أَيث-ؤُفَسُوْس1
1نش ذ بُوْلُس، نش ذ يجّن ن اَرَّسُوْل ن عِيْسَى لْمَسِيح س ڒْخَاضَر ن أَربِّـي. ؤُرِيغ ثَبْرَات-أَ إِ صَّالِحِين إِي يدْجَان ذِي جْوَايه ن ؤُفَسُوْس إِي يُوْمْنن س عِيْسَى.2أَكِذْوم يِيڒِي اَرْضَا ذ ڒهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.3أَذ يتْوَابَرَك أَربِّـي، بَابَاس ن سِيذِيثْنغ عِيْسَى لْمَسِيح. أُو ذِي لْمَسِيح يبَرك-اَنغ سِيذِي أَربِّـي زِي مْكُڒ لْبَرَكَا رُوْحِيَا إِݣ يدْجَان ذݣ يجنَّاثن. 4شُوْف، ئِخْضَر-اَنغ ذِي لْمَسِيح قْبڒ مَا د يخْڒق دُّنشْت-أَ بَاش أَ نِيڒِي نصْفَا بْڒَا ڒْعِيب زَّاثس.5س ڒمْحِبّث نّس يزمّم-اَنغ بَاش اَذَانغ يتْبنَّا اَم ثَارْوَا نّس س عِيْسَى لْمَسِيح عْلَاحْسَاب لْغَرَض ن ڒْخَاضَر نّس.6أَذ يتْوَابَرَك اَرْضَا نّس يمْغَارن، ئِفَرغ-يث-يذ خَانغ أَربِّـي س مِّيس يعِيزّن.7ئِفكّ-اَنغ-د سِيذِي أَربِّـي س لْفِدْيَا نِّي ن مِّيس يعْنِي س يذَامّن نّس بَاش اَذ تْوَاغْفَرنْت ڒْمُعْصِيَاث نّغ عْلَاحْسَاب اَݣْڒَا ن اَرْضَا نّس.8أَرْضَا-يَا يفَرغ-اَنغ-ث-يذ سِيذِي أَربِّـي س مَارَّا ڒفْهَامث ذ ثُوْسْنَا نّس.9أُو عْلَاحْسَاب لْغَرَض نّس إِݣ يݣَّا ذِي لْمَسِيح يسْبيّن-اَنغ-د ڒْمَعْنَا ينُوْفَّرن ن ڒْخَاضَر نّس.10ڒْمَعْنَا-يَا ينُوْفَّرن يخطّط-يت-يد بَاش اَذ تبْذَا ثْصدْجَاح ذِي ڒْوقْث نّس نِيشَان بَاش اَذ يسْمُوْن أَربِّـي مَارَّا ثِمسْڒَايِين ذِي لْمَسِيح، يعْنِي ثِمسْڒَايِين ذݣ وجنَّا ذ ثْمُوْرْث.11مَارَّا ثِمسْڒَايِين يتݣّ-يثنْت أَربِّـي عْلَاحْسَاب مِين يخطّط ذ مِين يخْضَر نتَّا. نشِّين ذِي عِيْسَى يَارَّا-ٱنغ أَربِّـي أَ نْوَارث عْلَاحْسَاب مِين يزمّم نتَّا س لْغَرَض نّس.12حمَا نشِّين إِي يُوْمْنن ذ يمزْوُوْرَا ذِي لْمَسِيح أَ نحْمذ أَربِّـي خ لْعَظَمَا نّس.13ثُمَّا يسْمُوْن-يكنِّيو-د عَاوذ اَك لْمَسِيح وَامِي ثْصنّْطم إِ وَاوَاڒ ن لْحَقِيقَا يعْنِي لْإِنْجِيل إِي زِي ثْنجْمم. وَامِي ثُوْمْنم يضْبع-يكنِّيو أَربِّـي س طَّبَع نّس يعْنِي س أَرُّوْح يقدّْسن إِي زِي ذَانغ يوْعذ.14أَرُّوْح-أَ نتَّا ذ يجّن ن ڒْعَرْبُوْن يضمّن لْوَارث نّغ اَڒ غَا ث نطّف ثُمَّا أَ نحْمذ أَربِّـي خ لْعَظَمَا نّس.15خ مَانَايَا، نش زݣ وَامِي تُوْغَا تسْڒِيغ خ لِإِيمَان نْوم زِي سِيذِيثْنغ عِيْسَى ذ ڒمْحِبّث نْوم إِ مَارَّا صَّالِحِين16تْشكَّرغ أَربِّـي خَاوم بْڒَا مَا ٱذ بدّغ أُو ڒبْدَا تْفكَّرغ ذَايْوم ذِي ثْࢲَادْجِيث ينُو.17حمَا أَربِّـي بَابَاثْنغ عَظِيم ن سِيذِيثْنغ عِيسَى لْمَسِيح اَذَاوم د يُوْش يجّن ن اَرُّوْح ن ڒفْهَامث، كنِّيو اَذ تْعڒْمم خ مِين ينُوْفَّرن بَاش اَد تسّْنم سِيذِي أَربِّـي مْلِيح.18أَذَاوم د يُوْش يجّن ن نُّوْر إِ وُوْڒَاون نْوم بَاش اَذ تسّْنم مِين يعْنَا لْأَمَال-أَ إِي زِي ذَاوم د يڒَاغَا، ذ مِين يعْنَا وَاݣْڒَا-يَا ن لْوَارث عَظِيم ن صَّالِحِين،19ذ مِين يعْنَا جّْهذ نّس يمْغَارن بْڒَا ڒقْيَاس غَار نشِّين إِي يُوْمْنن. جّْهذ-أَ اَم ونِّي إِݣ يسخْذم أَربِّـي س لْقُوَّا نّس20إِݣ يݣَّا ذِي لْمَسِيح وَامِي ثِيذ يسكَّر زِي ڒْموْث يسْغِيم-يث خ وفُوْسِي نّس ذݣ يجنَّاثن.21ئِسُوْعْڒَا-ث أَربِّـي اَطَّاس خ مَارَّا ڒحْكَام ذ ڒْمخْزن ذ جّْهذ ذ لْممْلَكَا. ئِسُوْعْڒَا-ث نتَّا عَاوذ خ كُڒ يسم إِي تݣّن ذ يسمَاون، مَاشِي غِيڒ ذِي زْمَان-أَ إِي ذِي ندْجَا وَاهَا وَلَكِن عَاوذ ذِي لْأَخِرَا.22يݣَّا أَربِّـي عَاوذ مَارَّا ثِمسْڒَايِين سْوَادَّاي يضَارن نّس يݣِّي-ث ذ اَزدْجِيف إِي يتْرَايَّان خ مَارَّا ثِمسْڒَايِين ذِي جْمَاعث ن ڒْمُوْمِنِين.23جْمَاعث-أَ نتَّاث إِي يدْجَان ذ دَّات ن لْمَسِيح أُو زَّايس نتَّاث إِي يشُّوْر يِيخف نّس أُو ذ نتَّا إِي يشُّوْرن مَارَّا ذِي مِين ذِي مَا.
Wycliffe Bible Translators, Inc.