أَيث-روما16
1فَا تْوصِّيغ-كنِّيو خ وتْشْمَاثْنغ فِيفِي إِݣ يخدّْمن إِ جْمَاعْث ن ڒْمُوْمِنِين ذِي ثنْدِينْت ن كَنْخَرْيَا.2رحّْبث زَّايس عْلَاحْسَاب سِيذِيثْنغ، يعْنِي يجّن ن ورحّب إِي سْذَاهدْجن ڒْمُوْمِنِين صَّالِحِين. عَاوْنم-ت ذِي مَارَّا مِين تحْذَاج زَّايْوم ڒَاحقَّاش نتَّاث تْعَاوَان اَطَّاس ن يِوْذَان، تْعَاوَان-اَيِي ؤُڒَا ذ نش.3سِّيوْضم-اَسن سْڒَام إِ پْـرِيسْكِيلَا ذ وَاكِيلَاس، يِنِّي اَكِذِي يخدّْمن ذِي عِيْسَى لْمَسِيح.4غَامَرن س ثُوْذَارْث نْسن خ سَّبَاب ينُو. وَار يدْجِي غِير نش إِي ثن يتْشكَّرن، وَلَكِن تْشكَّرنْت-ثن مَارَّا ثِجُمَاع ن ڒْمُوْمِنِين وَار يدْجِين شَا زِي أَيث-إِسْرَائِيل.5سِيوْضم-اَسن سْڒَام عَاوذ إِ جْمَاعْث ن ڒْمُوْمِنِين يتْمُوْنَان ذِي ثدَّارْث ن ثْنَاين-أَ. سِيوْضم-اَس سْڒَام إ ومْعِيزّ ينُو إِپَـانْتُوْس ونِّي إِي يُوْمْنن ذ اَمزْوَارُو س لْمَسِيح ذِي لْإِقْلِيم ن آسْيَا.6سِيوْضم-اَس سْڒَام إ مَرْيَم إِݣ يخدّْمن اَطَّاس خَاوم.7سِيوْضم-اَسن سْڒَام إ أَنْدْرُوْنِي ذ يُوْنْيَاس ڒحْبَاب ينُو، يِنِّي تُوْغَا اَكِذِي ذِي ڒحْبس. نِثْنِي مَعْرُوْفِين جَار اَرُّسُل، ؤُمْنن زِي لْمَسِيح قْبڒ مَا ٱذ اَمْنغ نش.8سِيوْضم-اَس سْڒَام إِ أَمفِلَاوُس، أَمْعِيزِّي ينُو ذِي سِيذِيثْنغ.9سِيوْضم-اَسن سْڒَام إِ أُوْرْبَان ونِّي يخدّْمن اَكِذِي ذِي لْمَسِيح ذ ومْعِيزِّي ينُو سْتَاخِيس.10سِيوْضم-اَس سْڒَام إِ أَپِـيلَاس، ونِّي يتْوَاملّْكن ذِي لْمَسِيح. سِيوْضم-اَسن سْڒَام عَاوذ إِ لْعَئِلَا ن أَرِسْتُوْبُوْس.11سِيوْضم-اَس سْڒَام إ حَرُوْدِي ونِّي يدْجَان زِي ڒحْبَاب ينُو. سِيوْضم-اَسن سْڒَام إِ لْعَئِلَا ن نَرْقِيس يِنِّي يتَامْنن س سِيذِيثْنغ.12سِيوْضم-اَسنْت سْڒَام إِ ضْرِيفُوْنَا ذ ضْرِيفِيسَا ثِنِّي يخدّْمن اَطَّاس ذِي سِيذِيثْنغ. سِيوْضم-اَس سْڒَام إِ ثَافرْسِيسْت إِي خَانغ يعِيزّن، ثْخدّم اَطَّاس ذِي سِيذِيثْنغ.13سِيوْضم-اَسن سْڒَام إِ أَرُوْفُس ونِّي يتْوَاخْضَرن ذِي سِيذِيثْنغ ؤُڒَا ذ يمَّاس إِي حسّْبغ اَم يمَّا.14سِيوْضم-اَسن سْڒَام إِ سِنْكْرِيتُس ذ فِيلْݣُوْن ذ هَرْمَاس ذ پَـتْرُوْبَاس ذ هِرْمِس ذ اَيثْمَاثْسن إِي كِسن يدْجَان.15سِيوْضم-اَسن سْڒَام إِ فِيلُغِي ذ جُوْلْيَا ذ لُوْمْبَاس ذ نِيرْيُوْس اَك وتْشْمَاس ذ مَارَّا ڒْمُوْمِنِين صَّالِحِين إِي كِذْسن يدْجَان.16سدْجْمث خ وَايَاوْيَا س يِجّن ن سْڒَام يصْفَا. قَا مَارَّا ثِجُمَاع ن لْمَسِيح تْسدْجَامنْت خَاوم.17آي اَيثْمَا، تتَّارغ زَّايْوم اَذ تحْضَام يخف نْوم زݣ يِنِّي يفرّْقن ڒْمُوْمِنِين خ وَايَاوْيَا تݣّن-اَوم مِين يسفْشِيڒن، يعْنِي ضد ثْغُوْرِي نِّي إِي ثْڒمْذم كنِّيو. بعّْذث خَاسن خ يِيْنَا.18لِأَنَّا يِيْنَا وَار خدّْمن شَا إِ سِيذِيثْنغ عِيْسَى لْمَسِيح، خدّْمن غِير إِ وعدِّيس نْسن وَاهَا. س وَاوَاڒ يِيزِيضن ذ لْمُهَوَاضَا يزوّْقن خدّْعن ؤُڒَاون ن يِنِّي إِي ذِي ثدْجَا نِّيّث.19كنِّيو، سْڒِين خَاوم يوْذَان مَارَّا خ طَّاعَا نْوم، نش فَرْحغ زَّايْوم خ مَانَاينِّي. وَلَكِن خْسغ كنِّيو اَذ تِيڒِيم ذ يفْطَانن خ مِين يدْجَان ذ اَصبْحَان، أَذ تْغفْڒم خ مِين يدْجَان ذ شَّرّْ.20أَربِّـي ن ڒهْنَا نتَّا عْڒَاين اَذ يڒْبࢲ شِّيطَان سْوَادَّاي إِ يضَارن نْوم. أَكِذْوم يِيڒِي اَرْضَا ن سِيذِيثْنغ عِيْسَى لْمَسِيح.21ئِسِّيوض-اَوم-د سْڒَام تِيْمُوْتَاوُس ونِّي يخدّْمن اَكِذِي، ذ ڒحْبَاب ينُو يعْنِي لُوْقْيُوْس ذ يَاسِين ذ سِبَاتْرُو.22نش تَرْتْيُوْس سِّيوْضغ-اَوم-د يجّن ن سْڒَام ذِي سِيذِيثْنغ، نش إِݣ يُوْرِين ثَبْرَات-أَ.23ئِسِّيوض-اَوم-د سْڒَام غَايُوْس، ذ نتَّا إِي زَّايِي يرحّْبن غَار ثدَّارْث نّس يرْزم-يت إِ مَارَّا جْمَاعْث ن ڒْمُوْمِنِين. ئِسِّيوض-اَوم-د سْڒَام أَرِيسْطُوْس لْأَمِين ن صّنْدُوْق ن ثنْدِينْت، ذ ؤُمَاثْنغ قَرْتُوْس.24{أَخَاوم يِيڒِي مَارَّا إِذْوم اَرْضَا ن سِيذِيثْنغ عِيْسَى لْمَسِيح. آمِين.}25ئِتْوَابَرَاك أَربِّـي! نتَّا ذ ونِّي يزمَّرن اَذَاوم يُوْش جّْهذ س لْإِنْجِيل-أَ إِي تْبشَّارغ أُو عَاوذ س ؤُحدّث ن عِيْسَى لْمَسِيح عْلَاحْسَاب مِين د يبَانن تُوْغَاث مَانَاينِّي زِي زْمَان ينُوْفَّر.26ڒخُّو يبَان-د مَانَايَا إِ يِوْذَان يتْوَاسّن س لْكُتُب ن لْأَنْبِيَا. أَربِّـي يعْنِي ونِّي يتْدُوْمَان إِ ڒبْدَا يُوْمَر اَزَّايس اَمْنن مَارَّا ڒݣْنُوْس اَذَاس طَاعن.27أَربِّـي وَاحْذس إِي غَار ثدْجَا لْحِكْمَا، أَغَارس ثِيڒِي لْعَظَمَا إِ نتَّا إِ ڒبْدَا ن ڒبْدَاث س عِيْسَى لْمَسِيح! آمِين.
Wycliffe Bible Translators, Inc.