Irmiya51rif_lti

1“Ammu i iqqar SIDI: ‘Xzar, Necc ad dd-ssekkareɣ ijj n buḥbeř n wareddeǧ x Babil u x yinni din izeddɣen deg wuř n iɣrimen inu.2Necc ad ssekkeɣ ibarraniyyen ɣar Babil, ad tt zuzzaren uca ad farḍen tammurt nnes, minzi deg wass n řɣar ad bedden arendad nnes ɣar marra iɣezdisen.3Ejj amjebbad n řqews ad imḥeḍ řqews nnes ḍidd n wenni imeḥḍen řqews u ḍidd n wenni issgeɛɛaden ixef nnes deg werruḍ nnes n wuzzař. War ttḥiwiřem x iḥudriyyen nnes, ḥarrmem marra řɛeskar nnes i uteḥḥi.4Inni ittwanɣen wḍan di temmurt n Ikaldaniyyen, u inni ittwassxarrqen aqa aten x ibriden nnes.’”5“Maɣar Israil d Yahuda war ttwajjen d tajjač zi AREBBI nsen, zi SIDI n řɛeskarat, minzi tammurt n Ikaldaniyyen teccur s umarwas ɣar Umqeddas n Israil.”
6“Arewřem zi Babil, ejj ad issenjem kuř ijj tudart nnes, war ttejjim ad ttwassbekkmem i řebda s řmuɛṣiyyet nnes, maɣar ta d řweqt n wexřaf n SIDI, Netta ad zzayes ixřef min tesdaheǧ.”
7“Babil tuɣa-tt d ijj n řkas n wureɣ deg ufus n SIDI, iscar marra tammurt. Zi binu nnes swin marra řegnus, x uya iffeɣ řeɛqeř i řegnus.8Deɣya tewḍa tendint n Babil u tᵉttwahdem. Wtem xas agejdur, awyem as-dd balsam i řeḥriq nnes, ad taɣ ad tᵉttwassgenfa.”
9“Neccin nexs ad nawi agenfu i Babil, maca war ɣares agenfu. Jjem tandint nni, u ejj kuř ijj zzayneɣ ad iraḥ ɣar temmurt nnes, maɣar řḥukm xas yiweḍ ař ajenna, igeɛɛed ař iseynuten.”
10“SIDI issiweḍ-dd řmuɛṣiyyet nneɣ ɣar tfawt. Asem-dd, ejj aneɣ ad nɛawed di Ṣihyun min igga SIDI, AREBBI nneɣ.”
11“Sqeḍɛem fřitcat, ṭṭfem tiseddariyin n uɛeskari. SIDI issekkar-dd buḥbeř n ijeǧiden n Maday, minzi Netta iɛewweř ad ihdem Babil, maɣar wa d axřaf n SIDI, axřaf i Zzawect nnes Tameqqrant.12Sgeɛɛdem taɛeǧant x řeḥyuḍ n Babil, zeyyarem taɛessast, sbeddem iɛessasen, ggem řefxux, maɣar ɛlaḥsab aɛewweř n SIDI, ammu i ɣa yegg marra min inna x imezdaɣ n Babil.13Cem, a tenni izeddɣen ɣar mani wesɛen waman, tenni ɣar iǧa waṭṭas n wagřa, qeṭṭu nnem yiweḍ-dd, aqa iccur řqedd n ṭṭmeɛ nnem.14Ijjuǧ SIDI n řɛeskarat ɣar yixef nnes: Waxxa Necc ccureɣ cem s iwdan am tmurɣi, ɛad ad xam dd-řaɣan s ict n tɣuyyit n usřiwřew!”
15“Netta igga tammurt s jjhed nnes, igga ddunect zi tiɣit nnes u ibezzeɛ ajenna s řefhamet nnes.16Řami ittejja tmijja nnes ad tt sřen, xenni tegga am ucarcur n waman deg ujenna. Iseynuten issgeɛɛad i-ten zeg ineggura n ddunect, ittegg assamen ak-d wenẓar uca issekka-dd asemmiḍ zeg ixxamen nnes n txubay.17Kuř bnadem d agarruḍ, břa tussna, kuř amziř n wureɣ ittseḍḥa zi ssibbet n řexyař i igga, maɣar řexyař nnes ifesyen d ixarriqen, war dayes iǧi buḥbeř.18Aqa-tent d l’aṣnam ibeṭṭřen, aqa atent d řeqcuɛ n tseḍḥact! Di řweqt n wexřaf nsent, ad fnant.”
19“Tasɣart n Yaɛqub war teǧi am tesɣart nsent, minzi Netta d wenni iggin marra, uca Israil d taqbič n tesɣart nnes, aqa SIDI n řɛeskarat d Isem nnes.”
20“Cek teggid ayi am yijj n ccaqur, řesnaḥ inu i umenɣi. Zzayek i ɣa řebzeɣ řegnus, zzayek i ɣa ɣeḍřeɣ tigeldiwin.21Zzayek i ɣa řebzeɣ ayis d wenni xas inyin u zzayek i ɣa řebzeɣ akarru n umenɣi d wenni t ineddhen,22zzayek i ɣa řebzeɣ aryaz d temɣart, zzayek i ɣa řebzeɣ awessar d uḥuḍri u zzayek i ɣa řebzeɣ abřiɣ d tebřiɣt,23zzayek i ɣa řebzeɣ ameksaw d tḥimart nnes, zzayek i ɣa řebzeɣ afeǧaḥ d zzayřet nnes ak-d iyenduzen, u zzayek i ɣa řebzeɣ lwulat d imseyyaren n temmurt,24maca zzat i tiṭṭawin nwem ad xeřfeɣ Necc zi Babil u zi marra imezdaɣ n temmurt n Ikaldaniyyen x marra řɣar i ggin di Ṣihyun, ammu i iqqar SIDI.”25“Xzar, Necc ad kidek dd-řhiɣ, cek adrar n Wareddeǧ, iqqar SIDI, cek d wenni yareddǧen marra tammurt. Necc ad xak dd-swiẓẓḍeɣ afus inu u ad cek sseqnunnyeɣ zi řejruf u ad cek ggeɣ d adrar icemmḍen.26Ɛemmarṣ war zzayek ttawyen ɛad aẓru i weẓru n teɣmart uřa d aẓru i dsusa, maɣar ad tdewřed i řxirbat i řebda, iqqar SIDI.”27“Sgeɛɛdem taɛeǧant di temmurt, suḍem deg uyicc n icarri jar řegnus, farzem řegnus ḍidd nnes, řaɣam ḍidd nnes i tgeldiwin n Araraṭ, Minni d Ackanaz, ggem ijj n řɛeskar ḍidd nnes, jjem iysan ad ffɣen am ijj n weyřaf n tmuɣri iṣarrḍen iqesḥen.28Farzem řegnus ḍidd nnes, ijeǧiden n Maday ak-d lwulat nnes d marra imseyyaren nnes, marra tammurt i x teǧa ṣṣulṭa nnes.29Xenni ad tenhezz temmurt uca ad tfarɣ s řeḥriq, minzi inwayen n SIDI bedden nican maḥend ad arren tammurt n Babil d ict n řqecɛet n unexřiɛ, war dayes izeddeɣ ɛad uřa d ijj.30Ayt n bu-teɣruḍt n Babil semḥen deg umenɣi, qqimen di lqelɛat nsen. Tefceř tzemmar nsen, nitni dewřen d timɣarin. Nitni qqden i tzeddiɣin nsen uca iɛumad nsen i ubelleɛ ttwarẓen.31Amsazzař nni x umsazzař nneɣni ittazzeř-dd, areqqas nni x ureqqas nneɣni, ḥima ad ḥajan i ujeǧid n Babil, aqa tandint nnes tᵉttwaṭṭef zi marra iɣezdisen,32aqa imucan n uẓekkwu ttwamenɛen, iyyaren n uɣanim ttwacemḍen s tmessi uca iɛeskariyyen ttwanhezzen.33Maɣar ammu i iqqar SIDI n řɛeskarat, AREBBI n Israil: Yeǧis n Babil tegga am unedrar, aqa tiweḍ-dd řweqt ḥima ad xas ɛefsen. Ɛad drus i iqqimen, xenni tiweḍ-dd řweqt n tmejra i nettat.”34“Nabuxadraṣṣar, ajeǧid n Babil, icca ayi, iřbez ayi, igga ayi d ijj n weqdiḥ ixwan, isarḍ ayi am řhaycet, iɛemmar aɛeddis nnes s řeḥzut inu uca yuẓẓeř xafi.35Ejj ad dd-yas x Babil lɛunf i d ayi iggin u deg yinni i iǧan d ddat inu, ammu i teqqar tenni izeddɣen di Ṣihyun. ‘Ejj ad dd-asen idammen inu x imezdaɣ n temmurt n Ikaldaniyyen ammu i teqqar Urcalim.”36“S uya, ammu i iqqar SIDI: ‘Necc simant inu ttedɛiɣ ddɛawi nnem u ad zzayem xeřfeɣ. Necc ad ssiẓɣeɣ řebḥar nnes u ad jjeɣ tařa nnes ad taẓeɣ.37Babil ad tedweř mɣir d řxirbat, ict n tzeddiɣt n wuccanen n řexřa, ict n řqecɛet n unexřiɛ d usemẓi maḥend war dayes ittɣimi izeddeɣ ɛad uřa d ijjen.’”38“Marra idsen ad zehharen am wayraden, ad ssmiɛɛriwen am wayraden imeẓyanen.39Xmi ɣa yiřin ḥman, ad ssarseɣ zzatsen tasessit nsen. Necc ad ten ssᵉscareɣ ař ɣa dewwxen uca ad ṭṭṣen iḍeṣ n řebda, ɛemmarṣ ad faqen ɛad, ammu i iqqar SIDI.40Necc ad ten dd-ssehwiɣ am yizemrawen ɣar tɣarṣt, am yicarriyyen ak-d iɣayḍen.41Mammec ittwaṭṭef Cicak u mammec ittwaṭṭef řɛezz n marra tammurt! Mammec tedweř tendint n Babil d ict n řqecɛet n unexřiɛ jar řegnus!42Igeɛɛed-dd řebḥar x tendint n Babil, s ubarru n řemwaj nnes tᵉttwadeř nettat.43Tineddam nnes dewřent d ict n řqecɛet n unexřiɛ, tammurt tedweř d tammurt yuẓɣen d tnezruft d ict n temmurt mani war izeddeɣ ɛad uřa d ijj u mani war ittcuqi uřa d ijj n mmis n bnadem.44Necc ad xeřfeɣ zi Bil di Babil, ad kkseɣ zi tmijja nnes min tuɣa isarḍ. Řegnus war ɣares ttazzřen ɛad. Ɛad řḥiḍ n Babil ad iwḍa.”45“Ffeɣ zzayes, a řgens inu, ejj kuř ijj ad issenjem tudart nnes zi řḥaduq n weɣḍab n SIDI.46Mařa lla xenni ad ḍeɛfen wuřawen nwem uca ad ggʷeden zi řexbar nni i ɣa sřen di temmurt, maɣar ijj n řexbar ad ittwaseř deg ijj n useggʷas uca awarni i yijj n useggʷas nneɣni ad dd-yas ijj n řexbar nneɣni. Ad din yiři lɛunf di temmurt, ijj n řḥakem ad dd-ikkar x ijj n řḥakem nneɣni.”47“S uyenni xzar, ad dd-asen wussan nni di ɣa xeřfeɣ zi Babil zi ssibbet n řexyařat ineqcen uca marra tammurt nnes ad tennefḍeḥ u marra inni ittwanɣen ad wḍan di řwesṭ nnes.48Ajenna d temmurt d marra min daysen ad sřiweřwen x Babil. Maɣar ad ɣares dd-asen imteḥḥayyen zi ccamal, ammu i iqqar SIDI.49Am mammec tuɣa Babil d ssibbet n uweṭṭu n yinni ittwanɣen n Israil, ammu i ɣa wḍan marra inni ittwanɣen zi marra tammurt ɣar tendint n Babil.”
50“Kenniw, inni inejmen i ssif, ffɣem, war sbeddam ixef nwem! Xemmem-dd zi řaggʷaj di SIDI u jjem Urcalim ad dd-tas ɣar řbař nwem.51Neccin nseḍḥa, maɣar nesřa x useḥqar, tezweɣ n řeḥya tedřa aɣembub nneɣ, maɣar ibarraniyyen geɛɛden x Tzawiyyin Iqeddsen n Taddart n SIDI.”
52“S uya xzar, ad dd-asen wussan, ammu i iqqar SIDI, Necc ad xeřfeɣ zi řexyařat nnes ineqcen uca di marra tammurt nnes ad ttwazbaren inni ittwanɣen.53Waxxa mařa tandint n Babil tgeɛɛed ař ajenna, waxxa tegga lbaraj nnes ijehden yuɛřan ař mani war yiwiḍ uřa d ijj, waxxa amenni ad ɣares dd-asen imteḥḥayen zzayi, ammu i iqqar SIDI.”
54“Iffeɣ-dd řḥess n tɣuyyit tameqqrant zi Babil, amecnaw n ict n lmuṣiba d tameqqrant zi temmurt n Ikaldaniyyen.55Maɣar SIDI igga ad ixarreb Babil u ad iqḍa x ddriz nnes ameqqran, minzi řemwaj nsen ad zehharen am waman imeqqranen, ddriz n uzehhar nsen ad ittwaseř.56Minzi ad xas dd-asen imteḥḥayen, x Babil, uca ttwaḥebbsen ayt n bu-teɣruḍt nnes, řeqwas nsen ad ttwarẓen, maɣar SIDI aqa-t d Arebbi n wexřaf, ad zzayes ixřef nican.”57“Ad ssᵉscareɣ řḥukkam nnes d imiɣisen nnes d lwulat nnes d imseyyaren nnes d ayt n bu-teɣruḍt nnes uca nitni ad ɣeḍṣen deg yiḍeṣ n řebda u ɛemmarṣ ad faqen, ammu i iqqar Ujeǧid, SIDI n řɛeskarat d Isem nnes.”58Ammu i iqqar SIDI n řɛeskarat: “Ad arren řeḥyuḍ imiriwen n Babil ad seḍḥan aṭṭas uca tiwwura nnes yuɛřan ad tent qedden s tmessi. Řegnus ad aḥřen baṭeř u ccuɛub ssiḥřen ixef nsen di ṭṭweɛ n tmessi.”
59Awař nni yumur unabi Irmiya i Saraya, mmis n Niri-Yah, mmis n Maḥsiyya, umi wanita yuyur zi Ṣidqiya, ajeǧid n Yahuda, ɣar Babil, deg useggʷas wiss arebɛa n řeḥkamet nnes. Tuɣa Saraya d řḥakem x řmargeḥ n řɛeskar.60Irmiya yura marra řɣar i dd ɣa yasen x Babil deg ijj n wedlis ittwannḍen, marra awařen nni ittwarin x Babil.61Xenni inna Irmiya i Saraya: “Xmi dd ɣa tased ɣar Babil, xzar mammec ɣa tegged ad tbarrḥed s marra awařen-a,62ad tinid: ‘A SIDI, Cek simant nnec teqqared x wemcan-a belli ad zzayes tekksed imezdaɣ, maḥend war dayes izeddeɣ ɛad uřa d ijj, řa bnadem uřa d řmař, u belli amcan-a ad yiři d ict n temmurt ittwareddǧen!’63Xmi i ɣa tkemmřed zeg uɣari n wedlis ittwannḍen, ad ɣares teqqned ijj n weẓru, ad t tenḍared di řwesṭ n yeɣzar n Lfuraṭ.64ad tinid: ‘Ammu i ɣa tɣebba tendint n Babil u war tgiɛɛid ɛad zi ssibbet n řɣar i xas dd-ssehwiɣ. Nitni ad sřawen.’” Ař da i yiwḍen wawařen n Irmiya.
expand_more
Search