Read إِزْڒَانْ س إِڭجْذُورنْ 3

إِزْڒَانْ س إِڭجْذُورنْ3rif_ati

إِزْڒِي وِيسّْ ثْڒَاثَا - أَودّبْ ذ ؤُفوّجْ ن ؤُنَابِي

¹أَلِيفْ. نشّْ ذ أَرْيَازْ نِّي إِژْرِينْ ڒغْبنْ س وعْمُوذْ ن ؤُذُوقّزْ نّسْ ن ؤُفُوڭمْ.²أَلِيفْ. نتَّا إِنْذهْ أَيِي ؤُشَا إِجَّا أَيِي أَذْ ؤُيُورغْ ذِي ثَادْجسْثْ، وَارْ إِدْجِي ذِي ثْفَاوْثْ.³أَلِيفْ. س ثِيذتّْ، نتَّا يَارَّا ڒبْذَا أَفُوسْ نّسْ ضِيدّْ إِنُو، أَسّْ إِكْمڒْ.

⁴بِيثْ. نتَّا إِضيّعْ أَيْسُومْ إِنُو ذ ثڒْمشْثْ إِنُو، يَارْژَا إِغْسَانْ إِنُو.⁵بِيثْ. نتَّا بْنَا إِشْثْ ن ڒبْنِييّثْ خَافِي ؤُ إِقُووَّارْ أَيِي س أَرّْهَاجْ ذ ثَامَارَا.⁶بِيثْ. ذِي طّْڒَامْ إِجَّا أَيِي زدّْغغْ، أَمْ إِمتَّانْ ن وَاطَّاسْ زڭْ وَامِي.

⁷ڭِيملْ. نتَّا إِبلّعْ أَيِي جَارْ ڒحْيُوضْ، وَارْ زمَّارغْ أَذْ نجْمغْ. إِسّذْقڒْ خَافِي سّْنَاسڒْ إِنُو ن نّْحَاسْ.⁸ڭِيملْ. عَاذْ مڒْمِي تّْڒَاغِيغْ ؤُ سْغُويُّوغْ، نتَّا إِقِّيمْ إِبْكمْ غَارْ ثْژَادْجِيثْ إِنُو.⁹ڭِيملْ. س ثْصُوضَارْ إِنْجَارنْ إِبلّعْ خَافِي أَبْرِيذْ، إِسّْفَارْغْ إِمسْرَاقْ إِنُو.

¹⁰ذَالِيثْ. ثُوغَا نتَّا إِ نشّْ أَمْ دُّوبْ إِتّْحَامَانْ، أَمْ وَايْرَاذْ ذڭْ إِمُوشَانْ إِنُّوفَارنْ.¹¹ذَالِيثْ. نتَّا يُوژّڒْ خَافِي زڭْ وبْرِيذْ، إِمزّقْ أَيِي، وَارْ ذ أَيِي إِجِّي شَا.¹²ذَالِيثْ. نتَّا إِسّمْحضْ ڒْقوْسْ نّسْ ؤُشَا إِجَّا أَيِي أَذْ إِڒِيغْ ذ أَوَاضْ إِ فْڒِيثْشَا نّسْ.

¹³هِي. فْڒِيثْشَاثْ زڭْ وقْرَابْ نّسْ إِجَّا إِ-ثنْثْ أَذْ أَذْفنْثْ ذِي ثِيژَّاڒْ إِنُو.¹⁴هِي. ذوْڒغْ ذ ثَاسضْهَاشْثْ إِ مَارَّا ڒْڭنْسْ إِنُو، ذ إِزْڒِي نْسنْ ن ؤُزَاوَارْ أَسّْ إِمُونْ.¹⁵هِي. نتَّا إِسّْجِّيونْ أَيِي س ثَارْزُوڭِي، إِسّسُّو أَيِي س شِّيحْ.

¹⁶وَاوْ. ثِيغْمَاسْ إِنُو إِجَّا إِ-ثنْثْ زعّْفنْثْ ذڭْ ؤُقَايَاسْ أَڒَامِي أَرْژِينْثْ، إِذْڒَا أَيِي س يِيغّذْ.¹⁷وَاوْ. شكْ ثسِّيڭّْوجذْ ڒعْمَارْ إِنُو خْ ڒهْنَا، نشّْ تُّوغْ مَارَّا ثْشُونِي.¹⁸وَاوْ. نشّْ نِّيغْ: ”جّهْذْ إِنُو إِقْضَا، ؤُڒَا ذ أَسِيثمْ إِنُو ذِي سِيذِي.“

¹⁹زَايِينْ. عْقڒْ خْ ڒغْبنْ إِنُو ذ ثْمحْبَاسْثْ إِنُو، خْ شِّيحْ ذ أَرّْهَاجْ.²⁰زَايِينْ. ڒعْمَارْ إِنُو إِتّْخَارّصْ نِيشَانْ ذِي مَانْ أَيَا، أَقَا إِشْضنْ ذَايِي.²¹زَايِينْ. أَيَا خْسغْ أَذْ ث أَرّغْ غَارْ وُوڒْ، خْ ؤُيَا أَذْ قِّيمغْ سِّيثِيمغْ عَاذْ.

²²خِيثْ. س ثْمڭَّا ن ثْمخْسِيوْثْ ن سِيذِي، أَقَا وَارْ نتّْوَاهلّكْ شَا، مِينْزِي أَرّحْمثْ نّسْ عمَّارْصْ وَارْ ثتّْبذِّي.²³خِيثْ. أَقَا-ت ذ جْذِيذْ كُوڒْ صّْبحْ، ڒَْامَانْ نّشْ ذ أَمقّْرَانْ.²⁴خِيثْ. ثَاسْغَارْثْ إِنُو ذ سِيذِي، أَمُّو إِ إِقَّارْ ڒعْمَارْ إِنُو، خْ ؤُيَا تّْغِيمِيغْ سِّيثِيمغْ ذَايسْ.

²⁵ثِيث. إِصْبحْ سِيذِي إِ يِينِّي ذَايسْ إِسِّيثِيمنْ، إِ ڒعْمَارْ نِّي خَاسْ يَارزُّونْ.²⁶ثِيث. أَقَا مْلِيحْ أَرَاجِي س ؤُسِيثمْ غَارْ زَّاثْ، أَرَاجِي ذِي ڒْهُوذْنثْ غَارْ ؤُسنْجمْ زِي سِيذِي.²⁷ثِيث. مْلِيحْ إِ ورْيَازْ أَذْ يَارْبُو أَزَايْڒُو ذِي ثمْژِي نّسْ.

²⁸يُوذْ. أجّْ إِ-ث أَذْ إِقِّيمْ حَافِي، أَذْ إِسّغْذْ، مَاغَارْ سِيذِي إِڭَّا إِ-ت خَاسْ.²⁹يُوذْ. أجّْ إِ-ث أَذْ إِڭّْ أَقمُّومْ نّسْ ذِي ثْعجَّاجْثْ، أَذْ يِينِي: ”أَذْ ثَاغْ إِدْجَا ڒَايَاسْ!“³⁰يُوذْ. أجّْ إِ-ث أَذْ إِوْشْ أَمڭِّيزْ إِ ونِّي ث إِشَّاثنْ، أجّْ إِ-ث أَذْ إِتّْوَاجِّيونْ س ؤُسحْقَارْ.

³¹كَافْ. مِينْزِي سِيذِي إِنُو وَارْ إِنطَّارْ حذْ إِ ڒبْذَا،³²كَافْ. مَاشَا مَاڒَا نتَّا إِسّشْضنْ حذْ، أَذْ خَاسْ إِحِينّْ عَاوذْ عْلَاحْسَابْ ڒمْغَارثْ ن ثْمخْسِيوْثْ نّسْ إِشُووَّارنْ،³³كَافْ. مَاغَارْ نتَّا وَارْ إِحصَّارْ نِيغْ إِسّشْضِينْ ثَارْوَا ن ورْيَازْ س وُوڒْ.

³⁴لَامِيذْ. خْمِي غَا ڒبْزنْ سَاذُو إِضَارنْ مَارَّا إِمحْبَاسْ ن ثمُّورْثْ،³⁵لَامِيذْ. خْمِي غَا حَارّْفنْ ثَاسْغَارْثْ ن ورْيَازْ زَّاثْ إِ وُوذمْ ن ؤُمْعُودْجِي خْ كُوڒْشِي،³⁶لَامِيذْ. خْمِي غَا قڒْبنْ دّعْوثْ ن بْنَاذمْ، مَا زعْمَا سِيذِي إِنُو وَارْ إِتّْوِيڒِي مَانْ أَيَا؟

³⁷مِيمْ. مَانْ ونْ إِ إِقَّارنْ شَا ن ڒْحَاجّثْ ؤُشَا خنِّي ثمْسَارْ، مَاڒَا وَارْ ت يُومُورْ سِيذِي إِنُو؟³⁸مِيمْ. مَا وَارْ د-إِتِّيسْ زڭْ ؤُقمُّومْ ن ؤُمْعُودْجِي خْ كُوڒْشِي مَارَّا مِينْ وَارْ إِحْڒِينْ ؤُڒَا ذ مَارَّا مِينْ إِصبْحنْ؟³⁹مِيمْ. مَامّشْ إِتّْشثْشَا بْنَاذمْ إِدَّارنْ عَاذْ؟ أجّْ ورْيَازْ أَذْ إِشثْشَا زِي سِّيبّثْ ن دّْنُوبْ نّسْ.

⁴⁰نُونْ. أجّْ أَنغْ أَذْ نخْزَارْ إِبْرِيذنْ نّغْ، أَذْ ذَايْسنْ نَارْزُو، أجّْ أَنغْ أَذْ د-نذْوڒْ غَارْ سِيذِي.⁴¹نُونْ. أجّْ أَنغْ أَذْ نسّْڭعّذْ أَكْ-ذ إِفَاسّنْ نّغْ ؤُڒَا ذ وُوڒَاونْ نّغْ، غَارْ أَربِّي ذڭْ ؤُجنَّا.⁴²نُونْ. نشِّينْ نْعدَّا ؤُ نْغوّغْ، شكْ وَارْ ثغْفَارذْ شَا إِ ؤُيَا.

⁴³سَامِيخْ. شكْ ثْڒحّْفذْ أَنغْ س وغْضَابْ، ثضْفَارضْ أَنغْ، ثنْغِيذْ، وَارْ خَانغْ ثْحِيوْڒذْ شَا.⁴⁴سَامِيخْ. ثْڒحّْفذْ إِخفْ نّشْ ذڭْ ؤُسيْنُو، مَاحنْذْ أَذْ ثَافْ ثَاژَادْجِيثْ وَارْ ثْزمَّارْ أَذْ ثعْذُو.⁴⁵سَامِيخْ. شكْ ثَارِّيذْ-د أَنغْ ذ ثَاخْمُوجِي ذ وفْرَاضْ ذِي ڒْوسْطْ ن ڒڭْنُوسْ.

⁴⁶بِي. مَارَّا ڒْعذْيَانْ نّغْ أَرْزْمنْ-د غَارْنغْ أَقمُّومْ نْسنْ.⁴⁷بِي. ثِيڭّْوُوذَا ذ ڒْفخْ ذوْڒنْ ذ أَزْينْ زَّايْنغْ، أَخَارّبْ ذ أَرْژِييّثْ.⁴⁸بِي. زِي ثِيطَّاوِينْ إِنُو تَّازّْڒنْثْ إِمطَّاونْ خْ ثَارژِّيثْ ن يدْجِيسْ ن ڒْڭنْسْ إِنُو.

⁴⁹عَايِينْ. ثِيطّْ إِنُو ثقِّيمْ ثتَّازّڒْ س إِمطَّاونْ، وَارْ ثتَّاريِّيحْ، وَارْ ثسّْبذِّي،⁵⁰عَايِينْ. أَڒْ ذ إِ غَا إِسِّيجّْ سِيذِي زڭْ ؤُجنَّا، ؤُشَا أَذْ إِتّْوَاڒَا.⁵¹عَايِينْ. ثِيطّْ إِنُو ثتّڭّْ أَيِي ڒحْرِيقْ ذِي ڒعْمَارْ إِنُو، زِي سِّيبّثْ ن مَارَّا يسِّيسْ ن ثنْذِينْثْ إِنُو.

⁵²ثْسَاذِي. أَردّْفنْ أَيِي-د ڒْعذْيَانْ إِنُو بْڒَا قطُّو، أَمْ يِيجّْ ن وجْضِيضْ، مَاشَا بْڒَا سِّيبّثْ.⁵³ثْسَاذِي. نِيثْنِي سّْبكْمنْ ثُوذَارْثْ إِنُو ذڭْ وَانُو، ؤُشَا نْضَارنْ أَژْرُو خَافِي.⁵⁴ثْسَاذِي. أَمَانْ حمْڒنْ-د خْ ؤُزدْجِيفْ إِنُو، نِّيغْ: ”أَقَا وَارْ قِّيمغْ دْجِيغْ!“

⁵⁵قُوفْ. أَ سِيذِي، نشّْ ڒَاغِيغْ خْ يِيسمْ نّشْ، زِي ڒَادْجَاغْ ن وَانُو.⁵⁶قُوفْ. شكْ ثسْڒِيذْ إِ ثْمِيجَّا إِنُو، وَارْ تّقّنْ أَمزُّوغْ نّشْ زَّاثْ إِ ؤُزهَّارْ إِنُو، زَّاثْ إِ إِغُويَّانْ إِنُو!⁵⁷قُوفْ. شكْ ثُوسِيذْ-د غَارِي ذڭْ وَاسّْ إِ ذ أَشْ د-ڒَْاغِيغْ، ثنِّيذْ: ”وَارْ تّڭّْوذْ شَا!“

⁵⁸رِيخْ. شكْ، أَ سِيذِي إِنُو، ثَارفْعذْ دّْعَاوِي خْ ڒعْمَارْ إِنُو، شكْ ثْفكّذْ ثُوذَارْثْ إِنُو.⁵⁹رِيخْ. أَ سِيذِي، ثژْرِيذْ دّدْجْ إِ ذَايِي إِڭِّينْ، أَغْ أَيِي ثَاسْغَارْثْ إِنُو.⁶⁰رِيخْ. شكْ ثژْرِيذْ مَارَّا أَخْڒَافْ نْسنْ، مَارَّا مِينْ نْوَانْ ضِيدّْ إِنُو.

⁶¹شِينْ. شكْ ثسْڒِيذْ ڒْحڭْرَا نْسنْ، أَ سِيذِي، مَارَّا مِينْ نْوَانْ ضِيدّْ إِنُو،⁶²شِينْ. أَوَاڒنْ نِّي د-إِتّفّْغنْ زِي جَارْ إِينْشِيشنْ ن يِينِّي خَافِي إِكَّارنْ، ؤُڒَا ذ ڒمْوَايَاڒْ نْسنْ ن ؤُخَارّصْ خَافِي أَسّْ إِمُونْ.⁶³شِينْ. خْزَارْ غَارْ ؤُغِيمِي ذ ؤُبذِّي نْسنْ، نشّْ ذ إِزْڒِي نْسنْ ن ؤُسْثهْزِي.

⁶⁴ثَافْ. أَ سِيذِي، خدْجصْ إِ-ثنْ ڒْمُونثْ نْسنْ إِ إِسْذَاهدْجنْ، عْلَاحْسَابْ ثِيمڭَّا ن إِفَاسّنْ نْسنْ.⁶⁵ثَافْ. سْذَاغْرڒْ ؤُڒَاونْ نْسنْ، أجّْ نّعْڒثْ نّشْ أَذْ د-خَاسنْ-ثوْضَا.⁶⁶ثَافْ. ضْفَارْ إِ-ثنْ ذڭْ وغْضَابْ نّشْ، قْضَا خَاسنْ زِي سَاذُو ؤُجنَّا ن سِيذِي.

إِزْڒَانْ س إِڭجْذُورنْ 3 / rif_ati

إِزْڒِي وِيسّْ ثْڒَاثَا - أَودّبْ ذ ؤُفوّجْ ن ؤُنَابِي

إِزْڒَانْ س إِڭجْذُورنْ3rif_ati