Read أَيُوبْ 29

أَيُوبْ29rif_ati

أَيُوبْ إِسِّيوڒْ خْ مَامّشْ ثُوغَا ثُوذَارْثْ نّسْ قْبڒْ

¹ؤُشَا يَارْنِي إِسّْڭعّذْ أَيُوبْ ڒْهَارْذْ ن لْمَاثَالْ نّسْ، إِنَّا:

²مْڒِي دْجِيغْ أَمْ ذڭْ ؤُينِّي ن إِيُورنْ إِعْذُونْ أَطَّاسْ زڭْ وَامِي، أَمْ ذڭْ ؤُينِّي ن وُوسَّانْ ڒَْامِي ذ أَيِي ثُوغَا إِحطَّا أَربِّي،³ڒَامِي إِڭَّا ڒفْنَارْ نّسْ أَذْ يَارغْ خْ ؤُزدْجِيفْ إِنُو، ؤُ ثُوغَا ڭُّورغْ ذِي ثَادْجسْثْ س ثْفَاوْثْ نّسْ.⁴مْڒِي دْجِيغْ أَمْ ذڭْ وُوسَّانْ ن ثمْژِي إِنُو، ؤُمِي أَمُونِي ذِي ڒَامَانْ أَكْ-ذ أَربِّي ثُوغَا إِبدّْ خْ ثْقِيضُونْثْ إِنُو،⁵ؤُمِي أَمْزمَّارْ خْ كُوڒْشِي ثُوغَا-ث عَاذْ أَكِيذِي، ؤُ إِحنْجِيرنْ إِنُو عَاذْ نّْضنْ أَيِي-د،⁶ؤُمِي إِصُورَافْ إِنُو ثُوغَا عُومّنْ ذِي ثْرُوسِّي، ؤُ ثَاصْضَارْثْ ثُوغَا ثتّْزدْجَاعْ زَّاثِي ثِيغزْرَاثِينْ ن زّشْثْ!

⁷ؤُمِي د-فّْغغْ غَارْ ثوَّارْثْ ن ثنْذِينْثْ، جِّيغْ سّْبدّنْ أَيِي ڒْكُورْسِي إِنُو ذڭْ وَازَّايْ،⁸نُّوفَارنْ إِحُوذْرِييّنْ ڒَامِي ذ أَيِي ژْرِينْ، ؤُ إِمشَّايْبُوثنْ كَّارنْ، قِّيمنْ بدّنْ.⁹ڒْحُوكَّامْ منْعنْ أَوَاڒنْ نْسنْ ؤُ سَّارْسنْ أَفُوسْ خْ ؤُقمُّومْ نْسنْ.¹⁰ثْمِيجَّا ن ڒْحُوكَّامْ ثسْقَارْ، إِڒْسقْ إِڒسْ نْسنْ غَارْ وَانغْ نْسنْ.

¹¹مَاڒَا إِسْڒَا أَيِي ؤُمزُّوغْ، إِسّمْغَارْ أَيِي، مَاڒَا ثژْرَا أَيِي ثِيطّْ، ثشْهذْ خْ ڒْخَاضَارْ إِنُو.¹²مَاغَارْ سّْنجْمغْ ڒْمسْكِينْ نِّي إِسْغُوينْ، أَيُوجِيڒْ نِّي وَارْ غَارسْ ثُوغِي ونِّي ث إِ غَا إِعَاوْننْ.¹³ڒْخَاضَارْ ن ونِّي ثُوغَا عْڒَاينْ أَذْ إِهلّكْ، ثُوسَا-د خَافِي، ؤُڒْ نْ ثَاجَّاتْشْ ڭِّيغْ ث إِسْڒِيوْڒوْ س ڒفْرَاحثْ.¹⁴يَارْضغْ ثَاسڭْذَا ؤُ ثَاسڭْذَا ثسّْيَارْضْ أَيِي. ثُوغَا شّْرعْ إِنُو أَمْ ؤُسڒْهَامْ ؤُ أَمْ أَرژّثْ.

¹⁵ثُوغَا أَيِي ذ ثِيطَّاوِينْ إِ إِذَارْغَاڒنْ، ؤُڒَا ذ إِضَارنْ إِ إِقِيضَارنْ.¹⁶ثُوغَا أَيِي ذ بَابَاثْسنْ إِ إِمزْڒَاضْ، ؤُشَا دّعْوثْ ن ونِّي وَارْ سِّينغْ، بقّْشغْ ت.¹⁷أَرْژِيغْ ثِيغْمَاسْ ن ثغْمَارْثْ ن ونِّي إِڭِّينْ مِينْ وَارْ إِسڭّْذنْ ؤُشَا كّْسغْ زَّارْذثْ إِ ثغْمَاسْ نّسْ.

¹⁸نِّيغْ: ’أَذْ سُّوفّْغغْ بُوحْبڒْ إِنُو خْ ڒْعُوشّْ إِنُو، أَذْ دَّارغْ ثُوذَارْثْ ثَازِيرَارْثْ أَمْ ؤُجْضِيذْ ن فُونِيكْسْ.‘¹⁹إِژوْرَانْ إِنُو بزّْعغْ ثنْ أَڒْ أَمَانْ ؤُ ذِي دْجِيڒثْ إِقِّيمْ نّْذَا خْ ڒفْرُوعْ إِنُو.²⁰ثُوغَا ڒْعزّْ إِنُو إِقِّيمْ أَكِيذِي ڒبْذَا، ڒْقوْسْ إِنُو إِسْهڒْ ذڭْ ؤُفُوسْ إِنُو ڒبْذَا.

²¹سْڒِينْ-د غَارِي، رَاجَانْ، سْقَارنْ ذِي طّْوعْ ن شّْوَارْ إِنُو.²²أَوَارْنِي وَاوَاڒْ إِنُو وَارْ سِّيوْڒنْ ثْوَاڒَا نّغْنِي، أَوَاڒنْ إِنُو ؤُذُومنْ خَاسنْ.²³نِيثْنِي رَاجَانْ أَيِي أَمْ رَاجَانْ أَنْژَارْ، أَرْزْمنْ أَقمُّومْ نْسنْ أَمْ ث أَرزْمنْ غَارْ ونْژَارْ ن ثفْسُوثْ.²⁴مَاڒَا سْفَارْنِينغْ غَارْسنْ، وَارْ زمَّارنْ عَاذْ أَذْ تِّيقّنْ، مَاشَا ثَافَاوْثْ ن ؤُغمْبُوبْ إِنُو وَارْ زْمِيرنْ أَذْ كِيذسْ مّْعَاڒَانْ.²⁵إِخْضَارغْ أَسنْ أَبْرِيذْ، بدّغْ أَسنْ غَارْ ؤُزدْجِيفْ، زذْغغْ أَمْ ؤُجدْجِيذْ جَارْ ڒْعسْكَارْ، أَمْ ونِّي إِتّْعزَّانْ إِنِّي إِشضْننْ.

أَيُوبْ 29 / rif_ati

أَيُوبْ إِسِّيوڒْ خْ مَامّشْ ثُوغَا ثُوذَارْثْ نّسْ قْبڒْ

أَيُوبْ29rif_ati