1 بطرس5
1فَا نش تْڒَاغِيغ-د خ يمقّْرَانن يدْجَان جَار ن ثْجُمَاع، نش إِي يدْجَان ذ يجّن ن ومقّْرَان اَم كنِّيو ذ يِجّن ن شَّاهذ خ مِين خف يتْوَاعدّب لْمَسِيح، نش ذ يِجّن عَاوذ إِي غَا يشَرْشن ذِي لْعَظَمَا إِي د غَا يمظْهَارن.2اَروْسث ثْحِيْمرْث نِّي ن أَربِّـي إِي خف كنِّيو يتْكلَّاف نتَّا. حْضَام-تث س ڒْخَاضَر نْوم مَاشِي س يِجّن ن بزّز إِي خَاوم تݣّن مِينْزِي اَمُّو إِي يخس أَربِّـي. مَاشِي س طّْمَع ن ڒفْضِيحث، لَّا س وُوْڒَاون نْوم.3مَاشِي اَخَاسن ثْحكْمم س ؤُزِيَّار خ يِنِّي إِي خف تْكلَّافم؛ لَّا، أَذ تِيڒِيم ذ لْمِثَال إِ ثْحِيْمرْث إِي غَا تبْعن.4خْمِي د غَا يمظْهَار ؤُمكْسَاو اَمقّْرَان اَتَاف اَذ تْقبْڒم يجّن ن تَّاج عمَّارْص اَذ يكْشف.5آي يحنْجِيرن، كنِّيو طَاعث عَاوذ إِ يِنِّي يدْجَان ذ يمقّْرَانن. سْوجْذث يخف نْوم مَارَّا كنِّيو س يِجّن ن اَرَّاي اَك وَايَاوْيَا وَار ذَايس بُو تَّكبُّر مِينْزِي <أَربِّـي اَقَاث ضد ن يِنِّي يسمْغَارن يخف نْسن، يِنِّي يسمْزَاين يخف نْسن يتِيشّ-اَسن اَرْضَا نّس.>6إِذن، سمْزَايم يخف نْوم سْوَادَّاي ن ؤُفُوْس يجهْذن ن أَربِّـي، أَكنِّيو يسمْغَار ذِي ڒْوقْث إِي يخس نتَّا.7مَارَّا يمْنُوْسن جّم-ثن إِ نتَّا مِينْزِي نتَّا يتْهلَّا ذَايْوم.8أَرّم-د ڒْبَاڒ نْوم، إِڒِيث عْلَابَال. ڒَعْذُو نْوم إِبْڒِيس قَا يتْقيَّاذ-كنِّيو اَم سّْبَاع يتْهِيرِّيو يرزُّو خ ونِّي إِي غَا يسغْڒِي.9عَرّْضم-اَس إِ إِبْڒِيس، بدّم نِيْشَان خ دْسَاس ن لْإِيمَان نْوم مِينْزِي ثسّْنم بلِّي أَيثْمَاثْوم ذِي مَارَّا دُّنشْت-أَ اَقَا تْوَاعدَّابن اَم كنِّيو.10أَتَاف اَذ تْوَاعدّْبم شْوَايْت ن ڒْوقْث ڒخْدّنِّي اَكنِّيو يسْريّح أَربِّـي نّغ إِي ذِي يدْجَا مَارَّا اَرْضَا ذ نتَّا إِي ذَاوم د يڒَاغَان غَار لْعَظَمَا نّس وَار يفنِّين شَا ذِي لْمَسِيح. أَكنِّيو يسْبدّ، أَكنِّيو يسجْهذ، أَكنِّيو يݣّ خ دْسَاس.11أَغَارس يِيڒِي ڒحْكَام إِ ڒبْدَا ن ڒبْدَاث. آمِين.12ؤُرِيغ-اَوم-د ثَبْرَات-أَ ثَمزْيَانْت خ ؤُفُوْس ن سِيْلْوَان حسّْبغ-ث نش اَم ؤُمَاثْنغ ذَايس تِّقث. تْشجَّاعغ-كنِّيو، شهّْذغ مِين قَّارغ مَانَايَا ذ اَرْضَا ن أَربِّـي ذ صَّح. بدّم ذَايس نِيْشَان.13ثْسَاوَّاض-اَوم-د سْڒَام جْمَاعث إِي يدْجَان ذِي ثنْدِينْت ن بَابِل، نِثْنِي تْوَاخْضَرن اَم كنِّيو. وَاخَّا ؤُڒَا ذ مَرْقُس يسَاوَّاض-اَوم-د سْڒَام ونِّي يدْجَان اَم ممِّي.14تْسدْجَامث خ وَايَاوْيَا س يِجّن ن سْڒَام ن ثمْعَشَارْث.
أَغَارْوم يِيڒِي ڒهْنَا إِ مَارَّا كنِّيو إِي يدْجَان ذِي لْمَسِيح.
أَغَارْوم يِيڒِي ڒهْنَا إِ مَارَّا كنِّيو إِي يدْجَان ذِي لْمَسِيح.
Wycliffe Bible Translators, Inc.