أَيث-ؤُفَسُوْس4
1إِذن فَا نش إِݣ يدْجَان ذ اَمحْبُوْس خ سَّبَاب ن سِيذِيثْنغ اَكنِّيو نْهِيغ بَاش اَذ تُوْيُوْرم نِيشَان عْلَاحْسَاب اَوَاڒ نِّي إِي ذَاوم د يڒَاغَان زݣ وجنَّا.2إِڒِيم بْڒَا تَّكبُّوْر قَاع. إِڒِيم س يِجّن ن تَّوَاضُع. صْبَرم اَك وَايَاوْيَا س تَّاسِع ن ڒْخَاضَر ذ ڒمْحِبّث.3ݣّث مَارَّا لْمجْهُوْد نْوم بَاش اَذ تِيڒِيم ذ يجّن ذِي أَرُّوْح يقدّْسن وَامِي ثطّْفم فُوْس ذݣ وفُوْس س ڒهْنَا.4جْمَاعث ذ يشْتن، أَرُّوْح يقدّْسن ذ يجّن. أَمنِّي أَربِّـي وَامِي ذَاوم د يڒَاغَا، يڒَاغَا-ٱوم-د غَار لْأَمَال ذ يجّن.5سِيذِيثْنغ ذ يجّن، لْإِيمَان ذ يجّن، طَّهَارث س وَامَان ذ يشْتن.6أَربِّـي بَابَاثْنغ ن مَارَّا ذ يجّن. أَقَاث خ مَارَّا، يعدُّو-د خ مَارَّا، أَقَاث ذِي مَارَّا.7شُوْف، كُڒ يجّن زَّايْنغ ثمُّوْش-اَس يِجّن ن لْبَرَكَا عْلَاحْسَاب مَامّش ت يوْزن لْمَسِيح ذ لْهَدِيَا.8خ مَانَايَا يقَّار لْكِتَاب:<وَامِي يݣَعّذ غَار ومْشَان نِّي إِي يُوْعْڒَان،يُوْوِي اَكِذس خَربِّي ذ يمحْبَاسيُوْشَا-ٱسن لْهَدِيَاث إِ يرْيَازن.>9(مِين يخس اَذ يِينِي بلِّي نتَّا يݣَعّذ؟ يعْنِي يخس اَذ يِينِي بلِّي نتَّا يهْوَا-د عَاوذ غَار يمُوْشَان إِي يُوْدْجْغن ذِي ثْمُوْرْث.10وَاه، ونِّي إِي د يهْوَان ذ ونِّي س يِيخف نّس إِݣ يݣَعّْذن قَاع ذݣ وجنَّا ن يجنَّاثن بَاش اَذ يشَّار مَارَّا ثِمسْڒَايِين.)11ذ نتَّا إِݣ يخْضَرن اَرُّسُل ذ لْأَنْبِيَا ذ يِنِّي إِݣ يتْبشَّارن س لْإِنْجِيل ذ ڒْفُقَهَا ذ يمْسڒْمَاذن.12نِثْنِي اَذ سْوجْذن إِ صَّالِحِين اَذ خذْمن شّْغڒ ن أَربِّـي بَاش جْمَاعث ن لْمَسِيح اَذ تجْهذ.13أَڒ غَا نِيڒِي مَارَّا ذ يجّن ذِي لْإِيمَان أُو ذِي ثُوْسْنَا خ مِّيس ن أَربِّـي. أَڒ غَا نِيڒِي مَارَّا عَاوذ نمْغر يعْنِي ذ يرْيَازن اَم ڒَعْبَر نِّي يكْمَاڒ ن ڒْقدّْ ن لْمَسِيح.14أَمنِّي وَار نتْغِيمِي شَا ذ يحنْجِيرن تَاوِينْت-اَنغ ڒمْوَاج تَارَّانْت-اَنغ. نِغ ذ اَرِّيح يتْصُوْض خَانغ يكسِّي-يَانغ سَّا ذ سَّا س كُڒ اَرِّيح زَعْمَا ن وسڒْمذ أُو س ثحْرَايْمِيث ذ يخَرْوِيضن ن يرْيَازن ذ مِين تْشِيطِّينن.15لَّا، إِنَّمَا، نشِّين خْمِي نسَّاوَاڒ ڒْحَقّ س ڒمْحِبّث لَابُد أَ نمْغر س كُڒ اَبْرِيذ أَ نِيڒِي اَم نتَّا ذ اَزدْجِيف نِّي يتْرَايَّان خَانغ يعْنِي لْمَسِيح.16زَّايس زِي لْمَسِيح دَّات ثكْمَاڒ ن جْمَاعث ثْمُوْن اَقَات ذ يشْتن س قَاع ڒمْفَاسڒ نِّي إِي ذَايس. أُو كُڒ طَّارْف نّس مڒَا يخدّم نِيشَان اَتَاف اَذ يسمْغَار دَّات-أَ أُو س يِيخف نّس اَذ تبْنَا س ڒمْحِبّث.17أَقَا مِين ذَاوم قَّارغ ذ ؤُزِيَّار-أَ إِي خَاوم تْزيَّارغ ذِي سِيذِيثْنغ، يعْنِي أُو لَابُد وَار ثݣُّوْرم شَا مَامّش ݣُّوْرن ڒݣْنُوْس س ڒَعْقُوْڒ نْسن يخْوَان.18نِثْنِي ثْطمّص-يثن ڒفْهَامث زَعْمَا إِي ذَايْسن. نِثْنِي ݣّْوْجن زِي ثُوْذَارْث ن أَربِّـي عْلَاحْسَاب ڒقْفَاڒث نِّي إِي ذَايْسن س ثْغنَّانْت ن وُوْڒَاون نْسن.19فلّْسن قَاع ذفَّارن شّهْوث نْسن أُو صَافِي، ذَايْسن يجّن ن زْعَامث اَذ سْخذْمن إِ كُڒ نُّوْع ن مِين يسخْنِيزن.20وَلَكِن كنِّيو لَّا، مَاشِي اَمنِّي إِي ثْڒمْذم خ لْمَسِيح.21وَاه، ثْڒمْذم خ عِيْسَى لْحَقِيقَا إِي يدْجَان ذَايس يعْنِي مڒَا ثسْڒَام خَاس نِيشَان.22إِيوَا تُوْغَا ثْڒمْذم اَذ تْسمْحم ذِي طَّبِيعَا نِّي نْوم تُوْغَا غَارْوم قْبڒ. لِأَنَّا طَّبِيعَا نِّي نْوم ثَرشَّا عْلَاحْسَاب شّهْوث نّس يسْتْوَاغَرّن.23تُوْغَا ثْڒمْذم اَذ تِيڒِيم ذ جْذِيذ زِي ڒفْهَامث ن ڒَعْقُوْڒَاث نْوم24اَذ تݣّم يجّن ن طَّبِيعَا ثنّغْنِي يعْنِي ذ جْذِيذ، ئِجّن ن طَّبِيعَا إِي د غَا يتْوَاخڒْقن اَمشْنَاو ونِّي ن أَربِّـي ذَايس ڒْحَقّ ذَايس مِين يصْفَان.25إِذن لَابُد كُڒ يجّن زَّايْوم اَذ يبعّذ زݣ يخرِّيقن اَذ يسِّيوڒ س ڒْحَقّ اَك وَاجَّار نّس لِأَنَّا نشِّين مَارَّا ذ يجّن ن جْمَاعث إِي ندْجَا.26عصّْبث بْڒَا مَا اَذ تݣّم ڒْمُعْصِيّث. وَار تجَّاث شَا ثْفُوْشْت اَخَاوم ثغْڒِي كنِّيو عَاذ تْعصِّيبم.27يعْنِي وَار تجَّاث شَا اَبْرِيذ إِ شِّيطَان اَذ يَاذف ذݣ وُوْڒَاون نْوم.28ونِّي إِݣ يتَاشَارن لَابُد اَذ يبعّذ زِي ثُوْكَّارْذَا نِّي، أَذ يخْذم يجّن ن ڒْخذْمث ذ ثَصبْحَانْت س يفَاسّن نّس بَاش اَذ يعَاون زَّايس ونِّي يتحْذَاجن.29وَار تجَّاث شَا اَذ د يفّغ زݣ وقمُّوْم نْوم شَان وَاوَاڒ ذ اَعفَّان. لَّا، أَذ د يفّغ زَّايس غِير اَوَاڒ اَصبْحَان ونِّي يتْشجَّاعن ذ ونِّي يتْحلَّالن بَاش اَزَّايس سْنفْعن يِنِّي ذَاس يتسْڒَان.30وَار سْخيَّاقم شَا أَرُّوْح يقدّْسن ن أَربِّـي يعْنِي ونِّي إِي زِي ثتْوَاضبْعم إِ نْهَار نِّي إِي غَا ثْنجّْمم.31مَارَّا لْعُقْدَا ذ وغْضَاب ذ وعصّب ذ سْذَاع ذ ڒْبَاطڒ سْبعّْذم-ثن خَاوم مَارَّا، أُو كّْسث عَاوذ كُڒ نُّوْع ن ڒقْبَاحث.32تݣّث ڒْخِير اَك وَايَاوْيَا، تْحِنَّام خ وَايَاوْيَا. سمّْحم إِ وَايَاوْيَا مَامّش ذَاوم يغْفَر أَربِّـي ذِي لْمَسِيح.
Wycliffe Bible Translators, Inc.