1 يوحنا1
1مِين تُوْغَا ذِنِّي زݣ ومزْوَارُو، نتْسْڒَا-يَاس نࢲّر-يث س ثِيطَّاوِين نّغ، نخزَّر ذَايس نتْحَاذَا-ث س يفَاسّن نّغ يعْنِي ذ اَوَاڒ ن ثُوْذَارْث.2ثُوْسَا-د ثُوْذَارْث ثْمظْهَار-د، نشِّين نْࢲر-يت نشْهذ خَاس. نتْبشَّار-يكنِّيو س ثُوْذَارْث-أَ وَار يفنِّين شَا عمَّارْص. تُوْغَا ثدْجَا ذِنِّي اَك بَابَاس سّنِّي ثْمظْهَار-اَنغ-د.3مِين نࢲْرَا ذ مِين نتْسْڒَا نتْبشَّار-يكنِّيو زَّايس حمَا ؤُڒَا ذ كنِّيو اَذ تمْعَاشَرم اَكِذْنغ. مَارَّا نشِّين ثَمْعَاشَرْث نّغ اَقَات اَك بَابَاثْنغ ذ مِّيس عِيْسَى لْمَسِيح.4نْتَارِي-يَاوم-د ثِمسْڒَاِين-أَ حمَا ڒفْرَاحث نّغ اَذ تجَّاون.5ذ وَا ذ اَوَاڒ إِي زَّايس نتْسْڒَا نتْبشَّار-يكنِّيو زَّايس يعْنِي أَربِّـي ذ نُّوْر وَار ذَايس بُو ثَادْجسْت.6مڒَا نقَّار قَا نشِّين نْتمْعَاشَر اَكِذس وَلَكِن نݣُّوْر ذݣ وبْرِيذ ن ثَادْجسْت اَتَاف نسْخَرِّيق وَاهَا وَار نسْخدِّيم شَا لْحَقِيقَا.7وَلَكِن مڒَا نݣُّوْر ذِي نُّوْر مَامّش يدْجَا نتَّا ذِي نُّوْر، أَتَاف نْتمْعَاشَر اَك وَايَاوْيَا اَتَاف يذَامّن ن مِّيس عِيْسَى سِّيصْفَان-اَنغ زِي مَارَّا ڒْمُعْصِيَاث.8مڒَا نقَّار وَار ذَايْنغ بُو ڒْمُعْصِيَاث اَتَاف نسْخَرِّيق خ يِيخف نّغ وَاهَا، أَتَاف لْحَقِيقَا وَار ذَايْنغ ثْزدّغ شَا.9وَلَكِن مڒَا نعْتَرف س ڒْمُعْصِيَاث نّغ إِ أَربِّـي، نتَّا اَقَاث نِيشَان ذَايس تِّقث، أَذَانغ يغْفَر ڒْمُعْصِيَاث نّغ اَذَانغ يسِّيصْفَا زِي مَارَّا شَّرّْ.10مڒَا نقَّار قَا نشِّين وَار نعْصِي شَا أَربِّـي، أَتَاف نتَّا نْتَارَّا-ث ذ بُو-يخَرِّيقن، أَتَاف اَوَاڒ نّس وَار ذَايْنغ يزدّغ شَا.
Wycliffe Bible Translators, Inc.