Read أَيُوبْ 34

أَيُوبْ34rif_ati

ڒْهَارْذْ وِيسّْ ثْنَاينْ ن إِلِيهُو خْ مَامّشْ إِتّڭّْ أَربِّي ڒبْذَا س ڒْحقّْ

¹إِطّفْ إِلِيهُو عَاوذْ ذڭْ وَاوَاڒْ، إِنَّا:

²سْڒمْ-د غَارْ وَاوَاڒنْ إِنُو، أَ إِمِيغِيسنْ، وْشمْ أَيِي أَمزُّوغْ، أَ كنِّيوْ، أَيْثْ ن ثُوسّْنَا.³مَاغَارْ أَمزُّوغْ إِنبّشْ ذڭْ وَاوَاڒنْ، أَمْ مَامّشْ إِتّْقَاسَا وَانغْ مَاشَّا.⁴جّمْ أَنغْ أَذْ نِيخْضَارْ جَارْ أَنغْ مِينْ إِدْجَانْ نِيشَانْ، جّمْ أَنغْ أَذْ نسّنْ جَارْ أَنغْ مِينْ إِدْجَانْ ذ أَصبْحَانْ.

⁵مَاغَارْ أَيُوبْ إِنَّا: ’نشّْ ذ أَمْسڭّذْ، أَربِّي إِكّسْ أَيِي ثَاسْغَارْثْ إِنُو!⁶وَاخَّا غَارِي ڒْحقّْ، عَاذْ تّْغِيمغْ تّْبَانغْ أَمْ يِيجّْ ن بُو-إِخَارِّيقنْ! أَيزِّيمْ ن فْڒِيثْشَا إِ ذَايِي إِدْجَا، وَارْ إِزمَّارْ أَذْ إِتّْوَاسّْڭنْفَا أَمْ وَارْ ذِينْ إِدْجِي ؤُعذِّي.‘⁷مَانْ ونْ إِدْجَانْ ذ أَرْيَازْ أَمْ أَيُوبْ، ونِّي إِسسّنْ أَسْثهْزِي أَمْ وَامَانْ؟⁸نتَّا إِڭُّورْ ذڭْ وبْرِيذْ أَمْ إِتّْعَاشَارْ إِنِّي إِتّڭّنْ ڒْمُوعْصِييّثْ، إِڭُّورْ أَكْ-ذ إِرْيَازنْ إِعفَّاننْ.⁹مَاغَارْ إِنَّا: ’وَارْ إِنفّعْ وَالُو إِ بْنَاذمْ، مَاڒَا نتَّا ذ أَمَارْضِي غَارْ أَربِّي.‘

¹⁰س ؤُيَا سْڒمْ-د غَارِي، كنِّيوْ إِرْيَازنْ إِ ذِي ثدْجَا ڒفْهَامثْ: ’إِڭّْوجْ خْ أَربِّي مَاحنْذْ أَذْ يڭّْ ثُوعفّْنَا، ؤُڒَا خْ ؤُمْزمَّارْ خْ كُوڒْشِي مَاحنْذْ أَذْ يڭّْ مِينْ إِفَارْغنْ.‘¹¹مَاغَارْ نتَّا إِخْڒفْ زِي بْنَاذمْ عْلَاحْسَابْ ثِيمڭَّا نّسْ، ؤُ أَمْ مَامّشْ إِدْجَا وبْرِيذْ ن ورْيَازْ، أَمُّو إِ ذ أَسْ غَا يَارّْ أَذْ ث يَافْ.

¹²س ثِيذتّْ،عمَّارْصْ وَارْ إِتّڭّْ أَربِّي ثُوعفّْنَا، أَمْزمَّارْ خْ كُوڒْشِي وَارْ إِسّْفَارِّيغْ شّْرعْ.¹³مَانْ ونْ ث إِوكّْڒنْ خْ ثمُّورْثْ، مَانْ ونْ إِسَّارْسنْ مَارَّا دُّونشْثْ؟¹⁴مَاڒَا نتَّا أَذْ خَاسْ إِسّْنقْڒبْ ؤُڒْ نّسْ، مَاڒَا أَذْ غَارسْ د-يَاوِي عَاوذْ بُوحْبڒْ نّسْ ذ نّفْسْ نّسْ،¹⁵مَارَّا بْنَاذمْ ذ ڒْمَاڒْ أَذْ سُّوفّْغنْ بُوحْبڒْ ؤُ بْنَاذمْ أَذْ إِعْقبْ غَارْ ؤُشَاڒْ.

¹⁶مَاڒَا ذَايكْ ڒفْهَامثْ، سڒْ خنِّي إِ مَانْ أَيَا، أوْشْ أَمزُّوغْ نّشْ إِ ڒْحسّْ ن وَاوَاڒنْ إِنُو.¹⁷مَا إِزمَّارْ ونِّي إِشَارّْهنْ ڒْحقّْ أَذْ إِحْكمْ، نِيغْ ثخْسذْ شكْ أَذْ ثذْعِيذْ خْ ونِّي إِدْجَانْ ذ أَمْسڭّذْ ذ أَمقّْرَانْ؟¹⁸مَا أَذْ إِنِينْ إِ ؤُجدْجِيذْ: ’شكْ وَارْ ثْسكّْوِيذْ وَالُو!‘ ؤُ إِ ثَارْوَا ن ثَاصِيڒثْ: ’كنِّيوْ ذ إِعفَّاننْ‘؟¹⁹مَامّشْ خنِّي إِ ونِّي وَارْ إِسِّيزْوِيڒِينْ ڒْحُوكَّامْ ؤُ وَارْ إِتّْرِيحْ أَكْ-ذ بُو-وَاڭْڒَا خْ ؤُمزْڒُوضْ، مَاغَارْ مَارَّا نِيثْنِي ذ ڒْخذْمثْ ن إِفَاسّنْ نّسْ.²⁰مُّوثنْ ذڭْ ورْمَاشْ ن وَابْڒِيونْ، ذڭْ وزْينْ ن دْجِيڒثْ. تّْوَانْهزّنْ نِيثْنِي، ڒْڭنْسْ نِّي، ؤُشَا هلّْكنْ. ونِّي غَارْ ثدْجَا صُّولْطَا إِتّْوَاعَارّنْ غَارْ ؤُغزْذِيسْ، بْڒَا مَا إِحَاذَا إِ-ث ؤُفُوسْ ن بْنَاذمْ.

²¹مَاغَارْ ثِيطَّاوِينْ نّسْ خزَّارنْثْ غَارْ إِبْرِيذنْ ن مْكُوڒْ إِجّْ، نتَّا إِتّْوَاڒَا مْلِيحْ مَارَّا إِصُورَافْ نْسنْ.²²وَارْ ثدْجِي ثُوبَّارْشنْثْ ؤُ وَارْ ثدْجِي ثِيڒِي ن ڒْموْثْ، مَانِي زمَّارنْ أَذْ نُّوفَّارنْ إِنِّي إِتّڭّنْ ڒْغَارْ.²³وَارْ ذ أَسْ إِتّْخصِّي أَذْ إِخْزَارْ ذِي بْنَاذمْ أَطَّاسْ ن ڒْوقْثْ، قْبڒْ إِ د غَا يَاذفْ غَارْ دّعْوثْ زَّاثْ إِ ؤُغمْبُوبْ ن أَربِّي.

²⁴إِڒبّزْ جّْوَاحڒْ بْڒَا أَسقْسِي ؤُشَا إِڭَّا إِنّغْنِي ذڭْ ومْشَانْ نْسنْ.²⁵مَاغَارْ نتَّا إِسّنْ ثِيمڭَّا نْسنْ، إِسّْنقْڒَابْ إِ-ثنْ ذِي دْجِيڒثْ ؤُشَا تّْوَاڒبْزنْ.²⁶إِشَّاثْ إِ-ثنْ جَارْ إِعفَّاننْ، ذڭْ إِجّْ ومْشَانْ مَانِي تّْبدَّانْ إِوْذَانْ تّْوَاڒَانْ،²⁷مِينْزِي نِيثْنِي حيّْذنْ خَاسْ، وَارْ تّْحكِّيرنْ مَارَّا إِبْرِيذنْ نّسْ،²⁸مَاحنْذْ أَذْ خَاسْ إِسِّيوضْ ثْغُويِّيثْ ن إِمزْڒَاضْ، ؤُ مَاحنْذْ أَذْ إِسْثَاجبْ إِ إِغُويَّانْ ن ڒْمُوسَاكِينْ.

²⁹مَاڒَا نتَّا يِيوِي-د ڒْهُوذْنثْ، مَانْ ونْ ذَايسْ إِ غَا إِڭّنْ ڒْعِيبْ؟ مَاڒَا إِسّْنُوفَّارْ أَغمْبُوبْ نّسْ، وِي ث غَا إِژَارنْ؟ إِحكّمْ ڒَا خْ ڒْڭنْسْ أَمْ خْ بْنَاذمْ،³⁰حِيمَا وَارْ إِحكّمْ ؤُڒَا ذ إِجّْ ن بْنَاذمْ إِ إِتّڭّنْ س ثْنَاينْ ن وُوذْمَاونْ، ؤُ حِيمَا وَارْ تِّيڒِينْثْ عَاذْ ثْخشِيفِينْ إِ ڒْڭنْسْ.³¹مْڒِي إِنَّا بْنَاذمْ نِّي إِ أَربِّي ’سّْڭعّْذغْ إِخفْ إِنُو، وَارْ تّْعِيوِيذغْ أَذْ ڭّغْ ڒْغَارْ.³²مِينْ وَارْ تّْوِيڒِيغْ، سْغَارْ أَيِي ث شكْ! مَاڒَا ڭِّيغْ مِينْ وَارْ إِسڭّْذنْ، وَارْ ث تّڭّغْ عَاذْ.‘

³³مَا إِتّْخصَّا أَذْ إِخْڒفْ نتَّا أَمْ مَامّشْ ث ثخْسذْ شكْ؟ أَقَا ثسّحْقَارذْ ث! أَقَا ثخْسذْ أَذْ ثِيخْضَارذْ س يِيخفْ نّشْ، نشّْ مَاشَا لَّا! مَاڒَا إِتّْغِيڒْ أَشْ أَقَا ثسّْنذْ ت، إِنِي ت!³⁴إِرْيَازنْ س ڒفْهَامثْ أَذْ أَيِي إِنِينْ، أَمْ قَاعْ أَرْيَازْ أَمِيغِيسْ إِتّسْڒَا-د غَارِي،³⁵أَقَا أَيُوبْ وَارْ إِسِّيوڒْ س ثُوسّْنَا، أَقَا أَوَاڒنْ نّسْ بْڒَا ڒفْهَامثْ إِ يدْجَانْ.³⁶إِوَا، أجّْ أَيُوبْ أَذْ إِتّْوَاقدْجبْ أَڒْ أَنڭَّارْ، مِينْزِي إِتَّارَّا-د أَمْ إِرْيَازنْ شُّورنْ س ڒْمُوعْصِييّثْ.³⁷مَاغَارْ إِ دّنْبْ نّسْ يَارنِّي عَاذْ أَعذِّي، جَارْ أَنغْ إِشَّاثْ شَامْخَا س إِفَاسّنْ ؤُ تّْمَارنْينْ وَاوَاڒنْ نّسْ ضِيدّْ إِ أَربِّي.

أَيُوبْ 34 / rif_ati

ڒْهَارْذْ وِيسّْ ثْنَاينْ ن إِلِيهُو خْ مَامّشْ إِتّڭّْ أَربِّي ڒبْذَا س ڒْحقّْ

أَيُوبْ34rif_ati