1Issiweř SIDI ak-d Musa d Harun, inna:2“Siweř ak-d ayt n Israil, inim asen: ‘Mařa aryaz ɣares ijj n useyyeř zi arrimet nnes, xenni ad yiři ixmej zi ssibbet n useyyeř.3Wa ad yiři d řexmej nnes zi ssibbet n useyyeř nnes: mařa arrimet nnes tᵉttejja aseyyeř nnes niɣ arrimet nnes tessbedda aseyyeř nnes, aqa-t d řexmej nnes.4Kuř qama min xef ɣa iṭṭeṣ wenni di iǧa useyyeř, ad yiři ixmej u kuř řqecɛet i xef ɣa iqqim, ad tiři texmej.5Marra wi ɣa iḥadan qama nnes, ad iṣebben arruḍ nnes, ad issird ixef nnes ɛawed s waman uca ad yiři ixmej ař tameddit.6Wenni i ɣa iqqimen x ca x min xef tuɣa iqqim wenni di iǧa useyyeř, ad iṣebben arruḍ nnes, ad issird ixef nnes ɛawed s waman uca ad yiři ixmej ař tameddit.7Wenni i ɣa iḥadan arrimet n wenni di iǧa useyyeř, ad iṣebben arruḍ nnes uca netta simant nnes ad issird s waman, uca ad yiři ixmej ař tameddit.8Mařa wi di iǧa useyyeř issusef x ijj n umezdag, aqa wa ad iṣebben arruḍ nnes, ad issird ixef nnes s waman uca ad yiři ixmej ař tameddit.9Kuř trict min xef iqqim wenni di iǧa useyyeř, ad tiři texmej.10Marra wi ɣa iḥadan mammec ma řqecɛet nni iǧan sadu nnes, ad yiři ixmej ař tameddit uca wi tt ɣa iksin, ad iṣebben arruḍ nnes, ad issird ixef nnes s waman uca ad yiři ixmej ař tameddit.11Marra wi ɣa ittwaḥadan zeg wenni di iǧa useyyeř břa ma ad issird wa ifassen nnes amezwaru, ad iṣebben arruḍ nnes, ad issird ixef nnes s waman uca ad yiři ixmej ař tameddit.12Ṭṭebṣi n třaxt nni iḥada wenni di iǧa useyyeř, ittxeṣṣa ad ittwarẓ, maca marra řqecɛet n tefřawt ad tt sirden s waman.13Xmi wenni di iǧa useyyeř ad ittwassizdeg zeg useyyeř nnes, ittxeṣṣa as simant nnes ad iḥseb i sebɛa n wussan. Xenni ad iṣebben arruḍ nnes, ad issird arrimet nnes s waman iddaren uca ad yiři izdig.14Deg wass wiss tmenya ad iksi tnayen n tejlilliḥin niɣ tnayen n idbiren imeẓyanen uca ad dd-yas zzat i wudem n SIDI ɣar wadaf n Uqiḍun n Umsagar uca ad ten iwc i ukehhan.15Akehhan ad issewjed ict n tɣarṣt n ddenb d ict n tɣarṣt n wecmaḍ. Akehhan ad xas igg aṣřaḥ zzat i wudem n SIDI x useyyeř nnes.’”16“Mařa iffeɣ-dd useyyeř n waǧu zeg weryaz, ad issird arrimet nnes marra s waman uca ad yiři ixmej ař tameddit.17Kuř arruḍ d kuř iřem i xef iǧa useyyeř n waǧu, ittxeṣṣa ad t sirden s waman uca ad yiři ixmej ař tameddit.18Mařa iṭṭeṣ yijj weryaz ak-d temɣart uca inḍar dayes netta, xenni ad ssirden s tnayen idsen s waman uca ad iřin xemjen ař tameddit.”19“Mařa tamɣart tuɣa-tt tseyyeř, aqa xas idammen di arrimet nnes, xenni ad teɛzeř sebɛa n wussan. Marra wi tt ɣa iḥadan ad yiři ixmej ař tameddit.20Marra min xef tuɣa tᵉṭṭeṣ deg weɛzař nnes, ad yiři ixmej uca marra min xef tuɣa teqqim, ad yiři ixmej.21Marra wi ɣa iḥadan qama nnes, ad issird arruḍ nnes, ad issird ixef nnes s waman uca ad yiři ixmej ař tameddit.22Marra wi ɣa iḥadan ca n řqecɛet min xef tuɣa tᵉttɣima, ad iṣebben arruḍ nnes, ad issird ixef nnes s waman uca ad yiři ixmej ař tameddit.23Niɣ mařa iqqim x qama niɣ x řqecɛet i xef tuɣa teqqim nettat, umi iḥada aya ad yiři ixmej ař tameddit.24Mařa iṭṭeṣ akides ijj n weryaz uca yusa-dd xas weɛzař nnes, xenni ad yiři ixmej sebɛa n wussan. Kuř qama i x tuɣa iṭṭeṣ, ad tiři texmej.25Mařa usin-dd idammen x ict n temɣart aṭṭas n wussan barra i řmijař n weɛzař nnes niɣ mařa tuɣa aseyyeř ktar x řmijař n weɛzař nnes, xenni ad tiři texmej marra ussan n useyyeř i dd-yusin ak-d řexmej nnes, am deg wussan n weɛzař nnes.26Kuř qama min xef tᵉṭṭeṣ marra ussan n useyyeř nnes, ad as tiři am qama n weɛzař nnes u marra řqecɛet min xef teqqim, ad tiři texmej amecnaw řexmej n weɛzař nnes.27Marra wi ɣa iḥadan timesřayin nni, ad yiři ixmej. Ad iṣebben arruḍ nnes uca ad issird ixef nnes s waman uca ad yiři ixmej ař tameddit.28Mařa tᵉttwassizdeg zeg useyyeř nnes, ittxeṣṣa ad teḥseb i yixef nnes sebɛa n wussan, awarni as ad tiři tezdeg.29Deg wass wiss tmenya ad teksi i yixef nnes tnayen n tejlilliḥin niɣ tnayen n idbiren imeẓyanen uca ad ten tawi ɣar ukehhan ɣar wadaf n Uqiḍun n Umsagar.30Akehhan ad issewjed ict n tɣarṣt n ddenb d ict n tɣarṣt n wecmaḍ uca akehhan ad xas igg aṣřaḥ di tmesřact n useyyeř n řexmej nnes zzat i wudem n SIDI.31Ammu i ɣa tɛezřed ayt n Israil x řexmej nsen, ḥima war ttᵉmettin di řexmej nsen, umi ssxemmajen Tazeddiɣt inu nni iǧan di řwesṭ nsen.”32Wa d azerf i wenni ɣar iǧa useyyeř u i wenni zi ɣa iffeɣ waǧu nnes uca xenni ad yiři ixmej33u ɛawed i tenni min xef iǧa idammen uca xenni teɛzeř ixef nnes u ɛawed i wi di tuɣa aseyyeř, i weryaz uřa i temɣart, u ɛawed i weryaz i tuɣa iṭṭṣen ak-d tenni iǧan texmej.