Ḥizqiyal39rif_lti
Taɣarṣt tameqqrant x idurar n Israil
1“Xenni řexxu, a mmis n bnadem, nabb ḍidd i Hajuj uca ini: ‘Ammu i iqqar Sidi inu, SIDI: Xzar, aqa ayi xak, a, cek Hajuj, řḥakem n Ruc, Macik d Tubal.2Necc ad cek ssɛeqbeɣ u ad dayek ggeɣ tisennarin u ad cek ssgeɛɛdeɣ zi ṭṭrufa n ccamal uca ad cek gewwdeɣ x idurar n Israil.3Ad wteɣ řqews zeg ufus nnec azeřmaḍ uca ad ɣeḍřeɣ fřitcat nnec zeg ufus nnec afusi.4Ad tewḍid x idurar n Israil, cek d marra řɛeskar nnec d řegnus nni iǧan akidek. Necc wciɣ cek d macca i ɛřam kuř ijḍaḍ ittkeccaḍen u i řmař n řexřa.5X wudem n yeyyar ad tewḍid, minzi Necc nniɣ t, ammu i iqqar Sidi inu, SIDI.6Necc ad ssekkeɣ timessi x Majuj u x inni izeddɣen s řeḥna di tegzirin u nitni ad ssnen belli Necc d SIDI.7Necc ad ssbaneɣ Isem inu iqeddsen di řwest n řgens Israil u Necc war ttejjiɣ ɛad ad ssxemjen Isem inu iqeddsen. Řegnus ad ssnen belli Necc d SIDI, Amqeddas di Israil.8Xzar, ad dd-yas u ad imsar!, ammu i iqqar Sidi inu, SIDI. Wa d ass nni x ssiwřeɣ.’”9“Imezdaɣ n tneddam n Israil ad ffɣen uca ad ssarɣen timessi ad sscemḍen marra řesnaḥ: am tseddariyin timeẓyanin am tseddariyin timeqqranin uřa d řqews d fřitcat d iɛumad i yifassen d iḥricen. Sebɛa n iseggʷusa ad zzaysen ssarɣen timessi.10War dd-ttiwyen akeccuḍ zeg iyyar u war ttqessin tafřawt zeg izeɣran, minzi ssarɣen timessi s řesnah uca ad keccḍen inni ten ikeccḍen uca ad acaren i yinni d asen yucaren!’, ammu i iqqar Sidi inu, SIDI.”11“Deg wass nni ad imsar, aqa Necc ad sswejdeɣ din amcan i Hajuj ijj n wenḍeř di Israil, Řewḍa n yinni iẓekkwan, ɣar ccarq n řebḥar, u tanita ad tbelleɛ abrid i yinni ixsen ad ẓekkwan. Din i ɣa neḍřen Hajuj d marra řɣaci nnes inhewřen u ad xas řaɣan: Řewḍa n Řɣaci Inhewřen n Hajuj.12Taddart n Israil ad ten tenḍeř, maḥend ad ssizdegen temmurt, řmijař n sebɛa n iyuren.13Marra řgens n temmurt ad ten neḍřen uca aya ad asen yiři i ccan, deg wass i di ɣa ttwassɛuǧeɣ!’, ammu i iqqar Sidi inu, SIDI.14‘Ad farzen ɛawed iryazen maḥend ad ẓwan nitni tammurt břa qeṭṭu maḥend ad neḍřen inni xas ikkin, inni tuɣa iqqimen buzzřen x wudem n temmurt, ḥima ad ssizedgen tammurt. Awarni sebɛa n iyuren ad qeǧben nitni.15Inni i d asen ittxeṣṣa ad ẓwan tammurt ad tt ẓwan u xmi ittwařa ḥed ijj n yiɣes n bnadem, ad yegg ɣares ict n řmarka ař t ɣa neḍřen inni ineṭṭařen di Řewḍa n Řɣaci Inhewřen n Hajuj.16Ɛawed ad yiři isem n ict n tendint ‘Řɣaci Inhewřen’. Nitni ad sizedgen tammurt.’”17“Cek, a mmis n bnadem, ammu i iqqar Sidi inu, SIDI: ‘Ini i marra řmarkat n ijḍaḍ u i marra řmař n yeyyar: Munem-dd da, asem-dd, seddem ixef nwem zeg wenneḍ ɣar tɣarṣt inu nni ɣarṣeɣ i kenniw, taɣarṣt tameqqrant x idurar n Israil, uca ad teccem aysum, ad teswem idammen.18Ad teccem aysum n ayt n bu-řexcunet u ad teswem idammen n řḥukkam n ddunect, n icarriyyen d izmaren d iɣayḍen d ifunasen imeẓyanen, aqa aten marra dewsen di Basan.19Ad teccem tadunt ař ɣa tejjiwnem uca ad teswem idammen ař ɣa tescarem zi tɣarṣt inu i ɣarṣeɣ i kenniw.20Kenniw ad tejjiwnem ɣar ṭṭabřa inu s iysan d imnayen, s ayt n bu-teɣruḍt u s marra iɛeskariyyen, ammu i iqqar Sidi inu, SIDI.21Ad ggeɣ aɛuǧi inu jar řegnus uca marra řegnus ad ẓaren řḥukm inu nni ggiɣ, uřa d afus nni jar asen ssarseɣ.22Taddart n Israil ad tessen, aqa Necc, SIDI, d AREBBI nsen, zeg wass nni u zi ssa tsawent.23Ad ssnen řegnus aqa inni n taddart n Israil ttwanedhen di lmenfa zi ssibbet n řmuɛṣiyyet nsen, minzi ɣeddaren ayi uca Necc ffareɣ xasen udem inu uca wciɣ ten deg ufus n iɣrimen nsen u xenni wḍan marra s ssif.24Necc ggiɣ asen am mammec taxmuji nsen u am mammec řmuɛṣiyyet nsen u Necc ffareɣ zzaysen udem inu.’”25“S uya, ammu i iqqar Sidi inu, SIDI: ‘Řexxu ad ssɛeqbeɣ imeḥbas n Yaɛqub, ad ḥinneɣ x marra taddart n Israil. Ad usmeɣ di ṭṭweɛ n Yisem inu iqeddsen.26Nitni ad arbun řefḍiḥet nsen d marra řmuɛṣiyyet nsen i zi d ayi ɣḍaren xmi nitni ɛad zedɣen di řaman di temmurt nsen u war iǧi wi ten i ɣa issiggʷeden.27Xmi ten i ɣa ssɛeqbeɣ zi řegnus u ad ten ssmuneɣ zi temmura n řɛedyan nsen u Necc ad ttwaqeddseɣ zzaysen zzat i tiṭṭawin n waṭṭas n řegnus,28xenni ad ssnen belli Necc d SIDI, AREBBI nsen, minzi Necc nedheɣ ten d imeḥbas jar řegnus u Necc ssmuneɣ ten ɛawed di temmurt nsen, war din jjiɣ uřa d ijjen zzaysen.29Necc war xasen tteffareɣ ɛad udem inu, xmi aqa ssfarrɣeɣ Arruḥ inu x taddart n Israil!’, ammu i iqqar Sidi inu, SIDI.”No translations available.