴳ ⵓⴼⵓⵙ ⵉⵏⵓ?15ⵅⴻⵏⵏⵉ ⵍⴻⵅⵅⵓ, ⵡⴰⵔ ⵜⵜⴻⵊⵊⵉⵎ ⵃⵉⵣⵇⵉⵢⴰ ⴰⴷ ⴽⴻⵏⵏⵉⵡ ⵉⵛⵎⴻⵜ ⵓ ⵡⴰⵔ ⵜ ⵜⵜⴻⵊⵉⵎ ⴰⴷ ⴽⴻⵏⵏⵉⵡ ⵉⵙⵙⵖⴻⴽⴽⵡⵉ ⴰⵎⵎⵓ. ⵡⴰⵔ ⵜᵉⵜⵜⵉⵇⵇⴰⵎ ⵛⴰ, ⵎⴰⵖⴰⵔ ⵓⵍⴰ ⴷ ⵉⵊⵊ ⵏ ⴰⵔⴻⴱⴱⵉ ⵣⵉ ⵎⴰⵏ ⵎⴰ ⵍⴳⴻⵏⵙ ⵏⵉⵖ ⵜⴰⴳⴻⵍⴷⵉⵜ ⵜⵓⵖⴰ ⵉⵣⴻⵎⵎⴰⵔ ⴰⴷ ⵉⴼⴻⴽⴽ ⵍⴳⴻⵏⵙ ⵏⵏⴻⵙ ⵣⴻⴳ ⵓⴼⵓⵙ ⵉⵏⵓ ⵏⵉⵖ ⵣⴻⴳ ⵓⴼⵓⵙ ⵏ ⵍⴻⵊⴷⵓⴷ ⵉⵏⵓ. ⵎⴻⵛⵃⴰⵍ ⵇⴻⵍⵍ ⵄⴰⴷ ⴰⵔⴻⴱⴱⵉ ⵏⵡⴻⵎ ⴰⴷ ⴽⴻⵏⵏⵉⵡ ⵉⴼⴻⴽⴽ ⵣⴻⴳ ⵓⴼⵓⵙ ⵉⵏⵓ!’”16ⵓⵛⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵙⵙⵉⵡⵍⴻⵏ ⵄⴰⴷ ⴽⵜⴰⵔ ⴹⵉⴷⴷ ⵉ ⵙⵉⴷⵉ ⴰⵔⴻⴱⴱⵉ ⵓ ⴹⵉⴷⴷ ⵉ ⵓⵎⵙⴻⵅⵅⴰⵔ ⵏⵏⴻⵙ ⵃⵉⵣⵇⵉⵢⴰ.17ⵏⴻⵜⵜⴰ ⵢⵓⵔⴰ ⵄⴰⵡⴻⴷ ⵜⵉⴱⵔⴰⵜⵉⵏ ⵃⵉⵎⴰ ⴰⴷ ⵉⵙⵙⴻⵃⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵓ ⵃⵉⵎⴰ ⴰⴷ ⵅⴰⵙ ⵉⵙⵙⵉⵡⴻⵍ ⴷⴰⵢⵙⴻⵏⵜ, ⵓⵛⴰ ⵉⵏⵏⴰ: “ⴰⵎ ⵎⴰⵎⵎⴻⵛ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⵏ ⵜⴻⵎⵎⵓⵔⴰ, ⵉⵏⵏⵉ ⵡⴰⵔ ⵉⵣⴻⵎⵎⴰⵔⴻⵏ ⴰⴷ ⴼⴻⴽⴽⴻⵏ ⵍⴳⴻⵏⵙ ⵏⵙⴻⵏ ⵣⴻⴳ ⵓⴼⵓⵙ ⵉⵏⵓ, ⴰⵎⵎⵓ ⵡⴰⵔ ⵉⵣⴻⵎⵎⴰⵔ ⴰⵔⴻⴱⴱⵉ ⵏ ⵃⵉⵣⵇⵉⵢⴰ ⴰⴷ ⵉⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⵙ ⵣⴻⴳ ⵓⴼⵓⵙ ⵉⵏⵓ!”18ⵏⵉⵜⵏⵉ ⵙⵖⵓⵢⴻⵏ ⵙ ⵊⵊⴻⵀⴷ ⵙ ⵢⵉⵍⴻⵙ ⵏ ⵜⵢⴰⵀⵓⴷⴻⵛⵜ ⵖⴰⵔ ⵍⴳⴻⵏⵙ ⵏ ⵓⵔⵛⴰⵍⵉⵎ ⵏⵏⵉ ⵉⴱⴻⴷⴷⴻⵏ ⵅ ⵍⵃⵉⴹ ⵃⵉⵎⴰ ⴰⴷ ⵜⴻⵏ ⵙⵙⵉⴳⴳⵯⵉⴷⴻⵏ ⵓ ⴰⴷ ⵜⴻⵏ ⵙⵙⵅⴰⵔⴻⵡⴹⴻⵏ, ⵎⴰⵃⴻⵏⴷ ⵣⴻⵎⵎⴰⵔⴻⵏ ⴰⴷ ⵟⵟⴼⴻⵏ ⵜⴰⵏⴷⵉⵏⵜ.19ⵏⵉⵜⵏⵉ ⵙⵙⵉⵡⵍⴻⵏ ⵅ ⴰⵔⴻⴱⴱⵉ ⵏ ⵓⵔⵛⴰⵍⵉⵎ ⴰⵎ ⵅ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⵏ ⵎⴰⵔⵔⴰ ⵜⴰⵎⵎⵓⵔⵜ, ⵉⵏⵏⵉ ⵉⴵⴰⵏ ⵎⵖⵉⵔ ⵍⵅⴻⴷⵎⴻⵜ ⵏ ⵉⵡⴷⴰⵏ ⵡⴰⵀⴰ.20ⴰⵊⴻⴵⵉⴷ ⵃⵉⵣⵇⵉⵢⴰ ⴷ ⵓⵏⴰⴱⵉ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ, ⵥⵥⵓⴵⴻⵏ ⵅ ⵎⴰⵏ ⴰⵢⴰ, ⵍⴰⵖⴰⵏ ⵖⴰⵔ ⵓⵊⴻⵏⵏⴰ.21ⵓⵛⴰ ⵉⵙⵙⴻⴽⴽ-ⴷⴷ ⵙⵉⴷⵉ ⵉⵊⵊ ⵏ ⵍⵎⴰⵍⴰⴽ, ⵡⴻⵏⵏⵉ ⵉⵇⴹⴰⵏ ⵅ ⵎⴰⵔⵔⴰ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ ⴷ ⵍⵃⵓⴽⴽⴰⵎ ⴷ ⵉⵎⴻⵇⵇⵔⴰⵏⴻⵏ ⴷⵉ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ ⵏ ⵓⵊⴻⴵⵉⴷ ⵏ ⴰⵛⵛⵓⵔ. ⵅⴻⵏⵏⵉ ⵉⴷⵡⴻⵍ-ⴷⴷ ⵏⴻⵜⵜⴰ ⵖⴰⵔ ⵜⴻⵎⵎⵓⵔⵜ ⵏⵏⴻⵙ ⵙ ⵍⴻⵃⵢⴰ ⵅ ⵓⵖⴻⵎⴱⵓⴱ. ⵓⵎⵉ ⴷⴷ-ⵢⵓⵙⴰ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏⵏⴻⵙ, ⴰⵇⴰ ⵉⵏⵏⵉ ⴷⴷ-ⵉⴼⴼⵖⴻⵏ ⵣⵉ ⴰⵔⵔⵉⵎⴻⵜ ⵏⵏⴻⵙ, ⵏⵖⵉⵏ ⵜ ⵙ ⵙⵙⵉⴼ.22ⴰⵎⵎⵓ ⵉ ⵉⵙⵙⴻⵏⵊⴻⵎ ⵙⵉⴷⵉ ⵃⵉⵣⵇⵉⵢⴰ ⴷ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⵣⴻⴳ ⵓⴼⵓⵙ ⵏ ⵙⴰⵏⵃⴰⵔⵉⴱ, ⴰⵊⴻⴵⵉⴷ ⵏ ⴰⵛⵛⵓⵔ, ⵓ ⵣⴻⴳ ⵓⴼⵓⵙ ⵏ ⵎⴰⵔⵔⴰ. ⵏⴻⵜⵜⴰ ⵜⵓⵖⴰ ⵉⵙⵙⴰⵔⴻⵢⵢⴻⵃ ⵉ-ⵜⴻⵏ ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏⵙⴻⵏ.23ⴰⵟⵟⴰⵙ ⵉ ⴷⴷ ⵢⵉⵡⵢⴻⵏ ⵜⵉⵡⵀⵉⴱⵉⵏ ⵖⴰⵔ ⵙⵉⴷⵉ ⴷⵉ ⵓⵔⵛⴰⵍⵉⵎ, ⵓⵍⴰ ⴷ ⵍⴻⵇⵛⵓⵄ ⵉⵖⵍⴰⵏ ⵖⴰⵔ ⵃⵉⵣⵇⵉⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ. ⵙⵙⴻⵏⵏⵉ ⵜⵓⵖⴰ ⵖⴰⵔⴻⵙ ⵍⴻⵡⵇⴰⵔ ⴷ ⴰⵎⴻⵇⵇⵔⴰⵏ ⴷⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵍⴻⴳⵏⵓⵙ.ⵍⴻⵀⵍⴰⵛ ⵏ ⵃⵉⵣⵇⵉⵢⴰ, ⴰⵙⴳⴻⵏⴼⵉ ⵏⵏⴻⵙ ⴷ ⵍⵎⴻⵡⵜ ⵏⵏⴻⵙ24ⴷⴻⴳ ⵡⵓⵙⵙⴰⵏ ⵏⵏⵉ ⵉⴷⵡⴻⵍ ⵃⵉⵣⵇⵉⵢⴰ ⵉⵀⵍⴻⵛ ⵙ ⵉⵊⵊ ⵏ ⵍⴻⵃⵍⴰⵛ ⵉⵏⴻⵇⵇⴻⵏ ⴰⵍⴰⵎⵉ ⵜⵓⵖⴰ ⵉⴳⴳⵓⵔ ⴰⴷ ⵉⵎⵎⴻⵜ. ⵉⵥⵥⵓⴵ ⵖⴰⵔ ⵙⵉⴷⵉ ⵓ ⵡⴰⵏⵉⵜⴰ ⵉⵙⵙⵉⵡⴻⵍ-ⴷⴷ ⵖⴰⵔⴻⵙ ⵓⵛⴰ ⵉⵡⵛⴰ ⴰⵙ-ⴷⴷ ⵉⵛⵜ ⵏ ⵍⴻⵄⵍⴰⵎⴻⵜ.25ⵎⴰⵛⴰ ⵃⵉⵣⵇⵉⵢⴰ ⵡⴰⵔ ⵉⴳⴳⵉ ⵄⵍⴰⵃⵙⴰⴱ ⵜⵛⵓⵏⵉ ⵉ ⴷ ⴰⵙ ⵉⵜⵜⵡⴰⵙⵙⴻⵛⵏⴻⵏ, ⵎⴰⵖⴰⵔ ⵓⵍ ⵏⵏⴻⵙ ⵉⴷⵡⴻⵍ ⴷⴰⵢⴻⵙ ⵏⵏⴼⴰⵅⴻⵜ. ⵅ ⵓⵢⴰ ⵢⵓⵙⴰ-ⴷⴷ ⵉⵊⵊ ⵏ ⵓⴷⵓⵇⵇⴻⵣ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵅⴰⵙ, ⵅ ⵢⴰⵀⵓⴷⴰ ⵓ ⵅ ⵓⵔⵛⴰⵍⵉⵎ.26ⵃⵉⵣⵇⵉⵢⴰ ⵎⴰⵛⴰ ⵉⵙⵙⵡⴰⴹⴻⵄ ⵉⵅⴻⴼ ⵏⵏⴻⵙ ⴷⵉ ⵙⵙⵉⴱⴱⴻⵜ ⵏ ⵏⵏⴼⴰⵅⴻⵜ ⵏ ⵡⵓⵍ ⵏⵏⴻⵙ, ⴰⵎ ⵏⴻⵜⵜⴰ ⴰⵎ ⵢⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ, ⴰⵍⴰⵎⵉ ⴰⴷⵓⵇⵇⴻⵣ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵏ ⵙⵉⴷⵉ ⵡⴰⵔ ⵅⴰⵙⴻⵏ ⴷⴷ-ⵢⵓⵙⵉ ⴷⴻⴳ ⵡⵓⵙⵙⴰⵏ ⵏ ⵃⵉⵣⵇⵉⵢⴰ.27ⵃⵉⵣⵇⵉⵢⴰ ⵜⵓⵖⴰ ⵖⴰⵔⴻⵙ ⴰⴳⵍⴰ ⴷ ⵛⵛⴰⵏ ⵙ ⵡⴰⵟⵟⴰⵙ. ⵏⴻⵜⵜⴰ ⵉⴳⴳⴰ ⵉ ⵉⵅⴻⴼ ⵏⵏⴻⵙ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵉ ⵏⵏⵓⵇⴰⵔⵜ, ⵉ ⵡⵓⵔⴻⵖ, ⵉ ⵢⴻⵥⵔⴰ ⵉⵖⵍⴰⵏ, ⵉ ⵍⴻⵄⵟⵓⵔ, ⵉ ⵜⵙⴻⴷⴷⴰⵔⵉⵢⵉⵏ ⵏ ⵓⵄⴻⵙⴽⴰⵔⵉ ⵓ ⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷ ⵍⴻⵇⵛⵓⵄ ⵉⵖⵍⴰⵏ.28ⵉⴳⴳⴰ ⵓⵍⴰ ⴷ ⵜⵉⵅⵓⴱⴰⵢ ⵉ ⵍⵖⵉⴵⴻⵜ ⵏ ⵉⵎⴻⵏⴷⵉ, ⵉ ⴱⵉⵏⵓ ⵏ ⵊⴷⵉⴷ ⴷ ⵣⵣⴻⵛⵜ, ⵓⵍⴰ ⴷ ⵍⴽⵓⵔⵉⵜ ⵉ ⵎⴰⵔⵔⴰ ⵍⵎⴰⵍ ⴷ ⵍⴻⵄⵔⴰⵚⵉ ⵉⴼⴰⵔⵢⴻⵏ ⵉ ⵜⵃⵉⵎⵔⵉⵡⵉⵏ.29ⵏⴻⵜⵜⴰ ⵉⴳⴳⴰ ⵜⵉⵏⴻⴷⴷⴰⵎ ⵉ ⵢⵉⵅⴻⴼ ⵏⵏⴻⵙ ⵓ ⵜⵓⵖⴰ ⵖⴰⵔⴻⵙ ⴰⵟⵟⴰⵙ ⵏ ⵡⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ, ⵎⴰⵖⴰⵔ ⴰⵔⴻⴱⴱⵉ ⵜⵓⵖⴰ ⵉⵡⵛⴰ ⴰⵙ ⵉⵊⵊ ⵏ ⵡⴰⴳⵍⴰ ⵉⵎⵖⴰⵔ ⴰⵟⵟⴰⵙ.30ⵃⵉⵣⵇⵉⵢⴰ ⵡⴰⵏⵉⵜⴰ ⵜⵓⵖⴰ ⵄⴰⵡⴻⴷ ⵉⴱⴻⵍⵍⴻⵄ ⵓⴼⴼⵓⵖ ⵏ ⵡⴰⵎⴰⵏ ⵏ ⵜⴻⵖⵣⴰⵔⵜ ⵏ ⵊⵉⵃⵓⵏ ⵉ ⵉⴵⴰⵏ ⵙⴻⵏⵏⴻⵊ ⵇⴰⵄ. ⵏⴻⵜⵜⴰ ⵢⴰⵔⵔⴰ ⴰⵎⴰⵏ ⵏⵉⵛⴰⵏ ⵖⴰⵔ ⵡⴰⴷⴷⴰⵢ ⵖⴰⵔ ⵍⵖⴰⵔⴱ ⵏ ⵜⴻⵏⴷⵉⵏⵜ ⵏ ⴷⴰⵡⵓⴷ, ⵎⴰⵖⴰⵔ ⵃⵉⵣⵇⵉⵢⴰ ⵜⵓⵖⴰ ⵉⴼⵍⴻⵃ ⴷⵉ ⵎⴰⵔⵔⴰ ⵎⵉⵏ ⵉⴳⴳⴰ.31ⵎⴰⵛⴰ ⵣⵉ ⵙⵙⵉⴱⴱⴻⵜ ⵏ ⵉⵎⴻⵏⴷⵓⴱⵉⵢⵢⴻⵏ ⵏ ⵍⵃⵓⴽⴽⴰⵎ ⵏ ⴱⴰⴱⵉⵍ ⵉⵏⵏⵉ ⵖⴰⵔⴻⵙ ⴷⴷ-ⵉⵜⵜⵡⴰⵙⵙⴻⴽⴽⴻⵏ, ⵃⵉⵎⴰ ⴰⴷ ⵙⵙⴻⵇⵙⴰⵏ ⵅ ⵍⴻⵄⵍⴰⵎⴻⵜ ⵉⵎⵖⴰⵔⴻⵏ ⵜⴻⵏⵏⵉ ⵜⵓⵖⴰ ⴷⵉ ⵜⴻⵎⵎⵓⵔⵜ, ⴰⵇⴰ ⵉⵊⵊⴰ ⵉ-ⵜ ⴰⵔⴻⴱⴱⵉ, ⵃⵉⵎⴰ ⴰⴷ ⵜ ⵉⵇⴻⴵⴻⴱ, ⵃⵉⵎⴰ ⴰⴷ ⵉⵙⵙⴻⵏ ⵎⴰⵔⵔⴰ ⵎⵉⵏ ⵉⴵⴰⵏ ⴷⴻⴳ ⵡⵓⵍ ⵏⵏⴻⵙ.32ⵉⵎⴻⵣⵔⵓⵢⴻⵏ ⵉⵇⵇⵉⵎⴻⵏ ⵏ ⵃⵉⵣⵇⵉⵢⴰ ⴷ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ, ⵅⵣⴰⵔ, ⴰⵇⴰ ⵎⴰⵏ ⴰⵢⴰ ⵎⴰⵔⵔⴰ ⵉⵜⵜⵡⴰⵣⴻⵎⵎⴻⵎ ⴷⵉ ⵍⴻⵡⵃⵉⵢ ⵏ ⵓⵏⴰⴱⵉ ⵉⵛⴰⵄⵢⴰ, ⵎⵎⵉⵙ ⵏ ⴰⵎⵓⵚ, ⵓ ⴷⴻⴳ ⵡⴻⴷⵍⵉⵙ ⵏ ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ ⴷ ⵉⵙⵔⴰⵉⵍ.33ⵃⵉⵣⵇⵉⵢⴰ ⵉⴳⴳⴰ ⴰⴷ ⵢⴰⵔⴻⵢⵢⴻⵃ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⴹⵍⴻⵏ ⵜ ⴷⴻⴳ ⵡⴻⵏⴹⴻⵍ ⵢⵓⵄⵍⴰⵏ ⵇⴰⵄ ⵏ ⵉⵎⴻⴹⵍⴰⵏ ⵏ ⵡⴰⵔⵔⴰⵡⴻⵏ ⵏ ⴷⴰⵡⵓⴷ. ⵎⴰⵔⵔⴰ ⵢⴰⵀⵓⴷⴰ ⴷ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⵙⵙⴻⵛⵏⴻⵏ ⴰⵙ ⵍⴻⵡⵇⴰⵔ ⵖⴰⵔ ⵍⵎⴻⵡⵜ ⵏⵏⴻⵙ. ⵎⵎⵉⵙ ⵎⴰⵏⴰⵙⵙⴰ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ.