Read أَسَارْڭبْ 2

أَسَارْڭبْ2rif_ati

ثِيبْرَاثِينْ إِ سبْعَا ن ثْمسْمُونِينْ

¹أَرِي إِ لْمَالَاكْ ذِي ثْمسْمُونْثْ ن أَفَاسُوسْ! ”أَمُّو إِ إِقَّارْ ونِّي غَارْ إِدْجَا سبْعَا ن إِثْرَانْ ذڭْ ؤُفُوسْ نّسْ، ونِّي إِڭُّورنْ ذِي ڒْوسْطْ ن سبْعَا ن ڒقْنَاذڒْ ن وُورغْ:²’نشّْ سّْنغْ ڒخْذَايمْ نّشْ ذ وَارْبَارْ نّشْ ذ صّْبَارْ نّشْ، بلِّي وَارْ ثْزمَّارذْ أَذْ ثْحمْڒذْ إِنِّي إِعفّْننْ ؤُشَا ثْقدْجْبذْ إِنِّي إِتّڭّنْ إِخفْ نْسنْ ذ رُّوسُولْ، مَاشَا وَارْ دْجِينْ شَا، ؤُشَا ثُوفِيذْ ثنْ ذ أَيْثْ ن بُو-إِخَارِّيقنْ.³شكْ ثْصبَّارذْ ؤُ ثكْسِيذْ أَرْمحْ خْ سِّيبّثْ ن يِيسمْ إِنُو ؤُ وَارْ ثُوحِيڒذْ شَا.⁴مَاشَا غَارِي خَاكْ شَا، بلِّي ثجِّيذْ ثَايْرِي نّشْ ثَامزْوَارُوثْ.⁵عْقڒْ مَانِيسْ-د ثوْضِيذْ ؤُشَا ثُوبْ، خنِّي أڭّْ ڒخْذَايمْ ثِيمزْوُورَا! مَاڒَا وَارْ إِدْجِي أَمنِّي، أَذْ غَاركْ د-أَسغْ ذغْيَا، أَذْ كسّغْ ڒْقنْذِيڒْ نّشْ، مَاڒَا وَارْ ثتُّوبذْ شَا.⁶مَاشَا مَانْ أَيَا ثِيوْضذْ، أَقَا ثْشَارّْهذْ ڒخْذَايمْ ن أَيْثْ ن إِنِيكُولَايِيثنْ، ثِينِّي شَارّْهغْ ؤُڒَا ذ نشّْ.⁷ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ. ونِّي إِ غَا إِغلّْبنْ أَذْ ث سّشّغْ زِي ثْشجَّارْثْ ن ثُوذَارْثْ إِ يدْجَانْ ذِي جّنّثْ ن أَربِّي.‘ “

⁸أَرِي إِ لْمَالَاكْ ن ثْمسْمُونْثْ ن سْمِيرْنَا! ”أَمُّو إِ إِقَّارْ ونِّي ذ أَمزْوَارُو ذ ؤُنڭَّارُو، ونِّي إِمُّوثنْ ؤُشَا إِدَّارْ:⁹’أَقَا سّْنغْ ڒْمحْنثْ نّشْ ذ وزْڒَاضْ نّشْ، قَاعْ أَمنِّي شكْ ثتّجَّارذْ، ؤُ أَقَا-يِي سّْنغْ ؤُڒَا ذ أَشقّفْ ن يِينِّي إِقَّارنْ أَقَا أَثنْ ذ ؤُذَاينْ س ثِيذتّْ، مَاشَا نِيثْنِي وَارْ دْجِينْ شَا ذ ؤُذَاينْ، مَاشَا ذ ثَامْزِيذَا ن شِّيطَانْ.¹⁰وَارْ تّڭّْوذْ شَا زِي مِينْ غَا ثتّْوَاعدّْبذْ. أَقَا إِبْڒِيسْ أَذْ إِنْضَارْ شَا زَّايْومْ ذِي ڒحْبسْ، حِيمَا أَذْ ثتّْوَاجَارّْبمْ. أَذْ غَارْومْ ثِيڒِي ڒْمحْنثْ نعشْرَا ن وُوسَّانْ. إِڒِيمْ ذ إِمْثِيقَّانْ أَڒْ ڒْموْثْ، ڒخْذنِّي أَذْ أَومْ وْشغْ تَّاجْ ن ثُوذَارْثْ.¹¹ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ. ونِّي إِ غَا إِغلّْبنْ وَارْ ذ أَسْ د-ثتِّيوِي شَا ثْخسَّارْثْ زِي ڒْموْثْ وِيسّْ ثْنَاينْ.‘ “

¹²أَرِي إِ لْمَالَاكْ ذِي ثْمسْمُونْثْ ن بِيرْغَامُوسْ! ”أَمُّو إِ إِقَّارْ ونِّي غَارْ إِدْجَا سِّيفْ إِقْضعْ خْ ثْنَاينْ ن وُوذْمَاونْ:¹³’نشّْ سّْنغْ مَانِي ثْزدّْغذْ، ذِيهَا مَانِي إِتّْبدَّا ڒْعَارْشْ ن شِّيطَانْ. أَقَا ثقِّيمذْ ثطّْفذْ ذڭْ يِيسمْ إِنُو ؤُشَا وَارْ ثنْكَارذْ شَا لْ-إِيمَانْ ذَايِي، ؤُشَا ذڭْ وُوسَّانْ ؤُمِي ثُوغَا شكْ ثتّْمنْغذْ جْمِيعْ أَكْ-ذ ؤُشهَّاذْ أَمْثِيقِّي إِنُو ذِي طّْوعْ ن مَارَّا إِشهَّاذنْ إِنُو إِمْثِيقَّانْ، أَقَا إِتّْوَانغْ نتَّا جَارْ أَومْ.¹⁴مَاشَا غَارِي خَاكْ شَا، مِينْزِي غَاركْ ذِينِّي شَا إِنِّي إِتّطّْفنْ ذڭْ ؤُسڒْمذْ ن بَالْعَامْ، ونِّي ثُوغَا إِسّْڒمْذنْ إِ بَالَاكْ مَامّشْ غَا إِنْضَارْ ثَاعنْكْرِيفْثْ إِ أَيْثْ ن إِسْرَائِيل، حِيمَا أَذْ شّنْ زِي مِينْ غَارْصنْ إِ لْ-أَصْنَامْ ؤُشَا أَذْ سفْسَّاذنْ إِخفْ نْسنْ.¹⁵غَاركْ ذِينْ عَاوذْ شَا إِنِّي إِتّطّْفنْ ذِي ثْغُورِي ن إِنِيكُولَايِيثنْ.¹⁶س ؤُينِّي ثُوبْ! مَاڒَا وَارْ إِدْجِي أَمنِّي، أَذْ غَارْومْ د-أَسغْ ذغْيَا، أَذْ كِيسنْ مّنْغغْ س سِّيفْ ن ؤُقمُّومْ إِنُو.¹⁷ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ. ونِّي إِ غَا إِغلّْبنْ أَذْ أَسْ سّشّغْ ’مَانَّا‘ إِنُّوفَارنْ ؤُشَا أَذْ أَسْ وْشغْ إِجّْ ن ؤُقَايَاسْ ذ أَشمْڒَاڒْ، ؤُشَا خْ ؤُقَايَاسْ نِّي إِتّْوَارِي خَاسْ إِجّْ ن إِسمْ ن جْذِيذْ، وَارْ ث إِسِّينْ حذْ مْغِيرْ ونِّي ث إِطّْفنْ.‘ “

¹⁸أَرِي إِ لْمَالَاكْ ذِي ثْمسْمُونْثْ ن ثِييَاثِيرَا! ”أَمُّو إِ إِقَّارْ مِّيسْ ن أَربِّي ونِّي غَارْ إِدْجَا ثِيطَّاوِينْ أَمْ يِيحُوذَاقْ ن ثْمسِّي ذ إِضَارنْ نّسْ أَمْ نّْحَاسْ زِي لُوبْنَانْ:¹⁹’نشّْ سّْنغْ ڒخْذَايمْ نّشْ ؤُڒَا ذ ثَايْرِي نّشْ ذ لْ-إِيمَانْ نّشْ ذ ثْسخَّارْثْ نّشْ ذ صّْبَارْ نّشْ، أَقَا ڒخْذَايمْ نّشْ ثِينڭُّورَا إِمْغَارنْ خْ ثْمزْوُورَا.²⁰مَاشَا غَارِي خَاكْ أَطَّاسْ، مِينْزِي ثجِّيذْ ثَامطُّوثْ نّشْ إِزَابِيلْ، ثنِّي إِقَّارنْ بلِّي نتَّاثْ ذ ثَانَابِيثْ، ثسّڒْمَاذْ ؤُشَا ثسّْغكّْوَا إِمْسخَّارنْ إِنُو، حِيمَا أَذْ سّْفسْذنْ إِخفْ نْسنْ ؤُشَا أَذْ شّنْ مِينْ إِتّْوَاغَارْصنْ إِ لْ-أَصْنَامْ.²¹أَقَا وْشِيغْ أَسْ شَا ن ڒْوقْثْ حِيمَا أَذْ ثثُوبْ، مَاشَا نتَّاثْ وَارْ ثتّخْسْ شَا أَذْ ثثُوبْ زِي فَارْقْ-شّْغڒْ نّسْ.²²خْزَارْ، أَذْ تغضْڒغْ ذِي ثَاسُّوثْ، أَذْ ثِيڒِي ثحْڒشْ أَڒْ ڒْموْثْ، ؤُشَا إِنِّي أَكِيذسْ إِزنَّانْ، أَذْ ثنْ نذْهغْ ذِي ڒْمحْنثْ ثَامقّْرَانْثْ مَاڒَا وَارْ ثُوبنْ شَا زِي مِينْ ڭِّينْ.²³ثَارْوَا نّسْ أَذْ ثنْ وْثغْ س ڒْموْثْ ؤُشَا مَارَّا ثِيمسْمُونِينْ أَذْ فهْمنْثْ أَقَا نشّْ ذ ونِّي إِقدْجْبنْ ثِيژَّاڒْ ذ وُوڒَاونْ ؤُشَا أَذْ وْشغْ إِ كُوڒْ إِجّنْ زَّايْومْ أَنشْثْ ن ڒخْذَايمْ نْومْ.²⁴مَاشَا إِ كنِّيوْ ؤُ إِ إِنّغْنِي ذِي ثِييَاثِيرَا - إِخْسْ أَذْ يِينِي إِ مَارَّا إِنِّي وَارْ غَارْ ثدْجِي شَا ثَاغُورِي-يَا، وَارْ سِّيننْ ؤُمِي قَّارنْ نِيثْنِي ’ڒَْادْجَاغْ ن شِّيطَانْ‘ - أَذْ أَومْ إِنِيغْ: نشّْ وَارْ خَاومْ تّْذَارَّاشغْ شَا ثَاغْرَارْثْ نّغْنِيثْ.²⁵مَاشَا مِينْ غَارْومْ، طّْفمْ ذَايسْ أَڒْ د غَا يَاسغْ.²⁶ونِّي إِ غَا إِغلّْبنْ ؤُ ونِّي إِ غَا إِطّْفنْ ذِي ڒخْذَايمْ إِنُو، أَذْ أَسْ وْشغْ صُّولْطَا خْ ڒڭْنُوسْ²⁷مَاحنْذْ أَذْ ثنْ يَارْوسْ س ؤُزدْجَاضْ ن وُوزَّاڒْ، أَذْ ثنْ ثَارْژِيمْ أَمْ إِغَارَّافنْ ن بُو-ثْڒَاخْثْ، أَمْ مَامّشْ إِ ثطّْفغْ ؤُڒَا ذ نشّْ زِي بَابَا،²⁸ؤُشَا نشّْ أَذْ أَسْ وْشغْ إِثْرِي ن ڒفْجَارْ.²⁹ونِّي غَارْ دْجَانْ إِمزُّوغنْ، أجّْ إِ-ث أَذْ إِسڒْ مِينْ إِقَّارْ أَرُّوحْ إِ ثْمسْمُونِينْ.‘ “

أَسَارْڭبْ 2 / rif_ati

ثِيبْرَاثِينْ إِ سبْعَا ن ثْمسْمُونِينْ

أَسَارْڭبْ2rif_ati