1 يوحنا5
1مَارَّا ونِّي غَا يَامْنن عِيْسَى نتَّا ذ لْمَسِيح اَتَاف يخْڒق-د زِي أَربِّـي. أُو مَارَّا ونِّي يتخْسن بَابَاثْنغ اَتَاف نتَّا عَاوذ يتخْس ثَارْوَا نّس إِي زَّايس د يخڒْقن.2مَامّش غَا نݣّ نشِّين أَ نسّن إِلَّا نْتخْس ثَارْوَا ن أَربِّـي؟ نْتسّن-يث مڒَا نْتخْس أَربِّـي نتْطَاعَا-ٱسنْت إِ ڒُوْصِيَاث نّس.3لِأَنَّا ذ ثَا ذ ڒمْحِبّث ن أَربِّـي يعْنِي نتْطَاعَا إِ ڒُوْصِيَاث نّس. أُو ڒُوْصِيَاث-أَ نّس وَار خَانغ تذْقِيڒنْت شَا.4أَقَا مَارَّا ونِّي إِي د يخڒْقن زِي أَربِّـي اَذ يغْڒب خ دُّنشْت-أَ. ذ وَا ذ اَغْڒَاب إِي زِي نغْڒب خ دُّنشْت-أَ يعْنِي لْإِيمَان نّغ.5مِين يعْنَا ونِّي يغلّْبن خ دُّنشْت-أَ؟ ونِّي يغلّْبن ذ ونِّي يُوْمْنن إِلَّا عِيْسَى ذ مِّيس ن أَربِّـي.6عِيْسَى لْمَسِيح ذ وَانِيتَا إِي د يُوْسِين س وَامَان ذ يذَامّن. نتَّا مَاشِي يُوْسَا-د س وَامَان وَاهَا، يُوْسَا-د س وَامَان ذ يذَامّن. ونِّي يشهّْذن نتَّا ذ أَرُّوْح يقدّْسن مِينْزِي أَرُّوْح-أَ نتَّا ذ لْحَقِيقَا.7أَقَا ذِنِّي ثْڒَاثَا إِݣ يشهّْذن، ثْڒَاثَا-يَا ذ أَرُّوْح ذ وَامَان ذ يذَامّن. ثْڒَاثَا-يَا ذ يجّن.9مڒَا نقْبڒ شْهَاذث ن بْنَاذم قَا شْهَاذث ن أَربِّـي ثمْغَر كْتَار. لِأَنَّا نتَّاث ذ شْهَاذث-أَ، ثنِّي ن أَربِّـي إِݣ يشهّْذن خ مِّيس.10ونِّي غَا يَامْنن زِي مِّيس ن أَربِّـي اَتَاف اَغَارس ثِيڒِي شْهَاذث-أَ ذݣ وُوْڒ نّس. ونِّي وَار يُوْمِينن شَا زِي شْهَاذث-أَ ن أَربِّـي اَتَاف اَث يَارّ ذ بُو-يخَرِّيقن وَاهَا ڒَاحقَّاش نتَّا وَار يُوْمِين شَا زِي شْهَاذث-أَ إِݣ يشْهذ عْلَاحْسَاب مِّيس.11ذ ثَانِيتَا ذ شْهَاذث-أَ يعْنِي أَربِّـي يُوْشَا-ٱنغ-د ثُوْذَارْث ن ڒبْدَا، ثُوْذَارْث-أَ اَقَات ذِي مِّيس.12ونِّي غَار يدْجَا مِّيس اَتَاف غَارس ثُوْذَارْث. ونِّي وَار غَار يدْجِي بُو مِّيس ن أَربِّـي اَتَاف وَار غَارس بُو ثُوْذَارْث.13نش ؤُرِيغ-اَوم-د ثِمسْڒَايِين-أَ إِ كنِّيو إِي يُوْمْنن س يِيْسم ن مِّيس ن أَربِّـي حمَا اَذ تسّْنم إِلَّا غَارْوم ثُوْذَارْث ن ڒبْدَا ن ڒبْدَاث.14ذ ثَا ذ تِّقث إِي غَارْنغ ذَايس يعْنِي مڒَا نتَّار-اَس شَان ثْمسْڒَايْث عْلَاحْسَاب ڒْخَاضَر نّس اَتَاف نتَّا اَغَارْنغ يصنّط.15مڒَا نشِّين نسّن بلِّي يتْسْڒَا غَارْنغ قَاع ثِمسْڒَايِين نِّي إِي ذَاس نْتتَّار اَتَاف أَ نسّن بلِّي مِين ذَاس غَا نتَّار اَذَانغ ث يُوْش.16ونِّي غَا يتْوَاڒَان يجّن ن وُوْمَاس يعْصَا يجّن ڒْمُعْصِيّث إِي وَار يتِيوِين شَا غَار ڒْموْث، نتَّا يتْخصَّا-يَاس اَخَاس يࢲَّادْج غَار أَربِّـي اَتَاف اَذَاس يُوْش ثُوْذَارْث إِ وُوْمَاس نِّي. نِّيغ-اَوم-د مَانَايَا عْلَاحْسَاب يِنِّي ڒْمُعْصِيّث نْسن وَار ثن تِيوِي شَا غَار ڒْموْث. ذِنِّي يجّن ن ڒْمُعْصِيّث إِݣ يتَاوِين غَار ڒْموْث، ثنِّي وَار ذَاوم ت قَّارغ شَا اَخَاس ثࢲَّادْجم.17مَارَّا شَّرّْ نتَّا ذ ڒْمُعْصِيّث، وَلَكِن ذِنِّي ڒْمُعْصِيَاث وَار ذَانغ تِيوِينْت شَا غَار ڒْموْث.18نشِّين نسّن بلِّي مَارَّا ونِّي د يخڒْقن زِي أَربِّـي وَار يقِّيم شَا يسْخدَّام ڒْمُعْصِيَاث. مِّيس إِي د يخڒْقن زِي أَربِّـي يحطَّا-ث، وَار ث يتْضَرِّي شَا لْمُفْسِيد.19نسّن إِلَّا نشِّين زِي أَربِّـي، نسّن عَاوذ مَارَّا دُّنشْت-أَ اَقَات سْوَادَّاي إِ ثْزمَّار ن لْمُفْسِيد.20نسّن عَاوذ اَقَا مِّيس ن أَربِّـي يُوْسَا-د يُوْشَا-ٱنغ ڒفْهَامث بَاش أَ نسّن ونِّي يدْجَان ذ صَّح. نشِّين اَقَانغ ذݣ ونِّي يدْجَان ذ صَّح س مِّيس عِيْسَى لْمَسِيح. وَانِيتَا إِݣ يدْجَان ذ أَربِّـي ن صَّح ذ ثُوْذَارْث ن ڒبْدَا ن ڒبْدَاث.21آ يحنْجِيرن، حْضَام يخف نْوم زِي لْأَصْنَام.
Wycliffe Bible Translators, Inc.