Read أَيُوبْ 19

أَيُوبْ19rif_ati

ثَامْوَارِّيثْ ن أَيُوبْ خْ بِيلْذَاذْ خْ ؤُسِيثمْ نّسْ ذِي أَربِّي

¹يَارَّا-د أَيُوبْ، إِنَّا:

²مشْحَاڒْ عَاذْ إِ غَا ثكّمْ ثْشضْنمْ ڒعْمَارْ إِنُو، أَذْ أَيِي ثْڒبْزمْ س وَاوَاڒنْ؟³ڒخُّو عَاذْ وِيسّْعشْرَا ن ثْوَاڒَاوِينْ تّكّْوَارمْ أَيِي، وَارْ ثتّْسضْحِيمْ ؤُمِي ذ أَيِي د-ثْغطّْڒمْ أَوَاڒْ.⁴مَاڒَا س ثِيذتّْ ودَّارغْ، أَذْ إِقِّيمْ ؤُودَّارْ إِنُو إِ إِخفْ إِنُو.⁵مَاڒَا س ثِيذتّْ ثخْسمْ أَذْ خَافِي ثسّْڭعّْذمْ إِخفْ نْومْ س شِّيكِي، أَذْ أَيِي ثسّْقنْعمْ س ڒفْضِيحثْ إِنُو،⁶سْنمْ خنِّي، أَقَا أَربِّي إِنّقْڒبْ خَافِي، ؤُشَا إِنّضْ أَيِي-د س ثْرَاشَّا نّسْ.

⁷خْزَارْ، سْغُويُّوغْ: ’ڒخْشُونثْ!‘، مَاشَا وَارْ خَافِي د-يَارِّي ؤُڒَا ذ إِجّْ، تّْڒَاغِيغْ إِ ثْوِيزَا، مَاشَا ڒْحقّْ وَارْ ذِينْ إِدْجِي.⁸أَبْرِيذْ إِنُو إِقّنْ إِ-ث، أَڒَامِي وَارْ زمَّارغْ أَذْ عْذُوغْ، ثَادْجسْثْ إِسُّو ت خْ إِمسْرَاقْ إِنُو.⁹ڒْعزّْ إِنُو إِكشّضْ إِ-ث زَّايِي، ؤُ تَّاجْ إِ إِدْجَانْ خْ ؤُزدْجِيفْ إِنُو إِكّسْ إِ-ث.¹⁰نتَّا يَاردّدْجْ أَيِي زِي مَارَّا إِغزْذِيسنْ، أَذْ تّْوَاهلّْكغْ! إِقْڒعْ ڒَايَاسْ إِنُو أَمْ يِيشْثْ ن ثْشجَّارْثْ.¹¹أَغْضَابْ نّسْ يَارْغَا ذَايِي، نتَّا إِحسّبْ أَيِي أَمْ إِجّْ زڭْ إِغْرِيمنْ نّسْ.

¹²مُوننْثْ فّْغنْثْ-د بَانْذِييَّاثْ نّسْ، سّْوجْذنْثْ-إِ-د أَبْرِيذْ نْسنْثْ غَارِي ؤُشَا قُووَّارنْثْ إِ ثْقِيضُونْثْ إِنُو.¹³أَيْثْمَا إِسِّيڭّْوجْ إِ-ثنْ خَافِي، إِنِّي ذ أَيِي إِسّْننْ ذوْڒنْ ذ مِيدّنْ خَافِي.¹⁴إِنِّي ذ أَيِي إِتّعْنَانْ جِّينْ أَيِي، إِنِّي ذ أَيِي إِسّْننْ تُّونْ أَيِي.¹⁵إِمْسخَّارنْ ن ثَادَّارْثْ إِنُو ذ ثِييَّا إِنُو حسّْبنْ أَيِي ذ ڒْبَارَّانِي، نشّْ ذ أَغْرِيبْ جَارْ ثِيطَّاوِينْ نْسنْ.

¹⁶ڒَاغِيغْ إِ ؤُمْسخَّارْ إِنُو، مَاشَا وَارْ خَافِي د-يَارِّي، ثُوغَا إِتّْخصَّا أَذْ ث حشّْمغْ س ؤُقمُّومْ إِنُو.¹⁷ڒعْوِينْ ن ثمْوَارِّيثْ ن نّفْسْ إِنُو إِسّْعِيفّْ ثَامْغَارْثْ إِنُو، أَرْصُوضغْ إِ أَيْثْمَا.¹⁸عَاذْ إِحْرَامنْ إِمژْيَاننْ سّحْقَارنْ أَيِي. مَاڒَا كَّارغْ بدّغْ، تّمْعَارَّانْ خَافِي س وَاوَاڒنْ نْسنْ.¹⁹مَارَّا إِمّدُّوكَّاڒْ إِنُو إِعِيزّنْ شَارّْهنْ أَيِي، إِنِّي تّخْسغْ، نّْقڒْبنْ خَافِي.²⁰غَارْ ثڒْمشْثْ ذ ويْسُومْ إِنُو ڒسّْقنْ إِغْسَانْ إِنُو. نشّْ نجْمغْ أَكْ-ذ ثِيڒْمشْثْ ن ثغْمَاسْ إِنُو وَاهَا.

²¹حِينّمْ خَافِي، حِينّمْ خَافِي، أَ كنِّيوْ، إِمدُّوكَّاڒْ إِنُو! مَاغَارْ أَفُوسْ ن أَربِّي إِڒْقفْ أَيِي.²²مَايمِّي ذ أَيِي ثْضَافَّارمْ أَمْ ت إِتّڭّْ أَربِّي، ؤُ مَايمِّي وَارْ تّْجِيوِينمْ أَيْسُومْ إِنُو؟²³مْڒِي ؤُرَانْ أَوَاڒنْ إِنُو، مْڒِي تّْوَازمّمنْ ذڭْ إِجّْ ن وذْلِيسْ!²⁴مْڒِي تّْوَانقْشنْ س بْلُومَا ن وُوزَّاڒْ ؤُ س ڒخْفِيفْ ذِي جَّارْفْ إِ ڒبْذَا.²⁵نشّْ سّْنغْ: ’أَمفْذِي إِنُو إِدَّارْ ؤُ نتَّا أَذْ د-إِكَّارْ ذ أَنڭَّارْ خْ ؤُشَاڒْ.‘

²⁶ؤُ أَوَارْنِي ڒَامِي إِ غَا ثتّْوَاڒْبزْ ثڒْمشْثْ إِنُو أَمُّو، أَذْ ژَترغْ أَربِّي زِي أَرِّيمثْ إِنُو.²⁷أَذْ ث ژَترغْ زَّاثِي، ثِيطَّاوِينْ إِنُو أَذْ ث ژَترنْثْ، وَارْ إِدْجِي مِيدّنْ. غَارسْ إِ تّْمژْرنْثْ ثِيژَّاڒْ إِنُو غَارْ ذَاخڒْ إِنُو.²⁸وَاخَّا أَمنِّي كنِّيوْ أَذْ ثِينِيمْ: ’مَامّشْ إِ نْزمَّارْ أَذْ ث نضْفَارْ؟‘ مَاغَارْ أَژْوَارْ ن ثْمسْڒَاشْثْ إِتّْوَافْ ذَايِي.²⁹ڭّْوذمْ زِي سِّيفْ، مَاغَارْ س سِّيفْ أَذْ د-يَاسْ وسْعَارْ خْ دّْنُوبْ إِنقّنْ، مَاحنْذْ أَذْ ثسّْنمْ أَقَا أَذْ يِيڒِي ڒْحُوكْمْ.

أَيُوبْ 19 / rif_ati

ثَامْوَارِّيثْ ن أَيُوبْ خْ بِيلْذَاذْ خْ ؤُسِيثمْ نّسْ ذِي أَربِّي

أَيُوبْ19rif_ati