يعيبرانيين6
1خ مَانَايَا وَار نتْغِيمِيث شَا ذِي تَّعْلِيم-أَ اَمزْوَارُو خ لْمَسِيح، أَ نُوْيُوْرث غَار زَّاث بَاش أَ نمْغَر. وَار نْتَاعْقِيب شَا غَار دْسَاس. يعْنِي وَار نسَّاوَاڒ شَا عَاذ خ تُّوْبَا نِّي ن سَّايِأَث، نِغ خ مَامّش غَا نݣّ أَ نَامن زِي أَربِّـي،2نِغ خ يبْرِيذن بَاش اَذ تْوَاطهَّارن يِوْذَان س وَامَان، نِغ خ مَامّش غَا نݣّ أَ نْسرْس يفَاسّن نّغ خ يِوْذَان، نِغ خ لْقِيَامَا ن يمتِّينن، نِغ خ لْحِسَاب نِّي وَار يفنِّين شَا.3إِيوَا، أَ نُوْيُوْرث غَار زَّاث يعْنِي مڒَا يخس أَربِّـي.4أَمَّا يِنِّي مِيخف يشعْشع نُّوْر، قَّاسن لْهَادِيَا ن وجنَّا، شَرّْشن ذِي أَرُّوْح يقدّْسن،5ذُوْقن عَاوذ زِي لْبَرَكَا ن وَاوَاڒ ن أَربِّـي ذ لْقُدُوْرَاث ن زْمَان إِي د غَا يَاسن.6يِيْنَا مڒَا فّْغن اَبْرِيذ، وَار يدْجِي وِي ثن د غَا يَارّن غَار تُّوْبَا. مَايمِّي؟ لِأَنَّا يِيْنَا اَذ يڒِين اَم تْصلَّابن مِّيس ن أَربِّـي عَاوذ خ صَّلِيب تْعيَّابن-ث زَّاث إِ يِوْذَان.7شُوْف، مڒَا ثَمُوْرْث يشَّاث خَاس ونْࢲَار اَطَّاس نتَّاث ثْسسّ تِيشّ ثَفدْجَاحْث، أَتَاف اَذ تَاوِي يجّن ن لْبَرَكَا زِي أَربِّـي.8وَلَكِن مڒَا ثَمُوْرْث نِّي ثْسغْمَاي-د غِير يسنَّانن ذ ثْزݣّْوَارْث، أَتَاف نتَّاث ذ وَالُو اَقَات ذِي لْخَطَر اَذ تْوَانْعڒ، أَڒ ونݣَّارُو اَت سْحَرْقن س ثْمسِّي.9آي يمْعِيزّن ينُو، وَاخَّا نسَّاوَاڒ اَمُّو نشِّين متْأَكدِّين زَّايْوم يعْنِي خ ثْمسْڒَايِين ثِصبْحَانِين إِي زِي غَا تْنجْمم.10إِيوَا أَربِّـي، مَا يتِيشّ ڒْحَقّ مَا لَّا؟ وَاه، أَربِّـي وَار يتتُّو شَا ڒْخذْمث نْوم ذ ڒمْحِبّث نِّي ذَاس د ثْسظْهَارم وَامِي ثْعَاوْنم صَّالِحِين. أُو عَاذ تݣّم مَانَايَا.11نخْس اَذ تْحَوْڒم كنِّيو س وُوْڒ كُڒ يجّن اَم قْبڒ بَاش اَذ تِيڒِيم كنِّيو متْأَكدِّين ذِي لْأَمَال نْوم اَڒ ونݣَّارُو.12وَار نخْس شَا اَذ تْعݣْزم. ئِتْخصَّا اَذ تِيڒِيم اَم يِنِّي يتْوَارَاثن س صّْبَر ذ لْإِيمَان نْسن خ ثْمسْڒَايِين نِّي إِي زِي ثن يوْعذ أَربِّـي.13شُوْف، وَامِي أَربِّـي يوْعذ بْرَاهِيم خ ڒْعَهذ نِّي، ئِجُّوْدْج أَربِّـي اَذ يشّ يخف نّس. مَايمِّي؟ لِأَنَّا وَار ذِنِّي حَدّ يمْغَر كْتَار زِي أَربِّـي.14ينَّا-ٱس: <نش جُّوْدْجغ قَا اَش بَرْكغ س يِجّن ن لْبَرَكَا ثمْغَر، أَذ سمْغَارغ دُّوْرِّيث نّش.>15إِيوَا اَمُّو وَامِي يرَاجَا بْرَاهِيم س يِجّن ن صّْبَر يُوْوض-اَس-د مِين زِي ث يوْعذ أَربِّـي.16لِأَنَّا يوْذَان تْجُوْدْجن س يِجّن ذ اَمقّْرَان زَّايْسن. أُو س يِجّن ن ثْجَادْجِيث اَذ حَقّن مَارَّا لْقَدِيَاث نْسن اَذ كمّْڒنْت.17خ مَانَايَا يضْمن أَربِّـي مَانَاينِّي س يِجّن ن ثْجَادْجِيث إِ يِنِّي إِي غَا يوَارْثن مِين زِي ثن يوْعذ. يعْنِي يخس اَذَاسن د يسظْهَار مْلِيح طَّبِيعَا ن لْغَرَض نّس عمَّارْص اَذ تْوَابدّڒ.18ثْنَاين ن ثْمسْڒَايِين-أَ وَار تْوَابدِّيڒنْت شَا، أَربِّـي وَار يزمَّر اَخَاسنْت يسْخَرّق. زِي ثْنَاين ن ثْمسْڒَايِين-أَ اَزَّايْسنْت إِي غَا نتْوَاشجّع نشِّين إِي نَرْوڒ بَاش اَغَارس نْنُوْفَّر. زَّايْسنْت إِي غَا نطّف س جّْهذ ذِي لْأَمَال إِي ذَانغ يتْوَابشَّرن.19لْأَمَال-أَ يتِيڒِي غَارْنغ اَم يِجّن ن ؤُڒِيزِيم ن وغَرَّابُو ن ڒَعْمَار نّغ، يرْسق س جّْهذ وَار يضدْجق. يُوْذف لْأَمَال-أَ يعْذُو غَار ذفَّار ن اَرّْوَاق ن وخَّام اَمْقدّس اَطَّاس.20ذݣ ومْشَان نِّي يُوْذف عِيْسَى ذِنِّي ذ اَمزْوَارُو عْلَاحْسَاب نشِّين، ئِذْوڒ ذ ڒفْقِي اَمقّْرَان إِ ڒبْدَا اَمشْنَاو لْفِرْقَا نِّي ن ڒفْقِي ؤُمِي قَّارن مَلِكِيصَادِق.
Wycliffe Bible Translators, Inc.