Mixa1rif_lti
Řḥukm x Samarya d Urcalim
1Awař n SIDI i dd-yusin ɣar Mixa, Amuracti, deg wussan n Yutam d Aḥaz d Ḥizqiya, ijeǧiden n Yahuda, awař i iẓra x Samarya d Urcalim.2“Sřem-dd, marra kenniw, a řegnus, iřim tfetnem, a cem, tammurt d uɛemmar nnes! Sidi inu, SIDI, ad yiři d acehhad xawem, Sidi inu zi Zzawect nnes iqeddsen.3Maɣar xzarem, SIDI iffeɣ-dd zeg wemcan nnes n tzeddiɣt, u Netta ad dd-ihwa u ad iṣurf x řegɛudi n temmurt.4Idurar ad fesyen sadu nnes, u tiɣzurin ad ttwabḍant, am ccmeɛ zzat i wudem n tmessi, am waman nni dd-ittwafarrɣen zi teysart.5Aya marra ittemsar zi ssibbet n uxeṭṭu n Yaɛqub, u zi ssibbet n ddnub n taddart n Israil. Min iǧan d xeṭṭu n Yaɛqub? Ma war iǧi d Samarya? U min ǧan d řegɛudi n Yahuda? Ma war teǧi d Urcalim?6Necc ad arreɣ Samarya d řxarbet deg iyyar, d amarjeɛ mani ɣa ẓẓun tazayart, u Necc ad nḍareɣ iẓra nnes di teɣzurt, u ad ɛarriɣ x dsusa nnes.7Marra řexyařat nnes ineqcen ad ttwaředǧent u marra řmunet nnes n farq-ccɣeř ad tt sscemḍen s tmessi, u marra řexyařat nnes ineqcen ad tent areddǧeɣ Necc, maɣar nettat tyarew i-tent zi řmunet n farq-ccɣeř, u nitenti ad dd-dewřent ɛawed d řmunet n farq-ccɣeř.”Acḍan ameqqran n Mixa8“X uya ad ceḍneɣ u ad wteɣ agejdur, ad uyureɣ s řeḥfa d aɛaryan, ad ssmiɛweɣ am wuccanen n řexřa, u ad sɣuyeɣ am yessis n nnɛamet.9Maɣar iyezzimen nnes neqqen, maɣar aya yusa-dd ař Yahuda, iwesseɛ řḥukm ař tiwwura n řgens inu, ař Urcalim.10War ttbarrḥem ca man aya di Jat, war tᵉttrum, war xas nessiwiř. Di Bayt-Li’afra zuzzareɣ acař x yixef inu.11Ɛdu, cem tenni izeddɣen di Cafir, d aɛaryan u s řeḥya. Tenni izeddɣen di Ṣanan war teffiɣ ca. Taɣuyyit n wecḍan n Bayt-Ha-Iṭṣil tekkes zzaywem abeddi nnes akidwem.12Maɣar tenni izeddɣen di Marut, tᵉtteqnunnuy ɣar marra tiɣemmura di ṭṭweɛ n řxar, minzi aqa ihwa-dd řɣar n SIDI, ař tawwart n Urcalim.13Ḥezzmem iysan n tazřa zzat i ukarru, a cem, tenni izeddɣen di Laxic! Nettat d beṭṭu n ddenb n yeǧis n Ṣihyun, maɣar dayek ttwafen ixeṭṭan n Israil.14S uya ewc arriɣaluten n umsebḍi i Muracat-Jat! Tudrin n Akzib ad dewřent d řɣecc i ijeǧiden n Israil.15Ɛawed Necc ad am dd-awyeɣ awrit, a cem tenni izeddɣen di Marica! Aɛuǧi n Israil ad dd-yas ař ɣar Ɛadullam.16Egg ixef nnem d taqeccart u ḥeff i ixef nnem di ssibbet n iḥenjiren nnem iɛizzen. Arr taqeccart nnem d tameqqrant amecnaw agider, minzi ttwawyen zzayem ɣar tmeḥbast.”