3 يوحنا1
1نش ذ اَمْغَار، تَارِيغ ثَبْرَات-أَ إِ غَايُوْس ونِّي إِي خَافِي يعِيزّن ذِي لْحَقِيقَا.2آي ؤُمَا ينُو يعِيزّن، تْࢲَادْجِيغ اَخَاك يسّقْسَا ڒْخِير اَغَارك ثِيڒِي صَّاحث نّش وَامِي ثدْجِيذ مْلِيح ذِي ڒَعْمَر نّش.3مِينْزِي نش فَرْحغ اَطَّاس وَامِي د ؤُسِين ڒبْعَاض ن وَاوْمَاثن شهْذن خَاك خ لْحَقِيقَا إِي ذَايش ذ مَامّش شك عَاذ ثݣُّوْرذ نِيْشَان ذِي لْحَقِيقَا.4فَرّْحغ اَطَّاس س وَاطَّاس وَار زمَّرغ اَذ اَرْنِيغ خْمِي تسْڒِيغ ثَارْوَا ينُو ݣُّوْرن نِيْشَان خ وبْرِيذ ن لْحَقِيقَا.5آي ؤُمَا ينُو يعِيزّن، شك ذَايش تِّقث وَامِي تݣّذ لْمجْهُوْد نّش عْلَاحْسَاب اَوْمَاثن-أَ وَاخَّا نِثْنِي تَاسن-د غَارك ذ يبَرَّانِيْين. 6شهْذن خَاك ذَانِيتَا زَّاث إِ جْمَاعث خ ڒمْحِبّث نّش. أَذ تݣّذ مْلِيح عَاوذ مڒَا ثْذبَّارذ خَاسن خ وبْرِيذ نْسن عْلَاحْسَاب مِين يتحْذَاجَا أَربِّـي.7يِيْنَا تْوَاسّكّن-د عْلَاحْسَاب يسم نِّي يُوْعْڒَان، وَار جمّْعن بُو لْمُعَاوَنَا زݣ يِنِّي وَار يذفَّارن شَا أَربِّـي.8س مَانَايَا يتْخصَّا أُو لَابُد أَ نْعَاون اَوْمَاثن-أَ اَم يِيْنَا بَاش أَ نخْذم اَك وَايَاوْيَا عْلَاحْسَاب لْحَقِيقَا.9ؤُرِيغ يجّن ن وَاوَاڒ إِ جْمَاعث وَلَكِن يُوْݣِي دِيُوْتْرِيف إِ سُّلْطَا نّغ ڒَاحقَّاش نتَّا يتعْجِيب-اَس اَذ يِيڒِي ذ اَمزْوَارُو.10س مَانَايَا مڒَا ؤُسِيغ-د نش، أَذ فضْحغ مِين يتݣّ نتَّا يسَّاوَاڒ س وَاوَاڒ ن ثُوْبُّوْهْڒِيَا وَار يحْڒِين ضذ نّغ. وَار يقْنِيع شَا س مَانَاينِّي، نتَّا يتَاݣِي اَذ يتْرحَّاب س وَاوْمَاثن يسْبدَّا ؤُڒَا ذ يِنِّي يتْرحَّابن زَّايْسن يتَازّڒ خَاسن زِي جْمَاعث.11آي ؤُمَا ينُو يعِيزّن، وَار تْقلَّاد شَا مِين يدْجَان ذ اَعفَّان؛ لَّا، قلّد مِين يدْجَان ذ اَصبْحَان. ونِّي يتݣّن مِين يدْجَان ذ اَصبْحَان نتَّا زِي أَربِّـي؛ ونِّي يتݣّن مِين يدْجَان ذ اَعفَّان نتَّا وَار يتْوِيڒِي شَا أَربِّـي.12أَمَّا دِيمِيتْرِيُوْس شهّْذن خَاس مْلِيح قَاع يوْذَان وَاخَّا ؤُڒَا ذ لْحَقِيقَا ثْشهّذ خَاس س يِيخف نّس. أَخَاس نَرْنِي وَاخَّا ذ شْهَاذث نّغ أُو كنِّيو ثسّْنم بلِّي شْهَاذث نّغ نشِّين ذ صَّح.13ئِتْغِيمَا-ٱيِي عَاذ اَطَّاس من ذَاش د غَا اَرِيغ وَلَكِن حْسن وَار ذَاش ثِيذ تَارِيغ شَا س سْتِيلُو ذ سّْمخ.14لَّا، تْمنِّيغ اَش ࢲْرغ ذغْيَا ڒخْدّنِّي أَ نسِّيوڒ اَغمْبُوْب ذݣ وغمْبُوْب.15أَغَارك يِيڒِي ڒهْنَا. تْسَاوَّاضن-اَش-د سْڒَام صّْحَابَا. سدْجم خَاسن خ صّْحَابَا كُڒ يجّن س يِيسم نّس.
Wycliffe Bible Translators, Inc.