2 أَيث-كورينث1
1ثَبْرَات-أَ زَّايِي نش بُوْلُس إِݣ يدْجَان ذ اَرَّسُوْل ن عِيْسَى لْمَسِيح س ڒْخَاضَر ن أَربِّـي، أَكِذِي ؤُمَاثْنغ تِيْمُوْتَاوُس. تَارِيغ إِ جْمَاعث ن ڒْمُوْمِنِين ن أَربِّـي يِنِّي يدْجَان ذِي ثنْدِينْت ن كُوْرِينْث ذ مَارَّا ڒْمُوْمِنِين صَّالِحِين عَاوذ إِݣ يدْجَان ذِي لْإِقْلِيم ن ؤُخَايَا اَمن-ثكْمَاڒ.2أَكِذْوم يِيڒِي اَرْضَا ذ ڒْهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.3أَذ يتْوَابَرك أَربِّـي بَابَاس ن سِيذِيثْنغ عِيْسَى لْمَسِيح. نتَّا عَاوذ ذ بَابَاس ن اَرَّحْمث ذ نتَّا ذ أَربِّـي إِݣ يتْعَاوَان مَارَّا يوْذَان.4ئِتْعَاوَان-اَنغ ذِي مَارَّا تَمَارَا نّغ حمَا نشِّين س ومْعَاوَان-أَ إِي زِي ذَانغ يتْعَاوَان أَربِّـي نْزمَّر أَ نْعَاون يِنِّي يدْجَان ذِي كُڒ تَمَارَا.5لِأَنَّا مَامّش اَعدّب ن لْمَسِيح يتنْفيَّاض-د يتَاذَاف ذِي ثُوْذَارْث نّغ اَمنِّي عَاوذ س لْمَسِيح يتنْفيَّاض-د ومْعَاوَان نّغ.6مڒَا نتْوَازيَّار نشِّين اَقَا مَانَاينِّي بَاش كنِّيو اَذ تْوَاعَاوْنم بَاش اَذ تْوَاسْنجّْمم. مڒَا نتْوَاعَاون نشِّين اَقَا مَانَاينِّي بَاش عَاوذ اَذ تْوَاعَاوْنم كنِّيو. أَقَا اَمْعَاوَان-أَ يتَارو-د ذَايْوم يجّن ن صْبَار خْمِي تْعدَّابم س مِين نتْعدَّاب نشِّين.7لْأَمَال نّغ عْلَاحْسَاب كنِّيو يجْهذ. أَقَا نسّن مَامّش ثْشَرّْشم ذِي تَمَارَا نّغ، أَمنِّي عَاوذ نسّن اَذ تْشَرّْشم ذݣ ومْعَاوَان نّغ.8آي أَيثْمَا، نخْس اَذ تسّْنم تَمَارَا إِي خَانغ يكِّين ذِي لْإِقْلِيم ن آسْيَا. تُوْغَا نتْوَازيَّار اَطَّاس نشِّين، أَزيَّار نِّي تُوْغَاث كْتَار زِي جّهذ نّغ وَار نْزمَّر اَزَّايس نصْبَر حتَّا وَامِي نفْقذ لْأَمَال بَاش أَ ندَّر.9وَاه، نْحسَّا ذݣ يِيخف نّغ بلِّي نتْوَاحْكَام س ڒْموْث. يوْقع مَانَاينِّي بَاش وَار نتْعوِّيڒ شَا خ يِيخف نّغ، أَ نْعوّڒ خ أَربِّـي ونِّي إِي د يسْنكَّارن يِنِّي يمُّوْثن.10ئِسنْجم-اَنغ-د زݣ يِجّن ن ڒْموْث ذ ثَعفَّانْت أُو نتَّا عَاذ اَقَا يسنْجَام-اَنغ. نْتݣّ ذَايس لْأَمَال نّغ بلِّي عَاذ اَذَانغ يسنْجم وَامِي كنِّيو ذَانغ تْعَاوَانم س ثْࢲَادْجِيث نْوم. ثُمَّا اَطَّاس ن يِوْذَان اَذ سْݣَعّْذن صُّوْت نْسن غَار أَربِّـي اَث شكَّرن خ لْبَرَكَا نِّي إِي ذَانغ غَا يُوْش خْمِي إِي غَا ثسْتَاجب اَطَّاس ن ثْࢲَادْجِيث نْسن خَانغ.12أَقَا نشِّين نْتفْتَخَر زِي ضَّمِير نّغ يعْنِي يشهّذ بلِّي نُوْيُوْر مْلِيح ذِي دُّنشْت-أَ خَصَّاتَن اَكِذْوم س يِجّن ن نِّيّث ذ وُوْڒ يصْفَان زِي أَربِّـي. وَار يدْجِي بُو س يِجّن ن ڒفْهَامث ن دُّنشْت-أَ؛ لَّا، س يِجّن ن اَرْضَا ن أَربِّـي.13شُوْف، كُڒ ثَمسْڒَايْث إِي ذَاوم د نْتَارِي ذِي ثبْرَات-أَ ثْزمَّرم اَت تْغَارم اَذَاس ثْفهْمم. أُو وَاخَّا وَار ذَانغ تفْهِيمم شَا ڒخُّو ذِي مَارَّا ثِمسْڒَايِين، نش تْمنِّيغ اَذَانغ ثْفهْمم مْلِيح بَاش اَزَّايْنغ تفْتَخَرم ذِي نْهَار نِّي ن سِيذِيثْنغ عِيْسَى مَامّش اَزَّايْوم نْتفْتَخَر نشِّين.15أُو س لْإِفْتِخَر-أَ تُوْغَا رزُّوْغ ذ اَمزْوَارُو اَغَارْوم د ݣّغ يجّن ن زِّيَارَا حمَا اَذَاوم دُوْبْلِيغ لْبَرَاكَا.16يعْنِي تُوْغَا رزُّوْغ اَخَاوم د كّغ خْمِي غَا رَاحغ غَار لْإِقْلِيم ن مَاسِدُوْنْيَا، منْبَعْد اَغَارْوم د عقْبغ زِي مَاسِدُوْنْيَا بَاش اَذَايِي ثْعَاوْنم اَذ سَفَرغ غَار ثْمُوْرْث ن يَهُوْذِيَا.17وَامِي تُوْغَا نش تْخطَّاطغ اَذ ݣّغ مَانَاينِّي، مَا ذوّْڒغ ذݣ وَاوَاڒ وَاهَا؟ نِغ مَا تْخطَّاطغ اَم يِجّن ن بْنَاذم ن دُّنشْت-أَ وَاهَا، يعْنِي اَذ ينِيغ وَاه-وَاه نِغ لَّا-لَّا ذِي نّفْس ن ڒْوقْث؟18أَم أَربِّـي ذَايس تِّقث نتَّا، نشِّين عَاوذ قَا اَوَاڒ نّغ إِ كنِّيو وَار يدْجِي بُو ذ وَاه اَكذ لَّا.19لِأَنَّا مِّيس ن أَربِّـي يعْنِي عِيْسَى لْمَسِيح نْبشَّر-يث جَارَاوم نش ؤُڒَا ذ سِيلَاس ؤُڒَا ذ تِيْمُوْتَاوُس. لْمَسِيح وَار يدْجِي بُو ذ وَاه اَكذ لَّا، نتَّا يدْجَا ڒبْدَا ذ <وَاه> أُو صَافِي.20لِأَنَّا نتَّا ذَايس إِي يقَّار أَربِّـي <وَاه> إِ مَارَّا ثِمسْڒَايِين إِي يعَاهذ أَربِّـي. س مَانَايَا زِي عِيْسَى نقَّار <آمِين> إِ لْعَظَمَا ن أَربِّـي.21أَربِّـي نتَّا إِي ذَانغ يسْبدّن مْلِيح اَكِذْوم ذِي لْمَسِيح. ئِخْضَر-اَنغ يضْبع-اَنغ س طَّبَاع نّس يُوْشَا-ٱنغ أَرُّوْح نّس يݣِّي-ث ذݣ وُوْڒَاون نّغ اَم يجّن ن تّسْبِق.23إِيوَا تتَّارغ إِ أَربِّـي اَذ يِيڒِي نتَّا ذ شَّاهذ ينُو قَا نش تُوْغَا رزُّوْغ اَخَاوم حِينّغ وَامِي ؤُݣِيغ اَغَارْوم د اَسغ غَار كُوْرِينْث.24لِأَنَّا وَار يدْجِي بُو نتْحكّم خ لْإِيمَان نْوم؛ لَّا، نْخدّم اَكِذْوم بَاش اَذ تْفَرْحم. أَقَا س لْإِيمَان نْوم إِي ثْبدَّام نِيشَان.
Wycliffe Bible Translators, Inc.