إِفِيلِيبِّيينْ1rif_ati
أَسدْجمْ غَارْ ؤُمزْوَارُو ذ ثْژَادْجِيثْ أَكْ-ذ ؤُقَاذِي
1بُولُوسْ ذ ثِيمُوثِييُو، إِمْسخَّارنْ ن يَاسُوع لْمَاسِيحْ، إِ مَارَّا إِمْقدَّاسنْ ذِي يَاسُوع لْمَاسِيحْ إِنِّي إِدْجَانْ ذِي فِيلِيبِّي، أَكْ-ذ إِمْغَارنْ ذ إِمْسخَّارنْ ذِي ثْمسْمُونْثْ:2أَرْضَا أَذْ كِيومْ يِيڒِي، ؤُڒَا ذ ڒهْنَا زِي أَربِّي بَابَاثْنغْ، ؤُ زِي سِيذِيثْنغْ يَاسُوع لْمَاسِيحْ.3تّْقَاذِيغْ أَربِّي إِنُو ڒَامِي ذَايْومْ تّْفكَّارغْ ڒبْذَا،4مَاغَارْ ذِي كُوڒْ ثِيژَادْجِيثِينْ إِنُو خَاومْ، أَقَا كْسِيغْ س ڒْمعْرُوفْ س ڒفْرَاحثْ5ذِي سِّيبّثْ ن ثْمُونْثْ نْومْ أَكْ-ذ لْ-إِنْجِيلْ، زڭْ وَاسّْ أَمزْوَارُو أَڒْ إِضَا.6أَقَا تِّيقّغْ بلِّي ونِّي ذَايْومْ إِبْذَانْ ڒخْذَايمْ إِصبْحنْ، أَذْ ثنْثْ إِكمّڒْ أَڒْ أَسّْ ن سِيذِيثْنغْ يَاسُوع لْمَاسِيحْ.7إِشْنَا أَيِي أَذْ فكَّارغْ ذَايْومْ مَارَّا أَمُّو، مِينْزِي أَقَا كنِّيوْ غَارِي ذڭْ وُوڒْ إِنُو، خْمِي دْجِيغْ ذِي سّْنَاسڒْ ؤُڒَا خْمِي غَا أَوْثغْ خْ ثِيذتّْ ن لْ-إِنْجِيلْ، مِينْزِي كنِّيوْ ثْشَارْشمْ أَكِيذِي ذِي أَرْضَا.8مِينْزِي أَربِّي ذ أَشهَّاذْ إِنُو مشْحَاڒْ كنِّيوْ تّخْسغْ س ڒحْنُونشْثْ يُودْجْغنْ ن يَاسُوع لْمَاسِيحْ.9مَانْ أَيَا إِ تّْژَادْجِيغْ، أَقَا ثَايْرِي نْومْ أَذْ ثْفيّضْ أَطَّاسْ س وَاطَّاسْ ذِي ثُوسّْنَا ذ قَاعْ ڒفْهَامثْ ثَارُوحَانشْثْ،10مَاحنْذْ أَذْ ثْفَارْزمْ مِينْ إِتّْڒِيقنْ، ؤُ مَاحنْذْ أَذْ ثِيڒِيمْ ثقُّورمْ ؤُ بْڒَا ڒْعِيبْ ذڭْ وَاسّْ ن لْمَاسِيحْ،11ثشُّورمْ س ڒْغِيدْجثْ ن ثْسڭْذَا إِ يدْجَانْ ذِي يَاسُوع لْمَاسِيحْ إِ ؤُعُودْجِي ذ ؤُسمْغَارْ ن أَربِّي.پُولُوسْ ذِي ڒحْبسْ12أَ أَيْثْمَا، نشّْ خْسغْ أَذْ ثسّْنمْ بلِّي ثِيمسْڒَايِينْ إِ ذ أَيِي إِمْسَارنْ أَرْنِينْثْ عَاذْ ذِي ثُوزّڭَّارْثْ ن ثْبَارّحْثْ ن لْ-إِنْجِيلْ،13مِينْزِي ثتّْوَاسّنْ ثْمحْبَاسْثْ إِنُو زِي سِّيبّثْ ن لْمَاسِيحْ إِ قَاعْ إِنِّي إِدْجَانْ ذِي ڒقْصَارْ ن قَايْصَارْ ؤُ إِ قَاعْ مِينْ إِقِّيمنْ.14أَزْينْ أَمقّْرَانْ ن وَاوْمَاثنْ ذِي سِيذِيثْنغْ، ؤُمِي دْجِيغْ ذِي ثْمحْبَاسْثْ، إِذْوڒْ غَارْسنْ تِّيقّثْ كْثَارْ ؤُشَا ذوْڒنْ زعّْمنْ سَّاوَاڒنْ أَوَاڒْ ن أَربِّي س ثرْيَاسْثْ كْثَارْ، بْڒَا ثِيڭّْوُوذِي.15شَا زَّايْسنْ تّْبَارّْحنْ لْمَاسِيحْ زِي ڒحْسذْ ذ ؤُمْعَانذْ، مَاشَا شَا نّغْنِي عَاوذْ زِي نّيّثْ ثشْنَا ؤُ س ثَايْرِي،16مِينْزِي نِيثْنِي سّْننْ أَقَا تّْوَاڭّغْ مَاحنْذْ أَذْ وْثغْ خْ لْ-إِنْجِيلْ.17مَاشَا إِنِّي إِتّْبَارّْحنْ س لْمَاسِيحْ س ؤُمْعَانذْ، وَارْ ث تّڭّنْ س نّيّثْ ثشْنَا، مَاشَا تّخْسنْ أَذْ خَافِي أَرْنِينْ ڒْمحْنثْ إِ سّْنَاسڒْ إِنُو.18س مَانْ أَيَا فَارّْهغْ، وَاهْ، أَذْ فَارْحغْ: أَقَا إِتّْوَابَارّحْ لْمَاسِيحْ س إِبْرِيذنْ إِفَارْزنْ، مَا س إِجّْ ن لْغَارَاضْ نّغْنِي، نِيغْ س ثِيذتّْ.19مِينْزِي سّْنغْ أَقَا ثِيمسْڒَايِينْ-أَ أَذْ إِڒِينْثْ إِ ثُوذَارْثْ إِ نشّْ س ثْژَادْجِيثْ نْومْ ؤُ س ثوْهِيبْثْ ن أَرُّوحْ ن يَاسُوع لْمَاسِيحْ،20مَاحنْذْ نشّْ، أَمْ سِيثِيمغْ ؤُ تّْرَاجِيغْ، وَارْ تّْسضْحِيغْ شَا خْ وَالُو، مَاشَا أَمْ ڒبْذَا، ؤُڒَا ذ ڒخُّو أَذْ إِتّْوَاسّمْغَارْ لْمَاسِيحْ س بْطَايْطَايْ ذِي أَرِّيمثْ إِنُو، مَا س ثُوذَارْثْ إِنُو نِيغْ س ڒْموْثْ إِنُو.21مِينْزِي ثُوذَارْثْ إِنُو ذ لْمَاسِيحْ ؤُشَا ڒْموْثْ ذ أَرْبحْ إِ نشّْ.22مَاشَا مَاڒَا ذِينْ ڒْغِيدْجثْ ذِي ثُوذَارْثْ-أَ ذِي أَرِّيمثْ زِي جِّيهثْ ن ڒْخذْمثْ إِنُو، خنِّي وَارْ سِّينغْ مِينْ غَا خْضَارغْ.23مَاغَارْ أَقَا أَيِي جَارْ ثْنَاينْ ن إِغزْذِيسنْ: ذَايِي مژْرِي مَاحنْذْ أَذْ رَاحغْ أَذْ إِڒِيغْ أَكْ-ذ لْمَاسِيحْ، مِينْزِي مَانْ أَيَا قَاعْ حْسنْ،24مَاشَا أَغِيمِي ذِي أَرِّيمثْ إِتّْخصَّا عَاذْ كْثَارْ ذِي طّْوعْ نْومْ.25ذ مَانْ أَيَا سّْنغْ نِيشَانْ، أَقَا أَذْ قِّيمغْ، وَاهْ، أَذْ قِّيمغْ ذِي طّْوعْ ن ڒفْرَاحثْ نْومْ ؤُ مَاحنْذْ أَذْ إِڭْمَا لْ-إِيمَانْ نْومْ،26حِيمَا، خْمِي د غَا يَاسغْ غَارْومْ عَاوذْ، أَقَا أَسمْغَارْ نْومْ ذِي لْمَاسِيحْ وَاهَا أَذْ إِفيّضْ، ؤُمِي نشّْ قِّيمغْ.27ؤُيُورمْ س ؤُوقَّارْ إِ ڒخْبَارْ أَصبْحَانْ ن لْمَاسِيحْ، حِيمَا، خْمِي د غَا يَاسغْ ؤُشَا أَذْ كنِّيوْ ژَترغْ ؤُڒَا خْمِي غَا غَابغْ، أَذْ زَّايْومْ سْڒغْ، أَقَا ثْبدّمْ نِيشَانْ ذڭْ إِجّْ ن أَرُّوحْ ؤُ س إِجّْ ن ڒعْمَارْ، ؤُشَا ثتّْغلّْبمْ س لْ-إِيمَانْ ذِي لْ-إِنْجِيلْ.28وَارْ تّڭّْوْذمْ شَاعمَّارْصْ زڭْ إِنِّي خَاومْ د-إِكَّارنْ. مَانْ أَيَا ذ أَعدْجمْ إِ نِيثْنِي غَارْ ؤُهلّكْ، مَاشَا إِ كنِّيوْ غَارْ ؤُسنْجمْ.29مِينْزِي أَقَا إِمّوْشْ أَومْ زِي أَربِّي، وَارْ إِدْجِي أَذْ ثَامْنمْ ذِي لْمَاسِيحْ وَاهَا، مَاشَا عَاوذْ مَاحنْذْ أَذْ ثْمَارّْثمْ ذِي طّْوعْ نّسْ،30ؤُ أَذْ ثكْسِيمْ أَمنْغِي، أَمْ مَامّشْ إِ ذ أَيِي ث ثژْرِيمْ ؤُشَا ڒخُّو أَقَا خَافِي ثسْڒِيمْ.