Read أَيُوبْ 12

أَيُوبْ12rif_ati

ثَامْوَارِّيثْ ن أَيُوبْ خْ صُوفَارْ

¹يَارَّا-د أَيُوبْ، إِنَّا:

²ذ ثِيذتّْ، كنِّيوْ ذ إِجّْ ن دَّارْبْ ن ڒْڭنْسْ، أَقَا ثِيغِيثْ أَذْ ثمّثْ أَكِيذْومْ!³نشّْ غَارِي ڒعْقڒْ أَمْ كنِّيوْ، نشّْ وَارْ وطِّيغْ ذڭْ ؤُمْقُوذِّي أَكِيذْومْ. وِي وَارْ إِسِّيننْ مَارَّا أَيَا؟

⁴نشّْ أَمْ ونِّي إِدْجَانْ إِ ثْسضْحَاشْ إِ ؤُمدُّوكّڒْ نّسْ، نشّْ ذ ونِّي ثُوغَا إِتّْڒَاغَانْ غَارْ أَربِّي ؤُشَا خنِّي نتَّا إِسْڒَا غَارِي، نشّْ ذ أَمْسڭّذْ ذ نِيشَانْ، أَقَا ذوْڒغْ ذ ڒْقشْعثْ ن ثْسضْحَاشْثْ.⁵’ڒْْحڭْرَا ذ ثَاسْغَارْثْ ن ونِّي إِتّْوَارْژَانْ!‘، أَمُّو إِ إِتّْخَارَّاصنْ يِينِّي ؤُمِي إِتّْغِيڒْ أَقَا أَثنْ ذِي ڒَامَانْ، إِتّْغِيڒْ أَسنْ أَيَا إِتّْرَاجَا إِنِّي إِتّْنقْرَاضنْ ذڭْ إِضَارنْ نْسنْ.⁶إِقِيضَانْ ن إِمْثحَّايّنْ أَرْسَانْ، ؤُ إِنِّي إِسعَّارنْ أَربِّي غَارْسنْ أَطَّاسْ ن ڒَامَانْ. مَاشَا وِي إِزمَّارنْ أَذْ يَاوِي أَربِّي س ؤُفُوسْ نّسْ؟

⁷سقْسَا خنِّي ڒْمَاڒْ، أَذْ أَشْ ث سّْڒمْذنْ، إِجْضَاضْ ن ؤُجنَّا أَذْ شكْ ث حَاجَانْ.⁸نِيغْ خزَّارغْ مْلِيحْ غَارْ ثمُّورْثْ، نتَّاثْ أَذْ شكْ ثسّْغَارْ، ؤُڒَا ذ إِسڒْمَانْ ن ڒبْحَارْ أَذْ أَشْ ث عَاوْذنْ.⁹مَانْ ونْ وَارْ إِسِّيننْ مَارَّا أَيَا، أَقَا أَفُوسْ ن سِيذِي إِ ث إِڭِّينْ؟¹⁰نتَّا ذ ونِّي ذڭْ ؤُفُوسْ نّسْ إِدْجَا ڒعْمَارْ ن مَارَّا مِينْ إِدَّارنْ، ؤُڒَا ذ بُوحْبڒْ ن كُوڒْ أَرِّيمثْ ن بْنَاذمْ.

¹¹مَا وَارْ إِتّْقدْجِيبْ ؤُمزُّوغْ أَوَاڒنْ، أَمْ إِتّْقَاسَا وَانغْ مَاشَّا؟¹²غَارْ إِوسُّورَا إِ ثدْجَا ثِيغِيثْ ؤُ ذِي ثُوذَارْثْ ثَازِيرَارْثْ ثدْجَا ڒفْهَامثْ؟¹³نتَّا غَارسْ إِ ثدْجَا ثِيغِيثْ ذ جّهْذْ س ثِيذتّْ، نتَّا غَارسْ إِ يدْجَا شّْوَارْ ذ ڒفْهَامثْ نِيشَانْ.

¹⁴خْزَارْ، مَاڒَا نتَّا إِهدّمْ، وَارْ إِبنِّي ؤُڒَا ذ إِجّْ عَاوذْ، مَاڒَا نتَّا إِبلّعْ خْ شَا ن يِيجّنْ، وَارْ ذ أَسْ يَارزّمْ عَاذْ.¹⁵خْزَارْ، مَاڒَا نتَّا إِسّْبدّْ أَمَانْ، أَذْ أَژْغنْ نِيثْنِي، مَاڒَا يَارْخُو أَسنْ، أَذْ سّنْقڒْبنْ ثَامُّورْثْ.¹⁶نتَّا غَارسْ جّهْذْ ذ ؤُفكِّي، نّسْ ذ ونِّي إِودَّارنْ ؤُڒَا ذ ونِّي إِسّْودَّارنْ.

¹⁷نتَّا إِتّجَّا إِرْيَازنْ ن شّْوَارْ ڭُّورنْ س ڒحْفَا، ڒْْقُوضَاثْ إِتَّارَّا إِ-ثنْ ذ إِبُوهَاڒِييّنْ.¹⁸أَزِييَّارْ ن إِجدْجِيذنْ إِسّْبطّڒْ إِ-ث ؤُ خنِّي نتَّا إِتّْشدَّا إِ-ثنْ س إِجّْ ن وبْيَاسْ زِي ثجْعِينَّا نْسنْ.¹⁹نتَّا إِندّهْ إِكهَّاننْ س ڒحْفَا، أَيْثْ ن جّهْذْ إِغطّرْ إِ-ثنْ.²⁰إِتّكّسْ أَوَاڒْ إِ إِرْيَازنْ إِتّْوَاقدْجْبنْ، إِ إِوسُّورَا إِتّكّسْ أَسنْ ڒفْهَامثْ.²¹أَسحْقَارْ إِتّْزدْجَاعْ إِ-ث خْ ثَارْوَا ن ثَاصِيڒثْ، إِ أَيْثْ ن بُو-ڒخْشُونثْ إِسَّارخُّو أَسنْ أَبْيَاسْ.

²²إِمُوشَانْ يُودْجْغنْ ن ثَادْجسْثْ إِتّْعَارَّا خَاسنْ، ذ ثِيڒِي ن ڒْموْثْ إِسُّوفُّوغْ إِ-ت غَارْ ثْفَاوْثْ.²³ڒڭْنُوسْ إِسّمْغَارْ إِ-ثنْ ؤُشَا إِغطّرْ إِ-ثنْ، نتَّا إِتّْبزَّاعْ ڒڭْنُوسْ ؤُشَا إِندّحْ إِ-ثنْ.²⁴إِتّكّسْ ڒفْهَامثْ إِ إِزدْجِيفنْ ن ڒْڭنْسْ خْ ثمُّورْثْ، إِجَّا إِ-ثنْ تّثْلِيعنْ ذِي ڒخْڒَا مَانِي وَارْ دْجِينْ إِبْرِيذْأنْ.²⁵نِيثْنِي تّمْهَافَانْ ذَا ذ ذِيهَا ذِي ثَادْجسْثْ، مَانِي وَارْ ثدْجِي ثْفَاوْثْ، نتَّا إِتّجَّا إِ-ثنْ أَذْ مّْهَافَانْ أَمْ يِيمسْشَارْأنْ.

أَيُوبْ 12 / rif_ati

ثَامْوَارِّيثْ ن أَيُوبْ خْ صُوفَارْ

أَيُوبْ12rif_ati