أَيث-روما3
1إِيوَا يسْرَائِيلِيْين، مَا غَارْسن شَان نّْفَع خ يِنِّي وَار يدْجِين شَا زِي أَيث-إِسْرَائِيل؟ عَاوذ طَّهَارث، مَا ذَايس شَان نّْفَع؟2وَاه، اَطَّاس ن نّْفَع! ذ اَمزْوَارُو، يجَّا-ٱسن-د أَربِّـي اَوَاڒ نّس ذ لْأَمَانَا.3إِيوَا مڒَا ڒبْعَاض زَّايْسن وَار ؤُمِينن شَا، مَا س لْكُفر نْسن إِي زِي غَا يسْبطّڒ أَربِّـي ڒْعَهذ نّس؟4عمَّارْص! ڒَاحقَّاش أَربِّـي يقّار لْحَقِيقَا وَاخَّا يوْذَان مَارَّا سْخرِّيقن. مَامّش يقَّار لْكِتَاب:<أَوَاڒن نّش اَذ يڒِين صحَّان،شك اَذ تْربْحذ خْمِي غَا تْوَاحكْمذ.>5فَا مڒَا ڒْبَاطڒ نّغ إِي نْتݣّ يسْمظْهَار-د ڒْحَقّ ن أَربِّـي، مِين غَا نِينِي؟ (نش سَّاوَاڒغ عْلَاحْسَاب لْفِكْرَا ن بْنَاذم.) أَربِّـي، مَا يضدْجم-اَنغ خْمِي ذَانغ يتْعَاقَاب؟6لَّا، عمَّارْص! مَعْلِيك اَمنِّي، مَامّش غَا يݣّ أَربِّـي اَذ يحَاسب دُّنشْت-أَ؟7يمْكن اَذ يِينِي شَان يِجّن: مْڒِي ڒْبَاطڒ ينُو نتَّا يسْمظْهَار-د مْلِيح لْحَقِيقَا ن أَربِّـي، مْڒِي زَّايس يتْمَارْنِي أَربِّـي ذِي لْعَظَمَا نّس، إِيوَا مَايمِّي ذَايِي غَا يحْسب ذ لْعَاصِي؟8نِغ اَذ يِينِي شَان يِجّن: يَالَّاه أَ نݣّ ڒْبَاطڒ حمَا ٱزَّايس د يكّ ڒْخِير. أَمنِّي تَهَامن-اَنغ شَان يِوْذَان س ࢲُّوْر بلِّي نقَّار اَوَاڒ-أَ. ئِوْذَان-أَ نِثْنِي سْذَاهدْجن لْعِقَاب ن أَربِّـي!9إِيوَا نشِّين أَيث-إِسْرَائِيل، مَا لْحَالَا نّغ حْسن زݣ يِوذَان نّغْنِي؟ لَّا، عمَّارْص! ننَّا قْبڒ قَا أَيث-إِسْرَائِيل ذ يِنِّي وَار يدْجِين شَا زِي أَيث-إِسْرَائِيل مَارَّا نݣَّا ڒْمُعْصِيّث.10مَامّش يقَّار لْكِتَاب:<وَار يدْجِي حَدّ نِيشَان، ؤُڒَا ذ يجّن.11ؤُڒَا ذ يجّن مَا يفهّم.وَار يرزُّو خ أَربِّـي، ؤُڒَا ذ يجّن.12فّْغن اَبْرِيذ مَارَّا إِذْسن،ذوْڒن مَارَّا وَار نفّْعن.وَار يدْجِي حَدّ يتݣّ مِين يصبْحَان.13ثْمِيجَّا نْسن ذ اَنْضڒ ينُوْرْزْمن،ئِڒسَاون نْسن يخدّْعن.سّم ن يفِيغرَان يتفّغ-د زݣ يينْشِيشن نْسن.14نَّعْڒث ذ ثَارْزُوݣِي يشُّوْر زَّايْسن وقمُّوْم نْسن.15تْقلِّيقن س يضَارن نْسن اَذ سِّيزْڒن يذَامّن.16تجَّان اَرّْوِينَا ذ لْأَزْمَا مَانِي مَا رُوْحن،17أَبْرِيذ ن ڒهْنَا وَار ث سِّينن.18ثِيݣّْوْذِي زِي أَربِّـي وَار غَارْسن ثدْجِي جَار ثِيطَّاوِين نْسن.>19فَا نشِّين نسّن بلِّي مَارَّا مِين ذَايس ذِي شَّرِيعَا ن مُوْسَى تْوصَّا يِنِّي غَار ثدْجَا شَّرِيعَا-يَا بَاش ؤُڒَا ذ يجّن وَار غَارس يتِيڒِي بُو لْعُدر. أُو مَارَّا يِنِّي يدْجَان ذِي دُّنشْت-أَ اَذ يڒِين سْوَادَّاي ن لْحِسَاب ن أَربِّـي.20فَلِهَذَا، ؤُڒَا ذ يجّن ن بْنَاذم وَار يزمَّر اَذ يمصْڒَاح اَك أَربِّـي س ڒخْذَايم إِي ذَايس ذِي شَّرِيعَا؛ لَّا، شَّرِيعَا ثسْبيَّان-اَنغ-د مِين ثعْنَا ڒْمُعْصِيّث.21فَا ڒخُّو أَربِّـي يسْمظْهَار-اَنغ-د مَامّش غَا نݣّ أَ نْمصْڒَاح اَكِذس بْڒَا شَّرِيعَا. مَانَايَا صَحّن-ث لْكُتُوْب ن لأَنبِيَاء ذ شَّرِيعَا ن مُوْسَى نِثْنِي س يِيخف نْسن.22يعْنِي، أَربِّـي يسمْصْڒَاح اَكِذس مَارَّا ونِّي يتَامْنن زِي عِيْسَى لْمَسِيح، وَار يتْفرَّق جَار يِوْذَان. أَقَا مَارَّا عْصَان أَربِّـي، تْوَاحَرَّامن زِي لْعَظَمَا نّس.24أَربِّـي، نتَّا يسمْصْڒَاح-يثن اَكِذس س اَرْضَا نّس بَاطڒ س وسنْجم إِي د يُوْسِين س عِيْسَى لْمَسِيح.25أَربِّـي يقدّم-يث ذ لْفِدْيَا حمَا اَذ تْوَاغْفَارنْت ڒْمُعْصِيَاث س يذَامّن نّس، يعْنِي إِ يِنِّي يقبّْڒن مَانَاينِّي س لْإِيمَان نْسن. س مَانَاينِّي يسْمظْهَار-د أَربِّـي ڒْحَقّ نّس. نتَّا تُوْغَا يصبَّار، وَار ت يُوْوِي شَا ذِي ڒْمُعْصِيَاث نِّي إِي يعْذُوْن،26حمَا ٱذ د يسْمظْهَار ذِي زْمَان-أَ ڒْحَقّ نّس. لِأَنَّا أَربِّـي نتَّا نِيشَان إِݣ يدْجَا، نتَّا يسمْصْڒَاح اَكِذس ونِّي غَا يَامْنن زِي عِيْسَى.27إِيوَا مَا أَ نفْتَخر س شَان ڒْحَاجث؟ لَّا، ممْنُوْع! مَا ممْنُوْع س شَّرِيعَا، يعْنِي س لْحَسَانَاث؟ لَّا، س لإِيمَان!28مَايمِّي؟ ڒَاحقَّاش نشِّين غَارْنغ بلِّي بْنَاذم يسمْصْڒَاح-يث أَربِّـي اَكِذس س لإِيمَان نّس بْڒَا لْحَسَانَاث ن شَّرِيعَا.29إِيوَا أَربِّـي، مَا نتَّا ذ أَربِّـي ن أَيث-إِسْرَائِيل وَاهَا؟ لَّا! مَا وَار يدْجِي ؤُڒَا ذ أَربِّـي ن يِوْذَان وَار يدْجِين شَا زِي أَيث-إِسْرَائِيل؟ وَاه، ذ أَربِّـي نْسن ؤُڒَا ذ نِثْنِي.30لِأَنَّا أَربِّـي نتَّا ذ يجّن. ذ نتَّا إِݣ يسمْصْڒَاحن أَيث-إِسْرَائِيل اَكِذس س لإِيمَان، ذ يِنِّي وَار يدْجِين شَا زِي أَيث-إِسْرَائِيل س نّفْس لْإِيمَان.31إِذن، مَا أَ نسْبطّڒ شَّرِيعَا س لإِيمَان-أَ؟ عمَّارْص! لَّا، نشِّين نتْحَامَا شَّرِيعَا.
Wycliffe Bible Translators, Inc.