يوحنا6
1منْبَعْد إِ مَانَايَا يرُوْح عِيْسَى اَذ يࢲْوَا ڒبْحَر ن لْجَالِيل (قَّارن-اَس إِ ڒبْحَر نِّي طَبَرْيَا).2ذْفَارن-ث اَطَّاس ن يِوْذَان وَامِي ࢲْرِين لْمُعْجِيزَاث نِّي وَامِي يسْݣنْفَا يمهْڒَاش.3ئِݣَعّذ عِيْسَى غَار وذْرَار يقِّيم اَك يمحْضَارن نّس.4ڒْعِيذ اَمقّْرَان ن أَيث-إِسْرَائِيل وَار ذَاس يقِّيم شَا اَذ د يَاوض.5ئِيْسِي عِيْسَى ثِيطَّاوِين نّس يُوْفَا ڒْغَاشِي ݣُّوْرن-د غَارس، ينَّا-ٱس إِ فِيلِيپَّـاس: "مَانِيس د غَا نْسغ اَغْرُوْم بَاش اَذَاسن نُوْش إِ يِيْنَا اَذ شّن؟"6ئِقَّار-اَس اَمُّو حمَا اَث يجَرّب ڒَاحقَّاش نتَّا يسّن مِين غَا يخْذم.7ينَّا-ٱس فِيلِيپَّـاس: "مڒَا نْسغ-د اَغْرُوْم س مِيَّاتَاين ن ثْپِـيَّاسِين ن نُّقَارْث، وَار يتْقِدِّي ؤُڒَا ذ يجّن ن ورمُّوْز إِ يِجّن."8ينَّا-ٱس يجّن زݣ يمحْضَارن نّس، نتَّا ذ أَنْدْرُوْس ؤُمَاس ن سِمْعَان بُطْرُس:9"أَقَا يج وحنْجِير غَارس خمْسَا ن ثْخبَّازِين ن يمنْدِي ذ ثْنَاين ن يسڒْمَان، وَلَكِن مَانَايَا وَار ذَاسن يتْقِيدِّي شَا إِ ڒْغَاشِي-يَا."10ينَّا-ٱسن عِيْسَى: "سْغِيمث يِوذَان-أَ." أَمْشَان نِّي مَانِي قِّيمن ذِنِّي اَطَّاس ن اَرْبِيع أُو ذِنِّي شَان خمْسَاڒَاف ن يرْيَازن.11ئِيْسِي-د عِيْسَى اَغْرُوْم نِّي يشكَّر أَربِّـي، يفرق-يث إِ يِنِّي إِي ذِنِّي يقِّيمن. أَمُّو يݣَّا ؤُڒَا إِ يسڒْمَان، ؤُشِين-اَسن عْلَاحْسَاب مِين رزّْوْن.12وَامِي جِّيوْنن، ينَّا-ٱسن إِ يمحْضَارن نّس: "جمْعث يڒقُّوْزن نِّي يشطّن حمَا وَار يتمْضيِّيع وَالُو."13وَامِي جمْعن، ؤُفِين ثنْعَاش ن ثقْرَابِين شُّوْرنْت زݣ يڒقُّوْزن نِّي يشطّن خ يِنِّي يشِّين زِي خمْسَا ن ثْخبَّازِين ن يمنْدِي نِّي.14وَامِي ࢲْرِين لْمُعْجِيزَا نِّي إِي يݣّا، ئِوْذَان نَّان قَا ذ وَانِيتَا ذ نَّبي ذ صَّح تُوْغَا د غَا يَاسن اَذ يِيڒِي ذِي دُّنشْت-أَ.15يسّن عِيْسَى بلِّي رزُّوْن اَث اَرَّان ذ اَزدْجِيذ س بسِّيف. ئِكَّر يُوْيُوْر سّنِّي، ئِذْوڒ غَار يذُوْرَار وَاحْذس.16أَݣ وعشِّي، هْوَان-د يمحْضَارن نّس غَار ڒبْحَر.17نْيِين ذِي ثْغَرَّابُوْت رَاحن اَذ قضْعن ڒبْحَر غَار وبِيلَاج ن كَفرْنَاحُوْم. ثُوْوض-د دْجِيڒث أُو عِيْسَى نتَّا عَاذ وَار غَارْسن د يُوْسِي.18ئِكَّر-د اَكِذْسن ڒبْحَر، يتْصُوْض اَرِّيح اَطَّاس.19وَامِي نِثْنِي تُوْغَا ؤُيُوْرن شَان خمْسَا نِغ ستَّا كِيلُوْمِت، ࢲْرِين عِيْسَى يݣُّوْر خ يضَارن خ وَامَان ن ڒبْحَر يقَارّب-د غَار ثْغَرَّابُوْت، نْخڒْعن س ثِيݣّْوْذِي.20ينَّا-ٱسن: "أَقَا ذ نش، وَار تݣّْوْذم شَا."21أُوْشَا قبْڒن-ث س ڒْخَاضَر نْسن اَذ يَاڒِي ذِي ثْغَرَّابُوْت. ڒخْدّنِّي ثَغَرَّابُوْت ثُوْوض غَار ڒْبَرّ مَانِي تُوْغَا ݣِّين اَذ رَاحن.22ثِيوشَّا نّس، ڒْغَاشِي نِّي يقِّيمن اَجمَّاض إِ ڒبْحَر فقْذن بلِّي تُوْغَا ذِنِّي يجّن ن ثْغَرَّابُوْت وَاهَا وَار ت ؤُفِين شَا. نِثْنِي سّْنن عِيْسَى وَار يُوْڒِي شَا ذِي ثْغَرَّابُوْت نِّي، ئِمحْضَارن نّس ؤُيُوْرن وَاحذْسن.23سّنِّي ؤُسِينْت-يد ثْغَرُّوْبَا نّغْنِي زِي ثنْدِينْت ن طَبَرْيَا غَار ومْشَان نِّي مَانِي شِّين اَغْرُوْم نِّي مَانِي يشكَّر عِيْسَى أَربِّـي.24وَامِي ڒْغَاشِي نِّي وَار ࢲْرِين شَا عِيْسَى ذِنِّي ؤُڒَا ذ يمحْضَارن نّس، نْيِين ؤُڒَا ذ نِثْنِي ذِي ثْغَرُّوْبَا ؤُيُوْرن سّنِّي رُوْحن غَار كَفرْنَاحُوْم رزُّوْن خ عِيْسَى.25وَامِي ث ؤُفِين غَار وجمَّاض-ين إِ ڒبْحَر نَّان-اَس: "آ لْمُعَلِّم، مڒْمِي ذَا د تُوْسِيذ ذَانِيتَا؟"26ينْدق-د عِيْسَى ينَّا-ٱسن: "أَقَا تسْڒَام ڒْحَقّ: كنِّيو ثْرزُّوْم خَافِي وَار يدْجِي بُو وَامِي ثࢲْرِيم لْمُعْجِيزَاث، كنِّيو ثْرزُّوْم خَافِي وَامِي ثشِّيم ثْجِّيوْنم اَغْرُوْم.27وَار خدّْمث شَا إِ ڒْمَكْلَا يخسَّرن، خذْمث إِ ڒْمَكْلَا يتْغِيمَان إِ ثُوْذَارْث ن ڒبْدَا. ذ ثَا ذ ڒْمَكْلَا ذَاوم غَا يُوْش مِّيس ن بْنَاذم مِينْزِي وَانِيتَا يضْبع-يث أَربِّـي بَابَاس س طَّابَع نّس."28نَّان-اَس: "مِين يتْخصَّا أَ نݣّ حمَا أَ نْزمَّر أَ نخْذم ڒخْذَايم ن أَربِّـي؟"29ينَّا-ٱسن عِيْسَى: "ذ ثَا ذ ڒْخذْمث ن أَربِّـي: أَذ تَامْنم زِي ونِّي إِي د يسّكّ نتَّا."30نَّان-اَس: "مَان لْعَلَامَا ثَمقّْرَانْت إِي غَا ثݣّذ اَت نْࢲر حمَا اَزَّايك نَامن؟ مِين غَا ثݣّذ؟31ذِي ڒخْڒَا ڒجْذُوْذ نّغ شِّين اَغْرُوْم نِّي ؤُمِي قَّارن لْمَنَّا مَامّش د يُوْسَا ذِي لْكِتَاب: <يُوْشَا-ٱسن-د اَغْرُوْم زݣ وجنَّا حمَا اَث شّن.>"32ينَّا-ٱسن عِيْسَى: "أَقَا تسْڒَام ڒْحَقّ: وَار يدْجِي بُو ذ مُوْسَى إِي ذَاوم يُوْشِين اَغْرُوْم زݣ وجنَّا؛ لَّا، ذ بَابَا إِي ذَاوم يتِيشّن اَغْرُوْم ن صَّح زݣ وجنَّا.33مِينْزِي اَغْرُوْم ن أَربِّـي نتَّا ذ ونِّي إِي د يهوَّان زݣ وجنَّا يتِيشّ-اَس ثُوْذَارْث إِ دُّنشْت."34نَّان-اَس: "إِيوَا آ سِيذِي، ؤُش-اَنغ اَغْرُوْم-أَ إِ ڒبْدَا."35ينَّا-ٱسن عِيْسَى: "نش ذ اَغْرُوْم ن ثُوْذَارْث. ونِّي إِي غَاري د غَا يَاسن وَار يتْڒِيزِي عمَّارْص. ونِّي زَّايِي غَا يَامْنن وَار يتْفِيذِي عمَّارْص.36وَلَكِن نِّيغ-اَوم: وَاخَّا ثࢲْرِيم-اَيِي كنِّيو، وَار تِيمْنم شَا.37مَارَّا مِين ذَايِي د يتِيشّ بَابَا يتَاس-د غَارِي. ونِّي إِي د يتَاسن غَارِي وَار ث سِݣّوِيجغ شَا.38مِينْزِي نش هْوِيغ-د زݣ وجنَّا، وَار يدْجِي شَا اَذ ݣّغ مِين خْسغ؛ لَّا، هْوِيغ-د اَذ ݣّغ مِين يخس ونِّي إِي ذَايِي د يسّكّن.39مِين يخس ونِّي إِي ذَايِي د يسّكّن؟ يخس بلِّي زِي مَارَّا مِين ذَايِي يُوْشَا وَار ذَايِي يتْودَّار ؤُڒَا ذ يجّن، أَثن د سكَّرغ ذِي نْهَار اَنݣَّارُو.40مِين يخس بَابَا؟ يخس بلِّي كُڒ ونِّي يࢲْرِين مِّيس يُوْمن زَّايس، أَغَارس ثِيڒِي ثُوْذَارْث ن ڒبْدَا نش اَثِيذ سكَّرغ ذِي نْهَار اَنݣَّارُو."41بْذَان يسْرَائِيلِيْين نِّي تْشثْشَان زَّايس وَامِي ذَاسن ينَّا قَا نش ذ اَغْرُوْم إِي د يهْوَان زݣ وجنَّا.42نَّان: "وَانِيتَا، مَا وَار يدْجِي شَا ذ عِيْسَى ذ مِّيس ن يُوسف نِغ؟ نشِّين نسّن بَابَاس ذ يمَّاس، مَامّش غَا يِينِي قَا نش هْوِيغ-د زݣ وجنَّا؟"43ينَّا-ٱسن عِيْسَى: "وَار تْشثْشَام شَا جَارَاوم.44وَار يزمَّر ؤُڒَا ذ يجّن اَذ د يَاس غَارِي إِلَّا مڒَا س لْإِذن ن بَابَا إِي ذَايِي د يسّكّن، نش اَثِيذ سكَّرغ ذِي نْهَار اَنݣَّارُو.45أَمُّو إِي يُوْرَا يجّن زِي لْأَنْبِيَا: <مَارَّا اَذ ڒمْذن زِي أَربِّـي.> مَارَّا ؤُو إِي س يسْڒِين إِ بَابَا اَذ يڒْمذ زَّايس اَتَاف اَغَارِي د يَاس.46وَار يدْجِي ؤُڒَا ذ يجّن يࢲْرَا بَابَا إِلَّا ونِّي إِي د يُوْسِين زِي أَربِّـي، ذ نتَّا إِݣ يࢲْرِين بَابَا.47أَقَا تسْڒَام ڒْحَقّ: ونِّي إِي غَا يَامْنن اَغَارس ثِيڒِي ثُوْذَارْث ن ڒبْدَا.48نش ذ اَغْرُوْم ن ثُوْذَارْث.49ڒجْذُوْذ نْوم شِّين اَغْرُوْم ن وجنَّا ذِي ڒخْڒَا، وَاخَّا اَمنِّي مُّوْثن.50مِين يعْنَا وغْرُوْم إِي د يهْوَان زݣ وجنَّا بَاش ونِّي إِي ث غَا يشّن وَار يتْمتِّي شَا؟51أَقَا ذ نش ذ اَغْرُوْم يدَّرن إِي د يهْوَان زݣ وجنَّا. مَارَّا ونِّي غَا يشّن زݣ وغْرُوْم-أَ اَذ يدَّر إِ ڒبْدَا. أَغْرُوْم-أَ إِي تِيشّغ نش ذ دَّات ينُو حمَا اَذ تدَّر دُّنشْت-أَ."52ئِسْرَائِيلِيْين نِّي منْغن جَارَاسن نَّان: "مَامّش غَا يݣّ وَانِيتَا اَذَانغ يُوْش دَّات نّس اَت نشّ؟"53ينَّا-ٱسن عِيْسَى: "أَقَا تسْڒَام ڒْحَقّ: مڒَا وَار ثشِّيم شَا دَّات ن مِّيس ن بْنَاذم وَار ثْسسّم شَا يذَامّن نّس، أَذ تِيڒِي وَار غَارْوم بُو ثُوْذَارْث ذݣ يِيخف نْوم."54ينَّا-ٱسن: "ونِّي غَا يشّن دَّات ينُو اَذ يسو يذَامّن ينُو، أَغَارس ثِيڒِي ثُوْذَارْث إِ ڒبْدَا نش اَثِيذ سكَّرغ ذِي نْهَار اَنݣَّارُو.55مِينْزِي دَّات ينُو ذ ڒْمَكْلَا ن صَّح، ئِذَامّن ينُو ذ ثِيسسِّي ن صَّح.56مَارَّا ونِّي غَا يشّن دَّات ينُو اَذ يسو يذَامّن ينُو، أَتَاف اَذ يقِّيم ذَايِي، نش ذَايس.57مَامّش إِي ذَايِي د يسّكّ بَابَا يدَّرن أُو نش دَّرغ زِي بَابَا، أَمنِّي ونِّي ذَايِي غَا يشّن اَزَّايِي إِي يدَّر.58صَافِي، ذ وَانِيتَا ذ اَغْرُوْم إِي د يهْوَان زݣ وجنَّا. وَار يدْجِي شَا اَم ڒجْذُوْذ نْوم إِي شِّين اَغْرُوْم نِّي ؤُمِي قَّارن لْمَنَّا منْبَعْد مُّوْثن؛ لَّا، ونِّي غَا يشّن زݣ وغْرُوْم-أَ اَذ يدَّر إِ ڒبْدَا."59مَانَايَا ينَّا-ث عِيْسَى ذِي ثمْزِيذَا وَامِي تُوْغَا يسڒْمَاذ ذݣ وبِيلَاج ن كَفرْنَاحُوْم.60أَطَّاس زݣ يمحْضَارن نّس وَامِي سْڒِين مَانَاينِّي نَّان قَا اَوَار-أَ يقْسح وَار يدْجِي وِي ث غَا يقبْڒن.61يعْڒم عِيْسَى س وُوْڒ نّس قَا يمحْضَارن نّس تْشثْشَان ينَّا-ٱسن: "مَا س مَانَايَا إِي زِي ذَاوم يتقّس ڒْحَاڒ؟62ئِي مڒَا ثࢲْرِيم مِّيس ن بْنَاذم يتْوَارْفع غَار مَانِي يقِّيم ذ اَمزْوَارُو؟63أَرُّوْح ن أَربِّـي ذ نتَّا يسّدَّرن. مِين يدْجَان ذ بنَاذم وَار ينفّع إِ وَالُو. أَوَاڒن إِي ذَاوم نِّيغ، ذَايسن أَرُّوْح ذ ثُوْذَارْث.64وَلَكِن ذَايْوم يِنِّي وَار يتِيمْنن شَا." مِينْزِي عِيْسَى يسّن زݣ ومزْوَارُو يِنِّي ذَايْسن وَار يتِيمْنن شَا ذ ونِّي إِي ث غَا يزّنْزن.65ينَّا-ٱسن: "س مَانَايَا نِّيغ-اَوم: وَار يزمَّر ؤُڒَا ذ يجّن اَذ د يَاس غَارِي إِلَّا مڒَا س لْإِذن ن بَابَا."66زِي ڒْوقْث نِّي سمْحن ذَايس اَطَّاس ن يمحْضَارن نّس، وَار كِس قِّيمن شَا ݣُّوْرن اَكِذس.67ئِنْدق-د عِيْسَى ينَّا-ٱسن إِ ثنْعَاش ن اَرُّسُل إِي كِس يدْجَان: "ؤُڒَا ذ كنِّيو، مَا ثخْسم اَذَايِي تْسمْحم؟"68ينَّا-ٱس سِمْعَان بُطْرُس: "آ سِيذِي، مِين يعْنَا ونِّي مَانِي غَا نْرَاح؟ شك غَارك اَوَاڒن ن ثُوْذَارْث ن ڒبْدَا.69قَا نشِّين نُوْمن، نسّن قَا شك ذ لْعَظِيم ن أَربِّـي."70ينَّا-ٱسن عِيْسَى: "نش إِي كنِّيو يخْضَرن س ثنْعَاش إِذْوم، وَلَكِن يجّن زَّايْوم ذ إِبْڒِيس."71مَانَايَا يقَّار-يث خ يَهُوْذَا مِّيس ن سِمْعَان إِسْخَرْيُوْطِي لِأَنَّا ذ وَانِيتَا إِي ث غَا يزّنْزن أُو نتَّا ذ يجّن زِي ثنْعَاش ن اَرُّسُل.
Wycliffe Bible Translators, Inc.