1 Imezruyen15rif_lti
Asmuṭṭi n Ttabut zi taddart n Ɛubid-Idum ɣar Urcalim
1Dawud igga i yixef nnes tudrin di tendint n Dawud u netta igga ɛawed ijj n wemcan i Ttabut n AREBBI uca issbedd as ijj n uqiḍun.2Xenni inna Dawud: “War iɛeddeř aqa uřa d ijjen ad yarbu Ttabut n AREBBI, mɣir Ilawiyyen waha, maɣar SIDI ifarz i-ten ḥima ad arbun Ttabut n AREBBI u ḥima ad as sexxaren i řebda.”3Dawud issmun-dd marra Israil ɣar Urcalim ḥima ad ssgeɛɛden Ttabut n SIDI ɣar wemcan nnes nni tuɣa d as igga.4Dawud issmun arrawen n Harun d Ilawiyyen.5Zeg warrawen n Qahat tuɣa Uriyil d ameqqran nsen. Aytmas tuɣa aten di mya u-ɛicrin.6Zeg warrawen n Marari tuɣa Ɛasaya d ameqqran nsen. Aytmas tuɣa aten di mitayen u-ɛicrin.7Zeg warrawen n Jarcum tuɣa Yuwil d ameqqran nsen. Aytmas tuɣa aten di mya u-třatin.8Zeg warrawen n Iliṣafan tuɣa Camɛiya d ameqqran nsen. Aytmas tuɣa aten di mitayen.9Zeg warrawen n Ḥabrun tuɣa Iliyil d ameqqran nsen. Aytmas tuɣa aten di tmenyin.10Zeg warrawen n Ɛuzziyil tuɣa Ɛamminadab d ameqqran nsen. Aytmas tuɣa aten di mya u-tenɛac n yeryazen.11Dawud iřaɣa i ikehhanen Ṣaduq d Abyatar, uřa i Ilawiyyen Uriyil, Ɛasaya, Yuwil, Camɛiya, Iliyil d Ɛamminab.12Netta inna asen: “Kenniw d izeǧifen n ibabaten n řaǧat n Ilawiyyen. Sqeddsem ixef nwem, kenniw d aytmatwem, ḥima ad tessgeɛɛdem Ttabut n SIDI, AREBBI n Israil ɣar wemcan nni d as sswejdeɣ.13Minzi kenniw war teggim aya twařa tamezwarut, aqa SIDI, AREBBI nneɣ, isɛar xaneɣ, minzi war xas narzu ɛlaḥsab lfariḍa.14Ikehhanen d Ilawiyyen ssqeddsen ixef nsen ḥima ad ssgeɛɛden Ttabut n SIDI, AREBBI n Israil.15Ayt n Lawi arbun Ttabut n AREBBI ak-d iɛumad n trebbut x tɣarḍin nsen, am mammec t yumur Musa ɛlaḥsab awař n SIDI.16Dawud inna i imeqqranen n Ilawiyyen, aqa ad ssbedden aytmatsen, imedyazen ak-d dduzan n ǧɣa, ak-d lharpat, ak-d řgambriyat u ak-d taǧunin n wuzzař, maḥend ad ittwaseř řḥess issefraḥen ijhed.17Nitni ssbedden Hayman, mmis n Yuwil, u zeg aytmas: Asaf, mmis n Baraxya, u zeg ayt n Marari, umatsen, Itan, mmis n Qucaya,18u akidsen aytmatsen di dduq n tɛessast wiss tnayen: Zakariyya, Bin, Yaɛziyil, Camiramut, Yaḥiyil, Ɛunni, Iliyab, Banaya, Maɛasya, Mattitya, Ilifalya, Maqniya, Ɛubid-Idum d Yaɛiyil, nitni tuɣa aten d iɛessasen n tewwart.19Imedyazen tuɣa aten d Hayman d Asaf d Itan ak-d teǧunin n nnḥas, ḥima ad tent jjen ad ddendunen,20u Zakariyya, Ɛuzziyil, Camiramut, Yaḥiyil, Ɛunni, Iliyab, Maɛasya d Banaya ak-d lharpat ittwarriglan ɣar sennej,21d Mattitya, Ilifalya, Maqniya, Ɛubid-Idum, Yaɛiyil d Ɛazazya ak-d řgambriyat di řmeftaḥ wiss tmenya, ḥima ad ssuyuren izřan.22Kananya, ameqqran n Ilawiyyen, tuɣa-t x tarebbut n Ttabut. Netta isseřmed asen mammec tuɣa ittxeṣṣa ad arbun, maɣar netta issen as.23Baraxya d Ilqana tuɣa aten d iɛessasen n tewwart ɣar Ttabut.24Ikehhanen Cabanya, Yahucafaṭ, Natanayil, Ɛamasay, Zakariyya, Banaja d Iliɛazar suḍen di řebwaq zzat i Ttabut n AREBBI u Ɛubid-Idum d Yaḥiya tuɣa aten d iɛessasen n tewwart ɣar Ttabut.Asmuṭṭi n Ttabut ɣar tendint n Dawud25Ammu i imsar, aqa Dawud d imɣaren n Israil d imeqqranen x wařef ṭṭfen abrid ḥima ad ssgeɛɛden Ttabut n Řɛahd n SIDI s řefraḥet zi taddart n Ɛubid-Idum.26Řami arbun Ilawiyyen Ttabut n Řɛahd n SIDI am d asen iwca AREBBI afus, imsar aqa nitni qeddmen sebɛa n ifunasen imeẓyanen d sebɛa n icarriyyen d taɣarṣt.27Dawud tuɣa yarḍ ijj n useřham n řeqṭen azdad, uřa marra Ilawiyyen, inni yarbun Ttabut d yinni tuɣa ittɣennajen, d Kananya, ameḥḍayi x yinni ittɣennajen. Dawud yarḍ ijj n upalṭu n ukehhan n řeqṭen.28Ammu i issgeɛɛed marra Israil Ttabut n Řɛahd n SIDI s iɣuyyan n řefraḥet u s řḥess n usuḍi deg uyicc n icarri u di řebwaq u s řḥess n taǧunin n wuzzař, u nitni tuɣa ttiraren s lharpat d řgambriyat.29Řami dd-tiweḍ Ttabut n Řɛahd n SIDI ɣar tendint n Dawud, imsar, aqa Mixal, yeǧis n Cawul, texzar zi řkazi, teẓra mammec ineggez u mammec iceṭṭeḥ ujeǧid Dawud, uca tesseḥqar i-t deg wuř nnes.