Read أَمزْوَارُو 3

أَمزْوَارُو3rif_ati

دّنْبْ أَمزْوَارُو

¹ثُوغَا أَفِيغَارْ ذ أَحْرَايْمِي خْ مَارَّا ڒْمَاڒْ ن ڒخْڒَا إِ إِڭَّا سِيذِي أَربِّي. إِنَّا إِ ثمْغَارْثْ: ”مَا ذ ثِيذتّْ إِنَّا أَربِّي: ’غَارْومْ وَارْ تّتّمْ شَا زِي مَارَّا ثِيشجُّورَا ن جّنّثْ‘؟“²ثنَّا ثمْغَارْثْ إِ ؤُفِيغَارْ: ”زِي ڒْغِيدْجثْ ن ثْشجُّورَا ن جّنّثْ نْزمَّارْ أَذْ نشّْ،³مَاشَا زِي ڒْغِيدْجثْ ن ثْشجَّارْثْ ذِي ڒْوسْطْ ن جّنّثْ، إِنَّا أَربِّي: ’وَارْ زَّايسْ تّتّمْ، وَارْ ت تّْحَاذَامْ، حِيمَا وَارْ ثتّْمتِّيمْ.‘ “⁴إِنَّا ؤُفِيغَارْ إِ ثمْغَارْثْ: ”كنِّيوْ وَارْ ثتّْمتِّيمْ شَا س ڒْموْثْ قَاعْ،⁵مَاشَا أَربِّي إِسّنْ بلِّي أَسّْ نِّي ذِي زَّايسْ إِ غَا ثشّمْ، أَذْ أَرْزْمنْثْ ثِيطَّاوِينْ نْومْ ؤُشَا أَذْ ثِيڒِيمْ أَمْ أَربِّي، أَذْ ثسّْنمْ ڒْخَارْ زِي ڒْغَارْ.“⁶ثژْرَا ثمْغَارْثْ بلِّي ثَاشجَّارْثْ ثصْبحْ إِ مَاشَّا ؤُشَا ثعْجبْ أَسنْثْ إِ ثِيطَّاوِينْ، أَقَا ثَاشجَّارْثْ ثڭَّا ذَايسْ مژْرِي مَاحنْذْ أَذْ زَّايسْ ثذْوڒْ ذ ثَامِيغِيسْثْ. خنِّي ثكْسِي زِي ڒْغِيدْجثْ نّسْ، ثشَّا ؤُشَا ثوْشَا عَاوذْ إِ ورْيَازْ نّسْ إِ ثُوغَا أَكِيذسْ، ؤُشَا نتَّا إِشَّا.⁷نَّارْزْمنْثْ ثِيطَّاوِينْ نْسنْ ؤُشَا ؤُفِينْ إِخفْ نْسنْ ذ إِعَارْيَاننْ. خنِّي خيّْضنْ ثِيفْرَايْ ن وَارْثُو، ؤُشَا ڭِّينْ زَّايْسنْثْ ثِيبَانْثِيوِينْ إِ يِيخفْ نْسنْ.⁸خنِّي سْڒِينْ نِيثْنِي ثْمِيجَّا ن سِيذِي أَربِّي إِڭُّورْ ذِي جّنّثْ غَارْ ؤُوطُّو ن ثْمذِّيثْ، ؤُشَا إِفَّارْ أَذَامْ ذ ثمْغَارْثْ نّسْ زڭْ وُوذمْ ن سِيذِي أَربِّي جَارْ ثْشجُّورَا ن جّنّثْ.⁹ؤُشَا إِڒَاغَا سِيذِي أَربِّي أَذَامْ، إِنَّا أَسْ: ”مَانِي ثدْجِيذْ؟“¹⁰نتَّا إِنَّا: ”سْڒِيغْ إِ ثْمِيجَّا نّشْ ذِي جّنّثْ ؤُشَا ڭّْوذغْ مِينْزِي نشّْ ذ أَعَارْيَانْ، خنِّي فَّارغْ.“¹¹إِنَّا أَسْ نتَّا: ”وِي ذ أَشْ إِنَّانْ بلِّي شكْ ذ أَعَارْيَانْ؟ مَا ثشِّيذْ زِي ثْشجَّارْثْ نِّي خْ شكْ وصِّيغْ ’أَقَا أَذْ زَّايسْ ثشّذْ؟“¹²إِنَّا أَذَامْ: ”ثَامْغَارْثْ نِّي ذ أَيِي ثوْشِيذْ، نتَّاثْ ثوْشَا أَيِي زِي ثْشجَّارْثْ ؤُشَا شِّيغْ.“¹³إِنَّا أَسْ سِيذِي أَربِّي إِ ثمْغَارْثْ: ”مَانَاوْيَا إِ ثڭِّيذْ؟“ ثنَّا أَسْ ثمْغَارْثْ: ”إِغَارَّا أَيِي ؤُفِيغَارْ ؤُشَا شِّيغْ.“

¹⁴إِنَّا سِيذِي أَربِّي إِ ؤُفِيغَارْ: ”ڒَْامِي ثڭِّيذْ أَيَا، أَقَا أَشْ ذ أَمنْعُوڒْ جَارْ مَارَّا ڒبْهَايمْ ؤُ جَارْ مَارَّا ڒْمَاڒْ ن ڒخْڒَا. خْ ؤُعذِّيسْ نّشْ أَذْ ثْمُورْذذْ، ؤُشَا أَذْ ثشّذْ ؤُشَاڒْ مَارَّا ؤُسَّانْ ن ثُوذَارْثْ نّشْ.¹⁵أَذْ ڭّغْ ڒعْذَاوَاثْ جَارْ أَشْ ذ ثمْغَارْثْ، جَارْ زَّارِيعثْ نّشْ ذ زَّارِيعثْ نّسْ. ذ ثنِّي نّسْ أَذْ ثڒْبزْ أَزدْجِيفْ نّشْ، ؤُ شكْ أَذْ أَسْ ثْڒبْزذْ أَنِيرْزْ نّسْ.“

¹⁶إِنَّا إِ ثمْغَارْثْ: ”أَطَّاسْ إِ غَا أَرْنِيغْ ڒحْرِيقْ ذ ڒوْجعْ ن ثَارْوَا نّمْ. س ڒحْرِيقْ أَذْ د-ثَارْوذْ إِحنْجِيرنْ، ؤُشَا غَارْ ورْيَازْ نّمْ أَذْ ثمّژْرذْ، مَاشَا نتَّا أَذْ خَامْ إِحْكمْ.“

¹⁷ؤُشَا إِنَّا إِ أَذَامْ: ”مِينْزِي ثسْڒِيذْ غَارْ ثْمِيجَّا ن ثمْغَارْثْ نّشْ ؤُ ثشِّيذْ زِي ثْشجَّارْثْ ثنِّي خْ شكْ وصِّيغْ: ’أَقَا أَذْ زَّايسْ ثشّذْ!‘، أَذْ ثِيڒِي ثمُّورْثْ ذ نّعْڒثْ خْ سِّيبّثْ نّشْ. س ثَامَارَا أَذْ زَّايسْ ثشّذْ، مَارَّا ؤُسَّانْ ن ثُوذَارْثْ نّشْ.¹⁸إِسنَّاننْ ذ ثْزڭّْوَارْثْ إِ ذ أَشْ د غَا ثسّغْمِي، ؤُشَا أَذْ ثشّذْ أَفْسُو ن ييَّارْ.¹⁹س ثِيذِي ن ؤُغمْبُوبْ نّشْ أَذْ ثشّذْ أَغْرُومْ أَڒْ د غَا ثْذوْڒذْ غَارْ ثمُّورْثْ إِ زِي ثمّكْسِيذْ، مِينْزِي شكْ ذ أَشَاڒْ ؤُشَا غَارْ ؤُشَاڒْ إِ غَا د-ثْذوْڒذْ.“

²⁰إِڒَاغَا أَذَامْ إِسمْ ن ثمْغَارْثْ نّسْ حَاوَّا مِينْزِي نتَّاثْ ذ يمَّاسْ ن مَارَّا إِنِّي إِدَّارنْ.²¹إِڭَّا سِيذِي أَربِّي إِ أَذَامْ ذ ثمْغَارْثْ نّسْ أَرُّوضْ س يِيڒمْ ؤُشَا يَارْضْ أَسنْ ث.²²إِنَّا سِيذِي أَربِّي: ”خْزَارْ، أَذَامْ وَا، أَقَا إِذْوڒْ أَمْ يِيجّنْ زَّايْنغْ، إِسّنْ ڒْخَارْ ذ ڒْغَارْ. ڒخُّو، أجّْ إِ-ث وَارْ إِسّْوَاژَّاضْ أَفُوسْ نّسْ مَاحنْذْ أَذْ إِكْسِي زِي ثْشجَّارْثْ ن ثُوذَارْثْ عَاوذْ، أَذْ يشّْ ؤُ خنِّي أَذْ إِدَّارْ إِ ڒبْذَا.“²³ؤُشَا إِسُّوفُّوغْ إِ-ث سِيذِي أَربِّي زِي جّنّثْ ن عَاذْنْ حِيمَا أَذْ إِخْذمْ ثَامُّورْثْ إِ زِي ثُوغَا إِمّكْسِي.²⁴يُوژّڒْ خْ أَذَامْ ؤُشَا إِڭَّا إِكِيرُوبنْ شَّارْقْ إِ جّنّثْ ن عَاذْنْ ذ يِيجّْ ن سِّيفْ إِتّحْذُوذُوقْ، إِتّشْضِيضِيحْ سَّا ذ سَّا إِ ؤُعسِّي خْ وبْرِيذْ ن ثْشجَّارْثْ ن ثُوذَارْثْ.

أَمزْوَارُو 3 / rif_ati

دّنْبْ أَمزْوَارُو

أَمزْوَارُو3rif_ati