Markus8rif_lti
Lmuɛjiza n usecci i twařa wiss tnayen
1Deg wussan nni, am tuɣa din ɛawed aṭṭas n řɣaci uca war tuɣi ɣarsen min ɣa ccen, iřaɣa Yasuɛ x imeḥḍaren nnes, inna asen:2“Aqa zziǧzen ayi řɣaci, minzi qqimen akidi ɛad třata n wussan, war ɣarsen min ɣa ccen.3Mařa ssekkeɣ ten ɣar tudrin nsen am ɛad ǧuẓen, ad ttwaheyyfen deg webrid, minzi ca zzaysen usin-dd zi řaggʷaj.”4Nnan as imeḥḍaren nnes: “Zi manis izemmar ḥed ad yaf aɣrum di řexřa-ya maḥend ad issjjiwen marra ina?”5Isseqsa ten: “Mecḥař n tecnifin i ɣarwem?” Nnan: “Sebɛa.”6Xenni yumur řɣaci ad iqqim di temmurt, uca iksi sebɛa nni n tecnifin, u awarni řami ibarek, yarẓa i-tent, iwca i-tent i imeḥḍaren nnes ḥima ad tent qeddmen, uca xenni qeddmen tent i řɣaci.7Tuɣa ɣarsen cwayt n iseřman d imeẓyanen. Ibark i-ten ɛawed, inna ad qeddmen ina.8Ccin, jjiwnen, uca yarwen min iceṭṭen, aqa sebɛa n tsuǧatin.9Inni iccen tuɣa aten ɛřaḥař di arebɛa-ařaf.10Xenni issekk i-ten, uca řexdenni inya di tɣarrabut ak-d imeḥḍaren nnes, yiweḍ ɣar jjwayeh n Dalmanuta.Antun n Ifarisiyyen11Ffɣen Ifarisiyyen, bdan ttqacaḥen dayes, ttaren zzayes ict n řeɛřamet zeg ujenna ḥima ad t jarrben.12Izehhar di Arruḥ nnes, inna: “Mayemmi ittettar jjiř-a ict n řeɛřamet? S tidett, Necc ad awem iniɣ, ɛemmarṣ war d as temmewc i jjiř-a ict n řeɛřamet!”13Xenni ismeḥ daysen uca inya di tɣarrabut, uca ruḥen nitni ɣar ujemmaḍ.14Imeḥḍaren nnes ttun ad kisen ksin aɣrum, uca war tuɣi ɣarsen walu di tɣarrabut mɣir ict n tecnift n weɣrum waha.15Uca yumur i-ten, inna: “Xzarem, ḥḍam zeg wentun n Ifarisiyyen d wentun n Hirudus.”16Mcawaren jar asen, nnan: “D man aya minzi war ɣarneɣ bu tecnifin n weɣrum.”17Maca yargeb Yasuɛ, inna asen: “Mayemmi temcawarem belli war ɣarwem bu tecnifin n weɣrum? Ma war tucim, ma war tefhimem? Ma ɛad uřawen nwem qesḥen?18Ma ɣarwem tiṭṭawin, maca war tᵉttwiřim? Ma ɣarwem imezzuɣen, maca war tᵉttesřim? Ma war tɛeqqiřem ɛad?19Umi arẓiɣ xemsa n tecnifin n weɣrum i xemsa-ařaf, mecḥař n tsuǧatin i iccuren s iřeqqʷaz i tyarwem?” Nnan as: “Tenɛac.”20“U ɣar sebɛa n tecnifin n weɣrum i arebɛa-ařaf, mecḥař n tsuǧatin iccuren s iřeqqʷaz i tyarwem?” Nnan: “Sebɛa!”21Xenni inna asen: “Mammec ɛad war tefhimem ař řexxu?”
Asgenfi n ijj n udarɣař di Baytṣayḍa22Yusa-dd ɣar Bayt-Ṣayda uca nitni iwyen as-dd ijj n udarɣař, zawgen t ad iḥada wanita.23Netta imneɛ adarɣař zeg ufus, indeh i-t barra i dcar uca issusef di tiṭṭawin nnes, issars xas afus nnes, isseqsa min ittwařa.24Isewḍ, inna: “Ttwařiɣ iwdan gguren am ticejjura.”25Xenni issars ɛawed afus nnes x tiṭṭawin nnes. Xenni iggenfa, idweř ittwařa marra mliḥ.26Issekk i-t ɣar taddart nnes, inna: “War d ttidef dcar, war t qqar i ḥed di dcar!”
Cchadet n Buṭrus x Yasuɛ27Xenni yuyur Yasuɛ ak-d imeḥḍaren nnes ɣar ředcur n Qayṣariya-Filippus. Deg webrid isseqsa imeḥḍaren nnes, inna asen: “Min qqaren iwdan min ɛniɣ Necc?”28Arrin-dd: “Yuḥanna Amseɣḍaṣ!”, ca nneɣni nnan: “Iliya!”, inneɣni ɛawed: “Ijjen zeg inabiyyen!”29Inna asen: “I kenniw min teqqarem xafi?” Yarra-dd Cimɛun, inna as: “Cek d Lmasiḥ, Mmis n AREBBI iddaren!”30Yumur i-ten mliḥ, maḥend war tt xas qqaren uřa i yijj.
Yasuɛ issawař x řmewt d tnukra nnes i twařa tamezwarut31Ibda isseřmad aqa Mmis n bnadem ittxeṣṣa ad iweddeb aṭṭas uca ad ittwasseḥqar zeg imɣaren n řgens d imeqqranen n ikehhanen d imseřmaden n idlisen, ad t nɣen uca deg wass wiss třata ad dd-ikkar.32Inna awař-a s bṭayṭay. Maca iksi t Buṭrus ɣares ɣar uɣezdis uca ibda ittwebbex i-t.33Xas uca inneqřeb, ixzar deg imeḥḍaren nnes uca iwebbex i Cimɛun, iqqar: “Aggʷej xafi awarni ayi, a cciṭan minzi cek war d ac icqi min iǧan n AREBBI, maca min iǧan n iwdan.”34Iřaɣa-dd Yasuɛ i řɣaci ak-d imeḥḍaren nnes ɣares, inna asen: “Wenni ixsen ad ayi iḍfar, ad inkar ixef nnes, ad iksi ṣṣalib nnes uca ad ayi iḍfar.35Minzi wenni ixsen ad issenjem tudart nnes, ad tt ixsar, maca wenni i ɣa ixsaren tudart nnes di ṭṭweɛ inu u di ṭṭweɛ n Řexbar Aṣebḥan, ad tt issenjem.36Minzi man řefḍeř n bnadem mařa yarbeḥ ddunect marra, maca ad ixsar řeɛmar nnes?37Minzi min ɣa iwc bnadem deg wemcan n řeɛmar nnes?38Minzi wenni zzayi i ɣa iseḍḥan u zeg wawařen inu di jjiř-a izennan ixḍan, aqa uřa d Mmis n bnadem ad zzayes iseḍḥa, xmi dd ɣa yas s uɛuǧi n Babas ak-d lmalakat iqeddsen.”