2 أَيث-سلونيك1
1نش ذ بُوْلُس، أَكِذِي سِيلَاس ذ تِيْمُوْتَاوُس، نُوْرَا ثَبْرَات-أَ غَار جْمَاعث ن ڒْمُوْمِنِين ن أَيث-سَلُوْنِيك إِي يُوْمْنن زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.2أَكِذْوم يِيڒِي اَرْضَا ذ ڒهْنَا زِي أَربِّـي بَابَاثْنغ ذ سِيذِيثْنغ عِيْسَى لْمَسِيح.3آي أَيثْمَا، ئِتْخصَّا أُو لَابُد أَ نْشكَّر أَربِّـي خَاوم ڒبْدَا. قَا مَانَايَا نِيشَان مِينْزِي لْإِيمَان نْوم يتمْغُوْر س وَاطَّاس، مِينْزِي عَاوذ ڒمْحِبّث نْوم ثْرنِّي اَك وَايَاوْيَا.4خ مَانَايَا ذ كنِّيو إِݣ يدْجَان ذ شَّان نّغ جَار ثْجُمَاع ن ڒْمُوْمِنِين، نسَّاوَاڒ خ صّْبَر نْوم ذ لْإِيمَان نْوم ذِي مَارَّا اَعدّب نِّي ذ مَارَّا ڒمْحَاين نِّي إِي خَاوم إِي تكّن.5مَانَايَا ذ يجّن ن دَّلِيل بلِّي لْحُكم ن أَربِّـي يدْجَا نِيشَان، أُو س دَّلِيل-أَ اَكنِّيو يحْسب ثسْذَاهدْجم ڒْمُلْك نّس إِي خف ثْعدّْبم.6أَربِّـي نتَّا ذ بَاب ن ڒْحَقّ، أَذ يعدّب س ڒمْحَاين يِنِّي إِي كنِّيو يتْمحَّانن،7أَذَاوم يُوْش اَرَّاحث اَكِذْنغ كنِّيو يتْوَامحَّانن. مَانَايَا اَذ يِيڒِي خْمِي د غَا يمظْهَار سِيذِيثْنغ عِيْسَى زݣ وجنَّا ذݣ يِجّن ن ثْمسِّي ثْحدّق، أَكِذس د مظْهَارنْت لْمَلَائِكَاث نّس يجهْذن.8أَذ ينْتَاقم زݣ يِنِّي وَار يسِّينن شَا أَربِّـي ذ يِنِّي وَار يتْطِيعِين شَا إِ لْإِنْجِيل ن سِيذِيثْنغ عِيْسَى.9أَذ تْوَاعَاقْبن س يِجّن ن لْخَرَاب وَار يفنِّين شَا، أَذ تْوَاحَرّْمن زݣ وغمْبُوْب ن سِيذِيثْنغ ذ لْعَظَمَا ن جّْهذ نّس.10مَانَايَا اَذ يوْقع ذِي يُوْم نِّي إِي د غَا يَاس سِيذِيثْنغ بَاش اَذ يتْوَاسمْغَار جَار صَّالِحِين نّس، نتَّا اَزَّايس تْعجّْبن مَارَّا يِنِّي يُوْمْنن، ذَايْسن كنِّيو مِينْزِي ثُوْمْنم زِي مِين خَاس نشْهذ.11خ مَانَايَا نْتتَّار إِ أَربِّـي خَاوم ڒبْدَا بَاش اَكنِّيو يَارّ ثسْذَاهدْجم اَڒَاغِي نّس. أُو س جّْهذ نّس اَذَاوم يَارو مَارَّا ڒْخِير إِي ثخْسم أَذ تݣّم، أَذَاوم يَارو كُڒ ڒْخذْمث عَاوذ إِي د تَاسن زِي لْإِيمَان نْوم.12نْتتَّار-اَس مَانَايَا بَاش يسم ن سِيذِيثْنغ عِيْسَى اَذَايْوم يتْوَاسمْغَار، أَذَايس تْوَامْغَارم عَاوذ كنِّيو عْلَاحْسَاب اَرْضَا ن أَربِّـي نّغ ذ سِيذِيثْنغ عِيْسَى لْمَسِيح.
Wycliffe Bible Translators, Inc.