Markus9rif_lti
Asɛuǧi x wedrar ak-d Musa d Iliya
1Inna asen: “S tidett, Necc ad awem iniɣ, aqa ca zeg inni da ibedden war ttqasin ca řmewt ař ɣa ẓaren Tageldit n AREBBI ad dd-tas s jjehd.”2Awarni setta n wussan Yasuɛ yiwi-dd akides Buṭrus d Yaɛqub d Yuḥanna weḥḥedsen ɣar ijj n wedrar yuɛřan, uca ibeddeř qibač i tiṭṭawin nsen.3Arruḍ nnes idweř yařeqq d acemřař aṭṭas am wedfeř, war izemmar uřa d ijj n bnadem x temmurt ad issemřeř amenni.4Iḍhar asen-dd Iliya ak-d Musa am tuɣa ssawařen ak-d Yasuɛ.5Inna as Buṭrus: “A Amseřmad inu, aqa mliḥ umi da neǧa, ejj aneɣ ad newwet třata n iɛuccuten n tseṭṭa, ijjen i Cek, ijjen i Musa u ijjen i Iliya.”6Maca tuɣa iweddar as min ɣa yini, minzi nitni ggʷeden aṭṭas.7Ikka-dd useynu issduriy i-ten s tiři nnes, uca třaɣa-dd ict n tmijja zeg useynu, teqqar: “Wa d Mmi iɛizzen, sřem ɣares!”8Umi ssgeɛɛden nitni tiṭṭawin nsen, deg ict n tecti war qqimen ttwařan ɛad ḥed akidsen, mɣir Yasuɛ weḥḥdes.9Ařami dd-hwan zeg wedrar, yumur i-ten ḥima war ttɛiwiden i ḥed walu zi min ẓrin ař dd ɣa ikkar Mmis n bnadem jar imettinen.10Xemmřen awař-a deg yixef nsen am tuɣa ttseqsan ixef nsen min ixs ad yini wawař-a: ‘Ař dd ɣa ikkar zi taddart n imettinen’?11Sseqsan t, nnan as: “Mayemmi qqaren imseřmaden n idlisen belli ittxeṣṣa ad dd-yas Iliya d amezwaru?”12Yarra-dd, inna asen: “Aqa Iliya ad dd-yas d amezwaru uca ad yarr kuřci, uca ad tiři am mammec tura x Mmis n bnadem, aqa ad iweddeb aṭṭas uca ad t sseḥqaren.13Maca Necc ad awem iniɣ, Iliya aqa yusa-dd uca ggin zzayes min xsen am mammec xas tura.”Abřiɣ dayes řaryaḥ amengus14Řami dd-yusa ɣar imeḥḍaren, iẓra ijj n řɣaci d ameqqran ittenneḍ asen-dd u imseřmaden n idlisen ttqacaḥen ten.15Deɣya iẓra i-t marra řɣaci, tbehten aṭṭas, uca uzzřen-dd ɣares, seǧmen xas.16Xenni isseqsa imseřmaden n idlisen: “Min xef kidsen tᵉttqacaḥem?”17Yarra-dd ijjen zi řɣaci, inna: “A Amseɣɣar, iwyeɣ-dd mmi ɣarek. Aqa dayes řaryaḥ nni t yarrin d agnaw.18Řebda xmi t itteṭṭef, ineṭṭar i-t ɣar temmurt, itteffeɣ as-dd ukuffu zeg uqemmum, ittɣezza tiɣmas nnes uca ittaẓeɣ. Nniɣ i imeḥḍaren nnec ad t ssuffɣen, maca war d as zemmaren.”19Yasuɛ yarra-dd, inna asen: “A jjiř war yuminen, mecḥař kidwem i ɣa qqimeɣ, mecḥař i kenniw i ɣa yarbuɣ ɛad? Awyem t-i-dd ɣari!”20Uca iwyen t-i-dd ɣares. Umi t iẓra, řexdenni immenḍar i-t řaryaḥ, ařami iwḍa ɣar temmurt, ibda ittbarkikkiḍ, ittekk as-dd ukuffu zeg uqemmum.21Yasuɛ isseqsa babas: “Mecḥař zeg wami t-i-dd-iḥkem uya?” Inna as: “Zi temẓi nnes.22Aṭṭas n imuren ineṭṭar i-t di tmessi u deg waman ḥima ad t isshellek. Maca mařa tzemmared x ca, ɛawen ayi u ḥinn xafi!”23Inna as Yasuɛ: “Mařa tzemmared ad tamned, aqa kuřci izemmar i wenni yumnen.”24Řexdenni isɣuy babas n uḥenjir s imeṭṭawen, inna: “Umneɣ, a Sidi! Ɛawen l’iman ineqṣen inu.”25Umi iẓra Yasuɛ řɣaci ittazzeř uca ssmunen-dd ɣares nitni, iwebbex řaryaḥ amengus, inna as: “A řaryaḥ agnaw, Necc umureɣ cek: Ffeɣ zzayes! War ttdekkwiř dayes ɛemmarṣ!”26Isɣuy cciṭan nni aṭṭas, ijebbed i-t aṭṭas ammu d wammu uca iffeɣ zzayes. Xenni idweř uḥenjir am yijj n umettin, ařami tuɣa nnan aṭṭas, aqa immut.27Maca Yasuɛ iṭṭef i-t zeg ufus nnes, issbedd i-t.28Umi dd-yudef ɣar taddart, sseqsan t imeḥḍaren nnes weḥḥedsen: “Mayemmi war nzemmar neccin ad t nessuffeɣ?”29Inna asen: “Ddegg-a war izemmar ad ittwassuffeɣ uřa s ict n řḥajjet mɣir s uẓummi d tẓaǧit waha.”
Yasuɛ issawař x řmewt d tnukra nnes i twařa wiss tnayen30Ffɣen-dd ssenni uca cuqen di Ljalil. Netta tuɣa war ixs ad t iɛqeř uřa d ijjen.31Maɣar tuɣa isseřmad imeḥḍaren nnes, iqqar asen: “Aqa Mmis n bnadem ad immewc deg ifassen n iwdan, ad t nɣen uca awarni řami t ɣa nɣen, ad dd-ikkar deg wass wiss třata.”32Maca nitni war fhimen i wawař-a uca ggʷeden ad t sseqsan x uya.
Man wen iǧan d ameqqran?33Usin-dd ɣar Kafarnaḥum u awarni řami udfen ɣar taddart, isseqsa ten: “Di min di tuɣa tḥarrḍem ak-d wayawya deg webrid?”34Maca sqaren, minzi tuɣa ttemqacaḥen deg webrid di win iǧan d ameqqran zzaysen.35Iqqim, iřaɣa-dd i tenɛac, inna asen: “Mařa ixs ḥed ad yiři d amezwar, ad yiři d aneggar uřa d amsexxar i marra.”36Iksi aḥenjir, issbedd i-t di řwesṭ nsen, idarreɛ as, uca inna asen:37“Wi ɣa iqebřen mɣir ijj n uḥenjir am uḥenjir-a s Yisem inu, aqa iqbeř ayi u wi d ayi ɣa iqebřen, war d ayi iqebbeř, maca iqebbeř wi d ayi-dd-issekken.”
Wi war iǧin ḍidd nneɣ, aqa-t akidneɣ38Yarra-dd xas Yuḥanna, inna as: “A Amseřmad inu, neẓra ijjen issuffuɣ ccwaṭen s Yisem nnec u nemneɛ i-t minzi netta war dd aneɣ iḍeffar.”39Inna asen Yasuɛ: “War t mennɛem ca, minzi war din uřa d ijj i ɣa yeggen timegga ijehden s Yisem inu, uca řexdenni deɣya ad xafi issiweř s řɣar.40Minzi wi war iǧin ḍidd nwem, aqa-t akidwem.41Wi kenniw i ɣa isseswen s yijj n řkas n waman waha, minzi aqa kenniw n Lmasiḥ i teǧam, aqa s tidett, Necc ad awem iniɣ, netta war ixessar ca řmunet nnes.
Yasuɛ iɛřem iwdan x min iɣekkʷan i ddnub42Wi ɣa issenqraḍen ijjen zeg imeẓyanen-a i dayi yumnen, iḥřa as ad as tᵉttwagg ict n teṣḍart n tsirt tedqeř deg iri nnes, ad immenḍar di řebḥar.43Mařa issenqarḍ cek ufus nnec, qess i-t. Iḥřa ac ad tadfed ɣar Tudart d ameɛḍuř x wadaf s tnayen n ifassen di jᵉhennama,44mani tikecca nsen war tᵉttmetti u timessi nsen war txessi.45Mařa issenqarḍ cek uḍar nnec, qess i-t. Iḥřa ac ad tadfed ɣar Tudart d aqejdaḥ x uweṭṭu s tnayen n iḍaren di jᵉhennama,46mani tikecca nsen war tᵉttmetti u timessi nsen war txessi.47Mařa tessenqarḍ cek tiṭṭ nnec, qeřɛ i-tt. Iḥřa ac ad tadfed ɣar Tgeldit n AREBBI s ict n tiṭṭ x uweṭṭu s tnayen n tiṭṭawin di tmessi n jᵉhennama,48mani tikecca nsent war tᵉttmetti u timessi nsent war txessi.49Minzi kuř ijjen ad ittwameǧeḥ s tmessi u kuř taɣarṣt ad tᵉttwameǧeḥ s tmeǧaḥt.50Tameǧaḥt teṣbeḥ, maca mařa tameǧaḥt ixsar uředdi nnes, s min zi tt i ɣa ɛedřen. Ad tiři tmeǧaḥt daywem uca ḥḍam řehna jar awem.”