يعيبرانيين12
1إِذن عْلَاحْسَاب نِثْنِي، يعْنِي ڒشْهُوْذ نِّي ن لْإِيمَان إِي خَانغ يتنّْضن اَم يِجّن ن ؤُمُوْنِي ذ اَمقّْرَان، لَابُد أَ نكَّر أَ نكّس كُڒ دْقڒ ذ كُڒ ڒْمُعْصِيّث إِي ذَانغ يسحْصَارن. أَ نَازّْڒث س صْبَار ثَازّْڒَا نِّي إِي ذَانغ يتْرَاجَان غَار زَّاث.2أُو لَابُد أَ نْخزَّر مْلِيح غَار عِيْسَى زَّعِيم نّغ ذ نتَّا إِي ذَانغ غَا يسِّيوْضن نِيشَان غَار ونݣَّارُو. عِيْسَى س ڒفْرَاحث نِّي إِي تُوْغَا ث يتْرَاجَان غَار زَّاث، ئِصْبَر خ صَّلِيب يعيّب اَحݣَّار ن صَّلِيب نِّي سّنِّي يقِّيم خ وفُوْسِي ن ڒْعَرْش ن أَربِّـي.3فكَّرث مْلِيح ذِي عِيْسَى نتَّا مشْحَاڒ يصْبَر خ شّْمَايث إِي ذَاس يعَارّْضن بَاش كنِّيو وَار تِيحْڒم شَا وَار تفْشِيڒم شَا.4وَامِي ثْمنْغم ضد إِ ڒْمُعْصِيّث، وَار ثْعِيرّْضم شَا بَاش اَذ اَزّْڒن يذَامّن نْوم لَّا.5كنِّيو ثتُّوْم اَوَاڒ نِّي زِي لْكِتَاب إِي كنِّيو غَا يشجّْعن، ئِسَّاوَاڒن اَكِذْوم اَم ثَارْوَا نّس ينَّا-ٱوم:<آ مِّي، وَار تْقهَّار شَا تَّرْبِـيَّا ن سِيذِي أَربِّـي،وَار تفْشِيڒ شَا مڒَا نتَّا ينهَّا-شك.6مِينْزِي سِيذِي أَربِّـي يتْربَّا ونِّي خَاس يعِيزّن،ئِنهَّا ونِّي إِي خف يَارْضَا يتْوَاحْسَاب اَم مِّيس.>7صْبَرث خ تَّرْبِـيَّا ن أَربِّـي، ئِتݣّ اَكِذْوم اَم ثَارْوَا نّس. مِين يعْنَا مِّيس-أَ وَار ث يتْربِّـي شَا بَابَاس؟8يَاش مَارَّا يوْذَان تْوَاربَّان نِغ؟ مَعْلِيك كنِّيو وَار كنِّيو يربِّـي شَا أَربِّـي، أَتَاف كنِّيو اَم ثَارْوَا ن ڒحْرَام مَاشِي ذ ثَارْوَا ن لْحَلَال.9أُو عَاوذ نشِّين مَارَّا تُوْغَا غَارْنغ لْوَالِدِين ذِي دُّنشْت-أَ إِي ذَانغ يتْربَّان نتْسذْحَا زَّايْسن. إِيوَا نشِّين مڒَا أَ ندَّر، أَتَاف أَ نْسذْحَا زِي بَابَاثْنغ ن وجنَّا كْتَار نِغ لَّا؟10شُوْف، لْوَالِدِين تْربَّان-اَنغ ذݣ يِجّن ن ڒْوقْث، تݣّن مَامّش ذَاسن يتْغِيڒ مْلِيح. وَلَكِن أَربِّـي يتْربَّا-يَانغ خ نّْفَع نّغ بَاش أَ نْشَرش ذِي طَّبِيعَا نّس يدْجَان عَظِيم.11ذِي ڒْوقْث نّس كُڒ تَّرْبِـيّث تْغِيڒ-اَنغ ثقْسح مَاشِي ذ ثَصبْحَانْت. وَلَكِن منْبَعْد اَذ تَارو يجّن ن ثْفدْجَاحْث ن ڒْخِير ذ يجّن ن ڒهْنَا إِ يِنِّي إِي ت غَا يڒمْذن.12خ مَانَايَا سْجهْذث يفَاسّن نْوم يرْخُوْن ذ يفَادّن نْوم يفشْڒن.13سݣّْذث يبْرِيذن نْوم نِيشَان بَاش يضَارن نْوم يزحَّافن وَار تْغِيمِين شَا ذ ينعْذَام اَذ ݣنْفَان.14ݣّث لْمجْهُوْد بَاش اَذ تْعِيشم ذِي ڒهْنَا اَك مَارَّا يوْذَان أُو بَاش اَذ تِيڒِيم ثصْفَام. بْڒَا أَ نِيڒِي نصْفَا وَار ذِنِّي حَدّ إِي غَا يࢲرن مَاوْلَانَا.15أَرّم-د ڒْبَاڒ نْوم بَاش وَار يتْغِيمِي حَدّ وَار يخطّڒ غَار اَرْضَا ن أَربِّـي، نِغ عَاوذ وَار يغمِّي شَان ن وࢲْوَار ذ اَمرْزَاݣ اَذ يݣّ لْمَشَاكِيل اَذ يضيّع اَطَّاس ن يِوْذَان.16أَرّم-د ڒْبَاڒ نْوم بَاش وَار يتݣّ شَان يِجّن زَّايْوم لْفَسَاد، نِغ شَان يِجّن وَار غَارس يتِيڒِي بُو أَربِّـي اَم عَسُو نِّي يرُوْح نتَّا يزّنْز ڒْحَقّ نّس زِي لْبَرَكَا ن بَابَاس خ يِجّن ن طّبْصِي ن لْمَكْلَا.17أَقَا ثسّْنم منْبَعْد يعْقب-د عَسُو-يَا يرزُّو اَذ يوَارث لْبَرَكَا نِّي يُوْݣِي-يَاس بَابَاس. وَار يُوْفِي مَامّش تِيد غَا يَارّ وَاخَّا يتتَّار-اَس-ت س يمطَّاون.18شُوْف، كنِّيو وَار ثْقَارّْبم شَا غَار يجّن ن وذْرَار إِي غَا تْحَاذَام س وفُوْس ذَايس ثِمسِّي ثْحدّق ذَايس ثَادْجسْت ذَايس ثُوْبَرْشَانْت ذَايس اَرِّيح اَطَّاس.19ئِتفّغ-د زَّايس يجّن ن صُّوْت ن زَّامَّار ذ يِجّن ن ثْمِيجَّا ثسَّاوَاڒ اَوَاڒن يسَاݣّْوَاذن إِ يِنِّي ذَاس يتْسْڒَان، تتَّارن-تث وَار ذَاسن ثقَّار بُو شَان ن وَاوَاڒن نّغْنِي.20مِينْزِي تُوْغَا نِثْنِي وَار زمَّرن شَا اَذ صْبَرن إِ مِين ذَاسن ثْوصَّا ثْمِيجَّا نِّي، ثنَّا-ٱسن قَا لْحَيَوَان نِّي إِي غَا يحَاذَان اَذْرَار-أَ اَتَاف أُو لَابُد اَذ يتْوَارْجم س وزْرُو.21مِين تْوَاڒَان ذِنِّي يسَاݣّْوَاذ اَطَّاس، حتَّا ؤُڒَا ذ نَّبِي مُوْسَى ينَّا اَقَايِي ترْجِيجِيغ س ثِيݣّْوْذِي.22وَلَكِن كنِّيو ثْقَارّْبم-د غَار وذْرَار ن صِيَان يعْنِي ثَنْدِينْت ن أَربِّـي يدَّرن ذ لْقُدْس ن وجنَّا، ذَايس اَڒَاف ن ؤُرُوْفَاث ن لْمَلَائِكَاث.23ثْقَارّْبم-د غَار يِنِّي يتْمُوْنن ذِي ڒفْرَاحث يعْنِي غَار جْمَاعث ن يِنِّي يخْضَر أَربِّـي إِي د يخڒْقن ذ يمزْوُوْرَا يسمَاون نْسن تْوَازمّن ذݣ وجنَّا. ثْقَارّْبم-د غَار أَربِّـي ونِّي يدْجَان ذ ڒْقَاضِي خ مَارَّا يوْذَان. ثْقَارّْبم-د غَار اَرُّوْحَاث ن صَّالِحِين يَارِّي-ثن أَربِّـي بْڒَا ڒْعِيب.24ثْقَارّْبم-د غَار عِيْسَى ونِّي يتْشَفَاعن ذَايْنغ س يِجّن ن ڒْعَهذ ذ جْذِيذ. ثْقَارّْبم-د كنِّيو غَار يذَامّن نّس يتْوَارُوْشّن إِي قَّارن يجّن ن وَاوَاڒ حْسن زݣ ونِّي ن نَّبِي هَابِيل.25أَرّم-د ڒْبَاڒ نْوم وَار تْجِيهِيڒم شَا اَوَاڒ ن ونِّي يسَّاوَاڒن، مَايمِّي؟ لِأَنَّا أَيث-إِسْرَائِيل وَار فڒْثن شَا وَامِي جهْڒن اَوَاڒ ن ونِّي تُوْغَا ثن يوصَّان ذِي ثْمُوْرْث. أُو نشِّين عَاذ كْتَار، مڒَا نُوْݣِي أَ نْطَاع إِ ونِّي ذَانغ يوصَّان زݣ وجنَّا اَتَاف عمَّارْص أَ نفْڒث.26ذِي ڒْوقْث نِّي يعْذُوْن صُّوْت ن أَربِّـي يسنْهزّ ثَمُوْرْث، وَلَكِن ڒخُّو يوْعذ ينَّا قَا عَاذ اَذ د تَاس يجّن ن ڒْوقْث نش اَذ سنْهزّغ ثَمُوْرْث ؤُڒَا ذ يجنَّاثن.27أَوَاڒ نِّي نّس يعْنِي <عَاذ اَذ د تَاس يجّن ن ڒْوقْث> اَتَاف نتَّا يسَّاوَاڒ خ شَا ن ثْمسْڒَايِين يتنْهزَّان اَذ تْوَاكّْسنْت يعْنِي ذ ثِمسْڒَايِين نِّي إِي د يتْوَاخڒْقن بَاش ثِمسْڒَايِين نِّي إِي وَار يتنْهزِّين شَا اَتَاف اَذ قِّيمنْت.28خ مَانَايَا أَ نْشكَّر أَربِّـي ڒَاحقَّاش نقْبڒ يجّن ن ڒْمُلْك وَار يتنْهزِّين شَا. أَمُّو اَذَاس نْقدّم إِ أَربِّـي يجّن ن لْعِبَادَا س ڒُوقَّار ذ ثِيݣّْوْذِي اَخَاس يَارْضَا نتَّا،29مِينْزِي أَربِّـي نّغ نتَّا ذ يجّن ن ثْمسِّي يسْحَرَّاقن.
Wycliffe Bible Translators, Inc.