2 تيموتاوس1
1نش ذ بُوْلُس ذ يجّن ن اَرَّسُوْل ن عِيْسَى لْمَسِيح س ڒْخَاضَر ن أَربِّـي عْلَاحْسَاب لْوَعذ نِّي إِي ذَانغ يوْعذ خ ثُوْذَارْث نِّي يدْجَان ذِي عِيْسَى لْمَسِيح.2تَارِيغ ثَبْرَات-أَ إِ تِيْمُوْتَاوُس ونِّي إِي يدْجَان اَم ممِّي يعِيزّن خَافِي. أَكِذش يِيڒِي اَرْضَا ذ ڒهْنَا ذ اَرَّاحْمث زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.3تْشكَّرغ أَربِّـي ونِّي عبّْذغ زِي ڒجْذُوْذ ينُو س يِجّن ن ضَّمِير يصْفَان. تتَّارغ-اَس إِ أَربِّـي خَاش دْجِيڒث ذ نْهَار بْڒَا مَا ٱذ بدّغ.4خْمِي تْفكَّرغ ذݣ يمطَّاون نّش يتطّف-اَيِي-د يجّن مزْڒِي اَش ࢲرغ حمَا اَذ عمَّرغ س ڒفْرَاحث.5عقْڒغ خ لْإِيمَان نّش بْڒَا نِّفَاق ونِّي يدْجَان ذ اَمزْوَارُو ذِي حنَّاش لْوِيزَا ذ يمَّاش أَنِيسَا. ڒخُّو تيّْقغ ذ صَّح بلِّي اَقَاث ذَايش ؤُڒَا ذ شك.6خ مَانَايَا اَش فكَّرغ بَاش اَذ تْسنْهزّذ لْقُدْرَا نِّي إِي ذَايش يدْجَان زِي أَربِّـي عْلَاحْسَاب وَامِي خَاش سرْسغ يفَاسّن ينُو.7أَقَا أَربِّـي وَار ذَانغ يُوْشِي شَا يجّن ن اَرُّوْح ن ثِيݣّْوْذِي؛ لَّا، قَا يُوْشَا-ٱنغ-د يجّن اَرُّوْح ن جّْهذ ذ ڒمْحِبّث ذ ڒحْكَام خ يِيخف نّغ س ڒَعْقڒ.8إِذن وَار تْسذْحَا شَا اَذ تْشهْذذ خ سِيذِيثْنغ نِغ خَافِي نش إِي يدْجَان ذ اَمحْبُوْس عْلَاحْسَاب نتَّا؛ لَّا، قبّڒ اَعدَّاب نِّي يدْجَان عْلَاحْسَاب لْإِنْجِيل، س جّْهذ ن أَربِّـي.9ئِسنْجم-اَنغ يڒَاغَا-يَانغ-د س يِجّن ن ؤُڒَاغِي مُقدّس. وَار ذَانغ د يڒَاغِي شَا عْلَاحْسَاب لْحَسَانَاث نّغ؛ لَّا، ئِڒَاغَا-يَانغ-د عْلَاحْسَاب لْغَرَض نّس نتَّا ذ اَرْضَا نّس إِي ذَانغ د يُوْشَا ذِي عِيْسَى لْمَسِيح قْبڒ مَا ٱذ تبْذَا ڒْوقْث ن دُّنشْت-أَ قَاع.10أَرْضَا-يَا قَا يمظْهَار-د ڒخُّو وَامِي د يمظْهَار عِيْسَى لْمَسِيح ونِّي إِي ذَانغ يسنْجَامن ونِّي يسْبطّْڒن ڒْموْث. ڒخُّو س وفُوْس ن لْإِنْجِيل يُوْوِي-د ثُوْذَارْث غَار نُّوْر ذ ثنِّي وَار يفنِّين شَا.11عْلَاحْسَاب لْإِنْجِيل-أَ تْوَاخْضَرغ نش اَذ بشَّرغ اَذ يڒِيغ ذ اَرَّسُوْل ذ يجّن ن ؤُمْسڒْمَاذ.12خ سَّبَاب-أَ نش قَا تْعدَّابغ خ مَارَّا ثِمسْڒَايِين-أَ ثِيْنَا وَلَكِن وَار تْسذْحِيغ شَا، نش سّْنغ ونِّي إِي زِي ؤُمْنغ. تيّْقغ نتَّا يزمَّر اَذ يحْضَا لْأَمَانَا نِّي إِي كِذس جِّيغ حتَّا ٱڒ نْهَار نِّي اَنݣَّارُو.13مثّل تَّعْلِيم نِّي نِيشَان إِي ثسْڒِيذ زَّايِي، أَكِذس إِي غَا يِيڒِي يجّن ن لْإِيمَان ذ يِجّن ن ڒمْحِبّث إِي يدْجَان ذِي عِيْسَى لْمَسِيح.14حْضَا ثَمسْڒَايْث نِّي إِي ذَاش يجَّا ذ لْأَمَانَا، حْضَا-ت س أَرُّوْح يقدّْسن إِي ذَايْنغ يزدّْغن.15شك ثسّْنذ بلِّي مَارَّا يِنِّي يدْجَان ذِي لْإِقْلِيم ن آسْيَا سمْحن ذَايِي ؤُڒَا ذ فِيْخُوْلُوْس ذ هِيْرْمُوْجِيْنُوْس.16أَذ يبَرك سِيذِي أَربِّـي ڒحْبَاب ن ؤُمَاثْنغ وَانِيْسْفُوْر، أَطَّاس ن ثْوَاڒَاثِين يسرْتَاح-اَيِي وَار يسذْحِي شَا خ سْنَاسڒ ينُو.17لَّا، نتَّا وَامِي يدْجَا ذِي ثنْدِينْت ن رُوْمَا يرزُّو خَافِي اَطَّاس اَڒ وَامِي إِي ذَايِي يُوْفَا.18أَث يجّ سِيذِيثْنغ حمَا اَذ يَاف اَرَّاحْمث زِي سِيذِي أَربِّـي ذِي نْهَار نِّي اَنݣَّارُو. شك عَاوذ ثسّْنذ مشْحَاڒ ن ثْوَاڒَاثِين إِي ذَايِي يعَاون ذِي ثنْدِينْت ن ؤُفَسُوْس.
Wycliffe Bible Translators, Inc.