متى24
1ئِفّغ عِيْسَى زِي ثمْزِيذَا ثَمقّْرَانْت يبعّذ سّنِّي شْوَايْت. قَارّْبن-د غَارس يمحْضَارن نّس حمَا اَذَاس سظْهَارن ڒبْنِي ن ثمْزِيذَا ثَمقّْرَانْت.2ئِنْدق-د عِيْسَى ينَّا-ٱسن: "مَا تْوَاڒَام قَاع مَانَايَا؟ أَقَا تسْڒَام ڒْحَقّ: وَار ذَا يتْغِيمِي يجّن ن وزْرُو خ ونّغْنِي، مَارَّا مَانَايَا اَذ ينهْذم."3وَامِي يقِّيم عِيْسَى ذݣ وذْرَار ن زِّيتُوْن، قَارّْبن-د غَارس يمحْضَارن نّس وَاحذْسن نَّان-اَس: "إِنِي-يَانغ شك، مڒْمِي غَا يوْقع مَانَايَا؟ مِين ثعْنَا لْعَلَامَا نِّي خْمِي د غَا ثَاسذ شك، ذ ڒفْنَا ن زْمَان؟"4ئِجَاوب-يثن عِيْسَى ينَّا-ٱسن: "حْضَام يخف نْوم حمَا وَار كنِّيو يخدّع حَدّ.5أَطَّاس إِي د غَا يَاسن س يِيسم ينُو زَعْمَا اَذ ينِين قَا نش ذ لْمَسِيح! أَذ خذْعن اَطَّاس ن يِوْذَان.6خْمِي غَا ثسْڒَام خ لْحُرُوْب ذ ڒخْبَار ن لْحُرُوْب وَار تݣّْوْذم شَا، لَابُد زِي مَانَايَا. وَلَكِن دُّنشْت-أَ عَاذ وَار ثْفنِّي شَا.7دُّوْلَا اَذ تهْجم خ دُّوْلَا، لْممْلَكَا اَذ تهْجم خ لْممْلَكَا. أَذ يِيڒِي جُّوْع اَذ يوْقع زِّنْزَال ذݣ وَاطَّاس ن يمُوْشَان.8مَارَّا مَانَايَا اَذ يِيڒِي اَمشْنَاو ڒحْرِيق اَمزْوَارُو ن ثمْغَارْث يتَارْون.9سّنِّي اَكنِّيو سلّْمن يِوْذَان حمَا اَكنِّيو عدّْبن، أَكنِّيو نْغن. مَارَّا دُّوَل اَكنِّيو عِيفّن عْلَاحْسَاب يسم ينُو.10أَطَّاس إِي غَا يكْفَرن زݣ يِنِّي إِي يُوْمْنن. أَذ زّنْزن اَيَاوْيَا، أَذ عِيفّن اَيَاوْيَا.11أَذ د مظْهَارن اَطَّاس ن يِوْذَان اَذ اَرّن يخف نْسن ذ لْأَنْبِيَا، أَذ خذْعن اَطَّاس ن يِوْذَان.12أَذ تنْقس ڒمْحِبّث جَار يِوْذَان مِينْزِي اَذ يكْثَر شَّرّْ.13وَلَكِن ونِّي غَا يصْبَرن غَار ونݣَّارُو اَتَاف اَذ ينْجم.14لْإِنْجِيل ن ڒْمُلْك ن أَربِّـي اَخَاس حدّْثن يِوْذَان ذِي مَارَّا ثِمُوْرَا ن دُّنشْت حمَا اَغَارْسن ثِيڒِي شْهَاذث خَافِي. ڒخْدّنِّي إِي د غَا يَاس ڒفْنَا.15خْمِي غَا ثࢲرم <مِين يدْجَان ذ اَعفَّان اَطَّاس يهدّْمن> نتَّا يتْبدَّا ذݣ ومْشَان يقدّْسن، يعْنِي مِيْخف يسِّيوڒ نَّبِي دَانْيَال (أَ فْهم آ ونِّي يغْرِين مَانَايَا!)،16ڒخْدّنِّي يِنِّي يدْجَان ذِي ثْمُوْرْث ن يَهُوْذِيَا ئِتْخصَّا اَذ اَروْڒن غَار يذُوْرَار.17ونِّي غَا يِڒِين خ ثْزقَّا نّس يتْخصَّا-ٱس وَار يهكّْوِي شَا غَار ثدَّارْث حمَا اَذ ييْسِي شَان ڒْحَاجث.18ونِّي غَا يِڒِين ذݣ ومَرْجع يتْخصَّا-ٱس وَار يتعْقِيب شَا غَار ثدَّارْث اَذ ييْسِي تْشَامِّير نّس.19يَا تَمَارَا خ ثمْغَارِين إِي غَا يِيڒِين س يعدِّيسن ذݣ وُوْسَّان نِّي، ذ ثِنِّي إِي يسُّوْطُوْضن!20تَّارث إِ أَربِّـي بَاش وَار تَروّْڒم شَا ذِي ڒْمشْتَا نِغ ذِي نْهَار ن لْعِبَادَا.21ذِي ڒْوقْث نِّي اَتَاف اَذ توْقع يجّن ن تَمَارَا ذ ثَمقّْرَانْت إِي وَار يوْقِيعن عمَّارْص زݣ وَامِي ثدْجَا دُّنشْت-أَ اَڒ ڒخُّو، أُو عمَّارْص اَذ توْقع عَاوذ.22مَعْلِيك سِيذِي أَربِّـي وَار يسنْقِيس شَا ذِي ڒِيَّام نِّي ن تَمَارَا-يَا إِي د غَا يَاسن، أَتَاف وَار ينجّم ؤُڒَا ذ يجّن. خ سَّبَاب ن يِنِّي يخْضَر أَربِّـي، أَتَاف اَذ يسنْقس ڒِيَّام نِّي إِي د غَا يَاسن.23سّنِّي مڒَا ينَّا-ٱوم شَان يِجّن: خْزَرم! أَقَاث ذَانِيتَا لْمَسِيح! نِغ، أَقَاث ذِيهَا! وَار ث تَامْنم شَا.24أَقَا اَطَّاس إِي د غَا يمظْهَارن س يخَرِّيقن اَذ ينِين اَقَا نش ذ لْمَسِيح نِغ نش زِي لْأَنْبِيَا. أَذ ݣّن لْمُعْجِزَاث ذ ثِمقّْرَانِين ذ ڒَعْجَايب زَعْمَا حمَا اَذ خذْعن يوْذَان. مَعْلِيك زمَّرن يڒِي خذْعن ؤُڒَا ذ يِنِّي يخْضَر أَربِّـي.25خْزَرم! أَقَا نش عڒْمغ-اَوم خ مَانَايَا قْبڒ مَا ٱذ يوْقع.26مڒَا نَّان-اَوم: خْزَرم، أَقَاث ذِي ڒخْڒَا! وَار تْرَاحم شَا ذِنِّي. نِغ مڒَا نَّان-اَوم: خْزَرم، أَقَاث غَار ذَاخڒ ذݣ يخَّامن! وَار ثن تَامْنم شَا.27أَقَا خْمِي د غَا يَاس مِّيس ن بْنَاذم اَتَاف اَذ يِيڒِي اَمشْنَاو اَسَّام إِي د يتفّْغن زِي شَّرْق يتْشعَّاڒ غَار لْغَرْب.28مَانِي دْجَان يمُوْرْضَاس، ذِنِّي إِݣ يتْمُوْنن يبَاغرِيون.29منْبَعْد إِ تَمَارَا ن ڒِيَّام نِّي، ڒخْدّنِّي ثْفُوْشْت اَذ تذْوڒ ذ ثَادْجسْت، ثَزِيرِي وَار تِيشّ بُو ثْفَاوْث. ئِثْرَان اَذ د وْضَان زݣ وجنَّا، يِنِّي يجهْذن ذݣ وجنَّا اَثن يسنْهزّ أَربِّـي. 30أُوْشَا اَذ تْمظْهَار لْعَلَامَا ن مِّيس ن بْنَاذم ذݣ وجنَّا، ڒخْدّنِّي إِي غَا حزْننْت مَارَّا ثِقبَّاڒ ن ثْمُوْرْث. أَذ ࢲرنْت مِّيس ن بْنَاذم يهوَّا-د ذݣ وسيْنُو ن وجنَّا س لْعَظَمَا ذ جّْهذ نّس يمْغَارن.31أَذ يصُوْض يجّن ن زَّمَّار ذ اَمقّْرَان، أَذ د يسّكّ لْمَلَائِكَاث نّس غَار اَرْبعَا ن يمُوْشَان ن ثْمُوْرْث مَانِيس د يتكّ اَرِّيح: زِي شَّرْق ذ لْغَرْب ذ لْجَنُوْب ذ شَّمَال. أَذ يسْمُوْن يِنِّي يخْضَر زِي ڒَاحدّ ن وجنَّا اَڒ ڒَاحدّ نّس نّغْنِي.32ڒمْذم يجّن ن ڒْمَعْنَا زِي ثْشجَّارْث ن ثَازَارْث. غِير ڒفْرُوْع نّس اَذ حبّْبن اَذ ݣّن ثِيفْرَاي، أَتَاف اَذ تسّْنم يَالَّاه اَنبْذُو يقَارّب-د.33أَمنِّي ؤُڒَا ذ كنِّيو. خْمِي غَا ثࢲرم مَارَّا ثِمسْڒَايِين-أَ يتوْقِيعن اَتَاف اَذ تسّْنم إِلَّا مَانَايَا يُوْذس-د، أَقَاث زَّاث إِ ثوَّارْث.34أَقَا تسْڒَام ڒْحَقّ: وَار تْمتِّين يِوْذَان ن ڒْوقْث-أَ اَڒ غَا يوْقع مَارَّا مَانَايَا.35أَذ يفْنَا وجنَّا ذ ثْمُوْرْث، وَلَكِن اَوَاڒن ينُو وَار فنِّين شَا عمَّارْص.36شُوْف، نْهَار نِّي نِغ ثْسَعَّات نِّي وَار ت يسِّين ؤُڒَا ذ يجّن، لَّا لْمَلَائِكَاث ذݣ وجنَّا ؤُڒَا ذ مِّيس. يسّن-يت غِير بَابَا وَاحْذس.37أَمشْنَاو مَامش يوْقع ذِي ڒِيَّام نِّي ن نُوْح، أَمنِّي إِي غَا يوْقع خْمِي د غَا يذْوڒ مِّيس ن بْنَاذم.38ئِوْذَان ذِي ڒْوقْث نِّي قْبڒ إِ طُّوْفَان، تُوْغَا تتّن، سسّن، مدْجْشن تْوَاسْمدْجَاشن، حتَّا اَڒ نْهَار وَامِي يُوْذف نُوْح ذݣ وغَرَّابُو.39وَار فْطِينن شَا اَڒ وَامِي د يُوْسَا طُّوْفَان يسْغَرق-يثن مَارَّا. أَمُّو إِي غَا يوْقع خْمِي د غَا يذْوڒ مِّيس ن بْنَاذم.40أَذ يڒِين ثْنَاين ن يرْيَازن ذݣ ومَرْجع، ئِجّن اَذ يميْسِي يجّن اَذ يقِّيم.41أَذ يڒِينْت ثْنَاين ن ثمْغَارِين ذِي ثْسِيرْث حرِّينْت ثِحبَّا، ئِشْتن اَذ تْميْسِي يشْتن اَذ تقَّيم.42خ مَانَايَا فَاقم بَعْدَا، قَا وَار ثسِّينم شَا مڒْمِي د غَا يذْوڒ سِيذِيثْوم.43ئِتْخصَّا-ٱوم اَذ تسّْنم مَانَايَا: مْڒِي بَاب ن ثدَّارْث يسّن ثْسَعَّات إِي ذِي د غَا يَاس وشفَّار، ئِڒِي يقِّيم يفَاق حمَا وَار ث يتِيجِّي شَا اَذ د يَاذف ثَدَّارْث نّس.44خ مَانَايَا، سْوجْذم يخف نْوم مِينْزِي مِّيس ن بْنَاذم اَذ د يَاس ذݣ يِجّن ن ثْسَعَّات وَار ث تْرِيجِيم شَا.45مِين يعْنَا وخدَّام إِي يدْجَان ذ اَمِيغِيس، ذَايس ڒَامَان؟ نتَّا ذ ونِّي إِݣ يتْكلَّاف سِيذس اَذَاسن يُوْش مَشَّا إِ يخدَّامن نّس ذِي ڒْوقْث نِيشَان.46سَّعْذ ن وخدَّام نِّي، خْمِي د غَا يذْوڒ سِيذس اَث يَاف يخدّم.47أَقَا تسْڒَام ڒْحَقّ: أَخدَّام نِّي اَث يكلّف سِيذس خ مَارَّا اَݣْڒَا نّس.48وَلَكِن اَخدَّام نِّي مڒَا ذ اَعفَّان ينوَّا بلِّي سِيذس اَذ يعْظڒ وَار د يتِيس شَا،49أَتَاف اَذ يبْذَا يشَّاث يخدَّامن اَذ يشّ اَذ يسو اَذ يِيڒِي اَك يسْكَايْرِيْين وَاهَا.50أُوشَا اَذ د يَاس سِيذس ن وخدَّام نِّي ذݣ يِجّن ن نْهَار وَار ث ينْوِي شَا، ذݣ يِجّن ن ثْسَعَّات وَار ث يسِّين شَا.51أَث يقسّ ذ يوزْوِيزن اَث ينْضَر ذݣ ومْشَان ن لْمُنَافِقِين، ذِنِّي إِي غَا يڒِين يمطَّاون ذ وغࢲَّاࢲ ن ثغْمَاس.
Wycliffe Bible Translators, Inc.