Řquḍat16rif_lti
Camcun di Ɣazza
1Umi iṭṭef Camcun abrid ɣar Ɣazza, iẓra dinni ict n temɣart n farq-ccɣeř, uca yudef ɣares.2Xenni ittwanna i ayt n Ɣazza: “Camcun aqa-t da!” Innḍen as-dd uca ḥḍan ǧiřet tmun ɣar tewwart n tendint. Ǧiřet tmun ssqaren, nnan: “Ɣar tuffut n wass ad t neneɣ.”3Camcun maca iqqim izzeř iṭṭeṣ ař azyen n ǧiřet. Xenni ikkar-dd deg wezyen n ǧiřet, iṭṭef tiwwura n tendint ak-d řeḍruf ɣar uɣezdis n tewwart, iqřeɛ i tent i-dd akl-d weɛmud i ubelleɛ, igga i-tent x tɣarḍin nnes uca yarbu tent ɣar tqiccet n wedrar nni iǧan qibač i Ḥabrun.Camcun d Dalila4Awarni as, imsar iɛceq ict n temɣart ɣar teɣzart n Suraq, qqaren as Dalila.5Uca řbacat n tneddam n Ifilisṭiniyyen usin-dd ɣares, nnan as: “Ɣwa i-t, u xzar ad tafed zi manis ɣares jjehd-a tameqqrant u mammec xas i ɣa nzemmar. Xenni ad t ncarf, ḥima ad t neṭṭef. Neccin ad am newc kuř ijj zzayneɣ ařef u-mya n uqiyyat n nnuqart.”6Xas uca tenna Dalila i Camcun: “Ini ayi maca, zi manis ɣarek jjehd-a ameqqran d mammec zemmaren ad cek carfen ḥima ad tᵉttwaṭṭfed.”7Inna as Camcun: “Mařa carfen ayi s sebɛa n iẓewran ṭṭri zeg weysum nni war yuẓiɣen ɛad, xenni ad dewřeɣ arxuɣ am kuř ijj n bnadem nneɣni.”8Řbacat n tneddam n Ifilisṭiniyyen iwyen as-dd sebɛa n iẓewran d ṭṭri zeg weysum nni war yuẓiɣen ɛad u nettat tcarf i-t zzaysent.9Deg ijj n umur tuɣa ɣares ḥed di texxamt n daxeř iṭṭef aḥeṭṭu. Tenna as: “A Camcun, Ifilisṭiniyyen usin-dd xak!” Xenni iqḍuw iẓewran am mammec ittqeṭṭas bnadem afiřu n tiffest axmi tt teřqef tmessi. Uca ssir n jjehd nnes war idwiř ittwassen.10Xas uca tenna Dalila i Camcun: “Xzar, tcemted ayi u tessxarrqed xafi. Ini ayi maca řexxu, s min zi zemmaren ad cek carfen.”11Netta inna as: “Mařa carfen ayi s tseɣwin n jdid war ttwassxedment ɛemmarṣ, ad dewřeɣ arxuɣ am kuř ijj n bnadem nneɣni.”12Uca Dalila teksi tiseɣwin timaynutin tcarf i-t zzaysent u tenna as: “A Camcun, Ifilisṭiniyyen usin-dd xak!”, deg umur d ijjen tuɣa ḥed deg ict n texxamt n daxeř iṭṭef aḥeṭṭu. Xenni iqeṭṭes tiseɣwin zeg iɣaǧen nnes am yijj n ufiřu.13Xas uca tenna Dalila i Camcun: “Xzar, cek tcemted ayi u tessxarrqed xafi. Ini ayi maca, s min zi zemmaren ad cek carfen?” Netta inna as: “Mařa cem tmuded sebɛa n tmuzarin x uzeǧif inu ak-d wexmar n ddebbuz n txeyyaḍt!”14Xenni nettat tessemted tent s yijj n umesmir, tenna as: “A Camcun, Ifilisṭiniyyen usin-dd xak!” Xenni ifaq-dd zeg yiḍeṣ nnes, ikkes-dd ddebbuz n txeyyaḍt d ufiřu.15Xas uca tenna as: “Mammec tzemmared ad tinid: ‘Necc ttexseɣ cem!’, mařa uř nnec war ɣari iǧi? Řexxu tcemted ayi třata n twařawin u war d ayi tennid zi manis ɣarek jjehd-a ameqqran.”16Uca imsar, umi nettat tegga xas aɣiř s wawařen nnes u tehweř i-t marra ussan, idweř řeɛmar nnes di řeḥṣaret ař řmewt.17Netta issargeb i-tt marra x wuř nnes, inna as: “Ijj n řmus i uḥeffi ɛemmarṣ war ɣari dd-yusi x uzeǧif inu, minzi necc arebbuɣ ttaj n weɛzař zeg uɛeddis n yemmas. Mařa ittwaḥeff ucuwwaf inu, xenni ad ayi iffeɣ jjehd inu, ad dewřeɣ arxuɣ am kuř bnadem nneɣni.”18Umi teẓra Dalila, belli aqa netta issargeb i-tt marra x wuř nnes, nettat tessekk ɣar řbacat n tneddam n Ifilisṭiniyyen, tenna: “Asem-dd twařa-ya da, minzi issargeb ayi marra sirr n wuř nnes.” Řbacat n tneddam n Ifilisṭiniyyen geɛɛden-dd ɣares, iwyen-dd akidsen řweznat n nnuqart deg ufus nsen.19Nettat tejja Camcun ad iṭṭeṣ x ifadden nnes, třaɣa i weryaz, tqess as sebɛa n tmuzarin x uzeǧif nnes uca tebda nettat tᵉṭṭef i-t ɣares uca jjehd nnes iffeɣ zzayes.20Xenni tenna: “A Camcun, Ifilisṭiniyyen usin-dd xak!” Netta ifaq-dd zeg yiḍeṣ, inna: “Twařa-ya ad arxuɣ, ad ssfekkeɣ ixef inu”, minzi netta war issin, aqa SIDI tuɣa ismeḥ dayes.21Xenni ṭṭfen t Ifilisṭiniyyen, qeřɛen as tiṭṭawin uca nedhen t ɣar Ɣazza, carfen t s tnayen n ssnaseř n nnḥas u netta idweř issunnuḍ tasirt di řeḥbes.22Maca acuwwaf n uzeǧif nnes idweř imeqqar deɣya awarni řami i d as ḥeffen.
Řmewt n Camcun23Řbacat n tneddam n Ifilisṭiniyyen munen, ḥima ad qeddmen ict n tɣarṣt d tameqqrant i Dajun, arebbi nsen, uřa i řefraḥet, uca nnan: “Arebbi nneɣ iwca aneɣ Camcun, řeɛdu nneɣ, deg ifassen nneɣ.”24Umi t iẓra řgens, ssemɣaren arebbi nsen, maɣar nnan: “Arebbi nneɣ igga řeɛdu nneɣ deg ufus nneɣ: netta, wenni ixřan tammurt nneɣ d wenni inɣin zzayneɣ aṭṭas!”25Uca imsar, umi uř nsen tuɣa ifarḥ, nnan: “Řaɣam i Camcun, ḥima ad aneɣ issfarḥ.” Uca řaɣan-dd x Camcun zi řeḥbes uca sstehzan zzayes zzat i wudem nsen uca jjin t ad ibedd jar ipilaren.26Xenni inna Camcun i uḥenjir wenni t inedhen zeg ufus: “Ewc ayi cwayt n arraḥet. Xseɣ ad ḥadiɣ ipilaren i yarebbun taddart, maḥend ad xasen senndeɣ.”27Taddart tuɣa teccur s yeryazen d temɣarin. Tuɣa din ɛawed marra řbacat n tneddam n Ifilisṭiniyyen. X tzeqqa iwaṭan tuɣa qqimen amenni teřt-ařaf n yeryazen d temɣarin nni xezzaren umi ittɣennen Camcun.28Xenni iřaɣa Camcun ɣar SIDI, inna: “Sidi inu, SIDI, xarreṣ dayi. Ewc ayi mɣir twařa-ya waha jjehd inu, a AREBBI, ḥima ad ntaqmeɣ ixef inu zeg Ifilisṭiniyyen di ssibbet n tiṭṭawin inu deg ict n twařa.”29Uca iṭṭef Camcun tnayen n ipilaren i iǧan di řwesṭ i yarbun u min xef tsenned taddart, iṭṭef ijj n upilar s ufus nnes afusi d wenneɣni s ufus nnes azeřmaḍ.30Xas uca Camcun inna: “Ejj řeɛmar inu ad immet ak-d Ifilisṭiniyyen!”, u netta iɣnes ixef nnes ɣar zzat s marra jjehd nnes uca tewḍa taddart x řbacat n tneddam u x marra řgens i dayes tuɣa iǧan. Tuɣa qedda n yinni i inɣa s řmewt nnes d ameqqran x yinni tuɣa inɣa umi tuɣa iddar.31Aytmas d marra taddart n babas hwan-dd u ssgeɛɛden t, iwyen t u neḍřen t jar Ṣurɛa d Icta’ul deg wenḍeř n babas Manuḥ. Tuɣa netta d řqaḍi x Israil ɛicrin n iseggʷusa.