Read أَيُوبْ 30

أَيُوبْ30rif_ati

أَيُوبْ إِسِّيوڒْ خْ ڒمْحَايمْ نّسْ ن يِيضَا

¹ڒخُّو مَاشَا ثُوغَا ضحّْشنْ خَافِي إِحُوذْرِييّنْ نِّي إِدْجَانْ ذ إِمژْيَاننْ خَافِي ذڭْ وُوسَّانْ، إِنِّي بَابَاثْسنْ وَارْ غَارِي سكّْوِينْ مَاحنْذْ أَذْ ثنْ ڭّغْ غَارْ يِيطَانْ إِ إِدْجَانْ خْ وُودْجِي إِنُو.²مِينْ غَا ڭّغْ خنِّي س جّهْذْ ن إِفَاسّنْ نْسنْ؟ أَقَا إِفْنَا جّهْذْ نْسنْ زِي سِّيبّثْ ن ثوْسَارْ.³زِي ڒْقِيدْجثْ ؤُ زِي ڒَاژْ ذوْڒنْ إِسْرِيونْ، تّْمغْزَازنْ ذِي ڒْوَاطَا يُوژْغنْ ذِي ثُوبَّارْشنْثْ ثشُّورْ س ؤُردّدْجْ ذ ؤُربّجْ.⁴نِيثْنِي ڒقّْضنْ ڒبْزَارْ أَمدْجَاحْ جَارْ شْبَارْقْ، إِژوْرَانْ ن ؤُززُّو ذ أَغْرُومْ نْسنْ.

⁵ؤُژّْڒنْ خَاسنْ زِي ثْمُونثْ ن إِوْذَانْ، كّْوَارنْ ثنْ أَمْ يِيخوَّاننْ،⁶حِيمَا أَذْ زذْغنْ ذِي ثغْزُورِينْ إِسَّاڭّْوَاذنْ، ذڭْ إِفْرَانْ ن ؤُشَاڒْ ؤُ ذِي ڒجْرُوفْ.⁷سْغُويُّونْ جَارْ شْبَارْقْ، سَاذُو ثِيزڭّْوَارِينْ سّْمُونَانْ.⁸ثَارْوَا ن إِبُوهَاڒِييّنْ ذ ثَارْوَا بْڒَا إِسمْ، ذ إِنِّي ؤُژّْڒنْ خَاسنْ زِي ثمُّورْثْ س ؤُزدْجَاضْ.

⁹ڒخُّو مَاشَا أَقَا أَيِي ذڭْ إِزْڒِي نْسنْ ن ثْژَاوَارْثْ، ذوْڒغْ أَسنْ إِ ڒْهَارْذْ.¹⁰شَارّْهنْ أَيِي، تَّاڭّْوَاجنْ خَافِي، وَارْ تّْسضْحِينْ شَا مَاحنْذْ أَذْ سُّوسْفنْ خْ ؤُغمْبُوبْ إِنُو.¹¹مَاغَارْ نتَّا إِسّفْسِي أَسْغُونْ ن ثْقِيضُونْثْ إِنُو ؤُشَا إِسّهْوَا أَيِي. نِيثْنِي نْضَارنْ سّْرِيمثْ نْسنْ زَّاثِي.¹²غَارْ ؤُغزْذِيسْ أَفُوسِي إِنُو كَّارنْ-د خَافِي إِغذِّيونْ ن ثَارَّاوْثْ، عَارّْننْ إِضَارنْ إِنُو، سّْڭعَّاذنْ خَافِي إِمسْرَاقْ ن أَرْژِييّثْ نْسنْ.

¹³أَبْرِيذْ إِنُو أَرْژِينْ ث، أَرنّْينْ ثَامَارَا خْ ثَامَارَا إِنُو وَاخَّا نِيثْنِي سِيمَانْثْ نْسنْ وَارْ غَارْسنْ إِدْجِي وِي ذ أَسنْ غَا إِوْشنْ أَفُوسْ.¹⁴أَخْمِي د-تَّاسنْ زڭْ إِجّْ ن ؤُنُوقِّيبْ ذ مِيرِيوْ، تَّاكّْوَاضنْ أَمْ ڒمْوَاجْ يَاردّْدْجنْ.¹⁵تّْوَاكبّنْ-د خَافِي إِنخْڒِيعنْ، أَمْ ؤُسمِّيضْ ضفَّارنْ نِيثْنِي شَّانْ إِنُو، إِضْوَا زّْهَارْ إِنُو أَمْ يِيجّْ ن ؤُسيْنُو.

¹⁶س ؤُيَا إِفسِّي ڒخُّو ڒعْمَارْ إِنُو ذَايِي، ؤُسَّانْ ن ڒغْبنْ منّْعنْ أَيِي.¹⁷ذِي دْجِيڒثْ إِسّْنُوقُّوبْ أَيِي إِغْسَانْ إِنُو إِ ذَايِي إِدْجَانْ، ڒحْرِيقْ إِ ذ أَيِي إِتّْغزَّانْ وَارْ يَارسِّي.¹⁸إِتّْوَابدّڒْ وَارُّوذْ إِنُو س جّهْذْ نّسْ أَمقّْرَانْ أَڒَامِي وَارْ خَافِي تّعْقِيڒنْ عَاذْ. إِشَارْفْ أَيِي أَمْ ثْمَا إِ إِنّْضنْ إِ وَارْزمْ ن يِيرِي ذڭْ وَارُّوضْ.¹⁹إِنْضَارْ أَيِي ذڭْ ؤُبدْجَاعْ، ذوْڒغْ أَمْ ؤُشَاڒْ ذ يِيغّضْ.

²⁰سْغُويُّوغْ غَاركْ، مَاشَا شكْ وَارْ خَافِي د-ثتَّارِّيذْ، نشّْ بدّغْ ذَا ؤُشَا شكْ ثقِّيمذْ ثْحطِّيذْ ذَايِي.²¹شكْ ثْذوْڒذْ أَيِي أَمْ يِيجّْ ن بُو-ڒخْشُونثْ، ثتّْذَارَّاشذْ خَافِي س ؤُفُوسْ نّشْ إِجهْذنْ.²²شكْ ثسّْڭعَّاذذْ أَيِي ؤُ ثْندّْهذْ أَيِي ذڭْ ؤُسمِّيضْ، ثسّفْرَاغذْ قَاعْ أَدُّوذْ إِنُو.²³مَاغَارْ نشّْ سّْنغْ أَقَا شكْ أَذْ أَيِي ثْنذْهذْ غَارْ ڒْموْثْ، غَارْ ثَادَّارْثْ مَانِي تّْمُوننْ مَارَّا إِنِّي إِدَّارنْ.

²⁴مَا وَارْ إِنطَّارْ بْنَاذمْ أَفُوسْ نّسْ مَاڒَا إِوْضَا حذْ، مَا وَارْ إِسْغُويُّو وَالُو قَاعْ غَارْ أَرْژِييّثْ نّسْ؟²⁵مَا وَارْ رُوغْ خْ ونِّي ثُوغَا غَارْ إِدْجَا وُوسَّانْ ن ثَامَارَا، مَا وَارْ إِشْضِينْ بُوحْبڒْ إِنُو خْ ؤُمزْڒُوضْ؟²⁶ؤُمِي سِّيثْمغْ غَارْ مِينْ إِصبْحنْ، أَقَا يُوسَا-د مِينْ إِدْجَانْ ذ أَعفَّانْ، ؤُمِي رَاجِيغْ ثَافَاوْثْ، ثُوسَا-د ثَادْجسْثْ.²⁷أَذَانْ إِنُو تّْننَّانْ، وَارْ أَرْسِينْ، إِوْضنْ-د وُوسَّانْ ن ثَامَارَا غَارِي.

²⁸نشّْ أَذْ ؤُيُورغْ ذڭْ وشْضَانْ، بْڒَا ڒهْمُو ن ثْفُوشْثْ. أَذْ كَّارغْ ذڭْ وڭْرَاوْ ن ڒْڭنْسْ ؤُشَا أَذْ قِّيمغْ سْغُويُّوغْ ذڭْ ؤُجنَّا.²⁹إِ وُوشَّاننْ ن ڒخْڒَا ذوْڒغْ ذ ؤُمَاثْسنْ زَّايْسنْ، إِ يسِّيسْ ن نّْعَامثْ ذ أَمْعَاشَارْ.³⁰ثِيڒْمشْثْ إِنُو ثذْوڒْ خَافِي ذ أَكَارْكُوشْ أَبَارْشَانْ، زِي ثْمسِّي شمّْضنْ إِغْسَانْ إِنُو.³¹ثذْوڒْ ثِيرَارْثْ ن ڒْڭَامْبْرِي إِنُو إِ وشْضَانْ، ثَامْجَا إِنُو إِ ڒْحسّْ ن إِمطَّاونْ.

أَيُوبْ 30 / rif_ati

أَيُوبْ إِسِّيوڒْ خْ ڒمْحَايمْ نّسْ ن يِيضَا

أَيُوبْ30rif_ati