لواحي1
1وَانِيتَا ذ لْوَحِي ن عِيْسَى لْمَسِيح. يُوْشَا-اَس-ث أَربِّـي حمَا اَث يسْمظْهَار إِ يِنِّي ث يعَبّْذن. مَانَايَا يتْخصَّا أُو لَابُد اَذ يوْقع ذغْيَا. لْمَسِيح يسّكّ لْمَلَاك نّس اَذ يخبَّر مَانَايَا إِ ڒْعَبْذ نّس قَّارن-اَس يُوْحَنَّا.2أُو نتَّا ذ شَّاهد خ مَارَّا مِين يࢲْرَا، يعْنِي خ وَاوَاڒ ن أَربِّـي ذ مِين خف يشْهذ عِيْسَى لْمَسِيح.3سَّعْذ ن ونِّي إِي غَا يغَرن اَوَاڒن ن لْوَاحِي-يَا. سَّعْذ ن يِنِّي عَاوذ إِي غَا يصنّْطن إِ مِين يُوْرِين ذِي لْكِتَاب-أَ اَزَّايس ݣّن اَرَّاي ڒَاحقَّاش ڒْوقْث ثْقَارّب-د.4زِي يُوْحَنَّا غَار سبْعَا ن ثْجُمَاع ن ڒْمُوْمِنِين ذِي لْإِقْلِيم ن آسْيَا. أَكِذْوم يِيڒِي اَرْضَا ذ ڒهْنَا زݣ ونِّي إِݣ يدْجَان، تُوْغَا يدْجَا، عَاذ اَذ د يَاس. أَكِذْوم يِيڒِي اَرْضَا زِي سبْعَا ن اَرُّوْحَاث إِݣ يدْجَان زَّاث إِ لْعَرْش نّس.5أُو عَاوذ اَكِذْوم يِيڒِي اَرْضَا زِي عِيْسَى لْمَسِيح نتَّا ذ شَّاهذ ذَايس ڒَامَان. نتَّا إِي د يخڒْقن ذ اَمزْوَارُو ن يِنِّي إِي د يتكَّرن زِي ڒْموْث، ذ نتَّا إِݣ يحكّْمن خ يزدْجِيذن ن ثْمُوْرْث. ئِحِبّ-اَنغ، ئِفكّ-اَنغ زِي ڒْمُعْصِيَاث نّغ س يذَامّن نّس.6يݣَّا زَّايْنغ يجّن ن لْممْلَكَا ذ ڒْفُقَهَا إِ أَربِّـي بَابَاس. أَغَارس ثِيڒِي لْعَظَمَا ذ ڒحْكَام إِ نتَّا إِ ڒبْدَا، آمِين.7أَقَا يُوْسَا-د اَك وسيْنُو، أَث ࢲرنْت مَارَّا ثِيطَّاوِين ذ يِوْذَان نِّي إِي ث يشُوْكّن. أَخَاس حزْنن مَارَّا ڒْقُوْم ن ثْمُوْرْث. وَاه، آمين.8ئِقَّار سِيذِي أَربِّـي: "نش ذ لْأَلِف نش ذ لْيَاء. نش ذ ونِّي إِݣ يدْجَان، تُوْغَا دْجِيغ، عَاذ اَذ د اَسغ، زمَّرغ إِ كُڒْشِي."9نش ذ يُوْحَنَّا ذ ؤُمَاثْوم، شرّْشغ اَكِذْوم ذِي ڒمْحَاين ذ ڒْمُلْك ن أَربِّـي ذْ صّْبَار إِݣ يدْجَان ذِي عِيْسَى. تُوْغَا دْجِيغ ذِي ثيْزِيْرْث ن بَطْمُس عْلَاحْسَاب اَوَاڒ ن أَربِّـي ذ مِين خف يشْهذ عِيْسَى.10ذِي نْهَار ن سِيذِيثْنغ تُوْغَا يهْوَا-د خَافِي أَرُّوح ن أَربِّـي، سْڒِيغ غَار ذفَّار ينُو يجّن ن ثْمِيجَّا ثمْغَار صُّوْت نّس يݣَّا اَم زَّمَّار.11ثقَّار-اَيِي: "مِين تْوَاڒِيذ شك أَرِي-ث ذݣ يِجّن ن لْكِتَاب، سكّ-يث غَار سبْعَا ن ثْجُمَاع ن ڒْمُوْمِنِين ذِي ثنْدِينْت ن ؤُفَسُوْس، ذ سْمِيرْنَا، ذ بَرْغَامُوس، ذ ثِيَاتْرَا، ذ سَارْدِس، ذ فِيلَادَلْفْيَا، ذ لَاوْدُكْيَا."12نْقڒْبغ اَذ خْزَرغ غَار ثْمِيجَّا نِّي إِي كِذِي د يسَّاوَاڒن. وَامِي نْقڒْبغ ؤُفِيغ سبْعَا ن ڒقْنَاذڒ ن دّْهب.13ذِي ڒْوسْط ن ڒقْنَاذڒ نِّي ؤُفِيغ ذِنِّي يجّن يتْشَابَّاه ذِي مِّيس ن بْنَاذم، غَارس تْشَامِّير ذ اَزيْرَار حتَّا اَڒ يضَارن نّس. غَارس يجّن ن وحزَّام ن دّْهب يقْضع-د زݣ وغِيڒ غَار نّصّ.14أَشوَّاف ن وزدْجِيف نّس ذ اَشمْڒَاڒ يݣَّا اَم ثَاضُوْفْث نِغ اَم وذْفڒ. ثِيطَّاوِين نّس ݣِّينْت اَم شَان ؤُحَذُوْق ن ثْمسِّي.15ئِضَارن نّس تْشعْشِيعن ݣِّين اَم نّحَّاس يصْفَان اَم يَالَّاه إِي د يفّْغن زِي ڒْكُوْشث، ثْمِيجَّا نّس ثݣَّا اَم صُّوْت ن وَاطَّاس ن وَامَان.16ذݣ وفُوْس نّس اَفُوْسِي غَارس سبْعَا ن يِيثْرَان. أَقمُّوْم نّس يتفّغ-د زَّايس يجّن ن سِّيف يقْضع خ ثْنَاين ن جِّهَاث، أَغمْبُوْب نّس يݣَّا اَم نُّوْر ن ثْفُوْشْت إِي يتْشعْشِعن اَطَّاس.17وَامِي ث ࢲْرِيغ ؤُضِيغ-اَس غَار يضَارن نّس اَخْمِي مُّوْثغ. ئِسرْس-د خَافِي فُوْس نّس اَفُوْسِي ينَّا-ٱيِي: "وَار تݣّْوذ شَا!" ينَّا-ٱيِي: "قَا نش ذ اَمزْوَارُو ذ اَنكَّارُو.18نش ذ ونِّي يدَّرن. تُوْغَا مُّوْثغ، ڒخُّو نش دَّرغ إِ ڒبْدَا ن ڒبْدَاث. غَارِي ڒمْفَاتَاح ن ڒْموْث ذ لْأَخِرَا.19أَرِي مِين ثࢲْرِيذ، ذ مِين يتوْقِيعن ڒخُّو، ذ مِين غَا يوقْعن سَّا اَڒ ثْسَاونْت.20مِين يعْنَا ڒْمَعْنَا ينُوْفّرن ن سبْعَا ن يِيثْرَان نِّي إِي ثࢲْرِيذ ذݣ وفُوْس ينُو اَفُوْسِي ذ سبْعَا نِّي ن ڒقْنَاذڒ؟ سبْعَا نِّي ن يِيثْرَان، يعْنِي نِثْنِي ذ سبْعَا ن لْمَلَائِكَاث ن ثْجُمَاع ن ڒْمُوْمِنِين. سبْعَا نِّي ن ڒقْنَاذڒ، يعْنِي نِثْنِي ذ سبْعَا ن ثْجُمَاع ن ڒْمُوْمِنِين."
Wycliffe Bible Translators, Inc.