1 تيموتاوس5
1وَار نهَّا شَا يجّن ن ؤُوسَّار س ڒقْسَاحث؛ لَّا، سِيوڒ اَكِذس اَم بَابَاش. ئِحنْجِيرن اݣّ-يثن اَم اَيثْمَاش.2ثِوسُّوْرَا اݣّ-يثنْت اَم يمَّاثَاش. ثِحنْجِيرِين اݣّ-يثنْت اَم سُوْيْثْمَاش س يِجّن ن وُوْڒ يصْفَا.3وقَّر ثَاجَّاڒِين إِݣ يدْجَان ذ ثَاجَّاڒِين ذ صَّح. 4شُوْف، ثَاجَّاڒْث نِّي مڒَا غَارس يحنْجِيرن نِغ ذ اَيَّاون اَتَاف ذ نِثْنِي إِي ت غَا يعَاوْنن اَذ ڒمْذن ذ اَمزْوَارُو اَذ سْخدّْمن لْإِيمَان نْسن اَك لْعَئِلَا نْسن اَذ اَرّن ڒْخِير إِ لْوَالِدِين نْسن. أَقَا مَانَايَا يَارْضَا خَاس أَربِّـي.5قَا ثَاجَّاڒْت ن صَّح ثنِّي وَار غَار يدْجِي حَدّ اَقَا ذ نتَّاث يتݣّن لْأَمَال نّس ذِي أَربِّـي تْغِيمَا تدْعَا أَربِّـي تتَّار-اَس دْجِيڒث ذ نْهَار.6وَلَكِن ثنِّي يتْعِيشن ذِي شّهْوث وَاهَا، قَا نتَّاث ثمُّوْث وَاخَّا ثدَّر.7ثِمسْڒَايِين-أَ تْوصَّا-ثنْت بَعْدَا شك بَاش اَذ قِّيمن يِوْذَان بْڒَا ڒْعِيب.8شُوْف، ونِّي وَار يتْذبِّيرن خ ڒحْبَاب نّس خَاصَّتَان خ لْعَئِلَا نّس اَتَاف نتَّا ينْكَر لْإِيمَان، ونِّي وَار يُوْمِينن قَاع اَتَاف حْسن زَّايس.9وَار تجَّا ؤُڒَا ذ يشْتن اَذ تْسجّل اَك ثَاجَّاڒِين غَار لْمُعَاوَنَا إِلَّا مڒَا غَارس زِي ستِّين يسݣّْوُوْسَا اَڒ ثْسَاونْت، إِلَّا مڒَا تُوْغَا غَارس يجّن ن ورْيَاز وَاهَا.10لَابُد اَذ تِيڒِي مَعْرُوْفَا س لْحَسَانَاث نّس يعْنِي مڒَا ثربَّا ثَارْوَا نّس، تْرحَّاب س ينوْجِيون، ثْسِيڒِيذ يضَارن ن صَّالِحِين، تْعَاوَان يِنِّي يتْزيَّارن، ثْذفَّار مَارَّا ثِمسْڒَايِين ثِصبْحَانِين.11فَا ثَاجَّاڒِين ثِمزْيَانِين وَار ثنْت تْسجَّال شَا عْلَاحْسَاب لْمُعَاوَنَا. نِثنْتِي خْمِي غَا ثذْفَارنْت شّهَاوَاث نْسنْت كْتَار زِي لْمَسِيح اَتَاف رزُّوْنْت اَذ مڒْشنْت.12أَمُّو اَذ تْوَاحكْمنْت مِينْزِي سمْحنْت ذِي لْوَعذ نْسنْت إِي ݣِّينْت ذ اَمزْوَارُو.13عَاوذ اَذ ذوْڒنْت ذ ثِمعْݣَازِين ݣُّوْرنْت زِي ثَدَّارْث غَار ثدَّارْث تݣّنْت فَرْق-شّْغڒ. مَاشِي ذ ثِمعْݣَازِين وَاهَا، تْعَاوَاذنْت ڒخْبُوْرَاث تَاذْفنْت ذِي شّْغُوْرَاث ن مِيدّن قَّارنْت ثِمسْڒَايِين وَار يتْخصَّا شَا اَذ تْوَانَّانْت.14إِذن، خْسغ ثَاجَّاڒِين ثِمزْيَانِين اَذ مڒْشنْت اَذ د جّنْت يحنْجِيرن اَذ سُوْݣُوْرنْت ثَدَّارْث نْسنْت مْلِيح وَار تجِّينْت بُو شَان لْفُرْصَا إِ ڒْعَذُو اَخَاسنْت يسِّيوڒ س ڒْعِيب.15مِينْزِي ذِنِّي ڒبْعَاض صَافِي فّْغنْت اَبْرِيذ ذْفَارنْت شِّيطَان.16ثَمْغَارْث ذ ڒْمُوْمْنَا مڒَا تِيڒِينْت اَكِذس شَان تَاجَّاڒِين اَذَايْسنْت تْهِيلَّا أُو لَابُد اَكِذس قِّيمنْت اَخَاسنْت ثْذبَّر. ثِيْنَا، مَاشِي ذ جْمَاعث ن ڒْمُوْمِنِين اَخَاسنْت تَرْبُو؛ لَّا، أَذ تَرْبُو غِير خ ثِنِّي يدْجَان ذ ثَاجَّاڒِين حْذَاجنْت ذ صَّح.17ئِمقّْرَانن ن جْمَاعث ن ڒْمُوْمِنِين يِنِّي يتحْكَامن مْلِيح أُو لَابُد اَثن تْوقَّرم ذ ضُوْبْلِي، خَاصَّتَان يِنِّي يخدّْمن اَطَّاس ذݣ وحدّث ذ وسڒْمذ.18أَقَا لْكِتَاب يقَّار: وَار ذَاس تݣّ بُو ثَشْمَانْت إِ ؤُفُوْنَاس نِّي يتْصَرْوَاثن. أَقَا عَاوذ اَخدَّام غَارس ڒْحَقّ اَذ يتْخَاڒس.19وَار قبّڒ شَا تُّوْهْمث ضد إِ ؤُمقّْرَان ن جْمَاعث ن ڒْمُوْمِنِين إِلَّا مڒَا ذِنِّي ثْنَاين نِغ ثْڒَاثَا ن ڒشْهُوْذ تَهَامن-ث.20ئِمقّْرَانن إِݣ يعصَّان نْهَا-ثن شك زَّاث إِ مَارَّا يوْذَان بَاش ينِّي ينّغْنِي اَذ ݣّْوْذن بَعْدَا.21أَقَا عڒْمغ-اَش زَّاث إِ أَربِّـي ذ عِيْسَى لْمَسِيح ذ لْمَلَائِكَاث يتْوَاخْضَرن قَا لَابُد اَذ تݣّذ ثِمسْڒَايِين-أَ بْڒَا مَا ٱذ تݣّذ ڒْفَرْز اَك شَان حَدّ بْڒَا مَا ٱذ تݣّذ عَاوذ س وُوْذمَاون.22ئِفَاسّن نّش وَار تْقدْجِيق شَا اَثن تْسرْسذ خ شَان حَدّ، وَار شَرّش شَا ذِي ڒْمُعْصِيَاث ن مِيدّن. قِّيم شك ثصْفِيذ.23وَار سسّ شَا اَمَان وَاهَا، سو عَاوذ ذْرُوْس ن وَامَان وضِيڒ عْلَاحْسَاب ثَكْرِيشْت نّش ذ ڒهْرَاشَاث إِي ش يڒقّْفن.24شَا ن ڒْمُعْصِيَاث ن يرْيَازن تْوَامظْهَارنْت-يد تِيزْوَارنْت-يد إِ لْعِقَاب نْسن، وَلَكِن ڒْمُعْصِيَاث ن يرْيَازن نّغْنِي اَخَاسن د خضْڒنْت منْبَعْد.25أَمُّو عَاوذ شَان ن لْحَسَانَاث تْوَامظْهَارنْت-يد، عَاذ شَان ن لْحَسَانَاث نّغْنِي وَار زمَّرنْت شَا اَذ قِّيمنْت تْوَانُوْفَّرنْت.
Wycliffe Bible Translators, Inc.