Markus12rif_lti
Amedya n umarjuɛ n tzayart d ixemmasen iɛeffanen
1Ibda issawař akidsen s imedya: “Ijj n bnadem igga ijj n umarjeɛ n uḍiř, iẓẓu dayes tizayarin, iqewwar as-dd s ijj n wefray, iɣza tasirt n uḍiř, ibna dayes ṣṣumɛet uca iwekkeř amarjuɛ nni i ixemmasen uca isafar.2Řami dd-yiweḍ řḥař, issekk amsexxar nnes ɣar ixemmasen, ḥima ad iksi tasɣart nnes zeg weřqaḍ n umarjeɛ n uḍiř.3Maca nitni wtin t uca ssekken t ixwa.4Ɛawed issekk ɣarsen ijj n umsexxar nneɣni, arejmen t, marẓen as, uca řami t ssbeḥtřen, uẓẓřen xas.5Ɛawed issekk-dd ɣarsen wenneɣni uca nɣin t uřa d netta. Ammu i issekk ɛad aṭṭas n inneɣni, hettken ca zzaysen s urekkuḍ d ca nneɣni zzaysen nɣin ten.6Ɣar uneggar issekk ɣarsen ayenni n mmis i ɣares i xas iɛizzen, maɣar inna: ‘Nican ad weqqaren mmi!’7Maca ixemmasen, nni nnan jar asen: ‘Aqa d wa d awrit. Zidem, ad t neneɣ uca ad ɣarneɣ yiři řwart.’8Ṭṭfen t, nɣin t uca nḍaren t barra i umarjeɛ n uḍiř.9Min ɣa yegg bab n umarjeɛ n uḍiř? Ad dd-yas, ad ineɣ ixemmasen uca ad iwc amarjeɛ n uḍiř i inneɣni.10Ma war teɣrim awař-a n Tira Iqeddsen? ...‘Aẓru i tuɣa immenḍaren ibennayen, aqa idweř d aẓru d Azeǧif n teɣmart.11Wa yusa-dd zi SIDI u man aya d řeɛjeb di tiṭṭawin nneɣ.’”12Xsen ad t ṭṭfen maca nitni ggʷeden zi řɣaci, minzi fehmen belli tuɣa issawař xasen s umedya nni. Nitni jjin t uca uyuren.
Axeǧeṣ n ḍḍariba i qayṣar13Xenni ssekken ɣares ca n yeryazen zeg Ifarisiyyen u ca zi taddart n Hirudus, ḥima ad as ṭṭfen s wawařen nnes.14Umi dd-usin, nnan as: “A Amseɣɣar, neccin nessen aqa Cek d tidett, war teggʷided zeg iwdan u war txezzared ca ɣar wudem n iwdan, maca tesseřmaded abrid n AREBBI s tidett. Ma iḥeǧeř ad newc ddariba i kuř ijjen zzayneɣ i qayṣar niɣ lla? Ma ittxeṣṣa aneɣ ad nxeǧeṣ ḍḍariba niɣ lla?”15Řami Netta yargeb x nnifaq nsen, inna asen: “Mayemmi d ayi tᵉttjarrabem? Awyem ayi-dd ijj n dinar ḥima ad t ẓareɣ!”16Iwyen as-dd ijj n dinar. Xenni inna asen: “Wi yiřan taṣwirt-a d tira-ya?” Nnan as: “N qayṣar!”17Yarra-dd Yasuɛ, inna asen: “Wcem xenni i qayṣar min iǧan i qayṣar, u min iǧan i AREBBI i AREBBI.” Uca ttɛejben dayes.
Aseqsi n Iṣaduqiyyen x tnukra18Usin-dd ɣares ɛawed Iṣaduqiyyen nni iqqaren belli war din bu tnukra. Sseqsan t, nnan:19“A Amseɣɣar, aqa yura aneɣ Musa, mařa immut i ḥed umas uca ijja tamɣart, maca war dd-ijji bu tarrawt, ad yawi umas tamɣart nni uca ad dd-yejj aḥenjir i umas.20Tuɣa din sebɛa n wawmaten. Amezwaru yiwi ict n temɣart uca awarni řami immut, war dd-ijji bu dduriyet.21Xenni yiwyi i-tt wenni wiss tnayen uca immut, war dd-ijji bu dduriyet uřa d netta, uca ammu uřa d wenni wiss třata.22Marra sebɛa nni iwyen tt, war dd-jjin bu dduriyet. Aneggar nsen marra temmut temɣart nni ɛawed.23Iwa di tnukra, xmi dd ɣa kkaren, umi ɣa tiři temɣart nni? Minzi sebɛa nni marra iwyen tt d tamɣart.”24Yarra-dd Yasuɛ, inna asen: “Ma war txeṭṭim ca minzi war tessinem ca Tira Iqeddsen d jjehd n AREBBI?25Maɣar xmi dd ɣa kkaren jar imettinen, war tent ttiwyen d tamɣart u war ssmiǧicen timɣarin i yeryazen, maca ad iřin am lmalakat i iǧan deg ujenna.26Maca zi jjihet n imettinen aqa ttwassnekkaren: Ma war teɣrim deg wedlis n Musa, mammec akides issiweř AREBBI zi cbarq ak-d isennanen, inna: ‘D NECC d AREBBI n Ibrahim d AREBBI n Isḥaq d AREBBI n Yaɛqub’?27Netta war iǧi d AREBBI n imettinen, maca d AREBBI n yinni iddaren. S uyenni aqa kenniw txeṭṭam aṭṭas.”
Tawṣeyyet tameqqrant28Ijjen zeg imseřmaden n idlisen iqarreb-dd ɣares, isřa asen ttemharwaḍen jar asen uca issen belli Netta aqa yarra-dd xasen mliḥ. Xenni isseqsa t: “Man tent iǧan d tawṣeyyet tamezwarut x kuřci?”29Yarra-dd xas Yasuɛ: “Aqa tamezwarut x marra tiweṣṣa: Seř a Israil! SIDI, AREBBI nneɣ, SIDI d Ijj.30Ad texsed SIDI, AREBBI nnec s marra wuř nnec s marra řeɛmar nnec s marra řeɛqeř nnec s marra jjehd nnec. Ta d tawṣeyyet tamezwarut.31U tawṣeyyet wiss tnayen, amecnaw tanita, aqa d ta: Ad texsed jjar nnec amecnaw ixef nnec. War din bu tewṣeyyet nneɣnit d tameqqrant x tina s tnayen.”32Inna as umseřmad n idlisen: “Nican, a Amseřmad inu, s tidett tennid belli Netta d Ijjen, war din uřa d ijj nneɣni mɣir Netta,33u belli mařa ijj n bnadem ad t ixs s wuř marra, s řeɛqeř marra, s řeɛmar marra u s jjehd marra, uca ad ixs jjar nnes amecnaw ixef nnes, aqa d man aya ḥsen zi marra tiɣarṣin n wecmaḍ d marra tiɣarṣin nneɣnit.”34Umi iẓra Yasuɛ belli yarra-dd s řeɛqeř, inna as: “Aqa cek war tiggʷijed ca x Tgeldit n AREBBI.” Xenni war iɛewweř ḥed ad t isseqsa uřa deg ict n tmesřact.
Man wen iǧan d mmis n Dawud?35Řami tuɣa isseřmad di Zzawect Tameqqrant iṭṭef Yasuɛ deg wawař, inna: “Mammec qqaren imseřmaden n idlisen belli Lmasiḥ d Mmis n Dawud?36Minzi Dawud s yixef nnes inna s Arruḥ Iqeddsen:
‘Inna SIDI i Sidi inu: Qqim-dd x ufusi inu ař dd ɣa ggeɣ řɛedyan nnec d tanebdat sadu iḍaren nnec.’37S uya ittřaɣa as-dd Dawud: ‘Sidi inu!’ Manis dd-ikka d mmis?” Marra řɣaci tuɣa isřa as s řefraḥet.
Aɛřam ɣar řgens x Imseřmaden n idlisen38Inna asen deg useřmad nnes: “Ḥḍam ixef nwem zeg imseřmaden n idlisen inni umi itteɛjib asen řḥař xmi ɣa uyuren s řeɛbayat tizirarin u xmi xasen i ɣa seǧmen iwdan di řeswaq,39inni umi itteɛjib asen řekrasi n zzat di temzidawin, uřa d imucan imezwura ɣar imensiwen n wuraren.40Nitni ttetten tudrin n tijjař am ttᵉttaren tiwhibin di ṭṭweɛ n tẓaǧatin nsen tizirarin. Aqa ina ad ksin řḥukm d ameqqran.”
Ṣṣedqet n tajjač41Am iqqim Yasuɛ qibač i ssenduq n ṣṣedqet, iẓra mammec ineṭṭar řɣaci tinɛacin di ssenduq. Aṭṭas n aytbab n wagřa tuɣa neṭṭaren dayes aṭṭas.42Tusa-dd ict n tajjač d řmeskina tenḍar dayes tnayen n uqiyyat, semman tent ‘camunat’.43Xenni iřaɣa Yasuɛ i imeḥḍaren nnes, inna asen: “S tidett, Necc ad awem iniɣ, tajjač-a řmeskina aqa tenḍar dayes ktar x marra iwdan nni inḍaren di ssenduq n ṣṣedqet.44Minzi marra nḍaren dayes zi min ɣarsen aṭṭas, maca ta zi drus nnes tenḍar dayes kuřci min ɣares, aqa tenḍar marra min ɣares d agřa.”